“මගේ හොඳ නෙමෙයි, මේ ආමි එකේ තියෙන සිස්ටම් එක. පොලීසියෙන් අත දැම්මොත් මම නතර කරනවා. උඹ අත දැම්මොත් මම නතර කරනවාද වාහනේ? උඹලා වගේ පිම්පිලා නෙමේ අපි. කන පලනවා ප…”
මේ අනුරාධපුර දිස්ත්‍රික්කය භාර මේජර් ජනරාල් මොහාන් රත්නායක මින්නේරිය ජාතික උද්‍යානයේ වන සත්ව අඩවි ආරක්ෂක ඩබ්.එම්. කුමාරසිරි විජේකෝන් මහතා ඇතුළු වන ජීවී නිලධාරීන්ට හමුදා හා පොලිස් හබරණ මරදන්කඩවල අතර පළුගස්වැව මුරපොළක් අබියසදී ආමන්ත්‍රණය කළ ආකාරයය. මේ වචන සටහන් වී තිබුණේ එම අවස්ථාවේ එම සිද්ධියට මුහුණ දුන් වන ජීවී නිලධාරීයෙකුගේ දූරකථනයේ සටහන් වූ වීඩියෝවකය. තමන් අනුරාධපුර දිස්ත්‍රික්කය භාර මේජර් ජනරාල් මොහාන් රත්නායක බව මේජර් ජනරාල්වර්යාගේ කටහඬින්ම එහි සටහන් වී තිබේ.
මෙම ගැටුමට හේතු වූයේ ජුනි 23 වනදා රාත්‍රියේ මින්නේරිය ජාතික උද්‍යානයට අයත් වනජීවී රක්ෂිතයේ ප්‍රේරක කලාපයේ විදුලි වැට ආසන්නයෙන් ගමන් ගත් යුද හමුදාවට අයත් යුහ 51348 හා යුහ 80494 කැබ් රථ දෙක වනජීවී නිලධාරීන් විසින් පරීක්ෂා කිරීමට ගත් උත්සාහයත් සමගය.
මින්නේරිය ජාතික උද්‍යානයෙන් අලි පැටියෙකු පැහැර ගැනීමට සූදානමක් ඇති බවත්, ලංකාවේ කුප්‍රකට අලි ජාවාරම්කරුවෙකු සහ ඔහුගේ කණ්ඩායම දින කිහිපයක් තිස්සේ හබරණ ප්‍රදේශය අවට හෝටල් කිහිපයක ලැගුම් ගෙන සිටින බවට වනජීවී දෙපාර්තමේන්තුවට තොරතුරු ලැබී තිබේ. මින්නේරිය උද්‍යානයේ වනජීවී නිලධාරීහු තම බල ප්‍රදේශය ආවරණය වන ලෙස පැය 24 පුරා රැකවල් ලා සිට ඇත්තේ ඒ නිසාය.
ජුනි 23 වන දා මින්නේරිය ජාතික උද්‍යානයේ, බටහිර මායිමේ, හබරණ කිට්ටුවෙන් වන ජීවී රක්ෂිතයේ ප්‍රේරක කලාපයේ විදුලි වැට ආසන්නයේ කැබ් රථ දෙකක් අතුරු මාර්ගයක පැමිණ තිබේ. එය නතර කරන්නැයි වනජීවී නිලධාරීන් සංඥා කළ ද එම රථ දෙක වන ජීවී නිලධාරීන්ගේ අණ නොතකා ඉදිරියට ධාවනය කර තිබේ. ඉදිරියෙන් තිබූ තවත් වනජීවී මුර කපොල්ලකින් ද වාහන දෙක අණ නොතකා ධාවනය කර ඇත. වනජීවී නිලධාරීන්ගේ අණ නොතකා ධාවනය වන මෙම රථ දෙක පසුපස වනජීවී නිලධාරීන්ගේ වාහන දෙකක් ද ලුහු බැඳ ගොස් ඇත. ඉදිරියෙන් යන රථ දෙක යුද හමුදා රථ දෙක්ක බව හඳුනාගත් වනජීවී නිලධාරීන් ඒ පිළිබඳව ගල්කුලම යුද හමුදා පොලිස් මුරපොලට දන්වා තම අණ නොතකා පැමිණෙමින් තිබෙන හමුදා රථ දෙක නතර කර දෙන ලෙස ඉල්ලා තිබේ.
