■ අමන්දිකා කුරේ
ජීඑස්පී ප්ලස් බදු සහනය තවදුරටත් ලබා දෙන්නේදැයි සොයා බැලීමට ලංකාවට පැමිණි යුරෝපා සංගමයේ දූත පිරිස සමග පැවති සාකච්ඡාවලදී දේශපාලන පක්ෂ හා වෘත්තීය සමිති විසින් හදිසි නීතිය පැනවීම හා අවභාවිත කිරීම, ත්‍රස්තවාදය වැළක්වීමේ පනත යොදාගෙන සිදුකරන සිරගත කිරීම් හා පළාත් සභා, පළාත් පාලන මැතිවරණ නොපැවැත්වීම සම්බන්ධයෙන් කරුණු ඉදිරිපත් කර තිබේ.
සැප්තැම්බර් 28 ශ්‍රී ලංකා මුස්ලිම් කොන්ග්‍රස් කාර්යාලයේ පැවති සාකච්ඡාවේදී යුරෝපා සංගම් නියෝජිතයන්ට ඉදිරිපත් කළ කරුණු සම්බන්ධයෙන් එම පක්ෂයේ නායක රවුෆ් හකීම් මහතාගෙන් අනිද්දා කළ විමසීමේදී ඔහු මෙසේ පැවසීය.
”ආණ්ඩුව හදිසි නීතිය පනවපු කාරණය අහෝසි වෙලා තිබෙද්දිත් තවමත් හදිසි නීතිය පවත්වගෙන යනවා. ත්‍රස්තවාදය වැළැක්වීමේ පනත යටතේ අත් අඩංගුවට ගත් නීතිඥ හිජාස් හිස්බුල්ලා ට ඇප ලබා දීම දිගින් දිගටම ප්‍රතික්ෂේප කරමින් අවුරුදු එකහාමාරක් තිස්සේ රිමාන්ඩ් භාරයේ තියාගෙන ඉන්නවා. ඒ වගේම බලතල බෙදීමෙන් මහජනතාවගේ ප්‍රජාතන්ත්‍රවාදය තහවුරු කරන පළාත් සභා, සීමා නිර්ණය යොදාගෙන ආණ්ඩුව දිගින් දිගටම කල් දානවා. මේ කරුණු වගේම පාස්කු ඉරිදා ප්‍රහාරය විවිධ දේශපාලන කටයුතුවලට ආණ්ඩුව පාවිච්චි කිරීම සම්බන්ධයෙන් අපි යුරෝපා සංගමයේ නියෝජිතයන්ට කරුණු දැක්වූවා. මේ සම්බන්ධයෙන් ඔවුන් ආණ්ඩුවට බලපෑමක් කරයි කියලා අපි බලාපොරොත්තු වෙනවා”
මීට අමතරව එදින ම දෙමළ ජාතික සංධානය සමග සාකච්ඡාවක් ද යුරෝපා සංගම් නියෝජිතයන් පවත්වා ඇත.
නිදහස් වෙළඳ කලාප හා පොදු සේවා සේවක සංගමය, ලංකා ගුරු සංගමය ඇතුළු වෘත්තීය සමිති අටක් සමග සාකච්ඡාවක් ද එම නියෝජිතයින් සැප්තැම්බර් 30 යුරෝපා සංගම් කාර්යාලයේදී පවත්වා ඇති අතර එහිදී ද හදිසි නීතිය හා මර්දනය සම්බන්ධයෙන් ද විශේෂයෙන් ම ඇඟලුම් ක්ෂේත්‍රයේ පවතින ගැටලු සම්බන්ධයෙන් ද කරුණු ඉදිරිපත් කර තිබේ.
යුරෝපා සංගම් දූත පිරිස හා විදේශ කටයුතු ඇමති මහාචාර්ය ජී.එල්. පීරිස් අතර සාකච්ඡාවක් ඔක්තෝබර් පළමුවෙනි දින පැවැත්වීමට නියමිතය.■
