‘මට කියන්න තියෙන්නෙ මෙච්චරයි. පක්ෂයක සාමාජිකයෙක් නම් පක්ෂයක් වෙනුවෙන්
වැඩ කරනවා නං තමන්ට කොන්දක් තියෙන්න ඕනෑ තමන්ගේ පක්ෂය දිනවන්න.’
■ දේශපාලන වාර්තාකරු
ශ්‍රී ලංකා නිදහස් පක්ෂය මේ වන විට සමස්ත ලංකා කාරක සභාව කැඳවීමට සූදානමින් සිටියි. සමස්ත ලංකා කාරක සභා රැස්වීම පැවැත්වීම ශ්‍රීලනිපයට එක්තරා අභියෝගයක් වන්නේ ප්‍රාදේශීය මට්ටමේ ශ්‍රීලනිප නායකයන් ශ්‍රී ලංකා පොදුජන පෙරමුණු ආණ්ඩුව තමන්ට ‘සලකන’ ආකාරය ගැන කේන්තියෙන් පසු වන නිසාය. අප පුවත්පත වෙත අදහස් දැක් වූ ශ්‍රීලනිප මහලේකම් දයාසිරි ජයසේකර ඒ ගැන විස්තර කළේ මෙලෙසය.
‘අපි සමස්ත ලංකා කාරක සභාව කැඳවීම, තරුණ සහ කාන්තා සමුළු පැවැත්වීම, වෘත්තිය සමිති ගොඩනැගීම කරන්න ඉන්නවා. පහළ අයගේ විශාල දුක්ඛ දෝමනස්සයක් තමයි තියෙන්නෙ. අදටත් ප්‍රාදේශීය සභා මන්ත්‍රීවරුන්ට ගමකට විදුලි බල්බයක් එල්ලගන්න බැරි තත්වයක් ඇති වෙලා. සමහර වැඩවලදී සම්පූර්ණයෙන් අපේ අය අතපසු කරලා තියෙනවා. පහළ තියෙන තත්වය ඉතා දුක්ඛිතයි. අපේ සංවිධායකවරුන්, මන්ත්‍රීවරුන් සියලුදෙනාම ගෝඨාභය රාජපක්ෂ මහතා පත් කරන්න දැඩි කැපකිරීමක් කළා. ඒත් ඔවුන්ට නොසැලකීම ගැන අපි කනගාටුවක ඉන්නේ. පක්ෂ නායක රැස්වීමකදීත් මම ඒ ගැන කතා කළා. පහළ මිනිසුන් ඉස්සරහට කතා කරයි.’
ශ්‍රීලනිප යෝධයා අවදි කරන බව හිටපු ජනාධිපති, ශ්‍රීලනිප සභාපති මෛත්‍රීපාල සිරිසේන පසුගිය සතියේ කියා තිබුණි. එය විශාල මාධ්‍ය අවධානයට ලක් විය. ජනාධිපති මෛත්‍රීපාල සිරිසේන කළ ප්‍රකාශය මෙසේය.
‘මම බලාගෙන හිටියා ගොඩක් අය කියනවා ‘අපිට අමාරුයි. පොහොට්ටුවෙන් ගැලවෙන්න බෑ. වෙන පක්ෂවලට සම්පත් තියෙනවා. අපි එකතුවෙලාම තමයි පළාත් සභා ඉල්ලන්න ඕනෑ. නැත්තං අපි අමාරුවේ වැටෙනවා. මේ වෙලේ ආණ්ඩුව තරහා කරගන්න හොඳ නෑ’ ආදි වශයෙන්.
මට කියන්න තියෙන්නෙ මෙච්චරයි. පක්ෂයක සාමාජිකයෙක් නම් පක්ෂයක් වෙනුවෙන් වැඩ කරනවා නං තමන්ට කොන්දක් තියෙන්න ඕනෑ තමන්ගේ පක්ෂය දිනවන්න.
බැහැ කියල හිතන කවුරු හරි ඉන්නවා නම්, හොඳයි කියල හිතෙන ඕනෑ පක්ෂයක සාමාජිකත්වය අරගෙන තමන්ගේ දේශපාලනය කරන්න.
