චීනයේ නිෂ්පාදිත සිනොෆාම් එන්නත ශ්‍රී ලාංකිකයන්ට ලබා දීම කොවිඩ්-19 මර්දනයට පමණක් නොව, අනාගතයේදී රජයෙන් ලබාදෙන ඕනෑම එන්නතක් පිළිබඳ සාමාන්‍ය ජනතාවගේ විශ්වාසය නැති විය හැකි, දීර්ඝකාලීනව නරක ප්‍රතිඵල ඇති වන භයානක තීන්දුවක් බව විශේෂඥ වෛද්‍යවරුන්ගේ සංගමයේ සභාපති වෛද්‍ය එල්.ඒ. රණසිංහ පවසයි.
ඔහු ඒ බව ප්‍රකාශ කළේ එම එන්නත ශ්‍රී ලාංකිකයන්ට ලබා දීම සඳහා කමිටුවක් පත් කර ප්‍රමුඛතා ලැයිස්තු සකස් කරන බව රජයේ වසංගත රෝග ඒකකයේ අධ්‍යක්ෂ වෛද්‍ය සුදත් සමරවීර අප්‍රේල් 01 වැනිදා මාධ්‍ය සාකච්ඡාවකදී කළ ප්‍රකාශය පිළිබඳ අප කළ විමසීමකදීය.
මීට පෙර ඖෂධ නිෂ්පාදනය පිළිබඳ රාජ්‍ය අමාත්‍ය චන්න ජයසුමන ප්‍රකාශ කළේ සිනොෆාම් චීන එන්නත ලබා දෙන්නේ ලංකාවේ සිටින චීන ජාතිකයන්ට පමණක් බවයි. එහෙත්, වෛද්‍ය සුදත් සමරවීර ඊට පටහැනිව පවසන්නේ, ලාංකිකයන්ටද එම එන්නත ලබාදීමට බලාපොරොත්තු වන බවයි.
වෛද්‍ය එල්.ඒ. රණසිංහ, සිනොෆාම් එන්නතේ තෙවැනි අදියරේ පර්යේෂණ පිළිබඳ තොරතුරු නොමැතිකමින් ජාතික ඖෂධ නියාමන අධිකාරිය එන්නතට අනුමැතිය ලබා දීම ප්‍රතික්ෂේප කළ බව සිහිපත් කළේය. ශ්‍රී ලංකාවේ ලබා දෙන ඕනෑම ඖෂධයක් හෝ එන්නතක් එම අධිකාරියේ අනුමැතිය ලැබිය යුතු බවද ඔහු පෙන්වා දුන්නේය.
ඔහු වැඩිදුරටත් කීවේ වසර ගණනාවක් තිස්සේ ශ්‍රී ලංකාවේ සෞඛ්‍ය අමාත්‍යාංශයෙන් විවිධාකාර එන්නත් වර්ග ලබාදීමේදී සාමාන්‍ය ජනතාව විශ්වාසයෙන් ඒ සඳහා සහභාගි වූ බවය. රජයෙන් ලබා දෙන එන්නත් පිළිබඳ සැකයක් ඇති වුවහොත්, එය දුරු කිරීම අසීරු බව ඔහු කීය.
එම එන්නත පිළිබඳ නියමිත ලියකියවිලි ජාතික ඖෂධ නියාමන අධිකාරියට ඉදිරිපත් කොට නිසි අවසරයක් ලබා ගෙන එන්නත ලබා දිය යුතු බවත්, එසේ නොකර බලපෑම් කර එන්නත ලබා දීමට කටයුතු කිරීම භයානක බවත් ඔහු කීය.
ඔහු වැඩිදුරටත් ප්‍රකාශ කළේ තම සංගමය මෙවැනි ක්‍රියාවලට එරෙහිව වෘත්තිය ක්‍රියාමාර්ග ගන්නා අන්දමේ සංවිධානයක් නොවන බවත්, තමන්ට කළ හැක්කේ මේ පිළිබඳ විද්වත් මතය ප්‍රකාශ කරමින් අනතුරු හැඟවීම පමණක් බවත්, තීන්දුව ගත යුත්තේ ආණ්ඩුව බවත්ය.■
චීන සිනොෆාම් එන්නත – චීන අයට පමණයි: චන්න , ලාංකිකයන්ටත්!: සමරවීර , භයානකයි!: විශේෂඥයෝ
- Advertisement -
