අභියාචනාධිකරණය: ‘ශානි අබේසේකර බොරු සාක්ෂි ගෙතුවේ යැයි කියා පැමිණිල්ලක් දැමීමට (2014 සිට) සෑම හැකියාවක්ම තිබියදීත් (2020 දක්වා) එය කිරීමට අසාමාන්‍ය සහ සුවිශේෂ ලෙස ප්‍රමාදවීම මඟින් පෙන්නුම් කරන්නේ ඔහුට එරෙහි චෝදනා අසත්‍යකරණයේ හා අලංකරණයේ ප්‍රතිඵලයක් මෙන්ම, පසුව හිතාමතා කරන ලද චෝදනා බවය.’
අපරාධ පරීක්ෂණ දෙපාර්තමේන්තුවේ හිටපු අධ්‍යක්‍ෂ ජ්‍යෙෂ්ඨ පොලිස් අධිකාරි ශානි අබේසේකර සහ පොලිස් පරීක්ෂක සුගත් මෙන්ඩිස් ඇප මත මුදාහරින ලෙස ජුනි 16 වැනිදා අභියාචනාධිකරණය නියම කළේය. එම තීරණය දෙන ලද්දේ අභියාචනාධිකරණ විනිසුරුවරුන් වන බන්දුල කරුණාරත්න හා රංජිත් ගුරුසිංහ විසිනි.
ඇප ලබාදීමට හේතු දක්වන අභියාචනාධිකරණ තීරණයෙන් පැහැදිලි වන ප්‍රධානතම කාරණය නම්, ශානි අබේසේකර හා සුගත් මෙන්ඩිස් යන දෙදෙනා, මෙපමණ කාලයක්, එනම් මාස දහයක පමණ කාලයක් රක්‍ෂිත බන්ධනාගාරගත කර තිබුණේ අභූත චෝදනා මතය යන්නයි. අභියාචනාධිකරණය හරියටම ඒ ගැන කියන්නේ මෙසේය. ‘ශානි අබේසේකර බොරු සාක්ෂි ගෙතුවේ යැයි කියා පැමිණිල්ලක් දැමීමට (2014 සිට) සෑම හැකියාවක්ම තිබියදීත් (2020 දක්වා) එය කිරීමට අසාමාන්‍ය සහ සුවිශේෂ ලෙස ප්‍රමාදවීම මඟින් පෙන්නුම් කරන්නේ ඔහුට එරෙහි චෝදනා අසත්‍යකරණයේ හා අලංකරණයේ ප්‍රතිඵලයක් මෙන්ම, පසුව හිතාමතා කරන ලද චෝදනා බවය.’
‘එම අසාමාන්‍ය හා සුවිශේෂ ප්‍රමාදය හේතුවෙන්, ශානිට එරෙහි පැමිණිල්ලට ස්වයංසිද්ධතාවේ (කෘත්‍රිම
පෙළඹවීමක් නොමැතිව සිදුවීමේ) වාසිය අහිමි වී තිබේ. එපමණක් නොවේ, සෑහීමට පත්වන ලෙස හා විශ්වාස කළ හැකි ලෙස එම ප්‍රමාදය ගැන පැහැදිලි කිරීමටද (නීතිපති) අපොහොසත් වී ඇත. පැමිණිල්ලේ සාක්ෂිකරුවන් 2020 දුන් ප්‍රකාශ හා 2014දී දුන් ප්‍රකාශවලට පරස්පර වන බව සක්සුදක් සේ පැහැදිලිය.’
අභියාචනාධිකරණ තීරණයේ ඇතුළත් කරුණු තවදුරටත් තේරුම් ගැනීමට පහසු වීම සඳහා, ශානිට චෝදනා එල්ල කරන්නට පදනම් කරගත් හිටපු නියෝජ්‍ය පොලිස්පති වාස් ගුණවර්ධන, ඔහුගේ පුත් රවිඳු ගුණවර්ධන හා හිටපු පොලිස් නිලධාරීන් කිහිප දෙනකු මරණ දණ්ඩනයට නියම කැරුණු මිනීමැරුම් නඩුව ගැන දැනසිටීම ප්‍රයෝජනවත් වෙයි.
මොහොමඩ් ෂියාම් ඝාතනය
වාස් ගුණවර්ධන ප්‍රමුඛ පිරිස වරදකරුවන් කැරුණේ මුස්ලිම් ව්‍යාපාරිකයකුගෙන් රුපියල් ලක්ෂ 10ක ගාස්තුවක් ලබාගැනීම සඳහා තවත් මුස්ලිම් ව්‍යාපාරිකයකු වන මොහොමඩ් ෂියාම් පැහැරගෙන ගොස්, 2013 මැයි 22 දින ඝාතනය කිරීමේ අපරාධයටය. ෂියාම්ගේ මස්සිනා එවකට ජනාධිපති මහින්ද රාජපක්ෂගේ හිතවතෙකි. ඔහු ඇතුළු පවුලේ ඥාතීහු ජනාධිපතිවරයා හමුවී ඝාතනය ගැන සාධාරණ විමර්ශනයක් පවත්වන ලෙස ඉල්ලා සිටියෝය. ඒ අනුව, 2013 වෙසක් පෝය දින, එවකට පොලිස්පති එන්කේ ඉලංගකෝන් සහ සීඅයිඩීය භාර ජ්‍යෙෂ්ඨ නියෝජ්‍ය පොලිස්පති රවි සෙනෙවිරත්න අරලියගහ මන්දිරයට කැඳවූ ජනාධිපති මහින්ද, මෙම විමර්ශනය සීඅයිඩීයේ ‘වැනෙන්නේ නැති’ දක්ෂ නිලධාරියකුට බාරදෙන ලෙස නියම කෙළේය. රවි සෙනෙවිරත්න මහතා එවිට කීවේ, එවැනි සුදුස්සකු සීඅයිඩීයේ සිටී නම් ඒ ශානි අබේසේකර බවයි. පසු දිනෙක පොලිස්පතිවරයා හා සෙනෙවිරත්න මහතා, ශානි අබේසේකර කැඳවා ෂියාම් ඝාතනයේ විමර්ශන කටයුතු බාරගන්නා ලෙස ඉල්ලා සිටියහ.
