■ සරත් ද අල්විස්
උතුම් මහතුනි, ඔබ උගන්වන්නේ වටිනා දහමක් විය හැකි ය. එහෙත් කුස පිරෙන තෙක් වරද නිවරද අපට අවබෝධ නොවනු ඇත. (බර්ටොල් බ්‍රෙෂ්ට්ගේ ‘ත්‍රී පෙනි’ නාට්‍යයෙනි)
වයිරස බියෙන් ඇලළී ගිය අපේ සිත්සතන් මැරුණු හා මැරෙන සංඛ්‍යාවන් විසින් තව තවත් අවුල් කරනු ලැබ ඇති මොහොතක ඉන්ධන මිල ඉහළ දැමීමක් ද රජය ප්‍රකාශයට පත් කෙළේ ය.
සවිස්තරාත්මක පැහැදිලි කිරීම් මගින් එය සාධාරණීකරණය සඳහා ද රජය පියවර ගත්තේ ය. බැංකු පද්ධතිය ද විනිමය අනුපාත ද දේශීය නිෂ්පාදනය පදනම් කොටගත් ආර්ථිකයක් ද පිළිබඳ කරුණු එහි ඇතුළත් ය.
බැංකු පද්ධතිය හා මුදල් න්‍යාය පිළිබඳ තැකීමක් එවැනි සංකීර්ණ කරුණු නොදන්නා මහජනතාව වෙතින් බලාපොරොත්තු විය නොහැකි ය. බහුතරය සැලකිලිමත් වන්නේ අතට ලැබෙන බත්පත ගැන ය. මහ බැංකුව පිළිබඳ සූක්ෂ්ම විෂය කෙරෙහි ඔවුන්ගේ අවධානය යොමු වන්නේ නම් ඒ ඉතා ම අල්ප වශයෙනි.
අතීතය පෙනෙන ප්‍රමාණයට වඩා බෙහෙවින් දිග ය. අනාගතය අතීතයට වඩා බෙහෙවින් වෙනස් වනු ඇත. ඒ බව බොහෝ දෙනා මැනවින් දනිති.
අලාභ ලබන ගුවන් සේවය නවතා දැමීම හෝ පාර්ලිමේන්තු මන්ත්‍රී විශ්‍රාම වැටුප අහෝසි කිරීම හෝ වැනි දැනෙන පියවර කීපයක් හෝ රජය විසින් ගනු ලබන්නේ නම් එය පසුගිය නාස්තිකාරකම් වටහාගැනීමෙහි අව්‍යාජ ප්‍රතිඵලයක් ලෙස සාමාන්‍ය ජනතාවට දැනෙනු ඇත.
ජනාධිපති මාධ්‍ය ඒකකයේ හේතු දැක්වීම්වලින් පෙනී යන්නේ ඒ සියල්ල දොස් දකින්නන් සනසාලීම පිණිස නිශ්චිතභාවයකින් තොරව ඉදිරිපත් කරනු ලැබ ඇති අනුභූතිවාදී ප්‍රකාශයන් බව ය.
ජනාධිපති මාධ්‍ය ඒකකය පවසන්නේ රටෙහි බැංකු පද්ධතිය ශක්තිමත් කිරීමත් අවම පොලී අනුපාත මට්ටමක් පවත්වාගෙන යාමත් විදේශ විනිමය වැය අඩු කිරීම හා විදේශ විනිමය අනුපාතය ශක්තිමත් කිරීමත් සඳහා ඉන්ධන මිල ඉහළ නැංවීමට සිදු වූ බවයි. ජනතා සෞඛ්‍යය හා ශුභ සාධනය ශක්තිමත් කිරීමත් ආර්ථිකයේ ආනයන මත යැපෙන පරිභෝජනවාදී ස්වභාවය වෙනස් කරමින් එය දේශීය නිෂ්පාදනය පදනම් කොටගත් ආයෝජන හා පරිභෝජන ආර්ථිකයක් බවට පත් කිරීම ද එමගින් අපේක්ෂා කරන ලද බව වැඩිදුරටත් එහි සඳහන් ය.
