- ඔවුන් ප්‍රශ්න කරන්නේ ධම්මික පෙරේරා අධ්‍යාපනය ලැබූ හොරණ ශ්‍රීපාලි විද්‍යාලයේ අඩුපාඩු පවතිද්දී දේවි බාලිකාව සඳහා ඔහුගේ මේ කරුණාව සැක සහිත බවය.
කොළඹ දේවි බාලිකා විද්‍යාලයේ විද්‍යා, ගණිත සිසුවියන් සංඛ්‍යාව පුළුල් කිරීම යටතේ කැබිනට් මණ්ඩලයට යෝජනාවක් ඉදිරිපත්වී ඇත. මේ ඒ ගැනය.
ආණ්ඩුව සමඟ කටයුතු කරන ප්‍රකට ව්‍යාපාරිකයන් වන ධම්මික පෙරේරා හා දිලිත් ජයවීර නුගේගොඩ උඩහමුල්ලේ පිහිටි ශ්‍රී විජයාරාම මහා විද්‍යාලයට පාසල් නිවාඩු කාලයේ එහි ඉබි කඩාගෙන ගියේ ඇයි යනුවෙන් අප ප්‍රශ්න කළේ පසුගිය මාර්තු 28 දින කලාපයෙන්ය.
‘වැසී යමින් පවතින එම පාසල ජාතික පාසලක් ලෙස පරිවර්තනය කිරීමේදී අවශ්‍ය වන භෞතික සම්පත් සංවර්ධනය සඳහා (ඉබි කඩා ඇතුල්වීමේ) නිරීක්ෂණ චාරිකාවට එක්වූ බව’ එම ගමනේ සම්බන්ධීකාරක වශයෙන් කටයුතු කළ පාර්ලිමේන්තු මන්ත්‍රී මධුර විතානගේ ඒ සම්බන්ධයෙන් එදා මාධ්‍යයට කියා තිබුණි.
එහෙත් එය එසේ නොවන බව අපගේ ප්‍රශ්න කිරීම තහවුරු කරමින් මේ වනවිට කරුණු අනාවරණය වී ඇත. කරන්නට යන්නේ ශ්‍රී විජයාරාම විද්‍යාලය සංවර්ධනය කිරීම සඳහා ධම්මික පෙරේරා සිය නොමසුරු ආධාරය ලබාදීම නොවේ. කොළඹ 08 දේවි බාලිකා විද්‍යාලයේ උසස් පෙළ පන්තිවලට වැඩිපුර ශිෂ්‍යාවන් බඳවාගෙන ඔවුන්ට පන්ති පැවැත්වීම සඳහා විජයාරාම විද්‍යාලය යොදා ගැනීමටත්, ඒ සඳහා දේවි බාලිකා විද්‍යාලයට රුපියල් මිලියන 100ක පරිත්‍යාගයක් කිරීමටත් ධම්මික පෙරේරා සූදානම් වීමය.
