■ අරුණ ජයවර්ධන
නාගරික සංවර්ධන අධිකාරිය මගින් රුපියල් මිලියන 1500ක් වැය කොට කොළඹ ඩීඑස් සේනානායක විදුහලේ හා යාබද පන්සලේ ඉඩම් කොටසක් රජයට පවරාගෙන වාහන අංගණයක් ගොඩනැගීමට කළ සැලසුම නවතා දැමූ බව එම අධිකාරියේ අධ්යක්ෂ ජෙනරාල් ප්රසාද් රණවීර පැවසීය.
ඔහු එසේ පැවසුවේ, ජුනි 1 වැනිදා පැවැති රජයේ ප්රවෘත්ති දෙපාර්තමේන්තුවේ පැවති රජයේ මාධ්ය සාකච්ඡාවට සහභාගි වෙමිනි.
‘මේ ව්යාපෘතියේ ප්රතිලාභ නැවත සේනානායක විද්යාලයට ලැබෙන විදියට තමයි නිර්මාණය කරන්න ගියේ. ඒ ප්රතිලාභ විද්යාලයට එපා නම්, ආදි ශිෂ්යයන්ට එපා නම්, අපිට කිසිම ගැටලුවක් නෑ, එක තව දිනයයි යන්නේ, තවත් ගැසට් එකක් ගහලා අපිට ඒක කැන්සල් කරලා දාන්න පුළුවන්.’ ඔහු එම මාධ්ය සාකච්ඡාවේදී පැවසීය.
එහිදී මාධ්යවේදියකු නැගූ ප්රශ්නයකට පිළිතුරු දෙමින් රණවීර මහතා පැවසුවේ, වාහන අංගණයේ වාහන නවතා තැබීමෙන් ලැබෙන මුදල් සියල්ල සේනානායක විදුහලට ලැබීමට නියමිතව තිබූ බවයි.
සේනානායක විදුහලේ සහ යාබද විහාරස්ථානයේ කොටසක් ජනාධිපතිවරයා විසින් පවරාගැනීමට නියම කර අදාළ ගැසට් නිවේදනය නිකුත් කර ඇති බව මුලින්ම හෙළිදරව් කරන ලද්දේ මැයි 29 වැනිදා, අනිද්දා වෙබ් අඩවිය විසිනි. එම ප්රවෘත්තිය පහත පරිදි වේ.
‘නාගරික සංවර්ධන කටයුත්තක් සඳහා යැයි සඳහන් කරමින් කොළඹ ඩීඑස් සේනානායක විද්යාලයට අයත් හා ඊට යාබදව පිහිටි ශ්රී බෞද්ධාලෝක විහාරයට අයත් ඉඩම් කොටසක් ජනාධිපතිවරයා රජයට පවරාගෙන ඇත.
නාගරික සංවර්ධන ව්යාපෘති විශේෂ විධිවිධාන පනතේ බලතල ප්රකාරව ජනාධිපතිවරයා මෙම පවරා ගැනීම කර ඇති අතර ඊට අදාළ ඉඩම් පවරා ගැනීමේ අති විශේෂ ගැසට් පත්රය මැයි 19 වැනිදා සහිතව අංක 2228/27 යටතේ නිකුත් කර ඇත.
මෙම නාගරික සංවර්ධන කටයුත්ත යටතේ එම පවරා ගන්නා ඉඩම්වල බහු මහල් රථ ගාලක් ඉදිකිරීමට යෝජිත බව සඳහන් කර ඇති අතර ඒ සඳහා පවරා ගෙන ඇති මුළු ඉඩම් ප්රමාණය රූඩ් 2යි පර්චස් 20ක් හෙවත් හෙක්ටයාර් 0.2530කි. ඩීඑස් සේනානායක විද්යාලය, ශ්රී බෞද්ධාලෝක විහාරය හා ඒ අසල ඇති මහාමාර්ගයේ ඇති ඉඩම්වල කොටස් මෙම පවරා ගන්නා ඉඩමට අයත්වේ. පවරා ගත් ඉඩමට අදාල දළ සැලසුම නාගරික සංවර්ධන අධිකාරියේ නගර නිර්මාණ ශිල්පිනී ශානිකා සුමනපාල සහ ඉඩම් කළමනාකරු වජිර දිසානායක සකස් කර ඇති බවද එම අති විශේෂ ගැසට් පත්රයේ සඳහන් කර ඇත.’