බාරගන්න බැහැ
ශානි අබේසේකර ගත් කටටම කිව්වේ, එම විමර්ශනය තමන්ට බාරගත නොහැකි බවයි. ‘අඟුලාන සිද්ධිය ගැන විමර්ශන කළ නිසා පොලිසියේ බාගයක් මං එක්ක දැන් තරහයි. ඒ නිසා මට ඕක බාරගන්න බැහැ.’ ශානි තිර හඬින් කීවේය. අඟුලාන සිද්ධිය යැයි ශානි කීවේ, 2009 අගෝස්තු 11 වැනිදා, අඟුලාන පොලිසියේ අත්අඩංගුවේ සිටි තරුණයන් දෙදෙනකුට වෙඩි තබා ඝාතනය කිරීමේ අපරාධය සම්බන්ධයෙන් අඟුලාන පොලිසියේ පොලිස් නිලධාරීන්ට එරෙහිව පැවැත්වුණු විමර්ශනය ගැනය. (එම අපරාධයට අදාළ නඩුවේ ත්‍රිපුද්ගල මහාධිකරණ විනිසුරු තීන්දුව අනුව පොලිස් නිලධාරීන් හතර දෙනකුට මරණ දඬුවම නියම වූ අතර, විමර්ශන ඉතාමත් දක්ෂ අන්දමින් කිරීම ගැන ශානි අබේසේකර මහාධිකරණ විනිසුරුවරුන්ගේ විශේෂ ගරු සඳහන් කිරීමකට ලක්විය.) ‘මේක බාරනොගෙන ඉන්න බැහැ. ජනාධිපතිතුමාට අපි ශානිගේ නම දැනුම්දීලායි ආවේ.’ සෙනෙවිරත්න හා පොලිස්පති ශානිට කීවෝය.
වාස්ගෙන් මරණ තර්ජන
ෂියාම් ඝාතනය ගැන විමර්ශන ශානි වෙත පැවරෙන්නේ ඒ ආකාරයටය. ශානි විමර්ශන කටයුතු කරද්දී, නියෝජ්‍ය පොලිස්පති වාස් ගුණවර්ධන මිනීමැරුමට සම්බන්ධ බවට තොරතුරු ලැබිණ. ඒ අනුව ඔහුගෙන් හා සම්බන්ධ අනෙක් පොලිස් නිලධාරීන්ගෙන් ෂියාම් ඝාතනය ගැන ප්‍රකාශ සටහන් කරගන්නට ශානිට අවශ්‍ය වූ නමුත්, සිය ඉහළ පොලිස් බලය පාවිච්චි කරමින් වාස් ගුණවර්ධන ප්‍රකාශ දීම මගහරිමින් සිටියේය. අවසානයේ, ඔවුන්ට එරෙහිව අධිකරණ නියෝග ලබාගන්නා බවට දැනුම් දීමෙන් පසුය, වාස් ගුණවර්ධන ප්‍රකාශය දීමට පැමිණියේ.
එහෙත්, 2013 ජුනි 13 වැනිදා, ප්‍රකාශය දෙන අතරතුරේදී වාස් ගුණවර්ධන ප්‍රකාශය සටහන් කරගත් ශානිට, අසභ්‍ය වචනයෙන් බැන, ඔහු මරා දමන බවට තර්ජනය කළේය. ‘ශානි මං මිනීමරුවෙක්. උඹට හැමදාම මාව ඇතුළෙ තියන්න බැහැ. මං එළියට ආවාම උඹලා ඔක්කොටම මොකද වෙන්නේ කියලා බලාගනිං.’ ඒ තර්ජනයයි.
(මේ මරණ තර්ජනය ගැන ශානි කළ පැමිණිල්ලට අනුව කොළඹ මහාධිකරණය ඉදිරියේ වාස් ගුණවර්ධනට එරෙහිව නඩු පැවරුණේය. එය 2018දී අවසන් විය. මහාධිකරණ විනිසුරු ගිහාන් කුලතුංග විසින් එහිදි වරදකරු කරන ලද වාස් ගුණවර්ධනට අවුරුදු පහක බරපතළ වැඩ ඇති සිරදඬුවමක් නියම විය.)
සීසීටීවි දර්ශන අනුව, ෂියාම් කොළඹදී පැහැර ගැනෙන්නේ වාස් ගුණවර්ධනට අයත් වාහනයකිනි. ෂියාම් පැහැරගන්නා විට රවිඳු ගුණවර්ධන රියැදුරු අසුනේ සිටියේය. ත්‍රිපුද්ගල විනිසුරු මහාධිකරණ නඩු විභාගයෙන් වාස් ගුණවර්ධන ඇතුළු විත්තිකරුවෝ වරදකරුවන් කරනු ලැබ 2015දී මරණීය දණ්ඩනයට නියම වූහ. වාස් ගුණවර්ධන තීන්දුවට එරෙහිව අභියාචනය කරන ලදුව දැන් එය ශ්‍රේෂ්ඨාධිකරණය ඉදිරියේ විභාග වෙමින් තිබේ.
