■ අමන්දිකා කුරේ
උසස් අධ්‍යාපන කටයුතු සඳහා විදෙස් ගත වීමට බලාපොරොත්තු වන සිසුන්ට අවශ්‍ය එන්නත් ලබා දෙන බවට රජය මීට පෙර ප්‍රකාශ කළ ද තමන්ට එන්නත් ලබා නොදෙන බවට විදෙස් ගත වීමට බලාපොරොත්තුවෙන් සිටින සිසුන් චෝදනා කරති.
ජර්මනිය හා එක්සත් රාජධානියේ උසස් අධ්‍යාපන කටයුතු සඳහා යාමට බලාපොරොත්තුවෙන් ස්ටින, රජයේ එන්නත්කරණ වැඩසටහනට ලියාපදිංචි වූ සිසුන්ට පසුගිය අගෝස්තු 20 වන දින දැනුම් දී ඇත්තේ එම රටවල් වලට ඇතුළත් වීම සඳහා කොවිඩ් එන්නත් අවශ්‍ය නොවන බැවින් ඔවුන්ව එන්නත් කිරීමේ වැඩසටහනින් ඉවත් කර ඇති බවයි.
විදෙස් ගත වීමට බලාපොරොත්තුවෙන් සිටින සියලු සිසුන්ට ඒ ඒ රටවල් වලින් අනුමත කර ඇති එන්නත් ලබා දීමට බලාපොරොත්තු වන බවට එවකට කැබිනට් ප්‍රකාශක වර්තමාන සෞඛ්‍ය ඇමති කෙහෙලිය රඹුක්වැල්ල මාධ්‍ය හමුවක දී පැවසීය. අවශ්‍ය නම් විදෙස් ගත සිසුන්ගේ උපාධි ප්‍රදානෝත්සව වලට සම්බන්ධ වීමට බලාපොරොත්තු වන දෙමවුපියන්ට ද එන්නත්ලබා දීමට හැකි බව ඔහු එහිදී ප්‍රකාශ කළේ ය.
විදෙස් ගත වන සිසුන් එන්නත් කිරීමේ වැඩසටහන සඳහා ලියාපදිංචිය පසුගිය ජුලි 02 වන දින යුධ හමුදා වෙබ් අඩවිය හරහා ආරම්භ කළ අතර එයින් කියවුණේ එලෙස ලියාපදිංචි වන සිසුන්ට දින දෙකකින් එන්නත් කරන ස්ථානය හා වේලාව දැනුම් දෙන බවයි.
උසස් අධ්‍යාපනය සඳහා ජර්මනියට යාමට බලාපොරොත්තු වන සිසුවෙක් ”අනිද්දා” වෙත ප්‍රකාශ කළේ තමා එම වෙබ් අඩවිය හරහා අගෝස්තු 14 ලියාපදිංචි වූ බවත්, අගෝස්තු 18 වන දින තමාව එම එන්නත්කරණ වැඩසටහනට ලියාපදිංචි කරගත් බවට කෙටි පණිවිඩයක් දුරකතනයට ලැබුණත් එන්නත්කරන දිනයක් හෝ වේලාවක් දැනුම් නොදුන් බවයි. පසුව අගෝස්තු 20 වන දින ඔවුන්ට කෙටි පනිවිඩයකින් දැනුම් දී ඇත්තේ ජර්මනිය එන්නත් නොකළ පුද්ගලයන්ට පැමිණීමට අවසර ලබා දී ඇති හෙයින් ඔවුන්ව එම එන්නත්කරණ වැඩසටහනෙන් ඉවත් කර ඇති බවයි. අධ්‍යාපන කටයුතු සඳහා එක්සත් රාජධානියට යාමට බලාපොරොත්තු වන සිසුන්ට ද ලැබී ඇත්තේ මෙම පිළිතුර ය.
මෙලෙස එන්නත් නොකර යාමට සිදු වන නිසා මෙම රටවල් වලට යාමට බලාපොරොත්තු වන සිසුන්ට දින 14ක නිරෝධායන කාලයක් එම රටේදී ගත කිරීමට සිදුවේ. ඒ සඳහා ජර්මනියේ දී දිනකට යූරෝ 200ක් පමණ වැය කිරීමට සිදුවන බව සිසුහු චෝදනා කරති.
කැනඩාවේ උසස් අධ්‍යාපන කටයුතු සඳහා විදෙස්ගත වීමට බලාපොරොත්තු වන සිසුන් ද මෙවැනිම අර්බුදයකට මුහුණ පා සිටිති. ඔවුන්ට අගෝස්තු 20 වන දින දැනුම් දී ඇත්තේ කැනඩාවට සයිනොෆාම් එන්නත ලබා ගත් පුද්ගලයන්ට ඇතුළුවීමට අවසර ලබා දී ඇති බැවින් ඔවුන් හට එම එන්නත ඉදිරියේදී ලබා දෙන බවයි. නමුත් සයිනොෆාම් එන්නත් ලබා ගෙන කැනඩාවට පැමිණෙන පිරිස් අනිවාර්යයෑන්ම කැනඩාවේ දින 14ක නිරෝධායන කාලයක් සම්පූර්ණ කළ යුතු අතර ඒ සඳහා ඇ.ඩො. 200ත් 250ත් අතර මුදලක් දිනකට වැය වන බව සිසුන් පවසයි. කැනඩාව නිර්දේශ කර ඇති එන්නත් ලබා ගෙන ඇත්නම් ඔවුන්ට මෙලෙස විශාල මුදලක් වැය කරමින් නිරෝධායනය වීමට සිදු නොවන බව සිසුහු මතුකරති.
මෙම රටවල් වලින් සයිනොෆාම් එන්නත සඳහා අනුමැතිය ලබා දී නොමැති අතර ෆයිසර්, මොඩර්නා, ජොන්සන් ඇන්ඩ් ජොන්සන් යන එන්නත් වර්ග සඳහා පමණක් අනුමැතිය ලබා දී තිබේ. දැනට ශ්‍රී ලංකාව තුළ මොඩර්නා හා ෆයිසර් එන්නත් එන්නත්කරණය සඳහා යොදාගන්නා අතර පසුගිය දිනක ෆයිසර් එන්නත් ලබා දීම සම්පූර්ණයෙන්ම යුධ හමුදාවට පමණක් ලබා දුන්නේ ය. මෙම සිසුන් එන්නත්කරණ වැඩසටහන මෙහෙයවන්නේ ද යුධ හමුදාව වන බැවින් ඔවුන්ට එන්නත්කරණය පිළිබඳ තොරතුරු දැනගැනීමට ලබා දී ඇති දුරකතන අංකය අමතා ෆයිසර් එන්නත ලබා ගත හැකිදැයි විමසුවද ඒ සඳහා අවශ්‍ය උපදෙස් තවම ලැබී නොමැති බව එම ඇමතුම් මධ්‍යස්ථාන නිලධාරියා ඔවුන්ට ප්‍රකාශ කර ඇත.
මේ සම්බන්ධයෙන් විමසීමට අප නාරාහෙන්පිට යුධ හමුදා රෝහල සහ සිසුන්ට ලබා දී ඇති කොවිඩ් මර්දන ජාතික ක්‍රියාන්විත මධ්‍යස්ථානයේ දුරකතන අංක ඇමතුවද එම දුරකතන ඇමතුම් සඳහා ප්‍රතිචාර ලැබුණේ නැත.■