ඉන්ධන මිල ඉහළ නැංවීම ප්‍රකාශයට පත් කිරීමට සුළු මොහොතකට පෙර මහ බැංකු අධිපතිවරයා මාර්ගගත මාධ්‍ය සාකච්ඡාවකට සහභාගි වූයේ ය.
පාර්ලිමේන්තු මන්ත්‍රීවරුන් සඳහා ආනයනය කිරීමට සැලසුම් කරනු ලැබ ඇති වාහන පිළිබඳව එහි දී මහ බැංකු අධිපතිවරයා ගෙන් විමසන ලදි. පාර්ලිමේන්තු මන්ත්‍රීවරුන් සඳහා සුඛෝපභෝගී වාහන ආනයනය සඳහා ණයවර ලිපි විවෘත කිරීමට මහ බැංකුවේ අනුමැතිය ලබා දී නොමැති බව මහ බැංකු අධිපතිවරයා ප්‍රකාශ කෙළේ ය.
“අපත් ඒ බව දැනගත්තේ පසුවයි ”
මහ බැංකු අධිපති ලක්ෂ්මන් මහතා සූක්ෂ්ම ලෙස අපහසු අවස්ථාවක් මගහැරියේ ය.
“ඒක අහන්න ඕනැ ලංකා බැංකුවෙනුයි ලංකා බැංකුවට උපදෙස් දුන්නු රජයේ ආයතනයෙනුයි. ”
මාධ්‍යකරුවන් හා මහ බැංකු අධිපතිවරයා අතර ඇති වූ මෙම දෙබස, සාමාන්‍ය රටවැසියන් සඳහා ලියැවුණු මා බෙහෙවින් අගය කළ ආර්ථික විද්‍යා පොතක් පිළිබඳ මතකය වෙත මා රැගෙන ගියේ ය.
“ද එන්ඩ් ඔෆ් ඇල්කෙමි” (ගුප්ත බලයක අවසානය) එම පොතෙහි නමයි. පොත ලියා තුබුණේ 2008 ආර්ථික අවපාතය පැවැති වකවානුව තුළ දී බෑන්ක් ඔෆ් ඉන්ග්ලන්ඩ්හි අධිපතිත්වය හෙබවූ මර්වින් කිං විසින් ය.
කිං සාමිවරයා විසින් එය ලියනු ලැබ තුබුණේ ආර්ථික විද්‍යාව පිළිබඳ අධ්‍යාපනයක් නො ලද සාමාන්‍ය පුද්ගලයන් සඳහා ය. ඔහුගේ පැහැදිලි කිරීම් එතරම් ම සරල හා ලිහිල් විණි. මුදල් ක්‍රමයෙහි පැවැත්ම රැඳෙන්නේ විශ්වාසය මත ය. තමනට අවශ්‍ය ඕනෑ ම කාර්යයක් කඩදාසි මුදල් මාර්ගයෙන් ඉටු කළ හැකැයි පෙන්වීමේ අවස්ථාව ආණ්ඩුවලට ලබා දෙන මූල්‍ය ක්‍රමය තුළ පවතින්නා වූ ‘ඉන්ද්‍රජාලය’ හෙතෙම එහි විස්තර කරයි.
“ණය නිර්මාණ ක්‍රියාවලියෙහි අතුරුඵලයක් වන මුදල් මැවීම සඳහා 20 වැනි සියවස තුළ දී ආණ්ඩුවල අවසරය ලැබුණා. මෙකල බොහෝ දුරට මුදල් නිර්මාණය කරනු ලබන්නේ පෞද්ගලික අංශයේ ආයතනයන් වන බැංකු විසින්. මේ තමයි මෙකල අප ජීවත් වන සමාජයෙහි මුදල් කළමනාකරණය හා අදාළව අනුගමනය කරනු ලබන වඩාත් ම සාවද්‍ය ක්‍රියාමාර්ගය.
