විධිමත් ආකාරයේ සායනික පර්යේෂණයක් සිදු නොකර කොවිඩ්-19 ඖෂධයක් යැයි කියමින් කරල් වර්ගයක් අලෙවි කරමින් සිටී. ඒ කරලට ඇතැම් මාධ්යවේදීන්ගේත් සහයෝගය ලැබී තිබේ.
‘අපි ප්රශ්නයම කතා කරලා හරි යන්නේ නැහැ. ගොඩ එන මාර්ගයක් හොයා ගන්නටත් අවශ්යයි. මේ අතරේ විස්මිත නිමැවුමක් හොයා ගන්නවා. ඒක හොයා ගන්නේ කරාපිටිය ශික්ෂණ රෝහලේ වෛද්ය කණ්ඩායමක්.’
එසේ කීවේ අන්තර්ජාලයෙන් විවිධාකාර චෝදනාලාභීන්ට, මිථ්යාව සහ බොරුව වපුරුවන්නන්ට අවස්ථා කිහිපයකදීම සම්මුඛ සාකච්ඡාවලින් ප්රචාරය දුන් චමුදිත සමරවික්රමය. ඔහු මේ කතාව කීවේ මෙගා ප්රයිමල් ඉන්ටේක් නමින් කොරෝනා වසංගතයට ඖෂධයක් ලෙස අලෙවි කරන කරල් වර්ගයක් ගැන සිදු කළ සම්මුඛ සාකච්ඡාවකදීය. මෙගා ප්රයිමල් ඉන්ටේක් නමින් එම කරල් වර්ගය බෝතල් ලෙස අලෙවි කරනු ලබයි. එකක මිල 3750කි.
කොවිඩ්-19 වසංගතයෙන් ගොඩ එන මාර්ගයක් හොයන්නට චමුදිත සමරවික්රම ඕනෑ නැත. මේ වන විටත් ලෝකයේ ඉහළම පහසුකම් සහ ප්රාග්ධනය සහිත ආයතන ගණනාවක්, ලොව ප්රමුඛ පෙළ විද්යාඥයන් සමඟ එක්ව ගොඩ එන මාර්ගය සොයා ගෙන හමාරය. මේ තරම් ඉහළ මිලට ව්යාජ ඖෂධ අලෙවි කිරීමෙන් ගොඩ එන්නේ ආසාදිතයන් නොවේ. ව්යාපාරිකයන්ය.
වසංගතයට විසඳුම අපේ රටෙන් එන්න ඕනෑ බව හිතෙන තරමට හීනමානය නම්, ගෝලීය වශයෙන් සිදු කළ විද්යාත්මක කාර්යභාරයට අපේ රටේ විද්යාඥයන්ද දායක වී ඇති බව සිහිපත් කරගත යුතුය. උදාහරණයක් ලෙස වෛරසය වෙන් කර ගැනීමේදීත්, කොරෝනා පවුලේ වෛරස වර්ග පිළිබඳ අධ්යයනය කිරීමේදීත් ලොව ප්රමුඛ පෙළ කාර්යභාරයක් කළ විද්යාඥයෙකු ලෙස අපේ ලාංකිකයෙකු වන මහාචාර්ය මලික් පීරිස් හැඳින්විය හැක. ව්යාජ ඖෂධ ප්රවර්ධනය කරන සෑම අවස්ථාවකදීම මාධ්ය සිදු කරන්නේ, කොවිඩ්-19 සඳහා සැබෑ විසඳුම වන එන්නත ලබාදෙමින් වසංගතය පරාජය කිරීම පස්සට යැවීමකි.
කෙසේ වෙතත්, අපේ රටේ අයට එන්නත මදිය. අපේ රටෙනුත් විසඳුමක් ගෙනාවායැයි කියන්නම ඕනෑය. ධම්මික පැණිය සායනික පරීක්ෂණයෙන් අසමත් වූ පසු අලුත් නාඩගමක් එළියට පැමිණ ඇත.
මේ ඖෂධය හොයා ගත් බව කියමින් මාධ්ය ඉදිරියට ආවේ කරාපිටිය රෝහලේ වෛද්ය සම්පත් ගුණවර්ධනය. ‘මේක විද්යාත්මක පදනමක් මුල් කරගෙන තමයි කළේ.’ යනුවෙන් චමුදිත සමරවික්රමගේ සාකච්ඡාවේදී ඒ වෛද්යවරයා කියා තිබුණි.