මේ ප්රවෘත්තිය අනිද්දා වෙබ් අඩවියෙන් උපුටාගෙන අනෙක් වෙබ් අඩවිවල හා සමාජ මාධ්යවල පළවීමත් සමග සේනානායක විදුහලේ ආදි ශිෂ්යයන් හා අදාළ අනෙකුත් පාර්ශ්වයන් අතර විශාල කතාබහක් නිර්මාණය වූ අතර, පාසල් භූමියෙන් කොටසක් පවරාගැනීමට එරෙහිව ඔවුන්ගෙන් විවිධ විරෝධතා මතුවිය.
එම ව්යාපෘතිය අතහැර දැමීමට නාගරික සංවර්ධන අධිකාරිය තීරණය කර ඇතැයි කියන්නේ එසේ එල්ල වුණු විශාල විරෝධය හේතුවෙනි.
රජයේ මාධ්ය සාකච්ඡාවේදී නාගරික සංවර්ධන අධිකාරියේ අධ්යක්ෂ ජෙනරාල්වරයා ව්යාපෘතියේ ස්වභාවය පැහැදිලි කළේ මේ අයුරිනි.
ගරුගාම්බීර පිවිසුමක් දෙන්නයි හැදුවේ
‘සේනානායක විද්යාලය මේ රටේ ජාතික පාසල් අතර කොළඹ තියෙන ඉතාම වැදගත් පාසලක්. සේනානායක වටරවුමට ඇවිල්ලා ග්රෙගරි පාර දිහා සේනානායක විද්යාලය දිහා බලන විට අපට පළමුවෙන්ම දිස්වන්නේ ටයර් අලුත්වැඩියා කරන මධ්යස්ථානයක් සහ තවත් අවිධිමත් කඩ පේළියක්. විදුහලේ ඉදිරි පෙනුම සම්පූර්ණයෙන්ම අවහිර වෙලා. මේ කඩ හරහා විද්යාලයේ සිසුන්ට සුදුසු නැති දේවල් හුවමාරු වෙනවාය කියලාත් අපිට දැනගන්නට ලැබිලා තිබුණා. අපට අවශ්ය වුණා සේනානායක විද්යාලයට ගරුගාම්බීර පිවිසුමක් හදලා දෙන්න. ග්රෙගරි පාරේ තිබෙන පිවිසුමට අමතරව. බේස්ලයින් පාර, කිංසි රෝඩ් එකෙනුත් එක්තරා පිවිසුමක් අරගෙන මේ පරිශ්රයම නැවත සේනානායක විද්යාලයට අත්පත් කරලා දෙන්න. අපේ තවත් අරමුණක් වුණා උදේ වරුව හවස් වරුව මේ පාසල ඉදිරිපිට වාහන තදබදය අඩුකරන්න. මේක අප්රසන්නයි වගේම, නගරයේ ක්රියාකාරිත්වයට අවහිරයක් වෙලා තිබුණා. විද්යාලය සතු ඉතාමත් පැරණි ගුරු නිවාසයක් තියෙනවා කිංසි රෝඩ් එකට යාබදව. මේ ඉඩම් කොටස් දෙක ඒකාබද්ධ කරලා මහපාරේ තියෙන කඩකාමර ටිකත්, ආසන්නයේ තියෙන විහාරස්ථානයේ කොටසකුත් ඒකාබද්ධ කරලා. නායක හාමුදුරුවන් එක්කත් කතාකරලා, හාමුදුරුවන්ට ලැබෙන ප්රතිලාභ අපි කියලා දුන්නා. යම් ඉඩම් කොටසක් අත්පත් කරගත්තත් නැවත දෙන්නේ විද්යාලයට හා විහාරස්ථානයට. ඔක්කොම ඉඩම් කොටස් එකතු කළාම පර්චස් 100ක් විතර එකතු කරලා ඉතාමත් සැලසුම් සහගත වාහන අංගණයක් හදන්න සැලැස්මක් තියෙනවා. විද්යාලයට ඇතුළු වෙන ද්වාරයක් හදලා, ඒ ද්වාරය දෙපස පාසල් බස්රථ 20කට අධික ප්රමාණයක් නවතා තබන්න පුළුවන්. කාර් වෑන් නවත්තන්න පුළුවන්. මේ ඔක්කොම වාහන 250කට අධික ප්රමාණයක් නවතා තබන්න හැකි බහුමහල් රථ ගාලක්. උඩ මහලේ ගුරු නේවාසිකාගාර, විදුහල්පති නිල නිවාස 4ක් හදලා ඒක නැවත සේනානායක විද්යාලයට බාරදෙන්න. නමුත් මේක ඉතාමත් වැරදි ප්රවෘත්තියක් හැටියට නිර්මාණය කළා අපි සේනානායක විද්යාලයෙන් ඉඩමක් මංකොල්ල කන්න යනවා කියලා. මේක මං හිතනවා ඩීඑස් සේනානායක විද්යාලයට ලබාගන්න තිබුණු ඉතාමත් වටිනා දැවැන්ත ව්යාපෘතියක්. මේ ගැන අපි මුලින්ම විදුහල්පතිතුමා එක්කත් කතාකළා. විද්යාලයට ගියා. ගිහින් ඒ සැලසුම සකස් කරලා, ඉඩම් අත්පත් කරගැනීමේ කටයුත්ත තමයි කළේ. අතිගරු ජනාධිපතිතුමා අද මට උපදෙස් දුන්නා විද්යාලය වෙනුවෙන්ම කරන්න හැදූ මේ ව්යාපෘතිය පිළිබඳ, අසත්ය ප්රකාශ නිර්මාණය කරලා ප්රකාශ කරනවා නම් ඒ ව්යාපෘතිය නවත්වන්න. මම අදම උපදෙස් දුන්නා අපේ නිලධාරීන්ට මේ ව්යාපෘතිය සඳහා නාගරික සංවර්ධන අධිකාරියේ, රජයේ, භාණ්ඩාගාරයේ මුදල් වැය කරන්න එපා, අපි ඒ ව්යාපෘතිය නවතා දැමීමට තීරණය කළා. ඉතාම වැදගත් ව්යාපෘතියක් මේ අවිධිමත් මාධ්ය භාවිතය නිසා.’
ජනාධිපති: කඩ පෙළ කැතයි නේද?
මේ ව්යාපෘතිය පිළිබඳ ෆේස්බුක් හරහා ප්රකාශයක් නිකුත් කළ ඇමති උදය ගම්මන්පිල මෙසේ කියයි. ‘ජනාධිපතිතුමා ඉස්කෝලෙ ඉදිරිපිට තියෙන කඩපෙළ දැකලා ටිරාන් අලස් අයියාට (මුල්ම විදුහල්පති ආර්අයිටී අලස්ගේ වැඩිමහල් පුත්රයා, පාර්ලිමේන්තු මන්ත්රී) කියලා තියෙනවා, මේ කඩපෙළ හරි කැතයි නේද කියලා. අලස් අයියා කියලා තියෙනවා, මගේ තාත්තා විදුහල්පති කාලයේ සිට ඔය කොටස පවරාගන්න ඉල්ලීම් කරලා තියෙනවා, ඒත් බැරිවුණා කියලා. ජනාධිපතිතුමා කියලා තියනවා හොඳ යෝජනාවක් ඉදිරිපත් කරන්න කරලා දෙන්නම් කියලා. ඒ අනුව අලස් මහත්මයා විදුහල්පතිතුමාවයි ආදි ශිෂ්ය සංගමයේ නිලධාරින්වයි කැඳවාගෙන ලිඛිතව ඉල්ලීමක් කරලා තියෙනවා, වෘත්තීය පුහුණු මධ්යස්ථානයක් හදලා දෙන්නයි කියලා ජනාධිපතිතුමාට. ඒ අනුව නාගරික සංවර්ධන අධිකාරියේ සභාපතිතුමා (හර්ෂාන් ද සිල්වා, ඔහු ඩීඑස් සේනානායක විදුහලේ ආදි ශිෂ්යයෙකි.) ඉඩම බලලා, කොයිතරම් හීනි බිම්තීරුවක් වුණත් මේ ප්රදේශයේ ඉඩම් මිල අධිකයි, ඒ නිසා අත්පත් කරගැනීමේදී පන්සලට විශාල වන්දියක් ගෙවන්න වෙනවා. එවැනි වන්දියක් ගෙවලා පවරාගන්න නම් රජයේ නිශ්චිත ව්යාපෘතියක් තියෙන්න ඕනෑ. මේ බිම් තීරුව යම්කිසි ව්යාපෘතියක් කරන්න ඉඩ මදි. ඒ අනුව රථගාලක්, නිල නිවාස හතරක් සහ මධ්යම පන්තික මහල් නිවාස 60ක් හදන්න සැලසුම් කරලා.’
