■ අමන්දිකා කුරේ
පසුගිය දිනවල අසාමාන්‍ය ලෙස කොටස් වෙළඳපොළේ මිල ඉහළ යාම කිහිපදෙනෙක් එක්ව සමාජමාධ්‍ය යොදාගනිමින් කරන ව්‍යාජයක් නිසා සිදුවූවක් බවට සමගි ජන බලවේගයේ පාර්ලිමේන්තු මන්ත්‍රී ආචාර්ය හර්ෂ ද සිල්වා ”අනිද්දා” වෙත අදහස් දක්වමින් ප්‍රකාශ කළේ ය.
”ආයෝජකයන්, අතරමැදියන් කිහිපදෙනෙකුගේ කණ්ඩායමක් එකතු වෙලා විවිධ සමාජ මාධ්‍ය සමූහ තුළ, කොටස් වෙළඳපොළ සම්බන්ධ අභ්‍යන්තර තොරතුරු කියලා බහුතරයක් අසත්‍ය ප්‍රචාර කරලා යම් යම් කොටස්වල අයෝජනය කරන්න දේශීය අයෝජකයන් පොළඹවලා තියෙනවා. ඒ නිසා තමයි කොටස් වෙළඳපොළ ඒ විදිහට අසාමාන්‍ය ලෙස ඉහළ ගියේ”
එමෙන් ම අධික ලෙස මුදල් අච්චු ගැසීම හේතුවෙන් මුදලේ අගය අඩු වීම නිසා කොටස් වෙළඳපොළ හා ආයෝජන සම්බන්ධයෙන් උනන්දු පිරිස් සිය මුදල් බැංකු ගිණුම්වල තබනවාට වඩා යම් ව්‍යාපාරයක ආයෝජනය කිරීමට ඇති ප්‍රවණතාව උපයෝගී කරගනිමින් මෙලෙස ව්‍යාජ ප්‍රචාර හරහා ආයෝජකයන් කොටස් වෙළඳපොළ අයෝජනය සඳහා පොළඹවාගෙන ඇති බව පාර්ලිමේන්තු මන්ත්‍රී හර්ෂ ද සිල්වා මහතා කියාසිටියේ ය.
පසුගිය යහපාලන රජය සමයේ ආරම්භ කර මේ පවතින රජය හමුවේ අවසන් කළ ”සුරැකුම් හා විනිමය පාලන කොමිෂන් සභා පනත” පසුගිය පාර්ලිමේන්තු සභාවාරයේදී ඉදිරිපත් කිරීමට තිබූවද එය පසුගිය සතියේ ඉදිරිපත් නොකිරීම මෙහි ඇති හාස්‍යජනකම කරුණ බවට ඔහු මතු කළේ ය.
යම් හෙයකින් එම පනත සම්ම්මත වූයේ නම් මෙලෙස විවිධ ප්‍රචාර කරමින් සමාජ මාධ්‍ය හරහා කොටස් වෙළඳපොළ වංචාකාරී ලෙස හැසිරවීම සාපරාධී වරදක් ලෙස නීතිගත වන්නට තිබූ බව ඒ මහතා වැඩි දුරටත් ප්‍රකාශ කළේ ය.■