මෙය විද්යාඥ කණ්ඩායමක් සිදු කළ එකක් බව ඔවුන් කීවත්, එය පවුලේ ව්යාපාරයක් බඳුය. එහි නම් සඳහන් වූ ආචාර්ය නන්ද ගුණවර්ධන මේ වෛද්යවරයාගේ සහෝදරයාය. කාන්තිකා විජේසේකර යනු වෛද්ය සම්පත් ගුණවර්ධනගේ බිරිඳය.
මේ කියන කරලෙහි අඩංගු වන්නේ ඉඟුරු, සුදුලූණු, කොත්තමල්ලි, මදුරුතලා, වදකහ ආදි ශාක වර්ග කිහිපයකි. එමෙන්ම එය ප්රවර්ධනය කරන්නේත්, අලෙවි කරන්නේත් ඖෂධයක් ලෙස නොව ආහාර අතිරේකයක් ලෙස හඟවමිනි. එමෙන්ම ධම්මික වෙද මහතා වගේ තමන්ගේ එක ‘සීයට සීයක් සාර්ථකයි, එක්වරක් බීවොත් ජීවිතේට වැළඳෙන්නේ නෑ’ වැනි ව්යාජ පොරොන්දු නොදී ඉන්නට තරම් මෙගා ප්රයිමල් විකුණන උදවිය සූරය. ඒ වෙනුවට මෙය පානය කරන ආසාදිතයන් මිය යන්නේ නැති බව ඔවුන් ප්රවර්ධනය කරන කතාවය. එහෙත් ඒ බව ඔවුන් විද්යාත්මකව සහතික කර නැති අතර, ව්යාජ ප්රචාරණ උපක්රමයකි.
මේ බෙහෙත ශරීරය තුළ කරන්නේ කුමක්දැයි විමසද්දී වෛද්ය සම්පත් ගුණවර්ධන කියා තිබුණේ පෙණහළුවල තිබෙන සෛල වර්ග අතරින් ඇල්වියර් ටයිප් 2 නම් සෛල වර්ගයට කොවිඩ්-19 වෛරසය පහර දෙන බවත් මේ ඖෂධයෙන් එය වළක්වන බවත්ය.
ඇල්වියලර් ටයිප් 2 වර්ගයේ සෛලවලට කොව්ඩ්-19 වෛරසය ඉලක්ක කරන බව සැබෑවකි. ඒ බව ලොව පුරා පර්යේෂකයන් කියා ඇති අතර අන්තර්ජාලයේ සෙවුමකින් වුව සොයා ගත හැක.
පෙණහළුවල සෛල වර්ග නම් කිරීමෙන් මේ බෙහෙතට ධම්මික වෙද මහතාට වඩා විද්යාත්මක බවක් ආරෝපණය කරන්නට ඔවුන් සමත්ව ඇත. එහෙත් සෛල වර්ගවල නම් කී පළියට බෙහෙත විද්යාත්මක වන්නේ නැත. ඒ සෛල ආරක්ෂා කරන්නට ආරක්ෂා කරන්නට බෙහෙත ක්රියාත්මක වෙන්නේ කෙලෙසද, වෛරසය දුර්වල කරන්නට කරල සමත් වන්නේ කෙසේද යන්න ඔහු පැහැදිලි කරන්නේ නැත.
මේ කරලට පාවිච්චි කර ඇත්තේ කැකිල්ලේ වර්ගයේ පර්යේෂණ ක්රමයකි. ඔවුන් කරල කී දෙනෙකුට ලබා දුන්නාද කියා සංඛ්යාලේඛන පවත්වාගෙන ගොස් නැත. සායනික පර්යේෂණවලට යොමු කර නැත.
‘ක්ලිනිකල් ට්රයල් එකක් කරන්න අපට බැරි වුණා. අපි බය වුණා. වට්ටෝරුව ගත්තොත් කියලා.’ යනුවෙන් චමුදිතගේ සම්මුඛ සාකච්ඡාවේදී කියා ඇත. ‘ආහාරයක් විදියට ආහාර අතිරේකයක් ලෙස ආහාර පනත යටතේ ලියාපදිංචි කළා.’ යනුවෙන් වෛද්ය සම්පත් ගුණවර්ධන කියද්දී කට ඇරගෙන අසා සිටි චමුදිත හිස සලමින් පිළිතුරු දුන්නේ ‘මට තේරෙනවා’ යනුවෙනි. එනම් ඖෂධය සායනික පරීක්ෂාවට ලක් නොකිරීම හිස සලා අනුමත කිරීමෙනි. ඒ ඔවුන්ගේ මාධ්ය කලාවේ හැටිය.