ආයුධ ගබඩාවක්
ෂියාම් ඝාතනය ගැන විමර්ශන කරගෙන යන අතරතුර වාස් ගුණවර්ධනගේ නිවසෙහි සිටි සේවකයන්ගෙන් තවත් තොරතුරක් ලැබිණ. එනම්, වාස් ගුණවර්ධනගේ නිවසේ තිබුණු ආයුධ සමූහයක්, එතැනින් ඉවත්කොටගෙන පොලිස් වාහනයක පටවාගෙන ගොස් කලගෙඩිහේන ප්‍රදේශයේ ඌරු කොටුවක වළලා ඇති බවත්, එම ආයුධ වාස් ගුණවර්ධනගේ නිවෙසින් පිටකර ඇත්තේ ඔහුගේ පොලිස් කාර්යාලයේ සේවයේ නියුතු පොලිස් පරීක්ෂක නිරෝෂ් චමින්ද විල්ලවආරච්චි විසින් බවත්ය.
තොරතුරු හඹාගිය සීඅයිඩීයේ පොලිස් පරීක්ෂක නිශාන්ත සිල්වා (ඔහු මේ වන විට විදේශගතව සිටියි.) ඇතුළු පිරිසට 2014 මැයි මාසයේදී කළගෙඩිහේන ඌරු කොටුවක වළලා තිබූ දැවැන්ත ආයුධ තොගයක් හමුවිය. ඒ සම්බන්ධයෙන් විමර්ශන තොරතුරු නීතිපතිට හා කොටුව මහේස්ත්‍රාත්වරයාට වාර්තා කරන ලදි. නීතිපති උපදෙස් පරිදි අත්අඩංගුවට ගැනීම් හා වැඩිදුර විමර්ශන සිදුවිය.
ඒ අතර, ඌරු කොටුව හිමි ප්‍රියන්ත නැලිගම යුවල අත්අඩංගුවට ගන්නා ලෙස ගම්පහ මහේස්ත්‍රාත්වරයා නියම කළ අතර, නීතිපති දෙපාර්තමේන්තුව කළේ, අත්අඩංගුවට ගැනීමට කළ මහේස්ත්‍රාත් නියෝගය වෙනස් කරවා ගැනීමට මහාධිකරණයට ප්‍රතිශෝධන ඉල්ලීමක් කිරීමයි. එය මහාධිකරණය විසින් ප්‍රතික්ෂේප කරනු ලැබිණ. නීතිපති දෙපාර්තමේන්තුවෙන් සීඅයිඩීයට උපදෙස් ලැබුණේ, කොටුව හිමි නැලිගම දෙපළ රජයේ සාක්ෂිකරුවන් කිරීමටය.
2014දී විල්ලවආරච්චි හා නැලිගම සීඅයිඩීයට ප්‍රකාශ දෙමින් සඳහන් කෙළේ, ආයුධ ඌරු කොටුවේ සඟවන්නට නියම කෙළේ වාස් ගුණවර්ධන බවය. මේ සිද්ධිය ගැන නැලිගම, විල්ලවආරච්චි හා ……. 2013දී මහේස්ත්‍රාත්වරයෙකු ඉදිරිපිට ප්‍රකාශ කළේ, වාස් ගුණවර්ධනට අයත් ආයුධ ප්‍රමාණයක් තමන් යම් තැනක වළලා ඇති බවයි. මේ ප්‍රකාශය 2015 දීත් මේ තුන්දෙනා මහාධිකරණ නඩු විභාගයේදී දිවුරුම් පිට සාක්ෂි හැටියට දුන්හ. ශානි අබේසේකරගේ බලපෑම හෝ බලහත්කාරය මත ඒ ප්‍රකාශ දෙන්නේයැයි කියාවත්, එම ආයුධ හංගන්නට තමන්ට දුන්නේ ශානි අබේසේකර යැයි කියාවත් ඔවුහු එහිදී නොකීවෝය.
2019 නොවැම්බරයේ දේශපාලන වෙනස සිදුවිය. ගෝඨාභය රාජපක්‍ෂ මහතා ජනාධිපති විය. 2020දී මේ පිරිස අලුත් ප්‍රකාශයක් කොළඹ අපරාධ කොට්ඨාසයට දුන්හ. එවිට කීවේ, ඌරු කොටුවේ හංගන්නට ආයුධ තමන්ට දුන්නේ ශානි අබේසේකර බවයි. ඒ සිද්ධියෙන් අවුරුදු හතකට පසු මෙන්ම අවස්ථා කිහිපයකදීම අධිකරණය ඉදිරියේ ප්‍රකාශ හා දිවුරුම් පිට සාක්ෂි ලබාදීමෙන් පසුවය. 2020 ජුලි මස, ශානි අබේසේකර රක්‍ෂිත බන්ධනාගාරගත කළේ මේ ප්‍රකාශ අනුවය.
