මව පැටවාගෙන් වෙන් නොකළ යුතු හෙයින් තවදුරටත් මව පැටවා සමඟ රඳවා ගන්නා ලෙස අභියාචනාධිකරණය නියෝගයක් ලබා දුන්නේ සැප්තැම්බර් මස 22 වැනිදාය. ඒ එම අධිකරණයට ඉදිරිපත් කළ පෙත්සමක් සලකා බැලීමෙන් පසුය. එම මව වූයේ සැප්තැම්බර් 06 වැනිදා කොළඹ අතිරේක මහේස්ත්‍රාත්වරයා ලබාදුන් නියෝගයක් අනුව සන්තකයේ තබාගෙන සිටි අයිතිකරුවන්ටම යළි නිදහස් කරන ලෙස නියෝග කළ අලි ඇතුන් 14 දෙනා අතර සිටි සුජීවා නැමැති ඇතින්නයි.
මෙම අලි ඇතුන්ගෙන් 13 දෙනෙකුම මීට වසර කිහිපයකට පෙර පැටවුන් සමයේ රජයේ භාරයට ගෙන පින්නවල හා උඩවලව ඇත් අතුරු සෙවණේ රඳවා තබන්නට සිදුවූයේ මව මරා හෝ මවගෙන් වෙන්කර එම අලි පැටවුන් නීති විරෝධී ලෙස කැලයෙන් අල්ලාගෙන පැමිණි බවට චෝදනා එල්ල වීමත් සමඟ අධිකරණය ලබාදුන් නියෝගයක් අනුවය. එම අලි පැටවුන්ට මවක සිටින බව ඔප්පු කිරීමට නොහැකි වීම මත ඔවුන්ගේ නීත්‍යානුකූලභාවය පිළිබඳ ප්‍රශ්නයක් පැන නගින්නට විය.
පියා කවුදැයි කිව නොහැකි දරුවකු මිස මව කවුදැයි කිව නොහැකි දරුවකු සිටිය නොහැකි තත්වය මේ අලි පැටවුන් සම්බන්ධයෙන්ද අදාළ විය. ඒ අනුව එම අලි පැටවුන් නීත්‍යනුකූල නොවන ආකාරයෙන් සන්තකයේ තබාගෙන සිටීම අධිකරණයට ඉදිරිපත් කළ යුතු කරුණක් වූ අතර අලි පැටවුන් නඩු භාණ්ඩ වශයෙන් රජයේ බාරයට පත්විය.
එම නඩු භාණ්ඩවලට අදාළ හෙවත් අලින්ට අදාළ නඩු තවම අවසන් නැත.එහෙත් අරුමය වූයේ එම නඩු භාණ්ඩ නිදහස් කරන ලෙසට සීඅයිඩීයෙන් අරුම පුදුම ඉල්ලීමක් ඉදිරිපත් වීමත් අතිරේක මහේස්ත්‍රාත්වරයා එම ඉල්ලීමට අවසර නියෝගයක් ලබාදීමත්ය.
එම ඉල්ලීම තුළ සඳහන් වන්නේ 2021 අගෝස්තු 19 දින වනජීවි රාජ්‍ය අමාත්‍යවරයා නිකුත් කර ඇති අති විශේෂ ගැසට් පත්‍රය අනුව හීලෑ අලි ඇතුන් මාස තුනක කාලයක් තුළ ලියාපදිංචි කිරීමට තීරණය කර ඇති බැවින් මෙම නඩුවලට සම්බන්ධ අලි ඇතුන් නිදහස් කරන ලෙසය. ඒ සම්බන්ධයෙන් නීතිපතිවරයාගේ උපදෙස්ද ලැබී ඇති බව එහි සඳහන්ය. හීලෑ අලි ඇතුන් ලියාපදිංචි කිරීමේ අලුත් ක්‍රමවේදයක් එම ගැසට් පත්‍රයෙන් ප්‍රකාශයට පත්කළද දැනට නඩුවලට සම්බන්ධ අලි ඇතුන් නිදහස් විය යුතු බවක් හෝ නඩුවලට සම්බන්ධ අලි ඇතුන් ලියාපදිංචි කළ යුතු බවක් එහි සඳහන් වන්නේ නැත.
