■ ප්‍රියන්ජිත් ආලෝකබණ්ඩාර
තිළිණ හෙට්ටිගමගේ නවක මෝස්තර නිර්මාණ ශිල්පියෙකි. වේදිකා නාට්‍ය, ටෙලි නාට්‍ය, චිත්‍රපටි, වෙළඳ දැන්වීම් හා රියැලිටි වැඩසටහන් සඳහා රංග වස්ත්‍ර නිර්මාණ ශිල්පියෙකි. ගාන්ධි ඩොට් කොම් වේදිකා නාට්‍යය, අලි කතාව, යසෝධරා චිත්‍රපටවල රංග වස්ත්‍ර නිර්මාණය කළේ තිළිණය. එම්.ටී.වී. ආයතනයේ සිරස ටී.වී., ශක්ති ටී.වී. නාලිකාවල විකාශය වූ රියැලිටි වැඩසටහන්වල නිල රංගවස්ත්‍ර නිර්මාණ ශිල්පියා ලෙස වසර කිහිපයක් සේවය කළ තිළිණ මොස්තර නිර්මාණ ශිල්පය පිළිබඳ උපාධිධරයෙකි.
ටෙලිනාට්‍ය ක්ෂේත්‍රය පිළිබඳ ඔබේ අත්දැකීම කොහොමද?
මම අඩුවෙන්ම වැඩ කරලා තියෙන්නේ ටෙලි නාට්‍යවල. ටෙලිනාට්‍යවල නිර්මාණාත්මක දෙයක් කරන්න අවස්ථාවක් නැති තරම්. රංග වස්ත්‍ර සඳහා අනුග්‍රහය දක්වන කඩවලින් ඇඳුම් අරන් ඇවිත් රංගන ශිල්පීන්ට, ශිල්පිනියන්ට අන්දන්නයි තියෙන්නේ. මම ඉගෙන ගත්ත විෂය මෝස්තර නිර්මාණ ශිල්පය. ඒ නිසා රංග වස්ත්‍ර නිර්මාණයක් කරන්න අවස්ථාව තියෙන්නේ වේදිකා නාට්‍ය, චිත්‍රපටි හා වෙළඳ දැන්වීම් ක්ෂේත්‍රයේ. රියැලිටි වැඩසටහන්වල නිර්මාණාත්මකව විශාල වැඩක් කරන්න පුළුවන් වුණා. මහාචාර්ය සුනිල් ආරියරත්නගේ යසෝධරා චිත්‍රපටියේ ඇඳුම් නිර්මාණය කිරීමට ලැබීම මට ලැබුණු විශේෂ අවස්ථාවක්. ඒකේදි මට කරන්න වැඩක් තිබුණා. නිර්මාණාත්මක දායකත්වයක් ලබා දෙන්න හැකි වුණා. ටෙලිනාට්‍යවල ගමේ ගෙවල්වල වැඩ කරන මිනිස්සු පවා ඇඳලා ඉන්නේ අලුත් ඇඳුම්. අඩුම තරමේ ඒවා පරණ කරන්නේවත් නෑ.
ඔබ චිත්‍රපටි ක්ෂේත්‍රයට පිවිසෙන්නේ නවකයෙක් ලෙස..
