■ ඉඳුවර බණ්ඩාර
පසුගිය අයවැය මගින් 2021 වර්ෂය සඳහා අනුමත කරන ලද ණය ගැනීමේ සීමාව තවත් රුපියල් බිලියන 400කින් වැඩි කිරීම සඳහා මුදල් අමාත්‍ය බැසිල් රාජපක්ෂ ඉදිරිපත් කරන ලද යෝජනාව සැප්තැම්බර් 21 වැනිදා පැවති කැබිනට් මණ්ඩලය අනුමත කර ඇත.
පසුගිය අයවැය මගින් 2021 වර්ෂය සඳහා රුපියල් බිලියන 2997ක ණය මුදලක් ලබා ගැනීම සඳහා අනුමැතිය ලබාදී තිබූ අතර මෙම අනුමැතියත් සමග එම ණය ගැනීමේ සීමාව රුපියල් බිලියන 3397 දක්වා වැඩිවේ.
මෙසේ ණය සීමාව ඉහළ දැමීමට හේතුව වශයෙන් මුදල් ඇමතිවරයා කැබිනට් මණ්ඩලයට දැනුම් දී ඇත්තේ කොවිඩ් 19 වසංගත තත්වය හේතුවෙන් රජයේ ආදායම් පහළ යෑම, සෞඛ්‍ය ක්ෂේත්‍රයේ වියදම් ඉහළ යෑම, ආදායම් අහිමි වූවන්ගේ සමාජ ආරක්ෂණය සුරක්ෂණය කිරීම, සිය ආදායමෙන් වැටුප් ගෙවන ලද ආයතනවල ආදායම් අහිමි වීම හේතුවෙන් වැටුප් හා අනිකුත් වියදම් සඳහා අතිරේක ප්‍රතිපාදන ලබාදීමට සිදුවීම හා වෙනත් ක්ෂේත්‍ර කිහිපයක වියදම් වැඩිවීම යන කරුණුය.■