එම ආයුධ තොගය දැවැන්ත එකකි. ටී56 ගිනිඅවි 6ක්, ජීව උණ්ඩ, ගල් කටස්, ආර්පීජී උණ්ඩ ආදිය එහි තිබිණ. එම ආයුධ තොගය ගැන වාස් ගුණවර්ධනගේ (ෂියාම් ඝාතනය පිළිබඳ) මහාධිකරණ නඩුවේදී සඳහන් වුණ විට විනිසුරුවරුන් පවා කිව්වේ ‘ඒක පුංචි ආමරියක් (ආයුධ ගබඩාවක් ) වගේනේ’ කියාය. එම නඩුවේදී විත්තිකූඩුවේ සිට ප්‍රකාශයක් කළ වාස් ගුණවර්ධන, අදාළ ආයුධ තමාගේ බව පිළිගෙන තිබේයැයි දැනගන්නට ඇත. එල්ටීටීයෙන් අල්ලාගත් ආයුධ තමන් ලබාගත් බවත් ඔහු කියූ බවට දැනගන්නට තිබේ. එම ආයුධ තොගයෙන් ටී56 තුනක්, මහවිලච්චිය සහ තන්තිරිමලේ පොලිස් ස්ථානවලින් වාස් ගුණවර්ධන නීති විරෝධී ලෙස ලබාගත් ඒවා බවටද තොරතුරු තිබේ. ඒ සම්බන්ධයෙන් එම පොලිස් ස්ථානාධිපතිවරුන්ට විරුද්ධව විමර්ශනයක් පවත්වා ඇති බවත්, විනය පරීක්ෂණ දැනට පැවැත්වෙන බවත් වාර්තා වෙයි.
ශානි අබේසේකර, අත්අඩංගුවට ගන්නේ ඉහත කී පරිදි 2020දී දුන් අලුත් ප්‍රකාශය හෙවත් කටඋත්තරය නිසාය.
ජුනි 16 දුන් අභියාචනාධිකරණ තීරණයේ මෙසේ සඳහන් වෙයි.
‘පෙත්සම්කරු (මේ ශානි අබේසේකරගේ බිරිඳයි) පවසන්නේ සැකකරු (ශානි අබේසේකර)ට එරෙහි චෝදනාව පදනම් වී ඇත්තේ පොලිස් පරීක්ෂක විල්වලආරච්චිගේ ප්‍රකාශය සහ අසංග නැලිගමගේ සිද්ධිය පදනම් කරගෙන බවයි. (මෙතැන් සිට නැලිගම ලෙස හඳුන්වනු ලැබේ.) බොරු නඩුවක් නිර්මාණය කිරීම සඳහා ඔවුහු සාක්ෂි ගෙතූහ. ආයුධ සමූහය සමන්විත වූයේ, ටී56 ගිනිඅවි 6ක්, 38 රිවෝල්වර් 1ක්, පිස්තෝල 2ක්, හිස් මිමී9 උණ්ඩ කොපු 11ක්, හිස් මිමී 9/19 කොපු 10ක්, 8.5 උණ්ඩ කොපු 303ක්, 7.62 උණ්ඩ කොපු 215ක්, බෝර 12 තුවක්කු 4ක්, වායු රයිපල 3ක්, රිපීටර් තුවක්කු 1ක්, ටී56 උණ්ඩ 2ක්, ආර්පීජී උණ්ඩ අසුරණ 3ක්, කිලෝ ග්‍රෑම් 5.58 චාජරය සහිත කොළ පැහැති ක්ලෙමේා් බෝම්බයක්, අත් බොම්බ 1ක් යනාදියෙනි.
පෙත්සම්කරු සඳහන් කරන්නේ 01 වැනි පැමිණිලිකාර වගඋත්තරකරුගේ විරෝධතාවලින් පහත තොරතුරු ඉදිරිපත් කර ඇති බවයි.
(අ) 2013.05.22 දින මොහොමඩ් ෂියාම් පැහැරගෙන ගොස් ඝාතනය කිරීම සම්බන්ධයෙන් කොළඹ ප්‍රධාන මහේස්ත්‍රාත් අධිකරණ නඩු අංක ඊ/3279/05/2013 යටතේ රහස් පොලිසිය පරීක්ෂණ පවත්වා තිබේ.
(ආ) හිටපු නියෝජ්‍ය පොලිස්පති වාස් ගුණවර්ධනගේ නිවසේ හා කාර්යාලයේ සේවය කරමින් සිටි පොලිස් කොස්තාපල් ඩයස් සහ පොලිස් කොස්තාපල් සමීර සුසන්ත, 2013 නොවැම්බර් 11 සහ 18 යන දිනවල සීඅයිඩීයට ස්වේච්ඡාවෙන් පැමිණ හා 2013.06.04 දින උගත් මහේස්ත්‍රාත්වරයා ඉදිරියේදී ‘ෂියාම් ඝාතනයට යොදාගත් ගිනි අවි කිහිපයක් පොලිස් පරීක්ෂක විල්වලආරච්චි වාහනයක රැගෙන ආ බවට’ ප්‍රකාශ ලබාදී තිබේ.
(ඇ) පොලිස් කොස්තාපල් ඩයස්, පොලිස් කොස්තාපල් සමීර සුසන්ත සහ පොලිස් පරීක්ෂක විල්වලආරච්චි යන අයගේ ප්‍රකාශයන්ට අනුව, මෙම නඩුවේ සැකකරු (ශානි අබේසේකර) සහ සෙසු විමර්ශන නිලධාරීන් විසින් ඉහත ආයුධ නැලිගමට අයත් කලගෙඩිහේනේ ඉඩමක මඩුවක තිබී සොයාගෙන තිබේ.
(ඈ) පොලිස් පරීක්ෂක විල්වලආරච්චි 2014.03.03 සිට රැඳවුම් නියෝග මත රඳවා තබා තිබේ.
