■ ප්‍රියාශා හෙට්ටිහේවා
තවත් සති 3ක පමණ කාලයක් රට ලොක්ඩවුන් කර තැබිය යුතු බවත් දැනට වඩා තදබල ලෙස සීමා පැනවිය යුතු බවත් විශේෂඥ වෛද්‍යවරුන්ගේ සංගමයේ මාධ්‍ය සම්බන්ධීකාරක විශේෂඥ වෛද්‍ය රවී දයාසේන අනිද්දාට පැවසීය.
සීමා පැනවීමේදී රජයෙන් ඉටු කළ යුතු වගකීම් මෙන් ම ජනතාව විසින් ද ඉටු කළ යුතු වගකීම් කොටසක් ඇති බව ඔහු අවධාරණය කළේය.
ජනතාවගේ පාර්ශ්වයෙන් සංචරණය සීමා කරමින් හැසිරෙන ආකාරයක් ද දැකිය නොහැකි බවත් රෝහලකට රෝගියෙකු පැමිණි විට ලබා දීමට ඇඳන් පවා නොමැති තත්ත්වයක් උද්ගතව ඇති බැවින් පවතින තත්ත්වයේ බරපතළ බව ජනතාව මේ මොහොතේ වටහාගත යුතු බවත් ඔහු ප්‍රකාශ කළේය.
වෛරසය ඉතා ඉක්මනින් පැතිරෙන බැවින් නිවසින් බැහැරට ගොස් පැමිණෙන අයෙකු හරහා මුළු පවුල ම ආසාදිතයන් බවට පත්වීමේ ප්‍රවණතාව ද ඉහළ වන බැවින් ඉතාමත් සැලකිලිමත් වන ලෙස වෛද්‍ය දයාසේන ජනතාවගෙන් ඉල්ලා සිටියේ ය.
ඔහු පැවසුවේ, එන්නත්කරණය රට පුරා සිදු වුව ද තවමත් විශාල පිරිසක් එන්නත්කරණයට ලක් කර නොමැති බැවින් රෝගයට එරෙහි ප්‍රතිශක්තිය සහිත විශාල පිරිසක් රට තුළ මේ වන විට නොමැති බව ය.
පසුගිය දින දෙක තුනක කාලය තුළ ජාතික රෝහලට ඇතුළත් වූ කොවිඩ් රෝගීන් ගණන සාපේක්ෂව අඩු බවක් පෙන්නුම් කළ ද එහි සාර්ථක ප්‍රතිඵල ලබා ගැනීමට නම් එන්නත්කරණ කටයුතු සිදු කරමින් තවත් සති 3ක්වත් අවම වශයෙන් රට වසා තැබිය යුතු බව ඔහු වැඩිදුරටත් පැවසීය.■
