■ ප්‍රියාශා හෙට්ටිහේවා
”මට කියන්න තියෙනවා එතුමාලා කරගෙන යන ගොඩක් දේවල්. මම මේ පක්ෂේ ඇතුළෙ නිසා ගොඩක් දේවල් කියන්නේ නෑ එළියේ. තව තවත් ඒගොල්ලෝ කියන්න ගියොත් අපිටත් කියන්නවෙයි රෙදි ගැලවෙන විදියට. මගේ ලියුමකින් කොහෙවත් කියල නෑ මෙයා අනිවාර්යෙන් පත් කරන්න කියලා,” යැයි පාදුක්ක පොලිස් ස්ථානාධිපතිවරයා පත් කිරීම පිළිබඳ සරත් වීරසේකර අමාත්‍යවරයා කළ ප්‍රකාශය සම්බන්ධයෙන් ‘අනිද්දා’ විමසූ විට ශ්‍රී ලංකා පොදුජන පෙරමුණේ කොළඹ දිස්ත්‍රික් පාර්ලිමේන්තු මන්ත්‍රී ජගත් කුමාර පැවසීය.
ජගත් කුමාර මන්ත්‍රීවරයාගේ හිතවතෙකු පාදුක්ක පොලිස් ස්ථානාධිපති ධූරයට පත් කරන ලෙස මන්ත්‍රීවරයා ලිඛිත සහ වාචික ඉල්ලීම් කර ඇති බව සරත් වීරසේකර අමාත්‍යවරයා ප්‍රකාශයක් කළ අතර මන්ත්‍රීවරයා ‘අනිද්දා‘ට පැවසුවේ, තමන්ගේ හිතවතෙකු පත් කරන ලෙස කිසිවිටෙක ඉල්ලීමක් නොකළ බවය.
පාදුක්ක හිටපු පොලිස් ස්ථානාධිපතිවරයා මාරු කිරීමෙන් පසු එයට හේතු විමසූ විට විනය හේතුවක් මත අදාළ නිලධාරියා ඉවත් කළ බව අමාත්‍යවරයා තමාට පැවසූ බවත් විනය හේතුවක් නොමැති බව අදාළ ස්ථානාධිපතිවරයා පවසන බවත් මන්ත්‍රීවරයා පැවසීය.
කෙසේ නමුත් ගාමිණී ලොකුගේ අමාත්‍යවරයා සහ එම කොට්ඨාසයේ ආසන සංවිධායක කැඳවුම්කරු රවින්ද්‍ර ජයසිංහ විසින් නම් කර එවූ පොලිස් නිලධාරියෙකු නව ස්ථානාධිපතිවරයා ලෙස පත් කරන බව අමාත්‍ය වීරසේකර පැවසූ බවත් වෙන පත් කිරීමට කෙනෙකු එම අවස්ථාවේ නොමැති යැයි පැවසූ බවත් මන්ත්‍රීවරයා ප්‍රකාශ කළේය.
එම අවස්ථාවේ ස්ථානාධිපති තනතුරට තවත් සුදුස්සෙක් ඇති බවත් ඔහුගේ සුදුසුකම් බලා ඔහුව පත් කිරීමට තමා වීරසේකර අමාත්‍යවරයාට යෝජනා කළ බවත් මන්ත්‍රීවරයා පැවසීය.
පොලිස්පතිවරයාට වීරසේකර අමාත්‍යවරයා එක් නමක් පමණක් යෝජනා කර යවා ඇති නිසා ඔහුට රාජ්‍ය සේවා කොමිෂන් සභාවේ අනුමැතිය ලැබුණු බව මන්ත්‍රීවරයා පැවසීය. නම් කිහිපයක් යෝජනා කර තෝරාගැනීමක් කිරීමට අවස්ථාව සලසා නොමැති බවත් දේශපාලන හිතවතෙකුගේ නම පමණක් යවා ඇති බවත් මන්ත්‍රීවරයා ප්‍රකාශ කළේය.
තමා අමාත්‍යවරයාට යොමු කළ ලිපිය ඉල්ලීමක් සඳහා පමණක් යොමු කළ බවත් බලකිරීමක් නොකළ බවත් පැවසූ මන්ත්‍රීවරයා දේශපාලන හිතවතෙකු පත් කිරීම වෙනුවට තමා යෝජනා කළ පුද්ගලයාගේ සුදුසුකම් බලා ඔහුව පත් කරන ලෙස ඉල්ලීමක් පමණක් කළ බව ප්‍රකාශ කළේය.
තව ද තමාට එරෙහිව විනය පරීක්ෂණයක් පවත්වන ලෙස වීරසේකර අමාත්‍යවරයා පක්ෂයෙන් ඉල්ලීමක් කළ බව පැවසුව ද පක්ෂ නායක අග්‍රාමාත්‍ය මහින්ද රාජපක්ෂ සහ බැසිල් රාජපක්ෂ අමාත්‍යවරයාගෙන් විමසූ විට විනය පරීක්ෂණයක් තමාට එරෙහිව පවත්වන්නැයි ඔවුන් පක්ෂයට දැනුම් දී නොමැති බව ප්‍රකාශ කළේ යැයිද මන්ත්‍රීවරයා වැඩිදුරටත් පැවසීය.■