(ඉ) 2014.05.27 වැනිදා ඉහත ආයුධ පිළිබඳ උද්ධෘත සීඅයිඩීය විසින් නීතිපති වෙත ඉදිරිපත් කර ඇත. ඉන්පසුව නීතිපති උපදෙස් ගොනුවක් විවෘත කර ආයුධ රජයේ රස පරීක්ෂක වෙත යවා ඇත.
(ඊ) පොලිස් පරීක්ෂක විල්වලආරච්චි 2014.03.03 දින සිට මාස තුනක් පමණ රඳවාගෙන තිබේ. ඉන්පසු නීතිපති උපදෙස් මත 2014.05.30 දින නිදහස් කර ඇත.
(උ) පොලිස් කොස්තාපල් ඩයස්, පොලිස් කොස්තාපල් සමීර සුසන්ත, අසංග නැලිගම සහ චිරන්ති සංජීවනී (නැලිගමගේ බිරිඳ) අත්අඩංගුවට ගෙන අධිකරණයට ඉදිරිපත් කරන ලෙස 2014.03.04 දින මහේස්ත්‍රාත් අධිකරණය විසින් සීඅයිඩීයට නියෝග කරනු ලැබ තිබේ.
(ඌ) මහේස්ත්‍රාත්ගේ 2014.03.04 දින එම නියෝගයට අදාළව මහාධිකරණයේ ප්‍රතිශෝධන නඩුවක් තිබුණි. මූලික විරෝධතා මතු කිරීමෙන් පසු එය 2017.06.30 දින මහාධිකරණය විසින් නිෂ්ප්‍රභ කරන ලදී.
(එ) එහි ප්‍රතිඵල වශයෙන් පොලිස් කොස්තාපල් ඩයස්, පොලිස් කොස්තාපල් සමීර සුසන්ත, අසංග නැලිගම සහ චිරන්ති සංජීවනී යන අය අත්අඩංගුවට ගන්නා ලෙස නීතිපති 2019.12.09 දින සීඅයිඩීයට උපදෙස් දී තිබේ. මේ කාලය වන විට වර්තමාන නඩුවේ සැකකරු (ශානි අබේසේකර) රහස් පොලිසියේ සිට ගාල්ල නියෝජ්‍ය පොලිස්පති කාර්යාලයට මාරුකර යවා තිබේ.
(ඒ) 2020.06.03 දින පොලිස් කොස්තාපල් සමීර සුසන්ත සහ කොස්තාපල් ඩයස් නිදහස් කරන ලෙස නීතිපතිවරයා යළිත් වරක් සීඅයිඩීයට උපදෙස් දී අතර, ඒ අනුව 2020.06.03 දින ඔවුන් නිදහස් කර තිබේ. නීතිපතිවරයා යළිත් වරක් 2020.06.11 දින අසංග නැලිගම සහ චිරන්ති සංජීවනී ද නිදහස් කරන ලෙස උපදෙස් දී ඇති අතර, ඔවුන් පිළිවෙළින් 2020 ජුනි 15 සහ 12 යන දිනවල නිදහස් කර තිබේ.
(ඔ) අසංග නැලිගම සහ චිරන්ති සංජීවනී යන අය නීතිඥවරයෙකු මගින් 2020.06.09 දින සීඅයිඩීයට ඉදිරිපත් වීමෙන් පසු ඔවුන්ගෙන් ප්‍රකාශ සටහන් කරගෙන ඇත. එම ප්‍රකාශවලදී, නැලිගමගේ ඉඩමට ආයුධ ගෙනැවිත් දමා ඡායාරූප ගෙන බොරු සාක්ෂි ගෙතූ බවට, අසංග නැලිගම සහ චිරන්ති සංජීවනී ශානි අබේසේකරට සහ පොලිස් පරීක්ෂක විල්වලආරච්චි ඇතුළු විමර්ශන නිලධාරීන්ට එරෙහිව චෝදනා නගා තිබේ.
(ඕ) තමා හා පොලිස් පරීක්ෂක විල්වලආරච්චි අතර ඇතිවූ දූරකථන සංවාදයක් අසංග නැලිගම ඉදිරිපත් කර තිබේ.
(ක) එම ප්‍රකාශයන් මත ශානි අබේසේකර 2020.07.31 දින අත්අඩංගුවට ගනු ලැබීය.
පෙත්සම්කරු සඳහන් කරන්නේ 2020.07.29 දින සිට විමර්ශන කර ඇති අතර සාක්ෂිකරුවන් 09 දෙනෙකුගේ ප්‍රකාශ සටහන් කර ඇති බවයි. එහෙත්, සාක්ෂිකරුවන් පස් දෙනෙකුගේ ප්‍රකාශයන් මත පමණක් සැකකරුට එරෙහිව නඩුව පවරා ඇත. එනම්, දිලිප් අසංග නැලිගම, චිරන්ති සංජීවනී, ඉරෝෂ් චමින්ද විල්වලආරච්චි, සමරපාල ඩයස් සමරතුංග සහ සමීර සුසන්ත.
පෙත්සම්කරු තවදුරටත් සඳහන් කරන්නේ, මහේස්ත්‍රාත්වරයාගේ 2015.03.04 දිනැති නියෝගයට අදාළව නීතිපතිගේ ප්‍රතිශෝධන අයැදුම්පත, මූලික විරෝධතා මතු කිරීමෙන් පසු 2017.06.30 දින නිෂ්ප්‍රභ කළ බවයි. මහේස්ත්‍රාත් නියෝගය අනුව ඉහත පුද්ගලයන් 4 දෙනා අත්අඩංගුවට ගත් බවත් පෙත්සම්කරු කියයි. මේ අනුව, මේ පිරිස අත්අඩංගු-වට නොගැනිම ගැන ශානි අබේසේකරගේ වරදක් සොයාගරැත නොහැකි බව පෙත්සම්කරු කියයි.