ක්ලිනිකල් ට්රයල් හෙවත් සායනික පරීක්ෂාව මඟ හැරියාට පසු එය බෙහෙතක් බව කියන්නේ කෙලෙසද? ඇත්තටම සායනික පරීක්ෂාවක් කරන විට වට්ටෝරු පිට යනවාද? නිපදවූ ක්රමය රැක ගනිමින් ආරක්ෂිතව සායනික පරීක්ෂා කළ නොහැකිද? ඖෂධයක මුල් නිෂ්පාදකයාගේ අයිතිය රකින්නට ලෝකයේ ක්රම නැතිද? දැන් ලෝකයේ ඖෂධ වර්ග දහස් ගණනක් නිපද වූ සමාගම්, එන්නත් නිපද වූ උදවිය තමන්ගේ වට්ටෝරුව පිටට යනු ඇතැයි බියෙන් සායනික පරීක්ෂාවන් මඟහැරියාද? එසේ මඟ හැරීම කළ හැකිද? යන ප්රශ්න චමුදිත සමරවික්රම විමසුවේ නැත. මේ බෙහෙතේ ඇත්ත නැත්ත විමසීමට ඇති එකම ක්රමය මඟහැරීම ගැන ඔහුට කිසිම හරස් ප්රශ්නයක් නැත.
අපි කැකිල්ලේ පර්යේෂණ ක්රමවේදයට අවධානය යොමු කරමු. ‘මේ රැල්ලට කලින් 1000කට පමණ දුන්නා. පවුලේ අය මුලින් ගත්තා. ඊට පස්සේ යාළුවන්. ඊට පස්සේ දන්න අය ඉල්ලා ගත්තා. රෝගීන්ට ගෙනිච්චා. දුන්න ප්රතිචාර විශාල ප්රමාණයක් තියෙනවා. මේ රැල්ල එනකොට හොයාගෙන ආවා. 2500ක් විතර. ඊටත් වැඩියි මං හිතන්නේ. විශාල ප්රමාණයක් අරගෙන තියෙනවා.’ යැයි වෛද්ය ගුණවර්ධන කීය.
‘ඊටත් වැඩියි මං හිතන්නේ’ යනුවෙන් ඔහු කී ප්රකාශය අනුව කරල ලබාගත් පිරිසගේ සංඛ්යාලේඛන පවා ඔහු සතුව නැත. ඇත්තේ අනුමානයක් පමණි. ඒ මොන ලෝකේ පර්යේෂණ ක්රමයක්ද?
මේ කරලේ ගුණාත්මකභාවය ගැන ඔහුට ඇති සහතිකය වන්නේ කරල ගත් අය ‘හොඳ ප්රතිචාර’ දුන් බවය. ‘කරල නිසා තමයි තමන් ජීවත් වන්නේ’ යනුවෙන් එය ලබාගත් අය කී බවය. මෙය කැකිල්ලේ පර්යේෂණ ක්රමයක් වන්නේ ඒ නිසාය. මේ කරලට මාධ්ය ආවරණය දුන්නේ චමුදිත සමරවික්රම පමණක් නොවේ. ලංකා සී නිව්ස් වැනි වෙබ් අඩවි පමණක් නොවේ. ඩේලි ෆයිනෑන්ෂල් ටයිම්ස් (ඩෙලි එෆ්ටී) වැනි මාධ්ය ආයතන පවා මාර්තු 27 වැනිදා පැවති මෙම පෙත්ත එළිදැක්වීමේ අවස්ථාවට මාධ්ය ආවරණය ලබා දී තිබුණි.