ඕන්නං පොහොට්ටුවේ සාමාජිකත්වය ගන්න. ඒකෙ දෙන්නෙ නැත්නම් වෙන පක්ෂයක හරි කමක් නෑ. හැබැයි පුළුවන් මිනිස්සු එක්ක මම මේ පක්ෂය නැගිට්ටනවා. මුක්කුව ගහලා දේශපාලනය කරන්න ඕන්නං ඒ අයටත් යන්න පුළුවන්. අනාගතයේ ග්‍රී ලංකා නිදහස් පක්ෂ ආණ්ඩුවක් 2025 හදන්න කැමති අය විතරක් ඉන්න. ඒ ඇති මට.’
ඒ ප්‍රකාශයේ පැහැදිලිව තිබුණු එක් කාරණයක් වන්නේ පළාත් සභා මැතිවරණයට තනිවම ඉදිරිපත් නොවිය යුතු බවට පක්ෂය තුළම අදහස් තිබෙන බවත්, එයට මෛත්‍රීපාල සිරිසේන මහතා එකඟ නැති බවත්ය. අනෙක් ප්‍රධාන කාරණය වන්නේ 2025 හෙවත් ඊළඟ පාර්ලිමේන්තු මැතිවරණය වන විට ශ්‍රීලනිප ආණ්ඩුවක් හැදීමට ඔහු ඉලක්ක කරන බවත්ය. ඒ ඉලක්කය ඉතා කෙටිකාලීන එකකි. ඉලක්කයට යන්නට තැබූ පියවර මොනවාදැයි විමසීම වටී.
ශ්‍රීලනිප මහලේකම් දයාසිරි ජයසේකර මෙසේ කීය.
‘නිලධාරී මණ්ඩලයක් පත් කළා. ඒ නිලධාරී මණ්ඩලයට වගකීම් පවරලා තියෙනවා. මධ්‍යම කාරක සභාව පළවැනි වතාවට අවුරුදු ගාණකට පස්සේ තුන් අවුරුදු සැලසුමක් ගැන සාකච්ඡා කළා. පක්ෂය හදන්නේ කොහොමද කියලා. මාතලේ ප්‍රකාශය කියලා විශේෂ ප්‍රකාශයක් නිකුත් කළා. පක්ෂය නැවත ග්‍රාමීය වශයෙන් ක්‍රියාත්මක කරන්නේ කොහොමද කියන එක ගැනත් අපි සාකච්ඡා කරනවා. ඒ නිසායි ජනාධිපතිතුමා (හිටපු ජනාධිපති මෛත්‍රීපාල සිරිසේන) කීවේ යෝධයෙක් නැගිට්ටවන්න වැඩපිළිවෙලක් සකස් කරනවා කියලා. ඊට පස්සේ අපි ග්‍රාමීය මට්ටමෙන් වැඩපිළිවෙළ ගොඩනගනවා.’
ශ්‍රීලනිප මූලික අරමුණ වන්නේ තනිවම මැතිවරණවලට ඉදිරිපත් වීම සඳහා සම්පූර්ණ යාන්ත්‍රණය සකස් කිරීමය. ආණ්ඩුව තුළ සිටින කලකිරුණු කණ්ඩායම් වෙනම මැතිවරණයකට ඉදිරිපත් වන්නේ නම්, තනිව මැතිවරණ ව්‍යාපාරයක් කිරීමේ යාන්ත්‍රණය තිබෙන්නේ ශ්‍රීලනිපයටය. එනම් යතුර ඇත්තේ ශ්‍රීලනිපය අතේය.
‘ඕනෑම දේශපාලන පක්ෂයක් හදන්නේ බලය ගන්න. බලය ගන්න බැරි නම් දේශපාලන පක්ෂ හදන්නේ නෑනේ. එක එක්කෙනාගේ පසුපස ගිහින් හේත්තු වෙන එක නෙවෙයි කරන්න තියෙන්නේ. ජවිපෙ ඡන්ද ලක්ෂ දෙකතුනටත් කියන්නේ බලය ගන්නවා කියලා. අපි ආණ්ඩු බලයත් දරපු පක්ෂයක්. මේ පක්ෂයේ යම් අර්බුදයක් ඇති වුණත්, බලය ගන්න බැරි බව ඒකෙන් අදහස් වෙන්නේ නෑ. පක්ෂයේ පහළ ඉන්න අය සහ උඩ ඉන්න අය තීන්දු කරන්න ඕනෑ ශ්‍රී ලංකා නිදහස් පක්ෂයට බලය ගන්න පුළුවන් වැඩපිළිවෙළ මොකක්ද කියලා. ඒ වෙනුවෙන් තමයි අපි මේ ක්‍රියාදාමය කරන්නේ.’ දයාසිරි ජයසේකර මහතා කීවේ එසේය.