චිත්‍රපටි ක්ෂේත්‍රයේ රංග වස්ත්‍ර නිර්මාණ ශිල්පීන් බොහෝ දෙනෙක් ඉන්නවා. මේ ක්ෂේත්‍රයට අලුත් අය එනවා අඩුයි. ලංකාවේ කරලා තියන සමහර රජ කතාවල ඇඳුම් නිර්මාණය කරලා තියන විදිහ දැක්කාම බොහෝම දුක හිතෙනවා. ගොඩාක් ඒවා කරලා තියෙන්නේ කිසිම පර්යේෂණයක් කරන්නේ නැතුව. ඒ දුප්පත්කම ඒ චිත්‍රපටිවල පේන්න තියනවා. ඉතිහාස කතාවක් සහිත චිත්‍රපටියක රංග වස්ත්‍ර සඳහා පිටපතක් අධ්‍යයනය කරනවා කියන්නේ පොඩි වැඩක් නෙමේ. කතාවට අදාළ කාලයේ මිනිසුන්ගේ වස්ත්‍රාභරණ ගැන පිටපතෙන් එළියේ විශාල පර්යේෂණයක් කරන්න අවශ්‍යයි. ඒ වගේම පසුතල මොනවාද කියලා අවබෝධයකින් කටයුතු කරන්න අවශ්‍යයි. අපේ රටේ හැදුණු ඇතැම් චිත්‍රපටවල පසුතලයයි රංග වස්ත්‍රවල පාටයි ගැළපෙන්නේ නෑ. ඒ නිසා මම ඇඳුම් නිර්මාණය කළේ පසුතල ගැන හොයලා බලලා. මොකද චරිතය හිට ගන්නේ පසුතලයේ ඉරියෙන් නිසා. සමහර චිත්‍රපටිවල කෙලින්ම කඩෙන් ගත්ත ඇඳුම අන්දලා රූගත කරලා. චරිතයට අවශ්‍ය ලෙස, පසුතලයට අවශ්‍ය ලෙස, සිදුවීමට අවශ්‍ය ලෙස ඇඳුමේ වෙනස්කම් කරලා නෑ. එහෙම වුණාම ඒ බව සමස්ත නිර්මාණයේ අඩුවක් ලෙස පෙනෙන්න ගන්නවා. සාමාන්‍යයෙන් මම වැඩක් බාර ගත්තාම, අනෙක් වැඩ සේරම නවත්තලා බාර ගත්ත වැඩේ කරනවා. ඒකට මුල් තැන දෙනවා. මම කරපු හැම වැඩකින්ම මට වැඩේ බාර දුන්න පාර්ශ්වය තෘප්තිමත් වුණේ ඒ නිසයි. එම්ටීවී ආයතනයේ සේවය කරමින් ඉඳලා රියැලිටි වැඩසටහන්වල රංග වස්ත්‍ර නිර්මාණයෙන් මම අයින් වුණේ චිත්‍රපටිවලට මට කතා කළ නිසා.
ඔබ ලිට්ල්ස්ටර්, ඩී්‍රම්ස්ටාර්, සුපර්ස්ටාර් රියැලිටි වැඩසටහන්වල රංග වස්ත්‍ර නිර්මාණය කළා..
එම් ටීවී එකේ, සිරස, ශක්ති ටීවී දෙකේම රියැලිටිවල රංග වස්ත්‍ර නිර්මාණය කලේ මම. රියැලිටිවලට ඇඳුම් නිර්මාණය කිරීම වෙනමම වැඩක්. රියැලිටිවල තියෙන්නේ සංගීතය හා නර්තනයනේ. සජීව හෝ පටිගත කිරීම සඳහා වේදිකාවේ ඉදිරිපත් කිරීම තමයි රියැලිටිවල තියෙන්නේ. එතන යම් ප්‍රේක්ෂාගාරයකුත් ඉන්නවා. චිත්‍රපටි, ටෙලි නාට්‍ය, වෙළඳ දැන්වීම්වල ප්‍රේක්ෂාගාරයක් නෑ. කැමරාවම ඉලක්ක කරලයි රංගනයේ යෙදෙන්නේ. නර්තනය හෝ ගායනය ඉදිරිපත් කරන තරගකරුවා ඉස්මතු වෙන ආකාරයටයි රියැලිටිවල ඇඳුම් නිර්මාණය කරන්නේ. විශේෂයෙන් අපි එදිනෙදා ජීවිතයේදී භාවිත නොකරන වර්ණ, භාවිත නොකරන ඇඳුම්, භාවිත නොකරන ආභරණ, තොප්පි, සපත්තු රියැලිටි වැඩසටහන් සඳහා යොදා ගත්තා.