2020.12.09 දින නීතිපති දෙපාර්තමේන්තුවේ උපදෙස් ලැබෙන විට පෙත්සම්කරුගේ ස්වාමිපුරුෂයා (ශානි අබේසේකර) ඇතුළු සැකකරුවන් සිව්දෙනා රහස් පොලිසියේ සිට වෙනත් විවිධ අංශවලට මාරු කර තිබුණු බව පෙත්සම්කරු කියයි. සැකකාර නිශාන්ත සිල්වා විදේශගතවී ඇත්තේ මේ කියන විමර්ශන ආරම්භ කිරීමට සහ පැමිණිල්ල ඉදිරිපත් කිරීමට මාස කිහිපයකට පෙර බවත්, නිශාන්ත සිල්වා රට හැර යන විට ඔහුට විදේශගත වීමේ කිසිදු තහනමක් නොතිබුණු බවත් පෙත්සම්කරු කියයි.
පෙත්සම්කරු තවදුරටත් කියා සිටින්නේ 2020දී එම සාක්ෂිකරුවන් පස්දෙනා දුන් ප්‍රකාශ 2014දී ඔවුන් දුන් ප්‍රකාශවලට සම්පූර්ණයෙන්ම පරස්පර බවයි.
2020දී ඩයස් කළ ප්‍රකාශය 2014දී කළ් ප්‍රකාශයට සමාන නොවේ. සංජීවනී වික්‍රමසිංහගේ නිවසේ සිටියදී සීඅයිඩීය විසින් තමා පැහැරගෙන ගිය බව ඔහු සඳහන් කර ඇත. සංජිවනී ෂියාම්ගේ ඝාතනයට වාස් ගුණවර්ධන සමඟම වරදකරු කරනු ලැබූ සරත්චන්ද්‍රගේ සමීපතම මිතුරියකි. 2020දී සමීර සුසන්ත ප්‍රකාශ කර ඇත්තේ 2014දී සිය ප්‍රකාශය ලබාදුන්නේ සීඅයිඩීයට බයෙන් බවයි. එහෙත් අවසානයේ අධිකරණයෙන් විශේෂ ඉල්ලීමක් කරමින්, ‘වාස් ගුණවර්ධන නියෝග කළ විට තමා ආයුධ මෝටර් රථයට දැමූ බව’ක් ඔහු සඳහන් කර තිබේ.
තන්තිරිමලේ සහ විලච්චිය පොලිස් ස්ථානවලින් කෙලින්ම වාස් ගුණවර්ධනට ලබා දුන් ආයුධ දෙකක් තිබුණු බව අනාවරණය වූ අතර, පොලිස් ස්ථානවලින් ආයුධ ලබාදීම සම්බන්ධයෙන් එම ස්ථානාධිපතිවරුන්ට එරෙහිව චෝදනා පත්‍ර ලබාදී සහ විනය පියවර ගෙන තිබේ. 2014දී සීඅයිඩීය විසින් මේ බව කොළඹ මහේස්ත්‍රාත් අධිකරණයට සහ නීතිපතිට වාර්තා කරන ලදි. මෙම ආයුධ වාස් ගුණවර්ධන බාරයේ තිබූ බව කොළඹ අපරාධ කොට්ඨාසය සහ නීතිපති දන්නා බව පෙත්සම්කරු කියයි.
ආයුධ කිහිපයක් වාස් ගුණවර්ධනගේ බාරයේ තිබී ඇති බව තහවුරු කරනු ලැබිණි. තන්තිරිමලේ සහ විලච්චිය සිද්ධියට අදාළ සාක්ෂිවලට අමතරව, වාස් ගුණවර්ධන විසින්ම නඩුවට අදාළව ප්‍රකාශ ලබාදෙමින් සඳහන් කර ඇත්තේ එල්ටීටීඊයට එරෙහි යුද්ධයෙන් පසු සොයාගත් ආයුධ තිබුණු බවයි. ඒ බව නඩුවේ තීන්දුවේද සඳහන් කර ඇත.
පෙත්සම්කරු සඳහන් කරන්නේ විල්වලආරච්චි, අසංග නැලිගමගේ මිතුරෙකු වන අතර, ඔහුගේ බිරිඳ චිරන්ති සංජීවනී බවය. විල්වලආරච්චි, ඩයස් සහ සුසන්ත, හිටපු නියෝජ්‍ය පොලිස්පති වාස් ගුණවර්ධනගේ සමීපතම සහායකයෝ ය. ඩයස්ගේ ප්‍රකාශයෙන් පැහැදිලි වන්නේ එකී චිරන්ති සංජීවනී වික්‍රමසිංහ, වාස් ගුණවර්ධන සමග මරණ දඬුවම නියම වූ සරත්චන්ද්‍රගේ සමීපතම මිතුරෙකු වන බවයි. මෙම සිදුවීම 2014.03.11 දින සිදුවූ බවට චෝදනා කෙරෙන අතර, එය වාර්තා කර ඇත්තේ 2020.06.24 දින පමණය…’
ශානි බේසේකරට එරෙහිව අලුත් චොදනාව ගොනු කිරීම ගැවන අබියාචනාදිකරණය මෙසේ කියයි.