පළාත් සභා මැතිවරණයේ නාමයෝජනා ඉදිරිපත් කිරීමේදී තනිවම ඉදිරිපත් වීමට ඉඩකඩ විවර කර ගනිමින්, ශ්‍රී ලංකාවේ සියලු පළාත් සභා සඳහා තනිව ලැයිස්තු ඉදිරිපත් කිරීමට සුදුසු ආකාරයට අයදුම්පත් බාර ගැනීමට ශ්‍රීලනිපය කටයුතු කරමින් සිටින බව පසුගිය සතිවල අපි වාර්තා කළෙමු. ඒ බව තහවුරු කළ හැකිදැයි දයාසිරි ජයසේකර මහතාගෙන් විමසුවෙමු.
‘අනිවාර්යයෙන්. ඒ ඒ දිස්ත්‍රික්කවලට පළාත් සභා අපේක්ෂකයන් විදියට ක්‍රමානුකූලව පිරිස් ගේන්න බලාපොරොත්තු වෙනවා. අපේ ඡන්ද ප්‍රමාණය වෙනුවෙන් කැම්පේන් එක කරන්න අපි ඉඩ දෙනවා. ඊට පස්සේ ඉස්සරහට යන්නේ කොහොමද කියලා තීන්දු කරනවා.’
ඔහු අදහස් කළේ ශ්‍රීලනිපය තනිව පළාත් සභා මැතිවරණයට ඉදිරිපත් වන බව නොවේ. තවමත් ඒ ගැන අවසත් තීන්දුවක් නැත. එහෙත්, සම්පූර්ණ ලැයිස්තු සැකසීමට බලාපොරොත්තු වේ.
පසුගිය ජනාධිපතිවරණයට පෙර දයාසිරි ජයසේකර මහතා අප පුවත්පත සමඟ කීවේ අද පොදුජන පෙරමුණට ශක්තිමත් නායකයන් සිටියත්, හෙට දිනයේ නායකත්වය ගත හැකි අනාගත නායකයන් ඉන්නේ ශ්‍රී ලංකා නිදහස් පක්ෂයේ බවය. ඔහු එයින් අදහස් කරන්නට ඇත්තේ රාජපක්ෂ පවුලේ සාමාජිකයන් සහ ශ්‍රීලනිපයේ කාලයක් තිස්සේ සිටි නායකයන් පිරිසක් හැරුණාම පොදුජන පෙරමුණේ දැවැන්ත තරුණ නායකයන් නොසිටීම ගැනය. එය දැනටත් විශ්වාස කරනවාදැයි විමසුවෙමු.
‘ඔව්, ශ්‍රීලනිපය තරුණ නායකයන්ට එන්න අවස්ථාවක් ඇති කරලා තියෙනවා. මේක ඉස්සර බණ්ඩාරනායක පවුලේ පක්ෂය බව කීවා. ඒත් පළවැනි වතාවට ඒක මහින්ද රාජපක්ෂ මහතාට ලැබුණා. එතැනින් පස්සේ තවත් එළියට ගිහින් ගොවියෙකුගේ පුතෙකුට නායකත්වය ලැබෙනවා. මෛත්‍රීපාල සිරිසේන (හිටපු) ජනාධිපතිතුමාගෙන් පස්සේ එන්න තව නායකයන් ගොඩක් ඉන්නවා. අපේ පක්ෂයේ එහෙම වාතාවරණයක් තියෙනවා. ඒකට අපට ලොකු ශක්තියක්.’
ආණ්ඩුව තුළ විමල්ගේ නායකත්වයෙන් කණ්ඩායමක් බිහිවූ බවත්, ශ්‍රීලනිපයත් එම නායකත්වය යටතේ කටයුතු කරන බවත් පසුගිය කාලයේ පෙනෙන්නට තිබුණි. එය මන්ත්‍රීවරුන් හයක් සිටින විමල්ලාට මන්ත්‍රීවරුන් 14ක් සිටින ශ්‍රීලනිපය යට වීමක් ලෙස ඇතැමුන්ට පෙනුණි.