මේ කතාව ඇතුළත් කැබිනට් පත්‍රිකාව අධ්‍යාපන අමාත්‍ය මහාචාර්ය ජීඑල් පීරිස් 2021 මාර්තු 29 දින සහිතව ‘කො/ දේවි බාලිකා විද්‍යාලයේ විද්‍යා හා ගණිත අංශය පුළුල් කිරීම සඳහා බප/ජය ශ්‍රී විජයරාම මහා විද්‍යාලයේ ගොඩනැගිලි හා ඉඩම් පවරා දීම හා ඉදිරි සංවර්ධන කටයුතු’ යනුවෙන් ඉදිරිපත් කර ඇත. ඊට අදාළ ධම්මික පෙරේරාගේ සම්බන්ධය කැබිනට් පත්‍රිකාවේ අංක 2.3 යටතේ සඳහන් වන්නේ මේ ආකාරයටය. ‘අදාළ වැඩි දියුණු කිරීම් සහ අලුත්වැඩියාවන් සඳහා රජයේ මුදල් වැය නොවන අතර ලංකාවේ ප්‍රමුඛ පෙළේ පෞද්ගලික ව්‍යාපාරිකයකු වන ධම්මික පෙරේරා මහතා සහ ඔහුගේ භාර්යාවට අයත් ධම්මික ප්‍රෙෂිලා පදනම මගින් අදාළ භෞතික සම්පත් වැඩිදියුණු කිරීමට රුපියල් මිලියන 100ක් යෙදවීමට එකඟ වී තිබීම’
එමෙන්ම මෙම කටයුත්ත සාධාරණය කිරීම සඳහා කැබිනට් පත්‍රිකාව සඳහන් කරන්නේ, මේ වනවිට දේවි බාලිකා විද්‍යාලයේ විද්‍යා, ගණිත අංශයන් සඳහා සමාන්තර ශේ්්‍රණි 10ක් පවතින බවත්, ඉන් සියයට 50ක් එම විද්‍යාලයේම සිසුවියන්ගෙන් සම්පූර්ණ වන බවත්, ඒ අනුව පිටතින් ඇතුළත් විය හැකි සිසුවියන් ගණන 200ක් බවත්, එසේ වුවද ‘ඒ’ සමාර්ථ 8 හෝ 9 ලබාගත් සිසුවියන් 3000ක පමණ පිරිසක් එයට ඉල්ලුම් කරන බවත්, ඒ නිසා එම විද්‍යාලයට ඇතුළත් කිරීම් පුළුල් කළ යුතු බවත්ය.
කැබිනට් පත්‍රිකාවේ එම සඳහන් කිරීම් සමඟ ප්‍රශ්න කිහිපයක් අපට පැන නඟී. එහි මූලිකම ප්‍රශ්නය වන්නේ දේවි බාලිකා විද්‍යාලය උසස් පෙළ විද්‍යා, ගණිත සිසුවියන්ට ඉඩ ලබාදීම සඳහා පුළුල් කිරීමේ අදහස හෝ වැඩපිළිවෙළ ධම්මික පෙරේරා දන්නේ කෙසේද යන්නය. ඒ වාගේම එය අධ්‍යාපන ඇමති ජීඑල් පීරිස් හෝ ජනාධිපතිවරයා ඔහුට කියා ඇතැයි උපකල්පනය කළහොත්, මේ කැබිනට් පත්‍රිකාව ඉදිරිපත් කිරීමට පෙර ඔහු විජයාරාම පාසල නිරීක්ෂණයට යන්නේ ගෙදර යන ගමන් අතරමඟදී අහම්බෙන් පුඩ්සිටි ගියා වාගේද යන්නය. ඒ පිළිබඳ ඔහු දැනුවත්ව බව පෙනේ. ඒ අනුව පාර්ලිමේන්තු මන්ත්‍රී මධුර විතානගේ ප්‍රමුඛ එම ප්‍රදේශයේ ආණ්ඩු පක්ෂයේ දේශපාලන අධිකාරිය විජයරාම පාසල ‘සංවර්ධනය’ ගැන කී කතා රැවටිලි බස් බව දැන් පැහැදිලිය.
එය කැබිනට් පත්‍රිකාවේ මේ ආකාරයට අපූරුවට විස්තර කර ඇත. ‘දැනට බප/ජය ශ්‍රී විජයරාම විද්‍යාලයේ ඉගෙනුම ලබන 71ක් වන සිසුන් සඳහා ජාතික පාසලක් වන සීඑම්එස් ශ්‍රී ජයවර්ධනපුර විද්‍යාලයට හෝ ජයවර්ධනපුර කලාපය තුළ වඩා පහසුකම් සහිත පාසලක් දෙමාපිය අභිමතය පරිදි ලබා දීමට යෝජිතය. එමෙන්ම සීඑම්එස් ජයවර්ධනපුර විද්‍යාලයට ඇතුළත් වන සිසුන් සඳහා ඉදිරි වර්ෂ දෙකක් තුළ නොමිලේ ප්‍රවාහන පහසුකම් ලබා දීමට ද ධම්මික ප්‍රෙෂිලා පදනම එකඟ වී ඇත.’ ධම්මික පෙරේරාගේ කරුණාවේ තරම කෙතරම්ද යැයි සිතෙන්නේ මේ විජයරාම පාසලේ ඉවත් කරන සිසුන් වෙනුවෙන් අලුත් පාසලට යෑමට ප්‍රවාහන පහසුකම්ද සලසන නිසාය.
