■ ඉඳුවර බණ්ඩාර
අමාත්‍ය බන්දුල ගුණවර්ධනට අපහාස කිරීමේ චෝදනාව මත සිදුකරන පරීක්ෂණයක් වෙනුවෙන් මාධ්‍යවේදීන්ව කැඳවීමට අපරාධ පරීක්ෂණ දෙපාර්තමේන්තුවට නෛතික බලයක් නැතැයි මාධ්‍ය සංවිධාන එකතුව නිවේදනයක් නිකුත් කරමින් සඳහන් කරයි.
සාපරාධී අපහාසය සම්බන්ධයෙන් වූ නීතිමය ප්‍රතිපාදන 2002 වර්ෂයේදී අහෝසි කළ බවත් ඒ අනුව ඒ සම්බන්ධයෙන් කටයුතු කිරීමේ බලයක් පොලීසියට නැති බවත් මෙසේ මාධ්‍යවේදීන් කැඳවීම දේශපාලන වුවමනාවක් අනුව සිදුකර ඇති බවත් මාධ්‍ය සංවිධාන එම නිවේදනයේ අවධාරණය කරයි.
ලංකාදීප, දිවයින හා දි අයිලන්ඩ් යන පුවත්පත්වල කතුවරුන්ට හා මාධ්‍යවේදීන්ට අපරාධ පරීක්ෂණ දෙපාර්තමේන්තුවට ප්‍රකාශ ලබාදෙන ලෙස කරන ලද දැනුම් දීම හෙළා දකිමින් මාධ්‍ය සංවිධාන එකතුව මෙම නිවේදනය නිකුත් කර ඇත.
මේ අතර ශ්‍රී ලංකා කර්තෘ සංසදය ඒ සම්බන්ධයෙන් නිවේදනයක් නිකුත් කරමින් සඳහන්
කරන්නේ කර්තෘවරුන් හා මාධ්‍යවේදීන් අපරාධ පරීක්ෂණ දෙපාර්තමේන්තුවට කැඳවීමේ තීරණය පිළිකුලෙන් යුතුව හෙළා දකින බවයි. ඒ සම්බන්ධයෙන් ලංකාදීප කාර්යාලයට ගොස් එහි කර්තෘවරයාගෙන් හා මාධ්‍යවේදීන්ගෙන් ප්‍රකාශ සටහන් කර ගන්නට උත්සහ කිරීම කුමන නීතිමය ප්‍රතිපාදන මත සිදුකළ එකක්ද යන්න ප්‍රශ්නාර්ථයක් බවද එහි සඳහන් කර තිබේ. එහි සම්පූර්ණ ප්‍රකාශය 7 වැනි පිටුවේ පළවේ.
මාධ්‍ය සංවිධාන නිවේදනය සඳහා ශ්‍රී ලංකා වෘත්තීය ජනමාධ්‍යවේදීන්ගේ සංගමය, නිදහස් මාධ්‍ය ව්‍යාපාරය, මාධ්‍ය සේවක වෘත්තීය සමිති සම්මේලනය, දෙමළ මාධ්‍ය සන්ධානය, මුස්ලිම් මාධ්‍ය සංසදය, තරුණ ජනමාධ්‍යවේදීන්ගේ සංගමය අත්සන් තබා ඇත.■
