වත්මන් නායකත්වය පිළිබඳ කලකිරීමෙන් ශ්‍රී ලංකා නිදහස් පක්ෂයේ අතරමං වී සිටින පාක්ෂිකයන් හා රටේ වාමාංශික අදහස් ඇති පුද්ගලයන්, බලවේග ඒකරාශි කර ගනිමින් ‘අපි ශ්‍රී ලංකා පක්ෂය’ නමින් නව දේශපාලන බලවේගයක් ගොඩ නගමින් සිටින බව සමගි ජන බලවේගයේ කළුතර දිස්ත්‍රික් පාර්ලිමේන්තු මන්ත්‍රී කුමාර වෙල්ගම අනිද්දාට පැවසීය.
එස්.ඩබ්ලිව්.ආර්.ඩී. බණ්ඩාරනායක මහතාගේ ප්‍රතිපත්ති ඉදිරියට ගෙන යමින් විධායක ජනාධිපති ක්‍රමය අහෝසි කර අගමැතිවරයා ප්‍රමුඛ පාර්ලිමේන්තුවක් මෙරට ඇති කිරීම තම පක්ෂයේ මූලික අරමුණ හා ඉලක්කය බවත් වෙල්ගම මන්ත්‍රීවරයා පැවසීය. ශ්‍රී ලංකා නිදහස් පක්ෂයෙන් දේශපාලන ගමන ආරම්භ කළ 2019 තමන් සමගි ජන බලවේගය සමග එක් වුණේ ශ්‍රී ලංකා නිදහස් පක්ෂයේ ජ්‍යෙෂ්ඨයන්ට අවස්ථාව නොදී මහින්ද රාජපක්ෂ මහතා ප්‍රාදේශීය සභාවක්වත් කිසි දාක නියෝජනය නොකළ ගෝඨාභය රාජපක්ෂට ජනාධිපති අපේක්ෂක ධුරය ලබා දීම නිසා බව වෙල්ගම මන්ත්‍රීවරයා වැඩිදුරටත් පැවසීය.■