පාසල්වලට උදව් කිරීමේ සැබෑ අරමුණක් ඇති පදනමක් කරන්නේ එසේ හඳුනා ගන්නා පාසලකට ගොස් එම පාසලේ ඇති අඩුපාඩු සකස් කර දීමය. නොඑසේව අඩුපාඩු හඳුනා ගත්තේ යැයි කියන පාසලක ඒ වනවිටත් ඉගෙනුම ලබන සිසුන් වෙනත් පාසලකට මාරුකර, කිලෝමීටර් 10කට වඩා ඈතින් ඇති සුපිරි යැයි කියන පාසලකට තවදුරටත් පහසුකම් සැලසීම සඳහා කටයුතු කිරීම නොවේ.
එය එසේ නොවේනම් සිදුවිය හැක්කේ කුමක්ද? ආණ්ඩුවේ වුවමනාව මත හෝ ධම්මික පෙරේරාගේ වුවමනාව මත සිදුකිරීමට නියමිත යම් ව්‍යාපෘතියක පළමු අදියර වශයෙන් විජයාරාම පාසල නිරීක්ෂණය සඳහා ධම්මික පෙරේරා ගොස් ඇති බවය. ඉන්පසු ඊට අදාළ වන සේ අධ්‍යාපන අමාත්‍ය ජීඑල් පීරිස් කැබිනට් පත්‍රිකාවක් ඉදිරිපත් කර ඇති බවය.
එසේ කීමට හේතුව විජයරාම පාසලේ අතිරික්ත ගොඩනැගිලි ඒ වනවිටත් ඒ අවට මහාමායා විද්‍යාලයේ 6,7 හා 8 වසර පන්ති පැවැත්වීමට ලබාදී තිබූ නිසාය. එමෙන්ම ක්‍රීඩා පිටියක්, ශ්‍රවණාගාරයක්, විද්‍යාගාරයක් ඇතුළු භෞතික සම්පත් ඇති එම පාසල වැසී යෑම වැළැක්වීම සඳහා ජාතික පාසලක් ලෙස පරිවර්තනය කිරීමේ ඉල්ලීමක්ද පළාත් අධ්‍යාපන බලධාරින් ඒ වනවිටත් කර තිබීමය. ඔවුන් එම ඉල්ලීම කර තිබුණේ එම පාසලට කිලෝමීටර් කිහිපයක් නුදුරින් පිහිටි නුගේගොඩ අනුලා හා ශාන්ත ජෝශප් බාලිකා යන පාසල්වල තදබදය ඒ මගින් අඩුවේ යැයි උපකල්පනය කිරීමෙනි.
එහෙත් දැන් යෝජනා වී ඇත්තේ ප්‍රායෝගිකව සිදුවීමට අවස්ථාව ඉතාමත් අඩු දෙයකි. යම් පාසලක ප්‍රාථමික අංශය හා ද්වීතියික අංශය එක ළඟ වෙන වෙනම පැවතීම හෝ එකම පාසලක කොටස් කිහිපයක් එක ළඟ වෙන වෙනම පැවතීම අපට හුරුපුරුදු හා තාර්කිකව පිළිගත හැකි ප්‍රායෝගිකව ක්‍රියාත්මක විය හැකි දෙයකි. එහෙත් කිලෝමීටර් 10ක් පමණ දුර ස්ථානයක පාසලක උසස් පෙළ පන්ති කිහිපයක් පමණක් පැවතීම ප්‍රායෝගික යැයි අපට කල්පනා කළ හැකිද? අඩුම තරමේ එහි යම් ප්‍රායෝගිකකමක් අපට සිතාගත හැක්කේ විජයරාම පාසලට නුදුරින් ඇති අනුලා හා ශාන්ත ජෝශප් බාලිකා විද්‍යාලවල යම් පන්ති ප්‍රමාණයක් විජයරාම පාසලේ පවත්වන්නට තීරණය කර ඇත්නම්ය. එසේ කීමට හේතුව අනුලා හා ශාන්ත ජෝශප් බාලිකා යන පාසල්ද විශාල ඉඩක පවත්වාගෙන යන පාසල් නොවීමත් දේවි බාලිකා විද්‍යාලයට මෙන්ම එම පාසල් දෙකටද උසස් පෙළ පන්ති සඳහා විශාල ඉල්ලුමක් පවතින නිසාත්ය.