සමහර වෙලාවට රියැලිටිවලදී 1990 න් එහා කාලේ ගීත තෝරා ගන්නා අවස්ථා තිබුණා. එවිට ආධුනික ශිල්පීන්ට 90 න් එහා කාලේ ඇඳුම් මෝස්තර ප්‍රතිනිර්මාණය කරලා සැරසුවා. කණ්ඩායම් සංගීතයේ හිටපු අය ඇඳපු විදිහ, ක්ලැරන්ස් විජේවර්ධන, මිල්ටන් මල්ලවාරච්චි, එම්.එස්. ප්‍රනාන්දු ඇඳපු විදිහ අධ්‍යයනය කරලා ඒ විදිහේ ඇඳුම් තරගකරුවන්ට ඇන්දුවා. තරගකරුවා ගායනා කරන්නේ පැරණි චිත්‍රපටියක ගීතයක් නම්, ඒ දර්ශනයේ රඟපෑ නළුවා නිළිය ඇඳපු රංග වස්ත්‍රයට සමාන රංග වස්ත්‍රයක් අපි ඔහු වෙනුවෙන් නිර්මාණය කළා.
ඒ වෙලාවල්වල ඒ ඒ වැඩසටහන්වල හිටපු නිෂ්පාදකවරුන්ගේ, අධ්‍යක්ෂවරුන්ගේ තේරීම අනුවයි වැඩසටහන කෙරුණේ. තරගකරුවාට ඕනෑ විදිහට නෙමෙයි ඔහුගේ ඇඳුම පවා නිර්මාණය වෙන්නේ. හැම සතියටම නිෂ්පාදක මණ්ඩලය තේමාවක් තෝරනවා. ඒ තේමාවට අනුවයි ගීත තෝරන්නේ, තරගකරුවන්ගේ ඇඳුම් නිර්මාණය වෙන්නේ. තරගකරුවාට තියෙන්නේ කියන විදිහට, කියන දේ ඉදිරිපත් කරන්නයි.
යසෝධරා චිත්‍රපටියට රංග වස්ත්‍ර නිර්මාණය සඳහා ඔබ අමුද්‍රව්‍ය සපයා ගන්නේ ඉන්දියාවෙන්. ලංකාවේ රංග වස්ත්‍ර නිර්මාණ ක්ෂේත්‍රය ගැන මොකද හිතුණේ?
ඉන්දියාවේ රජ කතාවක් ගැන හැදුණු චිත්‍රපටියක රංග වස්ත්‍ර එක්ක අපේ ඒවා අහලකින්වත් තියන්න බෑ. ඉන්දියාවේ ඒ සඳහා දෙන මූලිකත්වය හරි විශාලයි. චිත්‍රපටියක රංග වස්ත්‍ර සඳහා විශාල මුදලක් ඔවුන් වියදම් කරනවා. වැඩේ හොඳම විදිහට කරනවා. අපේ රටේ කොහොම හරි, යාන්තන් ගැට ගහලා කරන්නේ. දේව්දාස් වගේ පරණ චිත්‍රපටියක් මට්ටමටවත් රංග වස්ත්‍ර නිර්මාණය කරගන්න අපට තාම බැරි වෙලා තියනවා. පද්මාවතී, ගාම්භීර් වගේ චිත්‍රපටි බලන්න, ඒ බව හොඳින් වටහා ගන්න පුළුවන්. චිත්‍රපටියක මුලින්ම ප්‍රේක්ෂකයාගේ ඇස ගැටෙන්නේ රංග වස්ත්‍ර. රංගනය ඇස ගැසෙන්නේ ඊට පස්සේ. ඉන්දියාවේ චිත්‍රපටියක් තරමටම රංග වස්ත්‍ර නිර්මාණය කරන්න පුළුවන් අය අපේ රටේ ඉන්නවා. ඒත් එවැනි මුදලක් එකක් අවස්ථාවක් අපේ රටේදි ලැබෙන්නේ නෑ. චිත්‍රපටිය පෙන්නලා ඒ සඳහා යන වියදම අපේ රටේදි උපයන්න බෑ. අපිට ලැබුණු බජට් එකට අනුව අපි කරපු වැඩ ඉහළ මට්ටමකින් කළා.
