ජනාධිපතිවරයාගේ සෞභාග්‍යයේ දැක්ම ප්‍රතිපත්ති ප්‍රකාශය අනුව ජනමාධ්‍ය අමාත්‍යාංශය ජනමාධ්‍යවේදීන් සඳහා නොමිලේ ලබාදෙන බව ප්‍රකාශයට පත්කර ‘ඇසි දිසි’ නම්වූ රක්ෂණාවරණය සඳහා ජනමාධ්‍යවේදියා භාවිතා කරන සමාජ මාධ්‍ය ජාලා පිළිබඳ තොරතුරු හා ඒවාට සම්බන්ධ වන දුරකතන අංක ඉල්ලා තිබේ.
එම රක්ෂණාවරණයට සම්පූර්ණ කළ යුතු අයදුම්පතේ මෙම විස්තර ඉල්ලා ඇති අතර එය ජනමාධ්‍ය අමාත්‍යාංශයේ වෙබ් අඩවියේ පලකර තිබේ.
වට්ස්ඇප්, වයිබර් හා ෆේස් බුක් යන සමාජ මාධ්‍ය ජාලා සඳහන් කරමින් හා වෙනත් සමාජ මාධ්‍ය ජාලයක් සඳහන් කිරීම සඳහා හිස් තැනක් තබමින් එහි ඉල්ලා ඇත්තේ ජනමාධ්‍යවේදියා භාවිතා කරන සමාජ මාධ්‍ය ජාලා සලකුණු කරන ලෙසය. එමෙන්ම එම සමාජ මාධ්‍ය ජාලාවලට සම්බන්ධ වන දුරකතන අංක සඳහන් කරන ලෙසය.
මීට අමතරව ජනමාධ්‍යවේදීන්ගේ බැංකු ගිණුම් පිළිබඳ තොරතුරුද ඉල්ලා ඇත.
ජනමාධ්‍ය අමාත්‍යාංශය ඉල්ලා ඇති මෙම තොරතුරු ගැන විමසීමේදී ශ්‍රී ලංකා රක්ෂණ සංස්ථාවේ ඉහළ නිලධාරියකු නිර්නාමිකව සිටීමට කැමති වෙමින් පැවසුවේ රක්ෂණ හිමියාගේ සමාජ මාධ්‍ය තොරතුරු රක්ෂණ කටයුත්තකට අවශ්‍ය වන්නේ කෙසේදැයි ප්‍රශ්නයක් පැන නගින බවය. එමෙන්ම බැංකු ගිණුම් විස්තරද අවශ්‍ය වන්නේ මුල් අවස්ථාවේ නොව යම් ප්‍රතිලාභයක් ගෙවීමට සිදුවන අවස්ථාවේදී බවය. එම නිසා සිය සංස්ථාව බැංකු ගිණුම් විස්තර පවා මුල් අවස්ථාවේ නොඉල්ලන බව ඔහු පැවසීය.
මෙම ජනමාධ්‍යවේදී රක්ෂණය ආණ්ඩුවේ රක්ෂණ ආයතන දෙක වන ශ්‍රී ලංකා රක්ෂණ සංස්ථාවට හා ජාතික රක්ෂණ භාර අරමුදලට ක්‍රියාත්මක කිරීමට බාරදී නැති බව ප්‍රකාශ කරන ජනමාධ්‍ය අමාත්‍යාංශයේ අපගේ මූලාශ වැඩිදුරටත් ප්‍රකාශ කරන්නේ එම රක්ෂණය සොෆ්ට් ලොජික් රක්ෂණ සමාගමට බාරදී ඇති බවය.
මේ වනවිට ශ්‍රී ලන්කන් ගුවන් සමාගමේ ප්‍රධානියා ලෙස පත්කර ඇත්තේ සොෆ්ට් ලොජික් සමාගමේ ප්‍රධානියා වශයෙන් කටයුතු කරන අශෝක් පතිරගේ වන අතර ඔහු රාජපක්ෂවරුන්ගේ සමීපතමයකු වශයෙන් සැලකේ.■
