එක්සත් ජාතික පක්ෂ නායක රනිල් වික්‍රමසිංහ එහි ජාතික ලැයිස්තු මන්ත්‍රීවරයා වශයෙන් පාර්ලිමේන්තුවට පැමිණ කළ පළමු කතාවේ හරයට සමගි ජන බලවේගයේ මන්ත්‍රී හිටපු හමුදාපති ෆීල්ඩ් මාර්ෂල් සරත් පොන්සේකා පහර දී තිබේ.
ජුනි 28 වැනිදා පැවති මාධ්‍ය හමුවකදී රනිල් වික්‍රමසිංහ මහතාගේ පාර්ලිමේන්තු ආගමනය සම්බන්ධයෙන් ඇසූ ප්‍රශ්නයකට පිළිතුරු වශයෙන් සරත් පොන්සේකා මහතා මෙම පහර දීම කර තිබේ.
එහිදී සරත් පොන්සේකා මහතා කියා ඇත්තේ මංගල කතාවේදීම රන්ල් වික්‍රමසිංහ මහතා හමුදාවට හා හමුදාපතිට පහර ගසා පටන් ගත් බවත් වික්‍රමසිංහ මහතාට හමුදා නිල ඇඳුම් හමුදාපතිලා කහඹිලියා වගේ ඇලජික් බවය. කවුරු හෝ හමුදාව දකින්න කැමති නැත්නම් හමුදාපතිලා අයින් කරන්න ඕන කියන මානසිකත්වයක ඉන්නවා නම් එම පුද්ගලයාට කවදාකවත් රට ගැන ජාතික හැඟීමක් නැති බවත් වික්‍රමසිංහ මහතාට තිබෙන ප්‍රධාන ප්‍රශ්නය එය බවත් පොන්සේකා මහතා එහිදී කියා ඇත.
රනිල් වික්‍රමසිංහ මහතාගේ එම පාර්ලිමේන්තු කතාව පොන්සේකා මහතාට ඇලජික් වූවාට ඔහු නියෝජනය කරන සමගි ජන බලවේගයේ මන්ත්‍රීවරුන් පවා පිළිගන්නා කතාවකි. කොවිඩ් වසංගතය පාලනය කිරීමේ ව්‍යුහය විවේචනය කරමින් කරන ලද අගනා කතාවකි. සමගි ජන බලවේග නායක සජිත් ප්‍රේමදාසගෙන් හෝ එහි අනිකුත් සාමාජිකයන්ගෙන් මතු නොවූ කරුණකි.
වික්‍රමසිංහ මහතා කියූ දෙය ඇත්තකි. රටේ හමුදාපති යනු දෙපාර්තමේන්තුවක ප්‍රධානියකු පමණය. ඔහු යටතේ ඔහුට ඉහළින් සිටින අමාත්‍යාංශ ලේකම්ලාත්, ඇමතිවරුනුත් තබාගෙන කොවිඩ් පාලනය කළ නොහැකිය. රජයේ තනතුරුවල ධුරාවලියක් ඇත්තේය. කැබිනට් මණ්ඩලය හෙවත් විධායකය ඉන්නේ රජයේ තනතුරුලාභීන්ටත් ඉහළින්ය. කොවිඩ් මර්දන කටයුත්ත මේ තාක් අසාර්ථක වීමට අනිවාර්යෙන්ම එය බලපා තිබෙනවා විය හැකිය.
අද එය හොඳටම පෙනෙන්නේ ඉදිරියේදී ජනතාව සෞඛ්‍ය පුරුදු අත්හැරියොත් ඉන්දියානු කොවිඩ් ප්‍රභේදය භයානක ලෙස පැතිර යා හැකි බව වෛද්‍ය විශේෂඥයන් අනතුරු අඟවා ඇතැයි රට විවෘත කිරීමෙන් පසු රාජ්‍ය ඇමති සුදර්ශනී ප්‍රනාන්දුපුල්ලේට කියන්නට සිදුවීමෙන්ය.
කොවිඩ් වසංගතය යනු රටේ අභ්‍යන්තර යුද්ධයක් හෝ බාහිර යුද්ධයක් නොවේ. එය සෞඛ්‍ය වසංගත තත්වයකි. ඒ සඳහා පිළියම් ඇත්තේ යුද ශිල්පවල නොවේ. සෞඛ්‍ය පිළිබඳ විශේෂඥයන්ගේ දැනුම හා අත්දැකීම අනුවය. මේ වැනි වසංගත තත්වයකදී හෝ වෙනත් ආපදා තත්වයකදී හමුදාව අවශ්‍ය වන්නේ සහායක බළඇණියක් වශයෙන්ය. නැතහොත් පෙරමුණ ගැනීමට නොවේ.
ආණ්ඩුවේ වුවමනාව හෝ වෙනත් හේතුවක් නිසා දෛනික කොවිඩ් මරණ සංඛ්‍යාව ඉදිරිපත් කිරීමේදී පෙර දිනයන්ද සමඟ එම සංඛ්‍යා ඉදිරිපත් කිරීම සිදුවූයේ ජනාධිපතිවරයා එය දකින්නට පෙරය. කොවිඩ් බලකායේ ප්‍රධානී හමුදාපතිවරයාට ඒ තෙක්ම එය හසුවී නොතිබුණේ මේ විශේෂඥතාව පිළිබඳ ප්‍රශ්නය නිසාය. කොහොමත් හමුදාපතිවරුන් හෝ හමුදා ඇඳුම් ප්‍රධානත්වයේ ලා සලකන පාලනයක් රටකට අවශ්‍ය නැත. එවැනි පාලනයන් ප්‍රජාතන්ත්‍රවාදී පාලනයන් වන්නේ නැත. වර්තමානයේ අප රට තුළ සිදුවෙමින් පවතින්නේද එයය. නියෝජිත ප්‍රජාතන්ත්‍රවාදී මාවතට පිවිසි සරත් පොන්සේකා මහතාට සිවිල් පරිපාලනය ඇලජික් බව මේ ප්‍රකාශවලින් පෙනේ.■