වෙළඳ දැන්වීමක රංග වස්ත්‍ර නිර්මාණය අනෙක් මාධ්‍යවලින් වෙනස් වෙන්නේ කොහොමද?
ක්ලෝගාර්ඩ්, මැලිබන්, යූනියන් ඇශුවරන්ස් වගේ ආයතන වෙනුවෙන් සැකසුණු වෙළඳ දැන්වීම් සඳහා මම ඇඳුම් නිර්මාණය කළා. වෙළඳ දැන්වීම් ක්ෂේත්‍රයේ ඇදුම් නිර්මාණය සඳහා වෙනම පිරිසක් හැදිලා ඉන්නවා. ඒ ක්ෂේත්‍රයට ඇතුල් වීම පවා අමාරුයි. වැඩ තියෙන්නේ සීමිත ප්‍රමාණයයි.
ටෙලි නාට්‍යයක නම් සාකච්ඡා කරලා අපට ඕනෑ විදියට රංග වස්ත්‍ර නිර්මාණ කරන්න පුළුවන්. පිටපතට අනුව රංග වස්ත්‍ර නිර්මාණ කරන්නත්, සමහරවිට අපිට ඕනෑ විදිහට පිටපත වෙනස් කරගන්නත් පුළුවන්. වෙළඳ දැන්වීමකදී, පිටපත මත, සේවාදායකයාගේ වුවමනාවට අනුවයි රංග වස්ත්‍ර නිර්මාණය කරන්න වෙන්නේ. සේවාදායකයාට අවශ්‍ය ආකාරයෙන් රංග වස්ත්‍ර නිර්මාණ කරලා එයාට අවශ්‍ය හැඟීම අපි අරන් දෙනවා.
වෙළඳ දැන්වීම්වලදී ඇඳුම්වල පාට ගැන සැලකිලිමත් වෙන්න ඕනෑ. අපි තෝරන වර්ණයම විකාශය කරනකොට එන්න ඕනෑ. මොකද වෙළඳ දැන්වීම්වලදී අපි වැඩ කරන්නේ නිශ්චිත වර්ණ එක්ක. එක එක සන්නාමයට අයත් වර්ණ තියනවා. ඒවා වෙනස් කරන්න අපිට බෑ. අපේ පියවි ඇහැට පේන වර්ණ යොදලා රංග වස්ත්‍ර නිර්මාණය කළාට රූගත කළාම අදාළ වර්ණය එන්නේ නැති අවස්ථා තියනවා. සමහරවිට රූගත කළාට පස්සේ දර්ශනවල වර්ණ වෙනස් කරනවා. ඒ සියල්ල ගැන හිතලයි වර්ණ තොරාගන්න වෙන්නේ. ලස්සන ඇඳුමක් කැමරාවට අවලස්සනට පේන්න පුළුවන්. අලුත් ඇඳුම් පරණ කරලා ගන්න වෙන අවස්ථා තියනවා. අලුත් සුදු ඇඳුමක් කෝපි දාලා තම්බලා පරණ පාට කරලා ටිකක් ඉරලා ගත්තාම ඇත්තට කැත වුණත් කැමරාවට ඉතාම ලස්සනයි. දර්ශන රූපගත වෙන්නේ මඳ අඳුරේද හොඳ ආලෝක තත්වයක් යටතේද කියලා රූගත තරන්න කලින් කතා කරනවා. කළු සුදුවලින් රූගත වෙනවිට, රංග වස්ත්‍රවල ඇත්ත වර්ණ කළු සුදුවලට වෙනස් වෙන ආකාරය ගැන අවබෝධයක් තියෙන්න ඕනෑ.■