නඩුවක් අවසන් වූ පසු නඩු භාණ්ඩ නිදහස් කිරීම, රාජසන්තක කිරීම අප මෙතෙක් අත්දැක තිබූ සංසිද්ධිය වූවත් පෙර සඳහන් කළ ලෙසම මෙය අරුමයක් වූයේ මේ නඩු භාණ්ඩ වූ කලී නීත්‍යනුකූල තත්වයක් යටතේ තිබුණ ඒවා නොවීමය. සරල උදාහරණයකට කිවහොත් විශේෂ බලපත්‍ර මත ආයුර්වේද ඖෂධ සඳහා අවසර ඇති, සමාජය තුළ නීත්‍යනුකූල නැති කංසා තොගයක් එවැනි අවසරයක් නොමැති පුද්ගලයකු සතුව තිබියදී අල්ලාගෙන නඩුවක් පවතිද්දී එම කංසා තොගය නීත්‍යනුකූල අවසරයක් නොමැතිව තබාගෙන සිටි පුද්ගලයාටම නඩුව අවසන් වීමට ප්‍රථම නැවත බාරදීමක් වැනිය.
මෙම නඩුවලට අයත් අලි පැටවුන් සන්තකයේ තබාගෙන සිටි පුද්ගලයෝ එසේ මෙසේ අය නොවූහ. ඔවුන් සමහරෙක් ව්‍යාපාරිකයෝය, සමහරු රටම දන්නා හාමුදුරුවරුය. සමහරු යම් බලවත් සම්බන්ධතා ඇති පුද්ගලයෝ වූහ.
අධිකරණයෙන් නිදහස් කරන ලෙස නියෝග කළ එම අලි ඇතුන්ගේ හිමිකරුවන් හා ඔවුන්ගේ ලිපිනයන් වූයේ, 1. ඩිෂාන් වික්‍රමරත්න ගුණසේකර, පොල්කන්න, මාලිම්බඩ, පාලටුව, මාතර (කතරගම දේවාලය) 2. වරුණ ලංකා විජේසිංහ කන්නන්ගර, කහටපිටිය, හොරණ, 3. සුනෙත් චතුරංග වීරසිංහ, මොන්රෝවියා වත්ත, සී කොටස, කොළඹ පාර අලව්ව, 4. එස්එන් රොෂාන්, අංක 363/3 ගැමුණු මාවත, පැලවත්ත පාර පන්නිපිටිය, 5. ඩබ්පීඑච් දීප්ති කුමාර, 199/2 බියගම, 6. අයිබී කමල් කිත්සිරි, අංක 685 අතුරුගිරිය පාර කොට්ටාව, 7. ඩබ්එම්බී සමන්ත උදය විජේමාන්න, ඒ/1 72 ගඟබඩ වත්ත මැදගොඩ අමිතිරිගල, 8. බුද්ධික දේශප්‍රිය මීටිහැල්ල, පල්ලේවත්ත මාවෙල හිඟුල, 8. දරණාගම කුසලධම්ම හිමි, විහාරාධිපති, ශ්‍රී සම්බෝධි විහාරය කොළඹ 07 (අපවත් වී ඇත. වත්මන් විහාරාධිපති හිමිකම් පා ඇත.) 9. අජිත් සිරි කුමාර ගාල්ලගේ, රාමනායක මාවත, හෝකන්දර දකුණ හෝකන්දර, 10. හසන්ති චම්පිකා සමරසේකර කරුණාරත්න, ඕපාත වලව්ව, ඕපාත ගනේගොඩ, 11. භාරත දේශප්‍රිය අමරතුංග, අංක 563, පරණ පාර මීගොඩය.
