එළැඹෙන අගෝස්තු මාසයට නියමිත මහනුවර දළදා පෙරහැර සියලු අංගෝපාංගයන්ගෙන් සමන්විතව හා එය නැරඹීම සඳහා මහජනතාවට අවස්ථාව ලබාදෙමින් පැවැත්වීමට තීරණය කර ඇත.
ඒ අනුව දළදා පෙරහැර සඳහා සහභාගිවන කලාකරුවන් ඇතුළු අනිකුත් පිරිස එන්නත්කරණය දළදා මාලිගාවේ බහුකාර්ය ගොඩනැගිල්ල තුළ මේ වනවිට ආරම්භ වී තිබේ.
මේ සම්බන්ධයෙන් කරන ලද විමසීමකදී දළදා මාලිගාවේ දියවඩන නිලමේ ප්‍රදීප් නිලංග දෑල පැවසුවේ අගෝස්තු 13 දින සිට 23 දින දක්වා දළදා පෙරහැර පැවැත්වීමට සියලු කටයුතු සූදානම් කර ඇති බවයි. පෙරහැර පවත්වන්නේ ජෛව බුබුලක් තුළද යන්න පිළිබඳව විමසීමේදී දෑල මහතා පැවසුවේ දැනට එවැනි තීරණයක් නැති බවත් දළදා පෙරහැර සාමාන්‍ය ලෙස පවත්වන බවත්ය. එමෙන්ම ඔහු පැවසුවේ ලොකු අවදානමක් නොමැතිව පෙරහැර පැවැත්විය හැකි බවත් පෙරහැරට සහභාගිවන සියලු දෙනාට කොවිඩ් ප්‍රතිශක්තිකරණ එන්නත් දෙකම පෙරහැර දිනයට දින 14කට පෙර ලබාදීමට කටයුතු කරන බවත්ය. ඒ යටතේ මේ වනවිටත් 3000ක පමණ පිරිසකට පළමු එන්නත්කරණය කර ඇතැයි ඔහු පැවසීය. පෙරහැර නැරඹීම සඳහා මහජනයාටත් අවස්ථාව ලබාදෙනවාදැයි කළ විමසීමේදී ඔහු පැවසුවේ පෙරහැර නැරඹීමට මිනිසුන් ආවොත් එය ප්‍රශ්නයක් නොවන බවත් මහනුවර ජනතාව මේ වනවිට කොවිඩ් එන්නත්කරණයට ලක්කර ඇති බවත්ය. (රට තුළ දෙවන වටයේ එන්නත්කරණයේදී මහනුවර දිස්ත්‍රික්කයට ආණ්ඩුව ප්‍රමුඛතාව ලබාදෙන ලදි.)
ජුනි 25 දින ජාතිය ඇමතීමෙන් පසු ජනාධිපතිවරයා ජුනි 26 දින මහනුවර ගොස් මහානාහිමිවරුන්, අනුනාහිමිවරුන් හා දළදා මාලිගාවේ දියවඩන නිළමේ හමුවී සාකච්ඡා කර ඇති අතර එහිදී විශේෂයෙන්ම දළදා පෙරහැර පැවැත්වීම ගැන සාකච්ඡා කර ඇත. ජනාධිපතිවරයා බලයට පත්වීමෙන් පසු ජනතා සහභාගිත්වයෙන් යුතු දළදා පෙරහැරක් නොපැවැත්වීම වත්මන් අර්බුදවලට හේතුව බවත් ඒ නිසා ජනතා සහභාගිත්වයෙන් යුතු පූර්ණ දළදා පෙරහැරක් පවත්වන ලෙස අනුරාධපුරයේ ශාස්ත්‍ර කියන්නියක දුන් උපදෙස් අනුව මේ ආකාරයට දළදා පෙරහැර පැවැත්වීමට තීරණය කර ඇති බවත් දළදා මාලිගාවට සම්බන්ධ අපගේ මූලාශ්‍රයක් පැවසීය.
කොවිඩ් වසංගතය හේතුවෙන් පසුගිය වසරේ දළදා පෙරහැර වීදි සංචාරය කර තිබුණේ අංගෝපාංග අඩුකර සීමිත පිරිස පිරිසකගේ සහභාගිත්වයෙන් පොලිස් ආරක්ෂාව මාධ්‍යයේය. එය නැරඹීම සඳහා මහජනයාට අවස්ථාව ලබාදී නොතිබුණ අතර රූපවාහිනිය මගින් පමණක් විකාශය කරනු ලැබීය.
කොවිඩ් වසංගතය හේතුවෙන් වසා තිබුණු රට මේ වන විට විවෘත කර ඇතත් විශාල පිරිසක් සහභාගිවන ආගමික උත්සව ඇතුළු කිසිදු උත්සවයකට ඒ සම්බන්ධයෙන් නිකුත් කර ඇති උපදෙස් අනුව අවසර නැති අතර ජුලි 02 පැවැත්වීමට නියමිත කතෝලික ජනයාගේ විශේෂ උත්සවයක් වන මඩු මංගල්‍යය සඳහා සහභාගිවීමට අවස්ථාව ලබාදී තිබුණේ 30 දෙනෙකුට පමණය. ඒ, ඒ සම්බන්ධයෙන් සෞඛ්‍ය හා ආරක්ෂක අංශවල සහභාගිත්වයෙන් පැවති සාකච්ඡාවකදීය.■