‘ඒක අහඹු සිදුවීමක්. විමල්ගේ හෝ වෙන කාගේ හරි නායකත්වයෙන් බිහි වූ කණ්ඩායමක් නෙවෙයි ඒ. නැගෙනහිර ජැටිය පිළිබඳ සාකච්ඡාවලදී අපි කල්පනා කළා නැගෙනහිර ජැටියට විරුද්ධ විය යුතුයි කියලා. ඒ මතයට පෑහුණු පක්ෂ එකතු වුණේ. අපි ඒ තීන්දුව ගත්තේ සියලු පක්ෂ එකතුවෙලා. එක මතයක් තියෙන පිරිසක් එකතු වුණා. ඒ එකතුව විමල් වීරවංශගේ නායකත්වයෙන් කියලා පෙනුණා. ආණ්ඩුවෙන් කඩාගෙන යනවා කියලා පෙනුණා. අපි වරින් වර එකතු වෙනවා. ඒකට ශ්‍රීලනිප නායකත්වය ගන්න ඕනෑ කියලා එකක් නෑ. අපි නායකත්වය ගන්න හැදුවොත් තමයි බෙදීම තවත් තීව්‍ර වෙන්නේ. ආණ්ඩුවේ ගමන්මග පිළිබඳ කුඩා පක්ෂ නගන හඬ අධිපති මතවාදයකට එරෙහිව ගෙනියන අපේ එකමුතුභාවයේ ශක්තියක්.’
ඒ සියල්ල අවසානයේ මේ ආණ්ඩුව සහ ජනාධිපති ගෝඨාභය රාජපක්ෂ ආරක්ෂා කරන බවත් දයාසිරි ජයසේකර මහතා කීය.
‘අපට වෙනම දේශපාලන මතයක් තියෙනවා. එහෙම පක්ෂ ගණනාවකින් නිදහස් පොදුජන සන්ධානය හැදිලා තියෙනවා. පොදුජන පෙරමුණට අමතර පක්ෂ ගණනාවක් තියෙනවා. අපි එකතු වුණේ සෞභාග්‍යයේ දැක්ම යථාර්ථයක් කර ගන්න. ජාතික සම්පත් ආරක්ෂා කර ගන්න, නොබැඳි ජාත්‍යන්තර පිළිවෙතක යන ලියවිල්ලක්. ඒක අපි රැක ගන්නවා. මේ වැඩපිළිවෙළෙන් සීයට සීයක් පිට පනින්න අපේ බලාපොරොත්තුවක් නෑ.’
මෙවැනි පක්ෂය නැගිටවීමේ ව්‍යාපෘති කරන්නේ අන්තිමේ පොහොට්ටුව ලකුණෙන් මැතිවරණයකට ඉදිරිපත් වෙද්දී වැඩි අවස්ථා ලබා ගැනීම සඳහා හෙට්ටු කිරීමටදැයි අවසානයේ අපි විමසුවෙමු.
‘හෙට්ටු කරන්නත් පක්ෂය ශක්තිමත් වෙන්න එපායැ. ඒ කතාව ඒ අතින් හරි. ඕනෑ එකක් කරන්න පක්ෂය ශක්තිමත් වෙන්න ඕනෑ. හෙට්ටු කරලා තමයි පටන් ගන්න පුළුවන්. අපි පොහොට්ටුව ලකුණෙන් ඉල්ලන්න එකඟද කියලා තවම තීන්දු කරලා නෑ. ඒ තීන්දුව ගන්නට මැතිවරණය එන්න එපායැ.’ ඔහු කීය.
විමල්ගේ ෆීලික්ස්
මේ අතර මාර්තු 31 වැනිදා ‘යුගයක ඇරඹුම’ නමින් කොළඹදී පැවති උත්සවයකදී ෆීලික්ස් ඩයස් කෙනෙකු මේ ආණ්ඩුවේ සිටින බව විමල් වීරවංශ පැවසීය. ඔහු ඒ බව පැවසුවේ ඊට පෙර කිරින්දේ පැවති උත්සවයකදී යම් පිරිසකගේ සංවිධානාත්මක හූ හඬකට මුහුණදුන් පසුබිමකය. මේ ප්‍රකාශය ඊට ප්‍රතිචාරය විය යුතුය.
