තමා අත්අඩංගුවට ගැනීමෙන් වළක්වන ලෙස ඉල්ලමින් හරින් ප්රනාන්දු මන්ත්රීවරයා මූලික අයිතිවාසිකම් පෙත්සමක් ශ්රේෂ්ඨාධිකරණයට යොමුකර ඇත.
පාස්කු ඉරිදා ප්රහාරය සම්බන්ධයෙන් ඔහුව ත්රස්තවාදය වැළැක්වීමේ පනත යටතේ අත්අඩංගුවට ගැනීමට සූදානමක් ඇති බවත් එය වැළැක්වීමේ නියෝගයක් නිකුත් කරන ලෙසත් එම පෙත්සමෙන් මන්ත්රීවරයා ඉල්ලා ඇත.
එසේම ඔහු අත්අඩංගුවට ගැනීමට නියමිත පොලීසියේ සියලු පාර්ශ්ව ගෙන්වා ඒ සම්බන්ධයෙන් විභාගයක් පවත්වන ලෙසත් එම පෙත්සම මගින් මන්ත්රීවරයා වැඩිදුරටත් ඉල්ලා ඇත.
මෙම ඉල්ලීම වූ කලී අලුත් දෙයක් නොවේ. මීට පෙර යහපාලන ආණ්ඩු සමයේදී වත්මන් ජනාධිපති ගෝඨාභය රාජපක්ෂ ඇතුළු රාජපක්ෂ කඳවුරේ දේශපාලනඥයන් හා රාජ්ය නිලධාරින් අධිකරණයෙන් ඉල්ලූ දෙයමය. එහෙත් එසේ අත්අඩංගුවට නොගන්නැයි ඉල්ලූ රාජපක්ෂ කඳවුරු වාසීන්ගේ විශේෂත්වය වන්නේ ඔවුන් යම් යුක්තියක් හෝ සාධාරණත්වයක් ඉටුකිරීම වෙනුවෙන් හඬ අවදි කර හෝ කටයුතු කර අසාධාරණයට ලක්වී එසේ ඉල්ලුම් කළ අය නොවීමය. එම පිරිස අත්අඩංගුවට ගැනීමට ගියේ රාජ්ය මුදල් හා දේපල අවභාවිත කිරීම සම්බන්ධයෙන්ය. හරීන් ප්රනාන්දුගේ හා එම ඉල්ලීම් අතර වෙනස එයය.
හරීන් ප්රනාන්දු මන්ත්රීවරයා අත්අඩංගුවට ගැනීමට යන්නේ තවමත් යුක්තිය ඉටුවී නැති සහ අවශ්යතාව කාගේද යන්න නිල වශයෙන් හෙළිදරව් කර නොගත් පාස්කු ඉරුදින ප්රහාරය සම්බන්ධයෙන් පාර්ලිමේන්තුවේදී කරන ලද ආන්දෝලනාත්මක ප්රකාශය නිසා බවට සැකයක් නැත. එම ප්රහාරය සම්බන්ධයෙන් ආණ්ඩුවට හංගන්නට කිසිවක් නැත්නම් කළ යුත්තේ ඔහුත්, මනුෂ නානයක්කාර හා අනුර කුමාර දිසානායක යන මන්ත්රීවරුන් ඒ සම්බන්ධයෙන් පාර්ලිමේන්තුවේදී කළ හෙළිදරව් කිරීම් හෙවත් පාස්කු කොමිසම සිය වාර්තාව මගින් සඟවා ඇති කරුණු පිළිබඳව පරීක්ෂණ කිරීමය. එම ප්රකාශවල ඇත්ත නැත්ත රටට දැන ගැනීම සඳහා ජාතික ආරක්ෂාවේ නාමයෙන් සඟවා ඇති පාස්කු කොමිෂන් වාර්තාවේ වෙළුම් හා සියලු සාක්ෂි සටහන් ප්රසිද්ධියට පත්කිරීමය. ආණ්ඩුව එසේ නොකරමින් පාස්කු ප්රහාරයේ සැඟවූ තැන් හෙළිදරව් කරන්නන් දඩයම් කිරීම වූ කලී එම ප්රහාරය සම්බන්ධයෙන් සඟවන්නට දෙයක් ආණ්ඩුවට ඇති බවට කරන හෙළිදරව්වකි. එය තවදුරටත් තහවුරු වන්නේ පාස්කු ප්රහාරයේ සලකා බැලිය යුතු කරුණු සම්බන්ධයෙන් සමගි ජන බලවේගය කතෝලික පියතුමන්ලාට හා කන්යා සොහොයුරියන්ට ලබාදුන් ලියවිලිවල ඇත්තේ කුමක්දැයි අපරාධ පරීක්ෂණ දෙපාර්තමේන්තුව එම පියතුමන්ලාගෙන් ප්රශ්න කර ඇති නිසාය.
එම කරුණු පිළිබඳ ඇත්තටම ආණ්ඩුවේ වුවමනාව අනුව පරික්ෂා කිරීමට අපරාධ පරීක්ෂණ දෙපාර්තමේන්තුවට අවශ්ය නම් කළ යුත්තේ පාස්කු කොමිසමේ සියලු වාර්තා හා සාක්ෂි සටහන් කියවීමය. පාර්ලිමේන්තුවේදී හෙළිදරව් කළ කරුණු පිළිබඳ සැබෑ පරීක්ෂණයක් කිරීමය.■