බැංකු වුවත් භයානකයි. බැංකු තමයි අපගේ මූල්‍ය ක්‍රම ඉන්ද්‍රජාලයෙහි ‘හදවත’ ලෙස ක්‍රියා කරන්නේ. බැංකු යනු මුදල් මැවීමෙහි ප්‍රධාන මූලාශ්‍රයයි. අවදානමක් දරාගනිමින් විවිධ පාර්ශ්වයන් වෙත ලබා දෙන ණය තුළින් තැන්පතු නිර්මාණය කිරීමට බැංකු පියවර ගන්නවා.”
ආඥාදායකත්වය හා ප්‍රජාතන්ත්‍රවාදය
නියෝජන ප්‍රජාතන්ත්‍රවාදය තෝරාගැනෙන ආඥාදායකත්වයක් කරා නිහඬව ම තල්ලු වෙමින් පවතී.
නිදහස යනු කුමක්දැයි අපට දැනෙන්නේ ගෙදරට කොටු වී ස්වයං නිරෝධායනයෙහි යෙදෙන විට ය. හිතවතුන් මුණගැසීම හෝ පොතපතක් බැලීම පිණිස පුස්තකාලයකට යාම හෝ පිණිස ගෙදරින් පිට විය නොහැකි වීම හේතු කොට ගෙන බෙලහීනයකු බවට පත් වන ඔබ අපේක්ෂා භංගත්වයට ද පත් වීම වළක්වාලිය නොහැකි ය.
නිරෝධායන නීති උල්ලංඝනය කිරීමට අදාළ කිසියම් හේතුවක් මත සාමාන්‍ය පුරවැසියන් අත්අඩංගුවට ගැනීම් පිළිබඳ දැඩි හා අප්‍රසන්න තොරතුරු පොලිස් මාධ්‍ය ප්‍රකාශකයා විසින් අතිශය ආචාරශීලිත්වයකින් යුතුව හෙළි කරනු ලබන ආකාරය රූපවාහිනී ප්‍රවෘත්ති තුළින් අපි දකිමු. ඔවුන් පිටතට පැමිණ සිටීමට හේතු ඔහු ප්‍රකාශ කරන්නේ නැත.
ඔවුන් පිටතට එන්නේ ඇයි? ඒ, පිටතට යාමේ අතිශය දැඩි අවශ්‍යතාවන් ඔවුනට තිබෙන බැවිනි.
පනවනු ලබන නීතීන්ට අනුගත වීමත් ඔවුන්ගේ නිසග ගතියක් වූ තමනට නොවැටහෙන නීති නොතකා හැරීමේ ස්වභාවයත් අතර මධ්‍ය ලක්ෂ්‍යයක පිහිටා ක්‍රියා කිරීමට විවිධ හේතු යටතේ ඔවුන් පියවර ගත යුතුව තිබේ.
නාසීන් විසින් පැරිසිය යටත් කොටගෙන තුබුණු අවධියෙහි දී සාමාන්‍ය ක්‍රියාකාරකම් හා සුවිශේෂ යථාර්ථය අතර තත්ත්වයක සිට කරුණු සලකා බැලීමට පැරිස්වාසීන් පියවර ගත් බව දාර්ශනිකයකු වූ ජීන් පෝල් සාත්‍රෙ පවසයි.
මේ සියල්ල සිහිපත් වන්නේ සංවේදීබවින් තොර අධිකාර බලයකට යම් ආකාරයකින් සමාන වන්නා වූ තත්ත්වයක් යටතේ පසුවන විට ය.
වසංගත තත්ත්වයක් යටතේ වුව ද දේශපාලනයේ ස්වභාවය එයයි.
වැඩි දිනක් ගත වන්නට පෙර අපේ මන්ත්‍රීවරුනට සුඛෝපභෝගී වාහන ලැබෙන බව මෑතක දී අපට දැනගන්නට ලැබිණි. අප මුහුණ දී සිටින දුර්භාග්‍යමත් තත්ත්වයේ උග්‍ර බව සැලකිල්ලට ගනිමින් එකී වාහන ඇණැවුම අවලංගු කරන ලද බව ද පසුව අසන්නට ලැබිණි.