ඉහත සඳහන් කළ ඇතින්න අධිකරණ නියෝගය අනුව ක්ෂණිකව නිදහස් නොවුණේ ඒ වනවිටත් ඇය පැටවකු බිහිකර තිබූ නිසාය. පාරිසරික හා සංස්කෘතික අධ්‍යයන මධ්‍යස්ථානය හා සතුන්ට යුක්තිය වෙනුවෙන් වූ සංවිධාන මහේස්ත්‍රාත් අධිකරණයේ තීරණය අභියෝගයට ලක්කළේ එම කාල අවසරයෙන්ය. මෙසේ අලි පැටවුන් නිදහස් කරන්නැයි අධිකරණය ලබාදුන් නියෝගයට අදාළ එම අලි සන්තකයේ තබාගෙන සිටි සමහරුන් දැන් මිය ගොස්ය. මෙම අලි නීත්‍යනුකූල නම් ඔවුන්ගේ උරුමය ඇති ඊළඟ පුද්ගලයාට එම අයිතිය ලබාදීමේ වරදක් නැත. එහෙත් එයද අධිකරණයට කරුණු ඉදිරිපත් කර ඔප්පු කිරීමෙන් පසු ලබාගත යුක්තක්ය. මෙහිදී එයද සිදුවුණේ නැත. මියගිය අය වෙනුවෙන් ඊළඟ අයිතිය තීන්දු කර තිබුණේ සීඅයිඩීය විසින්ය. සීඅයිඩීය එම අයිතිය සඳහන් කර තිබුණේ අතිරේක මහේස්ත්‍රාත්වරයාට එම අලි පැටවුන් නිදහස් කිරීමට ඉල්ලීම්කළ ලිපියේය. මෙම නීත්‍යනුකූල නොවන සීඅයිඩීයේ ඉල්ලීම තවදුරටත් ප්‍රශ්න සහගත වන්නේ නීතිපතිවරයාගේද උපදෙස් සහිතව එම ඉල්ලීම ඉදිරිපත් කරන බව සඳහන්ව තිබීම හේතුවෙන්ය. නීතිපතිවරයා සීඅයිඩීයේ ඉල්ලීමට අනුමැතියක් ලබාදී තිබුණේ නම් එය නඩු භාණ්ඩ සම්බන්ධ තත්වයන් අනුව මෙන්ම ඊළඟ අයිතිය පිළිබඳ තත්වය සම්බන්ධයෙන්ද බරපතළ තත්වයකි.
මෙහි ඇති අනෙක් කාරණය වන්නේ මෙසේ පින්නවල හා උඩවලව ඇත්තුරු සෙවණවල සිටි එම අලි ඇතුන් රැගෙන ගියේ ඔවුන්ගේ අයිතිය ඇතැයි සඳහන් කළ පුද්ගලයන්මද යන්නය.
අධිකරණ නියෝගයක් ඇති යමක් මුදා හැරිය හැක්කේ ඒ සඳහා අයිතිය ඇති බවට සඳහන් කළ පුද්ගලයාට පමණි. එසේ නැත්නම් අයිතිය ඇති පුද්ගලයා ඒ සඳහා යම් පුද්ගලයකුට නීත්‍යනුකූල ආකාරයට බලය පැවරුවොත් පමණය. පින්නවලදී හා උඩවලවේදී එය එසේ සිදුවී තිබුණේ නැත. එම අලි පැටවුන්ව ඒවාහි අයිතිකරුවන් යැයි කියන පිරිස රැගෙන ගොස් තිබුණේ නිසි ලෙස අයිතිය ඔප්පු කිරීමකින් තොරව බලහත්කාරයෙනි. ඒ සඳහා අලි වැට හා අගල් රාජ්‍ය අමාත්‍යාංශයේ ලේකම් විශ්‍රාමික මේජර් ජෙනරාල් පාලිත ප්‍රනාන්දු නොමඳ සහායක් ලබාදුන් බවද වාර්තා විය. එම අලි බාරව සිටි ජාතික සත්වෝද්‍යාන දෙපාර්තමේන්තුවේ අධ්‍යක්ෂ ජෙනරාල් ඉෂිනි වික්‍රමසිංහට ඉල්ලා අස්වීමට හේතුවූ බලපෑමද එම නොමඳ සහාය බව තවදුරටත් වාර්ත විය.
