■ නිත්‍යා සෙව්වන්දි
සලාක ක්‍රමයක් ඇතිකර සතොස අලෙවි සැල්වලින් භාණ්ඩ පාරිභෝගිකයාට ලබා ගැනීමට ඉඩ සැළැස්වීම මගින් ජනතාවට සහන සැළැස්වීම ඉටු නොවන බව මහජන අයිතීන් සුරැකීමේ පදනමේ ජාතික සංවිධායක අසේල සම්පත් පවසයි.
ඔහු පැවසුවේ ලංකාවේ සතොස අලෙවි ජාලා තිබෙන්නේ 500ට අඩු ප්‍රමාණයක් බවත් එම වෙළඳසැල් නගර ආශ්‍රිතව පිහිටීම නිසාවෙනුත් ග්‍රාමීය පෙදෙස් තුළ ජීවත් වන ජනයාට සතොස මගින් ලබාගැනීමට නියම කරන ලද සහනදායි මිලට භාණ්ඩ මිලදී ගැනීමට නොහැකි වී ඇති බවයි.
තව ද රටෙහි උද්ගත වී ඇති වසංගත තත්වය යටතේ ග්‍රාමීය පෙදෙස්වල ජනයාට සතොස වෙළඳසැළක් සොයමින් කිලෝමීටර් ගණනාවක් ගමන් කිරීමට ඇති නොහැකියාව පෙන්වා දෙමින් අසේල මහතා වැඩිදුරටත් පැවසුවේ සාමාන්‍ය ජනයාට තම අතෙහි ඇති මුදලින් මිලදී ගැනීමට ක්‍රමයක් සලසා දීම මිස සලාක ක්‍රමයක් ක්‍රියාත්මක කිරීම අනවශ්‍ය බවත් දිස්ත්‍රික්ක 25 සෑම වෙළඳසැළකින්ම මිලදී ගැනීමට හැකි ආකාරයෙන් බඩු මිල අඩු කරන ලෙසත් රජයෙන් ඉල්ලා සිටින බවයි.■
