■ අරුණ ජයවර්ධන
අපරාධ පරීක්‍ෂණ දෙපාර්තමේන්තුවේ හිටපු අධ්‍යක්‍ෂ ජ්‍යෙෂ්ඨ පොලිස් අධිකාරි ශානි අබේසේකර හා පොලිස් පරීක්‍ෂක සුගත් මෙන්ඩිස් යන මහත්වරු අභියාචනාධිකරණය විසින් ජුනි 16 වැනිදා ඇප මත මුදාහරින ලදහ.
ජුනි 15 වැනිදා ඇප ඉල්ලීම සම්බන්ධ විමසීම අවසන් කළ අභියාචනාධිකරණය, ඇප ලබාදීම පිළිබඳ තීරණය 16 වැනිදාට කල් තැබීය.
අභියාචනාධිකරණ විනිසුරු බන්දුල කරුණාරත්න සහ ආර්.යූ.එස්. ගුරුසිංහ විසින් කරන ලද ඇප නියමය අනුව, දෙදෙනාටම රුපියල් 25,000ක බැගින් මුදල් ඇප සහ රුපියල් ලක්‍ෂ දහයක බැගින් ශරීර ඇප නියම වී තිබේ.
ඔවුන්ගේ විදේශ ගමන් බලපත්‍රය අධිකරණය වෙත බාරදිය යුතුය. අධිකරණයේ අවසරයකින් තොරව විදෙස්ගත වීමට නොහැකිය.
මොහොමඩ් සියාම් ඝාතනය සම්බන්ධයෙන් මරණ දඬුවම නියම වී මේ වන විට බන්ධනාගාරගතව සිටින හිටපු නියෝජ්‍ය පොලිස්පති වාස් ගුණවර්ධන මහතාගේ නඩුව සම්බන්ධයෙන් බොරු සාක්‍ෂි සකස් කළේයැයි කියන චෝදනාව මත කොළඹ අපරාධ කොට්ඨාසය විසින් ශානි අබේසේකර මහතා අත්අඩංගුවට ගන්නා ලද්දේ 2020 අප්‍රේල් මාසයේය. ගම්පහ මහේස්ත්‍රාත්වරයා ඔහුට ඇප ලබා දීම ප්‍රතික්‍ෂෙප කළේය. ඉන් දින කිහිපයකට පසු
පොලිස් පරීක්‍ෂක සුගත් මෙන්ඩිස් මහතා අත්අඩංගුවට ගන්නා ලද අතර ඔහුද රක්‍ෂිත බන්ධනාගාරගත කරන ලදි.
මහේස්ත්‍රාත් තීරණය ගැන ප්‍රතිශෝධන ඉල්ලීමක් ගම්පහ මහාධිකරණයට ඉදිරිපත් කළත් එයද ප්‍රතික්‍ෂෙප විය. අභියාචනාධිකරණයට පෙත්සම් ඉදිරිපත් කරන ලද්දේ මහාධිකරණයේ එම තීරණයට එරෙහිවය.
ඇප ඉල්ලීම් පිළිබඳ පෙත්සම් අවසාන වශයෙන් ජුනි 15 වැනිදා අභියාචනාධිකරණය විසින් කැඳවන ලද විට, නීතිපති දෙපාර්තමේන්තුව වෙනුවෙන් පෙනීසිටි නියෝජ්‍ය සොලිසිටර් ජෙනරාල් රොහන්ත අබේසූරිය, මේ දෙදෙනාට ඇප ලබාදීම කෙරෙහි බලවත් ලෙස විරුද්ධ විය. ඔවුන් සම්බන්ධයෙන් පවත්වන විමර්ශන තවමත් අවසන් නැති බැවින් ඒවා අවසන් වන තුරු ඇප ලබා නොදෙන ලෙස ඔහු අභියාචනාධිකරණයෙන් ඉල්ලා සිටියේය.
අබේසේකර මහතා වෙනුවෙන් පෙනීසිටි නීතිඥ විරාන් කොරයා කියාසිටියේ, ඇප පනතේ විධිවිධාන යටතේ කිසිදු හේතු දැක්වීමක් නැතිව මෙම නඩුවේ ඇප ලබා දීමට මහාධිකරණයට හැකි වුවද, ඇප ලබාදීම ප්‍රතික්ෂේප කර ඇති බවයි. ඇප පනත අනුව, ඇප ලබාදීම රීතිය විය යුතු බවත් ලබා නොදීම ව්‍යතිරේකය විය යුතු බවත් පෙන්වා දුන් කොරයා මහතා, විමර්ශන අවසන් වන තුරු යැයි කියමින් කෙළවරක් නොමැතිව අබේසේකර මහතා රක්‍ෂිත බන්ධනාගාරගත කර තිබීම ඔහුට කරන අසාධාරණයක් යැයි ද කීවේය.
