ජාතික ආරක්ෂාව සම්බන්ධයෙන් දෛනිකව පළවන ප්‍රවෘත්ති හා තොරතුරු ආරක්ෂක ලේකම්, අතිරේක ලේකම්වරුන් හා හමුදා සම්බන්ධීකරණ නිලධාරි විද්‍යුත් තැපෑල/මුද්‍රිත ලිපිගොනුවක් ආධාරයෙන් දැන්වත් කිරීම
සංරක්ෂිත තොරතුරු අවශ්‍ය අවස්ථාවන්හිදී ලබාදීම
සේවය නියුතු ත්‍රිවිධ හමුදා නිලධාරින් සහ සෙසු නිලයන් මෙන්ම සේවය හැර ගිය හා විශ්‍රාමික අයවලුන් සබැඳි සාපරාධි ක්‍රියා සහ විවිධ රිය අනතුරු සබැඳිව දෛනිකව යාවත්කාලීන වාර්තාවක් පවත්වාගෙන යෑම
ජාතික ආරක්ෂාව සම්බන්ධයෙන් ලිපි සහ වාර්තා සකස් කර මාධ්‍ය වෙත ලබාදීම
මාසික වාර්තා සකස් කිරීම සහ මාධ්‍ය දැනුවත් කිරීමේ වාර්තා සකස් කිරීම
මෙම මාධ්‍ය ආයතන සබැඳි සියලුම පරිපාලනමය ගැටලු ආරක්ෂක අමාත්‍යාංශය සමඟ සම්බන්ධතාවෙන් යුතුව නිරාකරණය කර ගැනීම සහ ආරක්ෂාව තහවුරු කිරීම
ආරක්ෂක අමාත්‍යාංශ වෙබ් අඩවිය කාර්යක්ෂමව සහ ඵලදායි අන්දමින් නඩත්තු කිරීම
ආරක්ෂක අමාත්‍යාංශය සංවිධානය කරනු ලබන වැඩසටහන් සඳහා වීඩියෝ සහ ඡායාරූප ආවරණයන් ලබාදීම
ආරක්ෂක අමාත්‍යාංශය යටතේ පවතින අනෙකුත් ආයතනයන්හි අවශ්‍යතාවයන් මත වාර්තාමය වැඩසටහන් සකස් කිරීම
ආරක්ෂක අමාත්‍යාංශය යටතේ ඇති මාධ්‍ය මධ්‍යස්ථානයේ ක්‍රියාකාරකම් එසේ සඳහන් කර ඇත්තේ 2019 වර්ෂයට අදාළ එම අමාත්‍යාංශයේ කාර්ය සාධන වාර්තාවේය.
එම මාධ්‍ය මධ්‍යස්ථානය දෛනිකව මුද්‍රිත, විද්‍යුත් හා වෙබ් මාධ්‍ය පුවත් නිරීක්ෂණය කිරීම හා සමාලෝචනය කරන බව එම වාර්තාවේ සඳහන්ය. ඊට අදාළ සංඛ්‍යාද ඉදිරිපත් කර ඇත. මේ නිරීක්ෂණ කර ඇත්තේ ඇරක්ෂාවට අහිතකර පුවත්, හිතකර පුවත් හා බලපෑමකින් තොර පුවත් ලෙස වර්ගීකරණ තුනක් යටතේය. ඒ අනුව රූපවාහිනී නාලිකා, ගුවන් විදුලි නාලිකා, පුවත්පත් හා වෙබ් අඩවිවල පළවන පුවත් ගැන නිරීක්ෂණ සිදුවී ඇත.
2019 ජනවාරි සිට අගෝස්තු දක්වා මාස අටක කාලයට අදාළව එක් එක් මාසය වෙනුවෙන් එම වර්ගීකරණ යටතේ වෙන වෙන සංඛ්‍යා දත්ත එහි දක්වා තිබේ.
ඒ අනුව 2019 ජනවාරි සිට අගෝස්තු දක්වා මාස 8ක කාලයේදී රූපවාහිනී නාලිකාවල අහිතකර පුවත් 459ක්ද, හිතකර පුවත් 2152ක්ද, බලපෑමකින් තොර පුවත් 2717ක්ද විකාශය වූ බව සඳහන් කර ඇත.
එම මාස 8ක කාලයේදී ගුවන්විදුලි නාලිකාවල අහිතකර පුවත් 166ක්ද, හිතකර පුවත් 543ක්ද, බලපෑමකින් තොර පුවත් 438ක්ද විකාශනය වූ බව සඳහන් කර ඇත.
වෙබ් අඩවිවල පළවූ පුවත් වර්ගීකරණය වශයෙන් සංඛ්‍යා දත්ත වගු දෙකක් එම වාර්තාවේ දැක්වෙන අතර ඉන් එකක් මුද්‍රිත හෙවත් පුවත්පත්වලට අදාළව විය යුතුය. එම අනුමානයට හේතුව වන්නේ පැහැදිලි කිරීමේ ඇතත් පුවත්පත්වලට අදාළ සංඛ්‍යා දත්ත වගුවක් නොමැති නිසාය.
ඒ අනුව වෙබ් අඩවි පුවත් යනුවෙන් සඳහන් එක් සංඛ්‍යා දත්ත වගුවක අහිතකර පුවත් 2961, හිතකර පුවත් 6492ක් හා බලපෑමක් නැති පුවත් 15,994ක් වශයෙන් හඳුනාගෙන ඇත.
එම මාතෘකාවෙන්ම ඇති අනෙක් සංඛ්‍යා දත්ත වගුවේ අහිතකර පුවත් 1023, හිතකර පුවත් 1490 හා බලපෑමක් නොමැති පුවත් 3105ක් වශයෙන් හඳුනාගෙන ඇත.
මෙම තොරතුරු අනුව පෙනෙන්නේ ඉතා විශාල කාර්ය මණ්ඩලයක් මුද්‍රිත, විද්‍යුත් හා වෙබ් අඩවි සම්බන්ධයෙන් දෛනිකව අහිතකර, හිතකර හා ලබපෑමක් නැති වශයෙන් එම මාධ්‍යයන්හි පළවන පුවත් සම්බන්ධයෙන් නිරීක්ෂණයක යෙදී ඇති බවය.
එය ලෙහෙසි පහසු කාර්යයක් නොවේ. එසේම එම තොරතුරු රජයේ නිලධාරීන් වන අමාත්‍යාංශ ලේකම් අතිරේක ලේකම් යන අයට අමතරව ත්‍රිවිධ හමුදාවේ සම්බන්ධීකරණ නිලධාරීන්ට යොමුකර ඇති බව පෙනේ.■
