■ ඉඳුවර බණ්ඩාර
පළාත් සභා මැතිවරණය ඉක්මණින් පැවැත්වීම සඳහා ගතයුතු ඉදිරි පියවර සම්බන්ධයෙන් නීතිපති දෙපාර්තමේන්තුවේ මතය මැතිවරණ සහ ඡන්ද විමසීම් ව්‍යුහයේ හා නීති රීතිවල ප්‍රතිසංස්කරණ හඳුනා ගැනීමටත්, ඒ සම්බන්ධයෙන් වන අවශ්‍ය සංශෝධන ඉදිරිපත් කිරීමටත් පත්කර ඇති පාර්ලිමේන්තු විශේෂ කාරක සභාවට දැනුම් දෙන ලෙස ඉල්ලීමක් කර ඇත.
එම විශේෂ කාරක සභාවේ සභාපති අමාත්‍ය දිනේෂ් ගුණවර්ධන මේ ඉල්ලීම කර ඇත්තේ එම කාරක සභාව සැප්තැම්බර් 21 වැනිදා රැස්වූ අවස්ථාවේදී එයට සහභාගි වූ නීතිපති දෙපාර්තමේන්තුවේ නිලධාරීන්ගෙන් බව පාර්ලිමේන්තුවේ සන්නිවේදන අංශය නිවේදනයක් නිකුත් කරමින් සඳහන් කරයි.
එම කාරක සභා අවස්ථාවට එහි සාමාජිකයින් වන නිමල් සිරිපාලද සිල්වා, ජීවන් තොන්ඩමාන්, අනුර කුමාර දිසානායක, රංජිත් මද්දුම බණ්ඩාර, කබීර් හෂීම්, මධුර විතානගේ හා සාගර කාරියවසම් යන මැති ඇමතිවරුන් සහභාගි වී ඇත.■