මේ අතර, ව්යාපෘතිය සඳහා ඉදිරිපත් කළ කැබිනට් පත්රිකාවේ සඳහන් වන්නේ, ‘ව්යාපෘතිය විවෘත තරගකාරී ප්රසම්පාදන ක්රියාවලිය හරහා කොන්ත්රාත්කරුවන් තෝරාගෙන ක්රියාත්මක කිරීමට යෝජිත අතර, වැයවන මුදල් ව්යාපෘතිය තුළින්ම (පෙර විකුණුම් පදනම මත) උත්පාදනය කිරීමට යෝජනා කෙරේ.’ යනුවෙනි.
දැන් පෙනෙන්නට තිබෙන පරිදි දැඩි විරෝධය නිසා භාණ්ඩාගාරයෙන්, රජයෙන් රුපියල් මිලියන 1500ක් වියදම් කර නාගරික සංවර්ධන අධිකාරිය සේනානායක විදුහලට ලබාදෙන්නට සැලසුම් කර තිබුණු දැවැන්ත ප්රතිලාභ සහිත ව්යාපෘතිය අතහැර දමා ඇත.
සාධාරණ ප්රශ්න
එහෙත්, මේ සිදුවීම හරහා අපට නැගෙන සාධාරණ ප්රශ්න කිහිපයක් පහත පරිදි වේ.
1. නාගරික සංවර්ධන අධිකාරිය රුපියල් මිලියන 1500ක් වියදම් කර ව්යාපෘතියක් සැලසුම් කරන්නේ ජනාධිපතිවරයාට ‘කඩ පේළිය කැතයි’ කියා සිතුණු නිසාද?
2. ග්රෙගරි පාරෙන්, ඩීඑස් සේනානායක විදුහල ආරම්භයේ සිටම තිබුණු මනස්කාන්ත නිස්කලංක පිවිසුම හා බෞද්ධාලෝක මාවතෙන්ද තිබෙන පිවිසුම යනාදි දැනට තිබෙන ප්රමාණවත් පිවිසුම් දෙකක් වෙනුවට අතිශය කලබලකාරි, තදබදයෙන් යුක්ත බොරැල්ල කනත්ත වටරවුමෙන් නව ‘ද්වාරයක්’ දීමේ තර්කය කුමක්ද? වාහන ගාලේ තිබෙන වාහන සවස 1.30ට එකවර මාර්ගයට පිවිසීමේදී ඇතිවන්නේ පරණ තදබදයම නොවේද?
‘ගරුගාම්භීර ද්වාරය’ ආණ්ඩුවේ ඉඩම් විකිණීමේ ව්යාපෘතිය වසා තැබීමට තවරන ලද අයිසින් තට්ටුවක්ද?
3. පාසල් ඇරඹෙන හා අවසන් වන වේලාවට, පාර පුරා වාහන නවතාගෙන තදබදයක් ඇතිවන්නේ සේනානායක විදුහල ඉදිරිපිට පමණක් නොවේ. ආනන්ද, නාලන්ද, විසාකා, දේවි බාලිකා, සිරිමාවෝ බණ්ඩාරනායක, ගෝතමී බාලිකා, මියුසියස් ආදි කොළඹ නගරය ආශ්රිතව ඇති සෑම විදුහලකම පමණක් නොව රටේ නගරාසන්න හැම විදුහලකම ඒ ප්රශ්නය තිබේ.
එය, එම වාහන කළමනාකරණයට පොලිසිය හා විදුහල් අධිකාරින් දක්වන අසමත්කම මෙන්ම දෙමාපියන්ගේ ආත්මාර්ථකාමිත්වයද නිසා ඇතිවන්නකි. එය නැති කිරීමට යැයි කියමින් මිලියන 1500ක රථගාලක් බොරැල්ලේ සේනානායක විදුහලට පමණක් ලබාදීමේ තර්කය කුමක්ද? එය කොළඹ ආයෝජන ප්රවර්ධන කලාපයක පිහිටා තිබීමද? කොළඹ තදබදය ඇති කරන අනෙක් පාසල් සම්බන්ධයෙනුත් ආණ්ඩුව මේ පහසුකම සපයා දෙනවාද? ඒ රථගාල අස්සට නිවාස සංකීර්ණයක් ඇතුළු බහුකාර්ය ව්යාපෘතියකුත් ආවේ කොහොමද?