‘මෙම චෝදනාවට ලක්ව ඇති වරද සිදුවී ඇත්තේ 2014.03.11 වීම සහ මේ සම්බන්ධයෙන් පැමිණිල්ලක් සීඅයිඩීයට ලැබී ඇත්තේ 2020.06.09 වීමත්, කොළඹ අපරාධ කොට්ඨාසයට පැමිණිල්ලක් ලැබී ඇත්තේ 2020.06.24 වීමත් සැලකිල්ලට ගැනීම වැදගත් වේ.
අත්අඩංගුවට ගන්නා අවස්ථාවේ සැකකාර ශානි අබේසේකර සතුව කිසිදු නීතිවිරෝධී ආයුධයක් නොතිබූ අතර, ඉහත සඳහන් සාක්ෂිකරුවන්ගේ ප්‍රකාශ හැරුණු විට එම ආයුධ සන්තකයේ තබාගැනීම සම්බන්ධව වැදගත් සාක්ෂි නොමැත. ශානි අබේසේකරට එරෙහිව පූර්ව වැරදි හැසිරීමක් හෝ වරදකරුවෙකු වූ අවස්ථා කිසිවක් නොමැත. සැකකරුට එරෙහිව නඩු පවරා නොමැත. සැකකරු අධිකරණ බලයෙන් සහ නීතිමය ක්‍රියාවලියට යටත් නොවී පලායනු ඇතැයි සාධාරණ ලෙස යෝජනා කිරීමට කිසිදු සාක්ෂියක් නොමැත…
මාගේ නිරීක්‍ෂණයට අනුව, ශානි අබේසේකර බොරු සාක්ෂි ගෙතුවේ යැයි කියා පැමිණිල්ලක් දැමීමට (2014 සිට) සෑම හැකියාවක්ම තිබියදීත් (2020 දක්වා) එය කිරීමට අසාමාන්‍ය සහ සුවිශේෂ ලෙස ප්‍රමාදවීම මඟින් පෙන්නුම් කරන්නේ ඔහුට එරෙහි චෝදනා අසත්‍යකරණයේ හා අලංකරණයේ ප්‍රතිඵලයක් මෙන්ම, පසුව හිතාමතා කරන ලද චෝදනා බවයි.
‘එම අසාමාන්‍ය හා සුවිශේෂ ප්‍රමාදය හේතුවෙන්, ශානිට එරෙහි පැමිණිල්ලට ස්වයංසිද්ධතාවේ (කෘත්‍රිම පෙළඹවීමක් නොමැතිව සිදුවීමේ) වාසිය අහිමි වී තිබේ. එපමණක් නොවේ, සෑහීමට පත්වන ලෙස හා විශ්වාස කළ හැකි ලෙස එම ප්‍රමාදය ගැන පැහැදිලි කිරීමටද (නීතිපති) අපොහොසත් වී ඇත. පැමිණිල්ලේ සාක්ෂිකරුවන් 2020 දුන් ප්‍රකාශ හා 2014දී දුන් ප්‍රකාශවලට පරස්පර වන බව සක්සුදක් සේ පැහැදිලිය.’
එයින් කියඇවෙන්නේ කුමක්ද? ශානි බේසේකරට එරෙහිව නීතිපති හා පොලිසිය ගොනුකළ චෝදනා, පදනම් විරහිත හා පුස් චෝදනා බව අභියාචනාධිකරණය නිගමනය කර ඇති බවයි. ශානි අබේසේකර සමග එදිනම ඇප ලැබූ අනෙක් පොලිස් නිලධාරියා වුණේ පොලිස් පරීක්ෂක සුගත් මෙන්ඩිස්ය. ඔහු කලක් සීඅයිඩීයේ රාජකාරි කළේය. අත්අඩංගුවට ගන්නා විට ඇඹිලිපිටිය පොලිසියේ සේවය කරමින් සිටියේය. ඔහු රිමාන්ඩ් බන්ධනාගාරගත කර තිබුණේ, ශානි තමන්ගේ අතින් ආයුධ ගෙනැවිත් කලගෙඩිහේනේ ඉඩමේ දැමූ බවට සීසීඩීයට ප්‍රකාශයක් නොදුන් නිසාය.
2020 අගෝස්තු 4වැනිදා ගම්පහ මහෙස්ත්‍රාත් ඉදිරියේ විශේෂ ප්‍රකාශයක් කරමින් පොලිස් පරීක්ෂක මෙන්ඩිස් කීවේ ‘ශානි අබේසේකර, තමා සන්තකයේ තිබුණු ආයුධ තොගයක් ගෙනැවිත් දී, කළගෙඩිහේන වත්තක ඌරු කොටුවක් තුළ, හිටපු නියෝජ්‍ය පොලිස්පති වාස් ගුණවර්ධන එම වරදට හසුකිරීමේ අදහසින් වළලන්නට කී බව’ට ප්‍රකාශයක් දෙනවා නම්, තමා අත්අඩංගුවට නොගෙන මුදාහරින බව කොළඹ අපරාධ කොට්ඨාසයේ (සීසීඩී) නිලධාරීන් දෙදෙනෙකු තමාට පොරොන්දු වූ බවයි.
සිය නිල මැදිරියේදී මෙන්ඩිස් මහතාගේ ප්‍රකාශය සටහන් කර ගැනීමට මහේස්ත්‍රාත්වරයා කටයුතු කෙළේය. මෙන්ඩිස් මහතා මහේස්ත්‍රාත්වරයාට ප්‍රකාශ කර සිටියේ, සීසීඩීයේ සහකාර පොලිස් අධිකාරි නෙවිල් පෙරේරා සහ නිශාන්ත නමැති තවත් පොලිස් පරීක්‍ෂකවරයකු තමාට එසේ කී බවයි. තමා එවැනි අසත්‍යයක් ප්‍රකාශ කිරීම ප්‍රතික්‍ෂෙප කළ විට අගෝස්තු 3 වැනිදා අත්අඩංගුවට ගෙන මහේස්ත්‍රාත්වරයා වෙත ඉදිරිපත් කළ බවද මෙන්ඩිස් මහතා අධිකරණයට කීවේය.
මේ අවස්ථාවේදී අධිකරණය ඇමතූ මෙන්ඩිස් මහතාගේ නීතිඥ චමින්ද අතුකෝරල මෙසේ කීවේය.
‘මෙවැනි නීති විරෝධී වැඩවලට විරුද්ධව ශ්‍රේෂ්ඨාධිකරණය ඉදිරියේ මූලික අයිතිවාසිකම් නඩු පැවරුවොත්, නියෝග දුන් ඉහළ නිලධාරීන්, තමන්ය නියෝග දුන්නේ කියා පිළිගන්න එකක් නැහැ. තනියෙන් වගඋත්තර කියන්න වෙන්නේ මේ පහළ පොලිස් නිලධාරීන්ටමයි.’
‘මේ විදියට සීසීඩීයත් අපරාධ විමර්ශන කරනවා. මේ සිදුවීම ප්‍රවණතාවක් බවට පත්වෙලා, ඒගොල්ලො කරන නඩුවලදීත්, තීන්දුව දීලා අවුරුදු පහ හයකට පස්සේ සාක්කිකාරයො කිව්වොත් එහෙම, ‘අපිට බලපෑම් කරලායි ප්‍රකාශ ගත්තේ’ කියලා මොකද වෙන්නේ? ඒ ගැන විමර්ශන කළ සීසීඩීයේ පොලිස් නිලධාරීන්වත් හිරේ දාන්න පුළුවන්. සාක්ෂි මෙහෙයෙව්වාය කියලා රජයේ නීතිඥ මහත්තයාවත් හිරේ දමන්න පුළුවන්, වැරදි සාක්කි මත නඩුවේ තීන්දුව දුන්නාය කියලා නඩුකාරතුමාවත් හිරේ දමන්න පුළුවන්. මේ ප්‍රවණතාව එච්චර භයානක තැනකට යන්න පුළුවන්. මේ නඩුවේ ඇත්ත මොකක්ද කියලා අපට වඩා හොඳින් පොලිසියේ මහත්තුරු දන්නවා. ඒ ඇත්ත එළිවෙච්ච දවසට ඒ මහත්තුරුන්ට නගින්න වෙන්නෙත් මේ විත්තිකූඩුවටම තමයි.’
මේ ආණ්ඩුව පත්වූ විගසම දින ගණනක් තුළ, දංගෙඩියට යැවුණු ජ්‍යෙෂ්ඨ පොලිස් අධිකාරි ශානි අබේසේකර හෙවත් සීඅයිඩීයේ අධ්‍යක්‍ෂවරයා පළමුව, ගාල්ල ප්‍රදේශය භාර නියෝජ්‍ය පොලිස්පතිගේ ‘පෞද්ගලික සහායක’ හැටියට මාරු කෙරිණ. දෙවනුව, වැඩ තහනමට ලක්කෙරිණ. මුළු වැටුපම ගෙවීම නැවැත්විණ. පසුව ශානි කළ අභියාචනයකට අනුව වැටුපෙන් භාගයක් ගෙවන්නට කොමිසම නියම කෙළේය. එහෙත්, ඒ භාගයද පසුගියදා නිදහස් වන තුරුම ඔහුට නොලැබිණ.
මේ කරන්නේ පළිගැනීමක් බව අලුතෙන් කියන්නට අවශ්‍ය නැත. 2015 කලින් ආණ්ඩුවේ ලොකු පොඩි දේශපාලකයන් හා රාජ්‍ය නිලධාරීන් කළ මිනීමරුම්, පැහැරගෙන යෑම්, අතුරුදහන් කිරීම්, මහජන දේපළ මංකොල්ලකෑම් ඇතුළු අපරාධ බොහොමයකම ප්‍රධාන විමර්ශකයා ශානි අබේසේකරය. ගෝඨාභය රාජපක්‍ෂ ජනාධිපතිවරයා පවා නමින්ම ශානි ගැන සඳහන් කරමින් ඔහු පිළිබඳ තමාගේ නොසතුට ප්‍රසිද්ධියේ ප්‍රකාශ කර තිබේ. ඒ නිසා ශානි අබේසේකර අත්අඩංගුවට ගැනීම හා රඳවා තැබීම ඉහළ සිට පහළට මේ ආණ්ඩුවේ වුවමනාව මිස අන් කිසිවක් නොවේ. අභියාචනාධිකරණය කියන පරිදි පසුව ගෙතූ කතාවක් කරළියට එන්නේ ඒ සඳහාය.
කෙසේ වෙතත්, ශානි අබේසේකරට එරෙහිව නගා ඇති චෝදනා තවදුරටත් පවත්වාගත හැකිද යන සාධාරණ ප්‍රශ්නය අභියාචනාධිකරණ තීරණය කියවන ඕනෑම සාමාන්‍ය මනුෂ්‍යයකුට වැටහෙයි.■