විශ්‍රාමික මේජර් ජෙනරාල් පාලිත ප්‍රනාන්දු යනු ජනාධිපති ගෝඨාභය රාජපක්ෂගේ යුද හමුදා මිතුරාය. දෙදෙනා එකම පුහුණු පාඨමාලාවක් හැදෑරූ අයය. පාලිත ප්‍රනාන්දු මහින්ද රාජපක්ෂ පාලන සමයේ ආරක්ෂක අමාත්‍යාංශ ලේකම් වශයෙන් ගෝඨාභය රාජපක්ෂ ඇවන්ගාඩ් සමාගම සමඟ පාවෙන අවි ගබඩා ගනුදෙනුව කළ රජයේ රක්නා ආරක්ෂක ලංකා නම් වූ ආරක්ෂක සමාගමේ ප්‍රධානියකු ලෙස පත්කරන්නේ එම යහළුකමේ ප්‍රතිඵලයක් වශයෙනි.
ඉහත කී අලි ඇතුන් නිදහස් කිරීමේදී නඩු භාණ්ඩ වශයෙන් නොසිටින අලියෙකුද නිදහස් කරන ලෙස සීඅයිඩීය අතිරේක මහේස්ත්‍රාත්වරයාට දන්වා තිබුණි. ඒ අංක 26 ඒ නුගේගොඩ පැඟිරිවත්ත මාවතේ එන් ජී රාජපක්ෂට අයත් ඔහුට සන්නසකින් ලැබී රජයේ බාරයට පත්කළ අලියා නිදහස් කරන ලෙසය. ඒ ගැන එම සීඅයිඩී ඉල්ලීමේ විස්තර දක්වා තිබුණේ එන් ජී රාජපක්ෂ සන්තකයේ සිටි හිටපු ජනාධිපති මහින්ද රාජපක්ෂ සන්නසකින් ලබාදුන් අලියා නැවත ඔහුට ලබාදෙන ලෙස එකී එන් ජී රාජපක්ෂ ඉල්ලීමක් කර ඇති බවය.
මෙකී එන් ජී රාජපක්ෂ යනු වෙන කවුරුවත් නොව නන්දසේන ගෝඨාභය රාජපක්ෂ හෙවත් වත්මන් ජනාධිපති ගෝඨාභය රාජපක්ෂ බව මෙම සිදුවීම සිදුවූ අවස්ථාවේ ලියුම්කරු අනිද්දා වෙබ් අඩවියේ පලකළ වාර්තාවක් මගින් හෙළිදරව් කරනු ලැබීය. මේ වූ කලි ජනාධිපති ගෝඨාභය රාජපක්ෂගේ ලැජ්ජා නැති කටයුත්තතකි. ඔහු රජයට බාරදුන් අලියකු ඔහුට නැවත අවශ්‍ය නම් ඒ සඳහා ඉල්ලීම් කළ යුත්තේ සීඅයිඩීයට නොවේ. එම අලි බාරව සිටින රාජ්‍ය ආයතනයටය. එය අධිකරණයේ පවතින නඩුවලට අදාළ කාරණයක් නොවේ.
ඇත්ත වශයෙන්ම වත්මන් ජනාධිපති ගෝඨාභය රාජපක්ෂ එම අලි දෙදෙනා නඩත්තු කිරීමට නොහැකි බව සඳහන් කරමින් රජයට බාරදෙනු ලැබුයේ පුද්ගලයන් සන්තකයේ තබාගෙන සිටින නීත්‍යනුකූල නොවන අලි සම්බන්ධයෙන් පරීක්ෂණ පවත්වමින් එම අලි අත්අඩංගුවට ගැනීම් සිදුකරමින් පැවති වකවානුවේදීය. ඔහු බාරදුන් අලි පැටවුන් දෙදෙනාගෙන් එක් අයකුට සිය සහෝදර ජනාධිපති මහින්ද රාජපක්ෂ ලබාදුන් සන්නසක් ඉදිරිපත් කරනු ලැබීය. අනෙක් අලි පැටවා සම්බන්ධයෙන් කිසිදු නීත්‍යනුකූල ලියවිල්ලක් තිබුණේ නැත.