ප්‍රායෝගික නොවන බව පෙනෙන ක්‍රියාකාරකමක් මගින් කොළඹ දේවි බාලිකා විද්‍යාලය වෙනුවෙන් නුගේගොඩ විජයරාම විද්‍යාලයේ ආරම්භ කිරීමට නියමිත මෙම කටයුත්ත ධම්මික පෙරේරාද, ඔහු සමඟ කටයුතු කරන ආණ්ඩුව කරන ඇත්තන්ද පමණක් දන්නා ව්‍යාපෘතියක පළමු අදියර විය හැකිය. ඊට හේතුව උසස් පෙළ විද්‍යා අධ්‍යාපනය ලබාදීම පුළුල් කිරීමට වුවමනා නම් ඒ සඳහා දේවි බාලිකාව ඈඳා ගන්නේ නැතිව විජයරාම පාසලේ නමින් හෝ වෙනත් නමකින් අවශ්‍ය භෞතික හා මානව සම්පත් සම්පාදනය කර එම කටයුත්ත කළ හැකි නිසාය.
ඒ නිසාම මෙම යෝජනාව ගැන විජයරාම පාසලට සම්බන්ධ පිරිස් මෙන්ම දේවි බාලිකා විද්‍යාලයේ ආදි ශිෂ්‍යාවන්ද මේ වනවිට විරෝධය පලකරන්නට පටන් ගෙන ඇත. ඔවුන් ප්‍රශ්න කරන්නේ ධම්මික පෙරේරා අධ්‍යාපනය ලැබූ හොරණ ශ්‍රීපාලි විද්‍යාලයේ අඩුපාඩු පවතිද්දී දේවි බාලිකාව සඳහා ඔහුගේ මේ කරුණාව සැක සහිත බවය. එය ඇත්තකි. කොළඹ 08 වටිනාකම ඉතා ඉහළ ඉඩක පවත්වාගෙන යන මුළු දේවි බාලිකාවම ඊට වඩා වැඩි ඉඩක විජයරාම පාසලේ ස්ථාපිත කළ හැකිය. එය උසස් පෙළින් ආරම්භ වී ක්‍රමයෙන් පහළ පන්ති දක්වා විජයරාම පාසල් භූමියට කරන මාරු කිරීමක් විය හැකිය. එහි අවසාන ප්‍රතිඵලය විය හැක්කේ දේවි බාලිකා විද්‍යාලය කොළඹ 08 වත්මන් ස්ථානයෙන් විතැන් වී නුගේගොඩ උඩහමුල්ලේ ස්ථාපිත වීමත්, දේවි බාලිකා වටිනා ඉඩම හිස් වීමත්ය.
කොළඹ ගොල්ෆ් ක්‍රීඩා පිටියට යාබදව ඇති එසේ හිස්වන දේවි බාලිකා ඉඩම හිස් ලෙසම නොතිබෙනු ඇත. රාජපක්ෂවරුන්ගේ මිශ්‍ර සංවර්ධන ව්‍යාපෘතියක් සඳහා එම ඉඩම කදිමට ගැළපේ. දැනටමත් කොළඹ නගරයේ රාජ්‍ය ආයතන ගණනාවක් එම ස්ථානවලින් ඉවත් කර එම ඉඩම් ආයෝජකයන්ට ලබාදීමට ආණ්ඩුව කැබිනට් මණ්ඩල අනුමැතිය ලබාගෙන ඇත.
වත්මන් කැබිනට් මණ්ඩල යෝජනාව එහි ආරම්භය විය හැකිය. ධම්මික පෙරේරාගේ දේවි බාලිකාවට මැදිහත්වීමේ සැකය යනු එය ලෙස ඒ අනුව අනුමාන කළ හැකිය.■