මෙය පුදුමයට පත් වීමට කරුණක් නොවේ.
හැම විට ම දේශපාලකයන් විශ්වාස කරන්නේ ඔවුනට විශේෂ සැලකිලි ලැබිය යුතු බව ය. සාමාන්‍ය නීති රීති ඔවුනට අදාළ වන්නේ නැත. ඔවුන් නිරතව සිටින්නේ ජනතාවට සේවය කිරීමේ ව්‍යාපාරයෙහි ය. ජනතාවට සේවය කිරීම ආරම්භ විය යුතු වන්නේ ඔවුන්ගෙන් ම ය. ජනතාව විසින් තෝරාගනු ලැබූ ඔවුනට ජනතාව අතර ගැවසෙන විට ඔවුන්ගේ ආරක්ෂාව සඳහා ආරක්ෂකයන් ද අවශ්‍ය ය.
දේශපාලනයෙහි දී මුදල් නොතකා කටයුතු කරන ඔවුහු ධන කුවේරයන්ගේත් කතිපයාධිකාරීන්ගේත් (බලය අතැති සුළු පිරිස) සහයෝගය මත යැපෙති.
වසංගත තත්ත්වය විසින් අප එන්නත තුළින් ජීවිතය යදින “කල්පනාවට වැටුණු හුදු සිරුරු” පමණක් බවට පත් කරනු ලැබීමට බොහෝ කලකට පෙර සිට ම නියෝජිත ප්‍රජාතන්ත්‍රවාදය එළැඹ තුබුණේ නොනවතින පසුබැස්මකට ය.
අධිකාර බලවාදී ජනතාවාදය වනාහි, අතීතයේ සිට ම දේශපාලකයනට අවවාදානුශාසනා කිරීමෙන් මෙන් ම එකඟත්වයන් ලබාදීමෙන් ද ඉටු කරන ලද භූමිකාව මගින් ස්වකීය ව්‍යවසායමය නිපුණතාවන් තියුණු කොට ගෙන සිටින මෙරට ව්‍යාපාරික බලවතුන් සහ සාම්ප්‍රදායික ආගමික නායකයන් හමුවෙහි වූ ඉවත හළ නොහැකි ක්‍රියාමාර්ගයකි.
එන්නත්කරණයේ දී ආගමික වැදගත්කමක් උසුලන පාර්ශ්වයන් වෙත ප්‍රමුඛත්වය ලබා දිය යුතු බව, දේශපාලනය යනු වැඩිමහලු ප්‍රමුඛතා පිළිවෙත යටතේ ක්‍රියාත්මක විය යුතු කාර්භාරයක් වෙතැයි සිතන විපක්ෂ නායකයා විසින් ප්‍රකාශ කරනු ලැබීමට හේතුව ඉන් පැහැදිලි වන්නේ ය.
කරුණු යෙදුණු අනුපිළිවෙළ සැලකිල්ලට ගනිමින් අපි විමර්ශනයක යෙදෙමු. සංචරණ සීමා පැනවීමේ හදිසිය මතු වූයේ වරාය නගර කෙටුම්පත අනුමත වීමෙන් අනතුරුව ය.
කොරෝනා වයිරසය සම්බන්ධයෙන් ගැනෙන පියවර මෙන් ම රාජ්‍ය නායකයන්ගේ ක්‍රියාමාර්ගයන් ද පවතින්නේ නිශ්චිතභාවයකින් තොර නොපැහැදිලි තැනක ය. එය ශ්‍රී ලංකාව පමණක් මුහුණ දෙන තත්ත්වයක් නොවේ.
