සහල් තොග සිය බාරයට ගැනීමක් මෙතෙක් සිදුකර නැතැයි අත්‍යවශ්‍ය සේවා කොමසාරිස් ජනරාල් විශ්‍රාමික මේජර් ජෙනරාල් සෙනරත් නිවුන්හැල්ල අනිද්දා කළ විමසීමකදී ප්‍රකාශ කළේය.
සීනි තොග වැටලීම් සිදුකරන අයුරු දක්නට ලැබුනද සහල් මෝල්වලට ගොස් සහල් තොග රජයේ බාරයට ගන්නා බවක් දක්නට නොලැබීම සම්බන්ධයෙන් කළ විමසීමේදී නිවුන්හැල්ල මහතා ඒ බව ප්‍රකාශ කළේය.
රජයේ උපරිම මිලට සහල් වෙළඳපොලේ නොමැති තත්වය තුළ සීනි සම්බන්ධයෙන් මෙන් සහල් තොග රජයේ බාරයට ගෙන වෙළඳපොලට නිකුත් නොකරන්නේ මන්දැයි තවදුරටත් කළ විමසීමේදී ඒ සඳහා ටික කාලයක් ලබාදෙන ලෙස ඔහු ඉල්ලීමක් කළේය.
එසේනම් සහල් මෝල්වලට ගියේ ඇයිදැයි කළ විමසීමේදී ඔහු ප්‍රකාශ කළේ සාධාරණ මිලකට සහල් ලබාදෙන ලෙස ඉල්ලීමක් කිරීමට එසේ ගිය බවය.
එම අවස්ථාවලදී සහල් මෝල් හිමියන් සතුව ඇති සහල් තොග පිළිබඳ තොරතුරු ලබාගත්තේදැයි කළ විමසීමේදී ඔහු කීවේ එම විස්තර ලබාගනිමින් පවතින බවය. ලබගත් එම තොරතුරු ගැන ඇසූ විට එම තොරතුරු ලබාදීම ඔහු ප්‍රතික්ෂේප කළේය.
දැනට රජයේ බාරයට ගෙන ඇති සීනි තොග රජයේ උපරිම මිලට හෝ ආනයනික මිල ගණන් අනුව මිලදී ගැනීමට රජයෙන් ප්‍රතිපාදන වෙන්කිරීමක් සිදුකර නැති බවත්, එම සීනි තොග විකිණීමෙන් පසු ඒවාහි හිමිකරුවන්ට මුදල් ලබාදීම් සිදුකරන බවත්, උපරිම මිලට වඩා රුපියල් 2ත් 3ත් අතර අඩු මිලකට එම සීනි ලබාදෙන බවත් ඒ සම්බන්ධයෙන් කරන ලද විමසීවලදී ඔහු වැඩිදුරටත් පැවසීය.■
