ජුලි 8 වන බ්‍රහස්පතින්දා ශ්‍රී ලංකා නිදහස් පක්ෂයේ මධ්‍යම කාරක සභාව රැස් වූ අවස්ථාවේදී එක් කණඩායමක් ශ්‍රී ලංකා පොදු ජන පෙරමුණෙන් ඉවත් වීමටත් තවත් කණ්ඩායමක් පොදුජන පෙරමුණ තුළ සිටිමින් පක්ෂයේ සංවිධාන කටයුතු කළ යුතු බවටත් අදහස් දැක් වූ බව ශ්‍රී ලංකා නිදහස් පක්ෂයේ මධ්‍යම කාරක සභිකයෙක් අනිද්දාට පැවසීය.
පොදු ජන පෙරමුණ ශ්‍රී ලංකා නිදහස් පක්ෂයේ පහළ පෙළේ මෙන්ම ඉහළ පෙළේ සාමාජිකයන් සංවර්ධන ක්‍රියාදාමයට සම්බන්ධ කර නොගැනීම හා දේශපාලන කටයුතු කිරීමට ඉඩ කඩ ලබා නොදීම නිසා ශ්‍රී ලංකා නිදහස් පක්ෂය තුළ මෙම අදහස් දෙක ඇති වී තිබෙන බව එම මධ්‍යම කාරක සභිකයා වැඩි දුරටත් පැවසීිය.
ශ්‍රී ලංකා නිදහස් පක්ෂය හා ජනාධිපති ගෝඨාභය රාජපක්ෂ අතර ජුනි 21 වන දා සාකච්ඡාවක් පැවැත්වීමට නියමිතව තිබුණත් තවමත් ඒ පිළිබඳව ස්ථිරත්වයක් ඇති වී නැති බව මේ පිළිබඳව අනිද්දා කළ විමසීමට පිළිතුරු දෙමින් ශ්‍රී ලංකා නිදහස් පක්ෂයේ ජ්‍යේෂ්ඨ උප සභාපති මහාචාර්ය රෝහණ ලක්ෂ්මන් පියදාස පැවසීය.
පළාත් සභා මැතිවරණය සඳහා අපේක්ෂකයන් තෝරා ගැනීම සඳහා අවශ්‍ය කටයුතු ඉදිරි දිනවලදී සිදු කරනු ඇති බවත් සන්ධානයක් ලෙස එක් වෙනවාද නැද්ද යන වග ඉදිරියේදී තීන්දු කරනු ඇති බවත් ජ්‍යේෂ්ඨ උප සභාපතිවරයා පැවසීය.
පොදු ජන පෙරමුණේ මෙන්ම ශ්‍රී ලංකා නිදහස් පක්ෂයත් ඉදිරියේ පැවැත්වීමට නියමිත පළාත් සභා මැතිවරණයට ලෑස්ති වෙමින් සිටින බවත් පක්ෂයේ සංවිධාන කටයුතු සිදු කරමින් සිටින බවත් ජ්‍යේෂ්ඨ උප සභාපතිවරයා පැවසීය.■
