■ ප්‍රියාශා හෙට්ටිහේවා
පාස්කු ප්‍රහාරයේ සත්‍ය යටපත් කිරීමට රජය කටයුතු කරමින් සිටින බැවින් සාධාරණය ඉල්ලා ජිනීවා මානව හිමිකම් කවුන්සිලයට කරුණු ඉදිරිපත් කරන බව කතෝලික සභාවේ තොළඹ අගරදගුරු මැල්කම් කාදිනල් රංජිත් හිමිපාණෝ පවසති.
කාදිනල් හිමි මේ බව ප්‍රකාශ කළේ, බොරැල්ල අගරදගුරු මැදුරේ අද (සැප්තැම්බර් 8) පැවති මාධ්‍ය හමුවකදීය.
එම මාධ්‍ය හමුවේදී ඩේලි මිරර් පුවත්පත උපුටා දක්වමින් කාදිනල් හිමි පැවසුවේ, පාස්කු ප්‍රහාරයේ වින්දිතයන්ට දුන් සහන පිළිබඳව සහ වැරදිකරුවන්ට දඬුවම්දීමේ වැඩපිළිවෙළ සම්බන්ධයෙන් අග්‍රාමාත්‍යවරයා සහ විදේශ අමාත්‍යවරයා ඉතාලියට ගොස් බොලොඤ්ඤා නගරයේ සමුළුවකදී ප්‍රකාශ කිරීමට සහ වතිකානුවට ගොස් පාප් වහන්සේ ද දැනුවත් කිරීමට නියමිත බවය.
විශේෂයෙන් ම රජය ජාත්‍යන්තරයට යන බැවින් උන්වහන්සේ ඇතුළු පිරිසට ද ජාත්‍යන්තරයට යාම හැර වෙනත් විකල්පයක් නොමැති බව කාදිනල් හිමියෝ පැවසූහ.
ඉතාලියට ගොස් අග්‍රාමාත්‍යවරයා සහ විදේශ අමාත්‍යවරයා ඇතුළු පිරිස සිදු කරන්නට යන්නේ පාස්කු ප්‍රහාරයේ සත්‍ය යටගැසීමේ ක්‍රියාවලියක් බවත් පාප් වහන්සේ සහ විදේශිකයන් නොමග යැවීමේ ක්‍රියාවක් බවත් කාදිනල් හිමියෝ පවසති.
කාදිනල් හිමි චෝදනා කළේ, පාස්කු ප්‍රහාරයේ සත්‍ය යටගැසීම වෙනුවෙන් මෙම රජය පෙනී සිටින බවටය.
මින් පෙර, වතිකානුවේ යුක්තිය සහ සාමය පිළිබඳ නියෝජනයට මේ සම්බන්ධව කරුණු ඉදිරිපත් කර තිබූ අතර ජිනීවාහි සිටින ඔවුන්ගේ නියෝජිතයන් මාර්ගයෙන් ජිනීවා මානව හිමිකම් කවුන්සිලය වෙත පාස්කු ප්‍රහාරයේ සත්‍ය යටගැසීම සම්බන්ධව කරුණු ඉදිරිපත් කිරීමට හැකියාව ලැබෙන බව කාදිනල් හිමියෝ පැවසූහ.
ජනාධිපතිවරයාට ජුලි 12 වන දා ලිපියක් යොමු කරමින් පාස්කු ප්‍රහාරය සම්බන්ධයෙන් අපක්ෂපාති පරීක්ෂණයක් ඉල්ලා සිටි නමුත් එයට ලැබුණේ ප්‍රශ්නය මග හැර යන පිළිතුරක් බව කාදිනල් හිමි පැවසීය.
ප්‍රශ්නය මග හැර ගොස් ජාත්‍යන්තරය රැවටීමට ඉඩ දිය නොහැකි බව කාදිනල් හිමි වැඩිදුරටත් ප්‍රකාශ කළේය.■