‘ලංකාවේ ඉතිහාසයේ නෙවෙයි, ලෝක ඉතිහාසයේ විප්ලවයක් බවට පත් වෙයි.’ චමුදිත සමරවික්රමගේ සහතිකය නම් මේ ව්යාපාරයට ලැබී තිබුණි. එහෙත් තර්ක බුද්ධියක් ඇති අපේ රටේ පුරවැසියන්ගේ සහතිකය ලැබිය යුතුදැයි කල්පනා කර බලන්නම ඕනෑය.■
‘ධම්මික පැණිය වගේ වැඩක්’
- කරාපිටිය රෝහලේ වැඩබලන අධ්යක්ෂ
වෛද්ය ප්රියන්ත ජීවරත්න
කොවිඩ්-19 ඖෂධයක් නිෂ්පාදනය කළ බව කියමින් කරාපිටිය රෝහලේ නම පාවිච්චි කිරීම පිළිබඳ අපි කරාපිටිය රෝහලේ වැඩබලන අධ්යක්ෂ වෛද්ය ප්රියන්ත ජීවරත්නගෙන් විමසුවෙමු. ඔහු ප්රකාශ කළේ මේ පිළිබඳ සෞඛ්ය අමාත්යාංශයට පැමිණිලි කර තිබෙන බවත්, කරාපිටිය රෝහලෙන් මෙවැන්නක් ප්රවර්ධනය නොකරන බවත්ය.
රෝහල් අධ්යක්ෂවරයා වැඩිදුරටත් මෙසේ කීය. ‘අපි දැනුවත්ව නෙවෙයි කරාපිටියේ නම පාවිච්චි කරලා තියෙන්නේ. අපට දැනුම් දීලාත් නෑ. කරාපිටිය රෝහලේ ඔය කියන නම තියෙන වෛද්යවරයෙක් ඉන්නවා තමයි. එහෙත් ඔහු අපට ඔය වගේ ඖෂධයක් ගැන දැනුම් දීලා නෑ. ඒ නිසා මේක අර ධම්මික පැණිය වගේ වැඩක් කියලා තමයි මට පෙනෙන්නේ. කොවිඩ්-19 රෝගීන්ට මේක දීලා බැලුවා නම් යම් කිසි ආයතනයක් හරහා තමයි දෙන්න ඕනෑ. ඒවා වාර්තාගත වෙන්න ඕනෑ. පර්යේෂණයට කලින් ආචාරධර්ම කමිටු අනුමැතියක් ලැබෙන්න ඕනෑ. විධිමත් නිරීක්ෂණයට ලක් වෙන්න ඕනෑ. එහෙම නැති නම් ඕනෑ කෙනෙකුට පෙති හදලා විකුණන්න පුළුවන්. අයියා හැදුවා, මල්ලි හැදුවා කියලා ඔබට වුණත් පෙත්තක් හදලා විකුණන්න පුළුවන්. කොහොම නමුත් මා විශ්වාස කරනවා මේවාට අනවශ්ය ප්රචාරයක් දෙන්න ඕනෑ නැති බව.’■
මාධ්යවේදී සජීවගේ හෙළිදරව්ව
ගාල්ල ප්රාදේශීය මාධ්යවේදියෙකු වන සජීව විජේවීර ‘රට’ වෙබ් අඩවිය වෙනුවෙන් වෛද්ය උදාර සම්පත් ගුණවර්ධන හමු වී මෙම බෙහෙත පිළිබඳ කරුණු විමසා තිබුණි. එම සාකච්ඡාවෙන් පසු සජීව විජේවීර ලියා තිබුණු කරුණු කිහිපයක් මෙසේය.
මෙම වෛද්යවරයා ඖෂධ නිෂ්පාදනය පිළිබඳ කිසිදු පුහුණුවක් ලබා නැත. ඔහු පවසන්නේ ආචාර්ය උපාධියක් සහිත තම සොහොයුරා මේ සම්බන්ධයෙන් තමන්ට සම්පූර්ණ සහයෝගය දක්වන බව වුව ද අවම වශයෙන් එම සොහොයුරාගේ දුරකථන අංකය හෝ ලබාදුන්නේ නැත. මෙම පර්යේෂණය සඳහා උදව් කළා යැයි පවසන මහමෝදර ශික්ෂණ රෝහලේ වෛද්යවරියක ලෙස සිටින තම බිරිඳ අප හා සම්බන්ධ කිරීමට මෙම වෛද්යවරයා කැමති වූයේ නැත.
ඔහු කියා සිටියේ ශාක වර්ග ගැන තොරතුරු සොයාගැනීමේ දී පමණක් තම බිරිඳ ඔහුට සහයෝගය දැක්වූ බවයි. එබැවින් මේ සම්බන්ධයෙන් ඇය සම්බන්ධ කරගැනීම අනවශ්ය බව ඔහු කියා සිටියේය. අප ඔහුගේ සහෝදරයා වෙනත් මාර්ගයකින් සම්බන්ධ කරගෙන ඇමතුම් ගත්ත ද ඔහු ඊට ප්රතිචාර දක්වන්නේ නැත. ඔහුට කෙටි පණිවිඩයක් යවා ඇමතීමට අවශ්ය කරුණ ගැන විමසූ විට තමන් රෝහලේ සිටන බව දන්වා පණිවිඩයක් එවා තිබිණි. මෙම නිෂ්පාදනය සඳහා ඔහුගේ දායකත්වයක් ඇත්දැයි විමසූ විට ඊට කිසිදු ප්රතිචාරයක් මේ දක්වා එවා තිබුණේ නැත.