ලැබුණා යැයි කියන සන්නසද ගැටලුකාරීය. මන්ද සන්නසකින් අලි පැටවුන් ලබාදීම හොර රහසේ සිදුකරන්නක් නොවන නිසාය. ඔහු අලි බාරදෙන තෙක්ම සන්නසකින් ඔහුට අලියෙකු ලැබුණ බව රටේ පොදු මහජනයා පමණක් නොව අලින්ගේ නීත්‍යනුකූලභාවය ගැන කටයුතු කරන වනජීවී දෙපාර්තමේන්තුවද දැන සිටියේ නැත. එසේම ජනාධිපතිවරයකු සන්නසකින් බාරදෙනු ලබන්නේ නීත්‍යනුකූලව රජයේ බාරයේ සිටින අලි වුවත් මේ අලියා එවැන්නෙක් නොවීය. සන්නසකින් අලියකු ලබාදීම සඳහා ගෝඨාභය රාජපක්ෂට තිබූ සුදුසුකම කුමක්ද යන්නද ප්‍රශ්න කිරීමට ලක්විය යුක්තක්ය. මන්ද සන්නසකින් අලි ලබාදෙන්නේ විදේශ රාජ්‍ය නායකයකුට, විදේශ රාජ්‍යයකට, විශේෂිත ප්‍රභූ පුද්ගලයකුට හෝ ආගමික ස්ථානයක් වැනි දේකට පමණක් නිසාය.
ඒ කෙසේ වෙතත් පෙර සඳහන් කළාක් මෙන්ම ගෝඨාභය රාජපක්ෂ ඔහුගේ අලියා ගැනීමට පින්නවලට ගොස් තිබුණේ නැත. එම අලියා රැගෙන ගොස් තිබුණේ වෙන අයකුය. එම පුද්ගලයාට අලියා බාරදෙන ලෙසට ජනාධිපති ගෝඨාභය රාජපක්ෂ දිව්රුම් ප්‍රකාශයක්වත් ලබාදී තිබී නැත. ජාතික සත්වෝද්‍යාන බාරයෙන් එම අලියා රැගෙන ගොස් තිබුණේ බලහත්කාරයෙන්ය. එසේ රැගෙන ගොස් තිබුණේද අධිකරණයට සීඅයිඩීය දැන්වූ අලියා නොව අනෙක් අලියාය. එසේ රැගෙන ගිය අලියා දැන් ඉන්නේ කොහිද? එදා නඩත්තු කිරීමට නොහැකි වූ අලියා දැන් නඩත්තු කිරීමට ජනාධිපති ගෝඨාභය රාජපක්ෂට දැන් මුදල් ලැබී ඇත්තේ කෙසේද? සන්නසකින් ලැබුණේ යැයි කියන අලියා එසේ ලැබීමට පෙර සිටියේ කොහිද? එම අලියාගේ මව කවුද? දැනට රජයේ බාරයේ සිටින අනෙක් අලියා ජනාධිපතිවරයාට ලැබුණේ කෙසේද? එම අලියාගේ මව කවුද? මේ ප්‍රශ්නවලට පිළිතුරු ලැබෙන විට ජනාධිපති ගෝඨාභය රාජපක්ෂගේ හා නීත්‍යනුකූල නොවන ආකාරයට වනයෙන් අලි පැටවුන් අල්ලාගෙන විත් සිදුකරන අලි පැටවුන් විකිණීමේ ජාවාරම අතර ඇති සම්බන්ධය අපට වටහා ගත හැක.■