ශානි අබේසේකර මහතා බන්ධනාගාරගතව සිටි කාලය තුළ කොවිඩ් 19 වෛරසයට ගොදුරු වූ අතර, පශ්චාත් කෝවිඩ් ආසාදන තත්ත්වයෙන්ද පසුවිය. ඊට අමතරව බන්ධනාගාරය තුළදී හෘදයාබාධයකටද ගොදුරු විය.
අබේසේකර මහතාගේ රෝග තත්වය ගැන වාර්තාවක් මැයි 15 වැනිදාට ඉදිරිපත් කරන ලෙස අභියාචනාධිකරණය බන්ධනාගාර දෙපාර්තමේන්තුවට නියම කළත්, එදින එම වාර්තාව ඉදිරිපත් නොකරන ලදි. එහෙත්, විශේෂඥ වෛද්‍යවරුන්ගේ වෛද්‍ය සහතික කිහිපයක්ම අබේසේකර මහතාගේ පාර්ශ්වය විසින් අධිකරණය වෙත ඉදිරිපත් කරන ලදි. ඇප ලබාදීමට දින කිහිපයකට පෙර විශේෂඥ වෛද්‍ය ආනන්ද විජේවික්‍රමද ශානි අබේසේකර මහතාගේ සෞඛ්‍ය තත්වය ගැන වාර්තාවක් ඉදිරිපත් කර තිබිණ.
පොලිස් පරීක්‍ෂක සුගත් මෙන්ඩිස් වෙනුවෙන් පෙනීසිටි නීතිඥ චමින්ද අතුකෝරළ අධිකරණයට පැහැදිලි කළේ තම සේවාදායකයා අත්අඩංගුවට ගැනීමට එකම හේතුව, ශානි අබේසේකර මහතාට වරදක් ආරෝපණය වන ආකාරයෙන් ප්‍රකාශයක් දීමට කොළඹ අපරාධ කොට්ඨාසය ඔහුට බල කළ විට එය ප්‍රතික්‍ෂෙප කිරීම බවයි.
අබේසේකර මහතාට වරදක් ආරෝපණය කරන පරිදි ප්‍රකාශයක් දීමට අපරාධ කොට්ඨාසයේ නිලධාරීන් විසින් එල්ල කරන ලද පීඩනය සම්බන්ධයෙන් පසු දිනම මෙන්ඩිස් මහතා ගම්පහ මහේස්ත්‍රාත්වරයාට ප්‍රකාශයක් ලබා දී ඇති බවද නීතිඥ අතුකෝරල පැවසීය.
2019 නොවැම්බර් මස ගෝඨාභය රාජපක්‍ෂ මහතා ජනාධිපති ධුරයට පත්වීමෙන් පසු පළිගැනීමට ලක්වූ පළමු රාජය නිලධාරියා ශානි අබේසේකර මහතාය. ජනාධිපති ධුරයේ රාජපක්‍ෂ මහතා දිවුරුම් දී දින දෙකක් ඇතුළත අබේසේකර මහතා අපරාධ පරීක්‍ෂණ දෙපාර්තමේන්තුවේ අධ්‍යක්‍ෂ ධුරයේ සිට ගාල්ල ප්‍රදේශය බාර නියෝජ්‍ය පොලිස්පතිවරයාගේ පෞද්ගලික සහකාර හැටියට මාරුකර යවන ලදි. පසුව වැඩ තහනම් කරන ලදි. ඔහු අත්අඩංගුවට ගැනුණේ ඊට පසුවය.
ලංකාවේ අපරාධ පරීක්‍ෂණ දෙපාර්තමේන්තුවේ ෂර්ලොක් හොම්ස් ලෙස සැලකෙන විශිෂ්ට ගණයේ අපරාධ විමර්ශකයකු වන ශානි අබේසේකර මහතා, 2014ට පෙර රාජපක්‍ෂ ආණ්ඩුවේ දේශපාලකයන් සහ නිලධාරීන් කළ මිනිස් ඝාතන, මහජන මුදල් වංචා හා දූෂණ සම්බන්ධයෙන් විමර්ශනය කළ ප්‍රධාන විමර්ශකයාය. යළි බලයට පත්වූ වහාම ඔහුගෙන් පළිගන්නට රාජපක්‍ෂ ආණ්ඩුව කටයුතු කළේ එහෙයිනි. 2019 පාස්කු ඉරිදා ප්‍රහාරය ගැන විමර්ශනයට මූලිකත්වය දුන්නේද ශානි අබේසේකර මහතා ය.
පසුගියදා යුරෝපා පාර්ලිමේන්තුවට ශ්‍රී ලංකාවේ ජීඑස්පී ප්ලස් සහනය තාවකාලිකව අත්හිටුවීමට ගෙනෙන ලද යෝජනාවේ එක් කාරණයක් හැටියටද ශානි අබේසේකර මහතා නීති විරෝධී ලෙස අත්අඩංගුවේ තබාගැනීම උපුටා දක්වා තිබිණ.■