රුහුණ විශ්වවිද්යාලයේ වෛද්ය පීඨයෙන් වෛද්ය විද්යාව පිළිබඳ මූලික උපාධිය ලැබීමෙන් පසු තමන් වැඩිදුර අධ්යාපනය ලැබූ විශ්වවිද්යාල, අධ්යාපන ආයතන හෝ පර්යේෂණ සිදුකළ විශ්වවිද්යාල, රසායනාගාර හෝ වෙනත් අධ්යයන ආයතන හෝ පෙන්වාදීමට ඔහුට හැකිවූයේ නැත. ආචාර්ය උපාධියක් හෝ ඇති බව නොකී මෙම වෛද්යවරයා තමන්ට මේ පර්යේෂණ සඳහා උපකාරකළා යැයි කියන අපට සම්බන්ධ කර නොදෙන සොහොයුරාගේ නම හැර වෙනත් කිසිම විශේෂඥයකු හෝ පර්යේෂණ සහායකයකු ගැන හෝ කීමට සමත්වූයේ නැත.
මෙම ඖෂධය සඳහා පර්යේෂණ කළ ස්ථානයක් හෝ නොකියන උදාර සම්පත් ගුණවර්ධන නමැති වෛද්යවරයා තමන් පර්යේෂණ සිදුකළේ කොරෝනා වයිරසයෙන් සිරුරේ රසායනික ද්රව්ය වෙනස්වන ආකාරය පිළිබඳ විදේශ රටවල පර්යේෂකයන් විසින් ලියා ඇති පර්යේෂණ වාර්තා කියවීමෙන් ඊට එරෙහිව ක්රියාත්මක විය හැකි ශාක සාර හඳුනාගැනීමෙන් බව කීවේය.
ඔහු සතුව ඇතැයි කියන පර්යේෂණ වාර්තා කිසිවක් ඔහු පෙන්නුවේ නැත. කොරෝනා වයිරසය සිරුරට ඇතුළු වූ පසු සිරුරේ සිදුවන වෙනස් කම් කිහිපයක් වෛද්යවරයා අපට පැවසුව ද ඒවා සාමාන්ය දැනීමක් ඇති මා හට වුව ද තේරුම්ගත හැකි කරුණු කිහිපයක් පමණි.
ඔහු ශාක සාර යොදාගත්තේ කවර නම් වූ රසායනිකයකට එරෙහිව ද යන්නත් ඊට එරෙහිව ඔහුගේ නිෂ්පාදනයේ ක්රියාත්මක වන රසායනික ද්රව්ය කවරේද කීමට හෝ ඔහු සමත්වූයේ නැත. ඔහු යොදා ගන්නා ශාක වර්ග ලෙස සුදුළූණු, ආඩතෝඩා, කොත්තමල්ලි, වද කහ, මදුරුතලා, ඉඟුරු නම් කළ ද ඔහුට ඒවායේ උද්භිද විද්යාත්මක නම් හෝ මතක නැත. ිමේ ශාක වර්ග 06 සමඟ මාස හයක් පර්යේෂණ කළ බව ඔහු පවසයි.