එම රථ දෙක තමන්ට නැවැත්විය නොහැකි බවත් එම රථ දෙකෙන් එකක ගමන් කරන්නේ යුද හමුදාවේ මේජර් ජනරාල්වරයෙකු බවත් යුද හමුදා පොලිස් මුරපොලේ නිලධාරීන් වනජීවී නිලධාරීන්ට දැනුම් දී ඇත. එම යුද හමුදා රථ දෙක අනුරාධපුරයේ 21 වන සේනාංක මූලස්ථානයට ඇතුළු වී තිබෙන්නේ ඉන් පසුවය.
ඒ බව නිරීක්ෂණය කළ වනජීවී නිලධාරීන් මෙහෙයුම නවතා ආපසු එන්නට පිටත් වී තිබේ. අනුරාධපුරයේ 21 වන සේනාංක මූලස්ථානයේ සිට වාහන කිහිපයක් වනජීවී වාහන දෙක පසුපස ලුහු බැඳ පැමිණ තිබෙන්නේ ඉන් පසුවය. හබරණ මරදන්කඩවල අතර පලූගස්වැව ආසන්නයේ හමුදා මුරපොලේදී වන ජීවී නිලධාරීන් පැමිණි වාහන දෙක නතර කර තිබේ. ඉන් සුළු වේලාවකට පසු එම ස්ථානයට වන ජීවී වාහන පසුපසින් පැමිණි හමුදා වාහනයකින් බිමට බැස ආ මේජර් ජනරාල් මොහාන් රත්නායක සහ මින්නේරිය ජාතික උද්‍යානයේ වන සත්ත්ව අඩවි ආරක්ෂක ඩබ්.එම්. කුමාරසිරි විජේකෝන්, එම්.ඩබ්.කේ. වාසල ඇතුළු පිරිස අතර ගැටුමක් ඇති වී තිබේ.
වාහනයෙන් බිමට බැස තවත් හමුදා නිලධාරීන් පිරිසක් පිරිවරා පැමිණි මේජර් ජනරාල් මොහාන් රත්නායක පරුෂ වචනයෙන් බැන වැදී වනජීවි නිලධාරියෙකුට පහර දුන් බවත් තමන්ගේ ජංගම දූරකථන පැහැරගත් බවත් පවසා වනජීවී නිලධාරීන් හබරණ පොලීසියට පැමිණිලි කර ඇත. සිද්ධිය සම්බන්ධව කළ දැනුවත් කිරීමකින් පසුව හබරණ පොලිසියේ ස්ථානාධිපතිවරයා ද එම ස්ථානයට පැමිණ තිබේ. පොලිස් ස්ථානාධිපතිවරයා නොපැමිණෙන්නට වන ජීවී නිලධාරීන්ට විශාල ගැටලුවකට මුහුණ දෙන්නට සිදුවන්නට ඉඩ තිබූ බව වන ජීවී නිලධාරීහු පැවසූහ. සිද්ධිය සම්බන්ධව මින්නේරිය ජාතික උද්‍යානය භාරකරු භාතිය මඩුගල්ලේ හබරණ පොලිසියට පැමිණිලි කර තිබෙන්නේ ඉන් පසුවය.
සාමාන්‍යයෙන් අලි පැටියෙක් සොරාගෙන යන්නේ ධනය බලය ඇති පුද්ගලයන් නිසා වනජීවී නිලධාරීන් මෙම වාහන දෙකේ අලි පැටියා රැගෙන යනු ඇතැයි කියා සැක පහළ කළ බවත් මේජර් ජනරාල්වරයා ඒ අවස්ථාවේ වාහන දෙක නවත්වා ඒවා පරීක්ෂා කිරීමට අවසර දුන්නේ නම් මේ ගැටලුව ඇති නොවන බවත් වන සත්ත්ව අඩවි ආරක්ෂක ඩබ්.එම්. කුමාරසිරි විජේකෝන් මහතා පැවසීය.
වාහනය නවත්වන්නට සංඥා කළ අවස්ථාවේ මේජර් ජනරාල් මොහොන් රත්නායක ගමන් කළ වාහනයේ ඔහුගේ බිරිඳ හා දරුවන් සිටි බැවින් වන ජීවී නිලධාරීන් ඔහුගේ වාහනය පරීක්ෂා කිරීම යුතු නැති බව හමුදා නිලධාරියෙකු පවසන අයුරු සිද්ධිය සිදු වූ අවස්ථාවේ ජංගම දූරකථනයක සටහන් වී තිබේ. හමුදා මේජර් ජනරාල්වරයෙකුට වන ජීවී නිලධාරීන්ට මෙවැනි අකාරයෙන් කතා කළ හැකිද? හමුදා මේජර් ජනරාල්වරයෙකුගේ වාහනයක් පරීක්ෂා කිරීම කළ නොහැකිද? මේ පිළිබඳව පරිසරවේදී ආචාර්ය ජගත් ගුණවර්ධනගෙන් අපි විමසුවෙමු.