බොහෝ රටවල සිටින ජනතාව විසින් තෝරාගනු ලැබූ දැඩි ආත්ම ධෛර්යයක් සහිත නායකයන් ව්‍යවස්ථාදායකයේ මතයෙහි ම පිහිටා කටයුතු කර නැත.
අපගේ නිදහස යනු කුමක් ද’ යන්නත් නිදහස වශයෙන් අප සතුව තුබුණේ කුමක් ද’ යන්නත් අනාගතයේ දී අපට නිදහස වශයෙන් ලැබෙනු ඇත්තේ කුමක් ද’ යන්නත් මෙම වසංගතය විසින් අපට කියා දෙනු ලැබ තිබේ.
දැනට බලපවත්නා සංචරණ සීමාවන්හි අවශ්‍යතාව පිළිබඳව කිසිදු විවාදයක් නැත. එහෙත් එහි ප්‍රතිඵල වශයෙන් ඉතිරි වන භයානක තත්ත්වයන් පිළිබඳව අප සැලකිලිමත් වීම අවශ්‍ය ය.
කොරෝනා වයිරසයෙන් බැට කෑ තත්ත්වයට අප ගේ නිදහස පත් විය යුතු නොවේ.
මෙම කාසියේ අනෙක් පැත්ත වෙත ද අපගේ අවධානය යොමු විය යුතු ය. දෙවැනි ලෝක යුද්ධය අතරතුර ප්‍රංශය යටත්ව පැවැති සමය තුළ සිය ජීවන තොරතුරු ඉදිරිපත් කරමින් සාංදෘෂ්ටිකවාදී ප්‍රංශ දාර්ශනිකයකු වූ ජීන් පෝල් සාත්‍රෙ මෙසේ සඳහන් කෙළේ ය. “ජර්මානුන්ට යටත්ව සිටි සමයෙහි දී ලද නිදහසට වැඩි නිදහසක් අප කිසිසේත් භුක්ති විඳ නැත.” එය නිවැරැදි ය.
නිදහස් සංචරණය කෙතරම් සුවදායක ද’ යන්න අපට අවබෝධ වන්නේ කායිකව නිදහසේ හැසිරීමේ බාධාවනට අප මුහුණ දෙන විට ය. නිදහස් වීම යන්නෙහි තේරුම වසංගතය විසින් අපට පැහැදිලි කර දෙනු ලැබ තිබෙන්නේ ඒ අනුව ය.
නිවෙස්වලට ම සීමා වෙමින් නිහඬ බවට පත් සිත්සතන් සහිතව ගැඹුරින් සිතා බැලීමේ අවකාශය දැන් අප සතුව පවතී.
රජය කියන්නේ ඉන්ධන ආනයනය සඳහා අතිවිශාල විදේශ විනිමය ප්‍රමාණයක් වැය කරන රටක් පමණක් නොව, ගමනාගමන සේවා, විදුලි බල ජනනය, ඇතැම් කම්හල් ක්‍රියා කරවීම ආදි අවශ්‍යතා එකී ආනයනයන් මගින් ඉටු කරගන්නා රටක් බවට ද ශ්‍රී ලංකාව පත් වී තිබෙන බව ය. ඒ බව හිටිඅඩියේ අපගේ බලවතුනට අවබෝධ වීමේ රහස අප දැන් නිරාකරණය කරගත යුතුව තිබේ.
එසේ නම් අපගේ පාර්ලිමේන්තු මන්ත්‍රීවරුන් සඳහා සුඛෝපභෝගී වාහන ඇණවුම් කිරීමට එම රජය විසින් ම තීරණය කරන ලද්දේ ඇයි ?
’නව ආඥාදායකත්වය’ (New Despotism) යනු ඕස්ටේ‍රලියානු දේශපාලන විද්‍යාඥයකු වූ ජෝන් කීන් විසින් ලියන ලද පොතකි. ස්වයං හුදෙකලා වීමක් පවතින මෙම උකටලී දින කීපයට අදාළ කරුණු එහි මැනවින් සඳහන් ය. කතුවරයා එමගින් බෙදුණු බලය සහිත ප්‍රජාතන්ත්‍රවාදය
ඉහළ සිට පහළට බලය යොදවන ව්‍යාජ ප්‍රජාතන්ත්‍රවාදයන් බවට පත් වන ආකාරය පිළිබඳව ගැඹුරු විශ්ලේෂණයක යෙදෙයි.