‘හැත්තෑව හැත්තෑහත කාලයේ තිබුණේ සමගි පෙරමුණු ආණ්ඩුවක්. දේශීය නිෂ්පාදකයන් බල ගන්වන ආණ්ඩුවක්. ඒ ආණ්ඩුවේ හිටියා ෆීලික්ස් ඩයස් කියලා කෙනෙක්. ඒ ෆීලික්ස් ඩයස් මහත්තයා කල්පනා කළා වමේ පක්ෂ එළවලා දාලා තනි ශ්‍රී ලංකා නිදහස් පක්ෂ පාලනයක් පවත්වාගෙන යන්නට පුළුවන් වෙයි කියලා. ඒ අනුව මුලින් සමසමාජ පක්ෂය එළවලා දැම්මා. ඊළඟට කොමියුනිස්ට් පක්ෂය එළියට දැම්මා. ඒ විදියට වමේ පක්ෂ එළියට දාලා, ෆීලික්ස් ඩයස් මහත්තයා හිතුවා වමේ පක්ෂ එළියට දාලා මේක කරගෙන යන්න පුළුවන් කියලා.’
දේශපාලනයේ අයනු ආයනු කියවන කෙනෙකුට වුව මේ විමල් වීරවංශ කියන්නේ කුමක්දැයි වැටහේ. ඉලක්ක කරන්නේ කාටද කියා වැටහේ.
ඒත්, මෙහි එක් දේශපාලන විහිළුවක් වන්නේ ආණ්ඩුව දැන් අවසන් බව සියල්ලන්ම නොකියා කීමය. ආණ්ඩුව පරද්දලා මොකක්දෝ වරදක් කරගන්න එපා කියා ජනාධිපතිවරයා කීය. 2025 දී ශ්‍රීලනිප ආණ්ඩුවක් හදන බව මෛත්‍රීපාල සිරිසේන හිටපු ජනාධිපතිවරයා කීය. විමල් කියන්නේ ආසන අටක් දක්වා පහළට වැටීමක් ගැනය. ඔහු මේ ආණ්ඩුව සමාන කරන්නේ මීට පෙර දේශපාලන පක්ෂයක් තුනෙන් දෙකක් ගෙන, වසර කිහිපයක් තුළ විශාලම කඩාවැටීමට ලක් වූ අවස්ථාවටය. ආණ්ඩුවේ අසාර්ථකත්වය ගැන අප තවත් මොනවා කියන්නද?
ඩයනාගේ ලියුම
සමගි ජන බලවේගයේ ජාතික ලැයිස්තු මන්ත්‍රීවරියක ලෙස තේරී පත් වූ පාර්ලිමේන්තු මන්ත්‍රිනී ඩයනා ගමගේ සමගි ජන බලවේගයේ විනය ක්‍රියාමාර්ග නොතකමින්, එම පක්ෂයේ නායකයා වෙත ලියූ ලිපියක් පසුගිය සතියේ මාධ්‍යවලින් ප්‍රසිද්ධ විය. 20 වන සංශෝධනයට පක්ෂව අත එස වූ ඇයට එරෙහිව විනය පියවර ගන්නා බව පසුගිය කාලයක් තිස්සේ සමගි ජන බලවේගය කී කතාවකි. මාර්තු 10 දිනැතිව ඇය වෙත යැවූ ලිපිය සමගි ජන බලවේගයේ විනය කමිටුවේ සභාපති නීතිඥ සුදත් වික්‍රමරත්නගේ අත්සනින් යැවූවකි. එහි සඳහන් වූයේ 20 වන සංශෝධනයට විරුද්ධව ඡන්දය ප්‍රකාශ කරන ලෙස සමගි ජන බලවේගයේ නායක සජිත් ප්‍රේමදාස ත්‍රිත්ව ඉරි විධානයක් දී තිබුණු බවය. එය පිළිනොගෙන පක්ෂ විනය උල්ලංඝනය කර ඇති බව සඳහන්ය. ඒ සමග දැනුම් දී ඇත්තේ මාර්තු 27 වැනිදා විනය පරීක්ෂණයක් පවත්වන බවත් එයට සහභාගි වන ලෙසත්ය. අවශ්‍ය නම් පක්ෂ ව්‍යවස්ථාවේ පිටපතක් ලබා ගන්නා ලෙසත් එහි සඳහන්ය.
මෙයට ප්‍රතිචාර ලෙස ඩයනා ගමගේ මහත්මිය ලිපිය යවා ඇත්තේ මාර්තු 25 වැනිදාය. එහි සඳහන් වන්නේ සමගි ජන බලවේගයේ මව් පක්ෂයේ ලේකම්වරිය ලෙස තමන් කනගාටු වන බවය. ඇය යවා ඇත්තේ දීර්ඝ ලිපියකි. විසි වන සංශෝධනයට අත එසවීම විනය කඩ කිරීමක් බව සඳහන් වන බවත්, ඒ බවක් පක්ෂයේ ව්‍යවස්ථාවේ සඳහන් නොවන බවත් ඇය තර්ක කර ඇත. තමන් කැමති කරුණක් වෙනුවෙන් පාර්ලිමේන්තුවේ ඡන්දය ප්‍රකාශ කිරීම ප්‍රජාතන්ත්‍රවාදය අනුව කටයුතු කිරීමක් වන බවත් එහි සඳහන්ය.