“තමන්ගේ ආරක්ෂිත ප්‍රදේශයක් තුළ නීති විරෝධී ලෙස ඇතුල් වුණොත් ඇතුල් වෙන්න තැත් කළොත්, හෝ වන ජීවී අපරාධයක් කරන්න සැරසෙන බවට සාධාරණ සැකයක් තියෙනවා නම් හෝ වන ජීවී අපරාධයක් කරමින් ඉන්නවා නම් හෝ කරලා තියෙනවා නම් වන ජීවී නිලධාරියෙකුට රටේ ඕනෑම පුරවැසියෙක් අත්අඩංගුවට ගන්න හැකියාව තියෙනවා. රාජකාරියට බාධා කරනවා නම් පොලීසියට හෝ ඕනෑම සාම නිලධාරියෙකුට ඔහුව අත්අඩංගුවට ගන්න පුළුවන්. වන ජීවී නිලධාරීනුත් සාම නිලධාරීන් හැටියට වන සත්ව හා වෘක්ෂලතා ආරක්ෂණ ආඥා පනතේ 66 වන වගන්තිය අනුව නම් කරලා තියෙන්නේ. තමන්ගේ නිල බලය භාවිත කරලා හෝ නොකර රාජකාරියට බාධා කරන ඕනෑම පුද්ගලයෙක් අත්අඩංගුවට ගන්න දණ්ඩ නීති සංග්‍රහය අනුව පොලීසියටත් බලය තියෙනවා.”
“රාජ්‍ය ආයතන විශාල සංඛ්‍යාවක රාජකාරී කටයුතු සිදු කෙරෙන දිස්ත්‍රික්කයක් වැනි විශාල පරිපාලන ප්‍රදේශයක් සම්බන්ධයෙන් වගකීම් දරන හමුදා හමුදාවේ ඉහළ නිලධාරියෙකු තම බල ප්‍රදේශය තුළ පවතින අනෙකුත් රාජ්‍ය ආයතන, නිලධාරීන් හා ආයතන, ආයතන අතර ඇති වගකීම්, නීතිමය තත්වයන් පිළිබඳව කිසිදු වැටහීමක් නැතිව උද්දච්ච ආකාරයෙන් හැසිරීමකින් යුද හමුදාවේ කීර්ති නාමයට ඇති කරන්නේ අඳුරු පැල්ලමකි.
මේජර් ජනරාල්වරයා වන ජීවී නිලධාරීන්ගේ රාජකාරියට බාධා කරමින් මෙසේ හැසිරීම සම්බන්ධයෙන් යුද හමුදාව කිනම් ක්‍රියාමාර්ගයක් ගත්තේ දැයි අප කළ විමසීමට පිළිතුරු දෙමින් යුද හමුදා මාධ්‍ය ප්‍රකාශක බි්‍රගේඩියර් නිලන්ත ප්‍රේමරත්න පැවසුවේ යුද හමුදාපතිවරයා මේ පිළිබඳව කරුණු වාර්තා කිරීමට මේජර් ජනරාල්වරුන් දෙදෙනෙකුගෙන් සමන්විත පරීක්ෂණ කමිටුවක් පත් කර ඇති බවත් යුද හාමුදාව පාර්ශ්වයෙන් කරුණු අනාවරණය කරගෙන ඇති බවත් බාහිර පාර්ශ්වයන්ගෙන් කරුණු විමසමින් සිටින බවත්ය.
මින්නේරිය ජාතික වනෝද්‍යානයේ රාජකාරියේ නිරතව සිටි වනජීවි නිලධාරියකුට පහරදී ඔවුන්ගේ රාජකාරියට බාධා කළේ යැයි කියන සිද්ධියට අදාළ යුද හමුදා මේජර් ජනරාල්වරයා ඇතුළු යුද හමුදා සාමාජිකයන් වහාම අත්අඩංගුවට ගෙන අධිකරණයට ඉදිරිපත් කරන්නැයි කැකිරාව දිසා විනිසුරු සහ මහේස්ත්‍රාත් සමන් වැරණියගොඩ හබරණ පොලිස් ස්ථානාධිපතිවරයාට ජුනි 30 වන දා නියෝග කර තිබූ අතර ජූලි 1 වන දාම යුද හමුදා මේජර් ජෙනරාල්වරයා හබරණ පොලීසියට පැමිණීමෙන් පසු අත්අඩංගුවට ගෙන තිබිණි. එදින ඔහුට ඇප නියම කර තිබිණි.■