මෙම නව ආඥාදායකත්වය සමස්ත රට ම වෙලාගත් අභිරංගනයන්හි යෙදෙමින් නොනැවතී ඉදිරියට ගමන් කරමින් සිටී. එය විශ්වාසය තබන්නේ ජෝන් කීන් ‘සන්නිවේදන බාහුල්‍යය’ :ජදපපමබසජ්එසඩැ ්ඉමබා්බජැ* යනුවෙන් හඳුන්වන න්‍යාය කෙරෙහි ය. විරුද්ධවාදීහු මෙහි දී ගැරහීමට ලක් වෙති. නායකයා ප්‍රසාදයට පාත්‍ර වෙයි. චීනය හා රුසියාව මෙයට හොඳ ම නිදර්ශනයන් ය. මෙය මෙහෙයැවෙන්නේ ස්වයං ප්‍රවර්ධන අවශ්‍යතාව විසින් ය.
එය තනි පුද්ගලයකුගේ කාර්යයක් නොවේ. මැනවින් සැලසුම් කරන ලදුව ක්‍රියාත්මක වන සාමූහික ක්‍රියාවලියකි. බලවත් සේ පීඩාවට පත් ජනතාව ආකර්ෂණය කරගනු ලබන්නේ යෝධ යටිතල ප්‍රවර්ධන ව්‍යාපෘතීන් මාර්ගයෙනි.
අතිසුඛෝපභෝගී හෝටල් සහ දර්ශනීය විවේකාගාර සහිත ගුවන් තොටවලින් සැදුම්ලත් ලොව ඉහළ ම මට්ටමේ නගර පිළිබඳ සිහිනයක ගැලී සිටීම පිණිස නිරවුල්ව සිතීම සඳහා තමන් සතුව පැවැති ශක්තිය ඉවත ලන නව මධ්‍යම පන්තියක් එමගින් නිර්මාණය කරනු ලැබේ. අශුභවාදී දෘෂ්ටීන් සහ චපල ප්‍රායෝගිකත්වය විසින් මෙහෙයවනු ලබන ඔවුහු ණය බරින් මිරිකෙමින් සිහින මාලිගා තුළ ජීවත් වෙති.
කොරෝනා වයිරසය විසින් තව දුරටත් උග්‍ර කරනු ලැබූ ආර්ථික අර්බුදයක අප ගිලී සිටින බව නොරහසකි. කිනම් ආකාරයෙන් බැලුව ද ඒ වනාහි නිදහසේ හුස්ම ගැනීම පිණිස කැරෙන අරගලයකි.
ජාතික විනෝදාංශයක්
මේ දිනවල සමාජ මාධ්‍යයන්හි පළ වන කර්කශ වූ නමුදු සියුම්භාවයක් ද සහිත බොහෝ නිර්මාණ තුළින් පෙනෙන්නේ කුහකත්වයට පහර දීම ජාතික විනෝදාංශයක් බවට පත්ව තිබෙන බව ය.
දේශපාලකයන් අපට වැදි බණ දෙසන්නේ ජනතා බුද්ධියට නිගා වන ආකාරයෙනි. දැනට දිගු කලකට ප්‍රථම, හරියට ම කිවහොත් යන්ත්‍රයට වැදගත් තැන ලබා දෙමින් පුද්ගලයා නොවැදගත් බවට පත් කරවූ විධායක ජනාධිපති ක්‍රමය සහ සමානුපාතික නියෝජන ක්‍රමය හඳුන්වා දෙනු ලැබීමෙන් පසුව, කිනම් මතවාදයක් දරන හෝ වේවා කිනම් පාටකට අයත් වූ හෝ වේවා කිනම් දුබලතා සහිත වූ හෝ වේවා සියලු ම දේශපාලනඥයෝ සෙසු ජනතාව පිළිබඳ තැකීමකින් තොරව තමනට ම විශේෂ වූ නීති රීතීනට හා හර පද්ධතීන්ට අනුව කටයුතු කරන්නට වූහ.
