■ අනුරංග ජයසිංහ
ශ්රී ලංකාවට ජුනි මාසයේ සිට රුසියානු සංචාරකයන් ගෙන්වීමේ ව්යාපෘතියක් පිළිබඳ රුසියාවේ හිටපු තානාපති උදයංග වීරතුංග මාධ්ය ආයතනවලට කියා තිබුණත්, සංචාරක ප්රවර්ධන අධිකාරියට එවැනි ව්යාපෘතියක් ගැන දැනුම් දී නැතැයි එම අධිකාරියේ අධ්යක්ෂ ජෙනරාල් ධම්මිකා විජේසිංහ පවසයි.
එවැනි ව්යාපෘතියක් පිළිබඳ සිවිල් ගුවන් සේවා අධිකාරියට දැනුම් දී ඇතිදැයි අප කළ විමසීමකදී එම අධිකාරියේ අධ්යක්ෂ ජෙනරාල් තේමිය අබේවික්රමද ප්රකාශ කළේ තමා එවැනි ව්යාපෘතියක් පිළිබඳ කිසිවක් නොදන්නා බවය.
උදයංග වීරතුංග මහතා ඉරිදා පුවත්පතකට ලියූ ලිපියක විශේෂ ගුවන් යානා මගින් ශ්රී ලංකාවට රුසියානු සංචාරකයන් ගෙන්වීමේ ව්යාපෘතියක් පිළිබඳ සඳහන් කර තිබුණි.
ජුනි මාසයේ සිට මොස්කව් සිට කොළඹ දක්වා ඍජු ගුවන් යානා යොදවන බවත්, මුලින්ම සතියකට එක ගුවන් යානය බැගින් යොදවන බවත්, දැනටමත් ඒ330 ගුවන් යානයක් යොදාගැනීමට සූදානම් කර හමාර බවත් වසර අවසාන වන විට රුසියානුවන් 26,000ක් සංචාරය සඳහා ශ්රී ලංකාවට ගෙන්වීමට බලාපොරොත්තු වන බවත් එම ලිපියේ සඳහන් කර තිබුණි.
මේ වන විට රුසියාවේ කොවිඩ්-19 රෝගීන් මිලියන 5.01ක් වාර්තා වී ඇති අතර මැයි මාසයේ සාමාන්යයක් වශයෙන් දිනකට රෝගීන් 8000 බැගින් වාර්තා වී තිබුණි.■
