පෞද්ගලික අංශයේ සේවකයින්ට අර්ධ වැටුප් ලබාදීමේ තීරණය ජුනි මස 30 වැනිදායින් පසු දීර්ඝ නොකිරීමට සූම් තාක්ෂණය ඔස්සේ අද(ජුනි 14) පැවති ජාතික කම්කරු උපදේශක සභා රැස්වීමේදී තීරණය වූ බව නිදහස් වෙළඳ කලාප සහ පොදු සේවා සේවක සංගමයේ සම ලේකම් ඇන්ටන් මාකස් අනිද්දා කළ විමසීමකදී පැවසීය.
කොවිඩ් තත්වය හේතුවෙන් සියයට පනහක සේවක පිරිසක් සේවයට කැඳවීමේ රජයේ තීරණය මත සේවයට නොකැඳවන සේවකයින් සඳහා අර්ධ වැටුප හෝ රුපියල් 14,500 යන දෙකෙන් වැඩි ප්‍රමාණය ගෙවිය යුතු යන එකඟතාවට 2020 මාර්තු මාසයේදී වෘත්තීය සමිති එළඹී තිබූ අතර එය මෙම වසරේ දෙසැම්බර් මාසය දක්වා දීර්ඝ කරන බවට කම්කරු කොමසාරිස් ජෙනරාල්වරයා කර තිබූ ප්‍රකාශයට වෘත්තීය සමිති දැඩි විරුද්ධත්වයක් පලකිරීම හේතුවෙන් එම තීරණය ගෙන තිබුණි.
එහිදී හෝටල් ක්ෂේත්‍රයේ වත්මන් අර්බුධය සලකා බලා එහි හාම්පුතුන් කරන ලද ඉල්ලීම අනුව එම ක්ෂේත්‍රය සඳහා පමණක් එක් එක් සිද්ධිය සම්බන්ධයෙන් ලැබෙන ඉල්ලීම් සලකා බලා අර්ධ වැටුප් තීන්දු කිරීමේ බලය කම්කරු කොමසාරිස්වරයාට ලබාදීමට වෘත්තීය සමිති එකඟ වූ බව ඇන්ටන් මාකස් මහතා වැඩිදුරටත් පැවසීය.
මෙම අර්ධ වැටුප් තීරණය තවදුරටත් දීර්ඝ කිරීම සඳහා වූ යෝජනාවක් කොවිඩ් සමයේ සේවකයින්ගේ රැකියා පිළිබඳ කටයුතු කිරීමේ කාර්ය සාධන කමිටුවේදී මීට පෙර සාකච්ඡාවට ගෙන ඇති අතර එම කමිටුව නියෝජනය කළ වෘත්තීය සමිති දෙකක් එම යෝජනාවට පක්ෂ වීම හා වෘත්තීය සමිති දෙකක් එම යෝජනාවට විරුද්ධ වීම නිසා එම යෝජනාව අද පැවති ජාතික කම්කරු උපදේශක සභාවට යොමුකර තිබේ. කම්කරු කොමසාරිස් ජෙනරාල්වරයා අර්ධ වැටුප් තීරණය දෙසැම්බර් දක්වා දීර්ඝ කරන බව ප්‍රකාශ කර ඇත්තේ ඒ සම්බන්ධයෙන් එසේ වෘත්තීය සමිතිවල එකඟතාවක් නොතිබියදීය. ■