ජේ ආර් ජයවර්ධනගේ සාධාරණ සමාජය දැඩි දෝෂ දර්ශනයට භාජන කරමින් පොතක් පළ කිරීම හේතු කොටගෙන මහාචාර්ය ඊ ආර් සරත්චන්ද්‍රයනට කායිකව අඩන්තේට්ටම් කිරීමේ අපරාධයට ක්‍රියාත්මකව සහභාගිත්වය දැක්වූ පුද්ගලයා වත්මන් ‘කෙළි මඬලෙහි’ මුල් පෙළේ ආසනයක් හොබවන ආකාරය මට නම් බලවත් හිරිකිත දනවන දර්ශනයකි.
පවත්නා වැඩපිළිවෙළ දැඩි උනන්දුවකින් යුතුව අගයන පිරිසෙන් වැඩි දෙනෙකු දේශපාලනයට අත් පොත් තැබුවේ එජාපය දැඩි කඩාවැටීමකට භාජන වී තුබුණු සමයේ දී බව අවධානයෙන් බලන විට ඔබට පෙනෙනු ඇත. එජාප නායකයා වේදිකාවට යළි පිවිසෙන විට බොහා් රසවත් දෑ සිදු වනු ඇතැයි අපේක්ෂා කළ හැකි ය. ආණ්ඩු පක්ෂයේ මන්ත්‍රී ආසන සියල්ල ම වෙතින් “කවුද හොරා” යන හඬ මතු වීමට සලස්වා බැඳුම්කර මගඩිය පිළිබඳ විවාදය අවුල් කර දැමීමට හෙතෙම සමත් වූයේ ය.
වෙස් මුහුණු ගැලවීම
පෙර නොවූ ආකාරයකින් අප වෙත පැමිණි මෙම ව්‍යසනය විසින් ඔවුන්ගේ වෙස් මුහුණු ගලවනු ලැබ තිබේ. ලිබරල්, නව ලිබරල්, සමාජවාදී, ප්‍රජාතන්ත්‍රවාදී සමාජවාදී ආදී වූ සියලු ම වෙස් මුහුණු පැළඳ සිටි පුද්ගලයන්ගේ සැබෑ ස්වරූපය දැන් පෙනේ. එනම් ඔවුන්ගේ චපලත්වය සහ දෙබිඩි පිළිවෙත ය. සෑම ප්‍රවෘත්ති ඛණ්ඩයක් ම ද ප්‍රකාශ ලබාදීමක් ම ද සැලසුම් කරනු ලැබ තිබෙන්නේ ප්‍රතිවාදියා පෙන්වන තරම් යහපත් නොවන බව හැඟෙන පරිදි ය. ජයගත් කිසිවෙක් නැත. අපට ද හිමි වන්නේ පරාජය ම ය. විරෝධාකල්ප මැඬලීම මෙයට විසඳුමක් නොවේ. ජෝර්ජ් ඕවෙල් දේශපාලනය තුළ අව්‍යාජත්වයක් සොයමින් සිටින අප වැනි සාමාන්‍ය මිනිසුන් වෙනුවෙන් සිටි විශිෂ්ට අනුශාසකයෙකි.
ඉන්ධන මිල ඉහළ නැංවීමත් සමග අපට අවබෝධ වුණු කරුණක් පිළිබඳව ඕවෙල් විසින් ප්‍රකාශ කරනු ලැබ තිබේ. “ යම් කෙනෙකුගේ නාසය ඉදිරිපිට තිබෙන දෑ දැකගැනීමට නම් නිරන්තර අරගලයක නිරත විය යුතු වන්නේ ය.”■