පර්යේෂණ කළ ආයතනයක් හෝ තැනක් කීමට ඔහු අසමත්ය. මෙම ශාක වර්ග 06ට අමතරව පර්යේෂණ කළ වෙනත් ශාක වර්ග කවරේද ඒ කොපමණ විශේෂ ප්රමාණයක් ද යන්න විමසූ විට ද ඔහු එම ප්රශ්නය මඟ හැරියේ මේ ශාක වර්ග සුදුසු බව තේරුම් ගත්තා යැයි කියමිනි. ඔහු විසින් වරෙක ඖෂධයක් ලෙසත් තවත් අවස්ථාවක ආහාර අතිරේකයත් ලෙසත් හඳුන්වන මේ නිෂ්පාදනය සඳහා අනුමැතිය ඇති බව ඔහු කීව ද අප අනුමැතිය ගත යුතු ඒ ඒ ආයතන නම් කරමින් අනුමැතිය ගත්තේ දැයි ඇසූ විට තමන් එම කිසිදු ආයතනයකින් අනුමැතිය ගෙන නැතැයි උදාර සම්පත් ගුණවර්ධන වෛද්යවරයා නිහතමානීව පිළිගත්තේය. ඔහු කියා සිටියේ බියුරෝ වෙරිටාස් නම් ජාත්යන්තර ආයතනයකින් තමන් මෙය ආහාර අතිරේකයක් බවට අනුමැතිය ලබාගත් බවයි. ඒ සහතිකය දැන් පෙන්වන්න යැයි කී විට එය තම ජංගම දුරකථනයේ නොමැති බවත් වාහනයේ තිබෙන බවත් ඔහු කීවේය. නමුත් එය පෙන්වන්න යැයි ඔහුට තුන්වරක් සිහිපත් කළ ද ඔහු එවැන්නක් පෙන්වූයේ නැත.
මා වෙතින් ඉවත්ව යාමෙන් පසු ඔහු කියා සිටියේ නිවසට ගිය වහාම එම අනුමැතිය ඇති සහතිකය මා වෙත එවන බවයි. නමුත් මේ ලියන මොහොත වනවිට ඔහු හමුවී පැය 12කට වැඩි කාලයක් ගතව ඇතත් ඔහු මා වෙත එවැනි අනුමත ලිපියක් එවා නැත. උදාර සම්පත් ගුණවර්ධන චමුදිත සමරවික්රම සමඟ පැවැත්වූ යූ ටියුබ් සාකච්ඡාවේ දී පවසන්නේ තමන්ට අයිඑස්ඕ 22000 තත්ත්ව සහතිකය තිබෙන බවයි. එමෙන්ම මේ නිෂ්පාදනයේ කැඩ්මියම් හෝ රසදිය වැනි බැර ලෝහ නොමැති බවට බියුරෝ වෙරිටාස් ආයතනය සහතික කර ඇති බවත් ඔහු කීවේය.
මේ කරුණු පරීක්ෂා කිරීම සඳහා ශ්රී ලංකා ප්රමිති ආයතනයට කතා කළ විට එම ආයතනය පැවසුවේ එවැනි නිෂ්පාදනයකට කිසිදු අයිඑස්ඕ සහතිකයක් ලබා දී නැති බවයි. නමුත් ඊමරු්ම ඪැරසඒි නම් ආයතනය ද තත්ත්ව සහතික ලබාදෙන බව කීවේය.
බියුරෝ වෙරිටාස් ආයතනයේ වෙළඳ අංශයේ මනේෂ් කෙවින් හට කතා කළ විට ඔහු කීවේ මෙම වෛද්යවරයාගේ නිෂ්පාදනය සඳහා කිසිදු අයිඑස්ඕ සහතිකයක් නිකුත් කර නැති බවයි. එමෙන්ම ඖෂධ හෝ ආහාර අතිරේක සඳහා තම ආයතනයට එවැනි සහතික ලබාදීමට බලයක් නොමැති බවත් ඔහු කීවේය. එම සහතිකය ලබාදිය යුත්තේ ශ්රී ලංකා ඖෂධ නියාමන අධිකාරියෙන් බව ද ප්රමිති ආයතනය හා බියුරෝ වෙරිටාස් ආයතයන පැවසූ අතර ශ්රී ලංකා ඖෂධ නියාමන අධිකාරියෙන් තමන් කිසිදු අනුමැතියක් ගෙන නැතැයි වෛද්යවරයාම අප සමග කීවේය.
ආහාර හෝ ඖෂධ නිෂ්පාදනයක් සඳහා තත්ත්වය සහතිකයක් ලබාගැනීමටනම් එම නිෂ්පාදනය සඳහා අමුද්රව්ය ලබාගන්නා ස්ථානවල සිට නිෂ්පාදනය කර අවසන්වන තුරු ක්රියාවලියේ ම ගුණාත්මකභාවය හා එම තාක්ෂණය පිළිබඳ පරීක්ෂණ වාර්තා රැසක් ගත යුතුය. උදාර සම්පත් ගුණවර්ධන එම අමුද්රව්ය ගන්නා ආකාරය හෝ සපයාගත හැකි ප්රදේශ ගැන හෝ කියන්නට දන්නේ නැත.■