යහපාලන ආණ්ඩුව දුර්වලතාවලින් සමන්විත වූ බවත්, ප්‍රධාන දුර්වලතාවක් වුණේ ජනාධිපතිවරයා සහ අගමැතිවරයා පක්ෂ දෙකකින් පත්වීම බවත් එහි සඳහන්ය. පාස්කු ඉරිදා බෝම්බ ප්‍රහාරයත් සිහිපත් කරමින් ශ්‍රී ලංකාවේ ජනාධිපතිවරයාගේ බලය ශක්තිමත් විය යුතු බව කියා ඇත. ජාතික ආරක්ෂාව ගැනත් කියමින් තමන් ගත් තීන්දුව සාධාරණ බව ඇය කියා ඇත. එය පක්ෂයක සාමාජිකයෙකු වීමටත් වඩා පුරවැසියෙකු ලෙස භුක්ති විඳින සතුටක් බවත් ඇය කියා ඇත.
ඉන්පසු ඇය කියා ඇත්තේ තමන් සහ තමන්ගේ සැමියා වන සේනක පෙරේරා ඉතා අමාරුවෙන් හැදූ අපේ ජාතික පෙරමුණ පුද්ගලික ධනය කෝටි ගණන් වියදම් කරමින් මීට පෙර ජනාධිපතිවරණ 03ක් හා මහමැතිවරණ 02ක් සඳහා ඉදිරිපත් වූ බවය. ඒ පක්ෂය කිසිදු මූල්‍ය ලාභයක් නැතිව සමගි ජන බලවේගයට ප්‍රදානය කළ බවය.
ඉන්පසු ඇය එම ලිපියෙන් ඉල්ලා ඇත්තේ තමන් කුමන විනය නීතිය කඩ කර තිබේදැයි පක්ෂ ව්‍යවස්ථාවේ අංක, උප අංක, තිත් කොමා සහ විරාම ලකුණු සහිතව ඉදිරිපත් කරන ලෙසය.
එම ලිපියේ අන්තිමට ඇත්තේ පක්ෂය සතුව පවතින නමුත් ප්‍රසිද්ධියේ හෙළි කිරීමට නොහැකි බලයක් තිබෙන බවය. තීරණාත්මක හා භයානක කාරණය එයයි. ලිපියේ මෙසේ සඳහන්ය.
‘අප ප්‍රදානය කළ පක්ෂය සතුව පවතින ප්‍රසිද්ධියේ හෙළි කිරීමට නොහැකි (ඔබ විසින් මැනවින් දන්නා කරුණු කාරණා හා ව්‍යවස්ථාපිත උපනතීන්) බලයක් විසින් නැවත අපේ ජාතික පෙරමුණේ කෘත්‍යාධිකාරී මණ්ඩලය හා පක්ෂ නායක ආචාර්ය සේනක ද සිල්වා වෙත පවරා ගැනීම සිදු කළහොත්…’
සමගි ජන බලවේගයේ විනය පියවර ගැනීම දෙකේ කොළයට දමමින් ඇය ලිපිය අවසන් කර ඇත. ‘ඉදිරියේදීද මෙවැනි විහිළු සහගත ලිපි හෝ විනය කරුණු යැයි සඳහන් මාතෘකා මා වෙත ලැබුණහොත් ලංකාවේ මාධ්‍ය වෙත අදාල තොරතුරු ලබා දී මෙහි සත්‍යය රටට හෙළි කිරීමට සිදු වන බවත් නෛතික තත්වයන් යටතේ අධිකරණය හමුවේ කරුණු දක්වාලීමට සිදු වන බවද අවධාරණය කර සිටිමි.’
මේ කතා ඇත්තදැයි සමගි ජන බලවේගය පිළිතුරු දිය යුතුය. හදිසි දේශපාලන අටවාගැනීම් ලෙස පක්ෂවලින් මැතිවරණයට ඉදිරිපත් වීමේ සැබෑ අවුල පෙනෙන්නේ මෙවැනි සිදුවීම්වලින්ය.■