4. නාගරික සංවර්ධන අධිකාරියේ අධ්යක්ෂ ජෙනරාල්වරයා, එක් වරෙක කියන්නේ ව්යාපෘතිය කරන්නේ රජයේ, භාණ්ඩාගාරයේ වියදමෙන් බවයි. එහෙත්, මාධ්යවේදියකු නැගූ ප්රශ්නයකට ඔහු මෙසේ පිළිතුරු දෙයි. ‘භාණ්ඩාගාරය මුදල් වෙන්කරන්නේ නැහැ. වෙන්කරන්නේ නාගරික සංවර්ධන අධිකාරිය. අධිකාරිය මේ ව්යාපෘතියට අරමුදල් සපයාගන්න ඕනෑ. අරමුදල් සපයාගැනීමට ක්රමවේදයක් සකසා ගන්න ඕනෑ.. නාගරික සංවර්ධන අධිකාරියේ ආයෝජන, ප්රාග්ධන පහසුකම් සපයන්න නම් ඒ දේපළ අධිකාරියට අයිති වෙන්න ඕනෑ. මේකට ආයෝජනය කරන්න මුදල් හොයාගන්න ඕනෑ. රුපියල් මිලියන 1500ක මුදලක් ආයෝජනය කරන්න කවුද ඉදිරිපත් වෙන්නේ ඉඩමක් නැතිව. අධ්යාපන අමාත්යාංශයට ඒ සඳහා අවශ්ය ප්රතිපාදන නොමැති නම් විහාරස්ථානයට ඒ කඩකාමරවලට වන්දි ගෙවන් ක්රමවේදයක් නැතිනම්, ක්රමවේදය කරන්නේ කවුද කියන්න ඔබතුමා දන්නවා නම්?’
අධ්යක්ෂ ජෙනරාල්වරයා, වියදම කරන්නේ අධිකාරියෙන්ද, ආයෝජකයන්ද යන්න ගැන පැහැදිලිව නොකියයි. එහෙත්, ඒ කියන දේ අසන අයට පැහැදිලි වන්නේ, විදුහලෙන් අත්පත් කරගන්නා ඉඩම්, ආයෝජකයකුට පවරා දී, ව්යාපෘතිය ගොඩනගන බවයි. එයින් ලැබෙන ප්රතිලාභ ලැබිය යුත්තේ ඒ ආයෝජකයාටය. නැතිනම් ඔවුන් ආයෝජනය කරන්නේ මොකටද?
ඉන් නැවත පැහැදිලි වන්නේ මෙයද, කොළඹ රජයේ ඉඩම් ආයෝජකයන්ට ලබාදීමේ ව්යාපෘතියේම කොටසක් බවයි. දැන් ඒ සඳහා පාසල් ඉඩම්ද පවරා ගැනීම අරඹා ඇත.
ඒ අනුව, සේනානායක විදුහලට ඔය කියන ‘දැවැන්ත ප්රතිලාභ’ හිමිවිය හැකිද?
5. විදුහල්පති හා ආදි ශිෂ්ය සංගමය ඉල්ලූ වෘත්තීය පුහුණු මධ්යස්ථානය කුණු කූඩයට දමා, මේ ඉතා වටිනා ඉඩමෙන් මුදල් ඉපැයීමට ආණ්ඩුව කටයුතු කර තිබෙනවාද? නැද්ද?
මේ ක්රියාවලිය පිරික්සීමෙන් එය පැහැදිලි වෙයි. ‘ජනාධිපතිවරයාට කඩපෙළ කැතයි කියා සිතෙයි. ටිරාන් අලස්ට කියා විදුහලෙන් ඉල්ලීමක් ගෙන්වා ගනියි. ඒ ඉල්ලීමේ නැති බහුකාර්ය ආයෝජන ව්යාපෘතියක් සැලසුම් කෙරෙයි. ඊට ආයෝජකයන් ගෙන්වාගනියි.’
6. පාසල් සම්බන්ධ බලය තිබෙන අධ්යාපන අමාත්යාංශය මේ ක්රියාවලියේදී සිටින්නේ කොතැනද? පාසලකට අයිති ඉඩමක් පවරාගෙන බහුකාර්ය වෙළඳ ව්යාපෘති යෝජනාවක් ඉදිරිපත් වන තෙක් අධ්යාපන අමාත්යයාංශය කළ මැදිහත්වීම කුමක්ද?
7. රටේ අනෙකුත් නාගරික පාසල්වලටත්, මෙලෙස රජයේ වියදමෙන් රථගාල් හදා දී ඒවායේ අදායම ඒ පාසල්වලටම දීමේ ව්යාපෘතියක් රජය ආරම්භ කොට තිබේද?■
