සෞඛ්‍ය ඇමතිනිය ඇතුළු රසික සමාජයට කොවිඩ් වැළඳුණු පසු ධම්මික වෙද/කපු මහතාගේ පැණියේ කාලය අහවර බව බොහෝ අය සිතුවත්, දැනටත් එහි සායනික පරීක්ෂණ සිදු කෙරෙමින් පවතී.
‘ශ්‍රී වීර භද්‍ර ධම්ම ප්‍රතිශක්ති ජීව පානය’ ආරක්ෂිතද සහ ඵලදායීද යනුවෙන් පරීක්ෂා කිරීම සඳහා රෝග ලක්ෂණ නැති, මඳ රෝග ලක්ෂණ සහ සාමාන්‍ය රෝග ලක්ෂණ ඇති කොවිඩ්-19 රෝගීන්ට ලබා දීමේ ද්වි-වැස්මෙන් යුත්, ප්ලසීබෝ පාලිත අහඹු සායනික පරීක්ෂාව මේ දිනවල සිදු කෙරෙනවා.
වචන දැකලා බය වෙන්න ඕනෑ නැහැ. මේ කතා කරන්නේ ‘ධම්මික පැණිය’ ගැන තමයි. සායනික පරීක්ෂාවට අනුමැතිය ලබා ගැනීමේදී පැණියට යෙදූ නම ඒ.
ඒ යොදා තියෙන නම අපූරුයි. වචනයෙන් වචනය බිඳින්න පුළුවන්. ශ්‍රී කියන වචනයෙන් පූජනීය බවක් ආරෝපණය වෙනවා.
වීර කියන වචනයට අපේ සමාජය හැමදාම කැමතියි. රෝගීන්ට ප්‍රතිකාර කිරීම අස්සටත් ‘වීර’ කියන වචනය දැමීමෙන් හුදු රෝගයක් සුව කිරීමට එහා ගිය යුද්ධයක් කිරීමක් වගේ හැඟීමක් ආරෝපණය වෙනවා.
භද්‍ර කියන්නේ කාලි මෑණියන් නියෝජනයට වචනය. කාලි මෑණියන් පමණක් නියෝජනය නුසුදුසුයැයි සිතූ නිසා බෞද්ධ පෙනුමක් ලැබෙනු පිණිස ධම්ම කියලාත් ඒ නාමයට යොදලා තියෙනවා.
වෙද/කපු මහත්තයාගේ නම ඇසුරෙන් ‘ධම්මික ප්‍රතිශක්ති ජීව පානය’ කියා දමන්නට අවස්ථාව තිබුණත්, ඊට වඩා ගැම්මක් එන නිසා භද්‍ර, වීර, ශ්‍රී වැනි වචන යොදන්න ඇති. ධම්මික වෙද/කපු මහතාගේ පැත්තෙන් ඒවා හරි අහිංසක වැඩ. ප්‍රශ්නය තියෙන්නේ රජයෙන් එයට පිළිගැනීමක් දී සායනික පරීක්ෂාවකුත් ඇරඹීම.
සියයට සියයක් සාර්ථක බව කී ධම්මික පැණිය පානය කළ හැටහුටහමාරක් පුද්ගලයන්ට කොවිඩ්-19 ආසාදනය වුණත්, ඒ පැණියේ සායනික පරීක්ෂණ තවමත් ක්‍රියාත්මක වෙන්නේ කෙලෙසද කියන එකයි අප විශේෂයෙන් විමසිය යුතු පැනය. පසුගිය වසරේ දෙසැම්බර් මාසයේදී තමයි මේ පැනියේ සායනික පරීක්ෂණ සඳහා ආචාර ධර්ම කමිටු අනුමැතිය ලැබුණේ. සාමාන්‍යයෙන් සායනික පරීක්ෂණයකට අනුමැතියක් ලැබෙන්නේ සතුන් යොදා කළ පරීක්ෂණ සහ විද්‍යාගාර පරීක්ෂණවල ප්‍රතිඵල අනුව ඖෂධයේ ක්‍රමවේදය හඳුනාගෙන.
කොවිඩ්-19 ප්‍රතිකාර සඳහා වෙන් කළ රෝහල් වන අනුරාධපුර ශික්ෂණ රෝහලට අනුබද්ධිත මෙත්සිරි සෙවණ මධ්‍යස්ථානයේත්, නොච්චියාගම ප්‍රාදේශීය රෝහලේත් මෙම සායනික පරීක්ෂා වෙනුවෙන් රෝගීන් 70කට පමණ පැණිය පෙව්වාලු.
තමන්ගේ නමින් කිසිදා රජයේ ආයතන නම් නොකරන බව කියා බලයට පත්වූ මෛත්‍රීපාල සිරිසේන ජනාධිපතිවරයා 2019 මාර්තු 20 වැනිදා මෙත්සිරි සෙවණ වකුගඩු රෝගීන් සඳහා ප්‍රතිකාර කිරීමේ මධ්‍යස්ථානය විවෘත කළ බව සිහිපත් කර ගැනීමි ධම්මික පැණියට අදාල නැතත්, සිහිපත් කරන්න වටින අතුරු කතාවක්.
මේ පරීක්ෂණයේ අංකය යූ1111-1262-3889. එය ලියාපදිංචි කළ අංකය එස්එල්සීටීආර්/2021/001. පරීක්ෂණය පිළිබඳ දැනට නිකුත් කර ඇති වාර්තා අනුව එම පරීක්ෂණයේ ලියාපදිංචි දිනය 2021 ජනවාරි 05. එහිදී පාවිච්චි කරන්නේ ‘ඩබල්-බ්ලයින්ඩ් ප්ලසීබෝ කන්ට්‍රෝල්ඩ් රැන්ඩමයිස්ඩ් පැරලල් ගෲප්’ ක්‍රමය.
පරීක්ෂණයට ධම්මික පැණිය සහ තවත් එයට සමාන පෙනුම සහිත ශරීරයට කිසිදු බලපෑමක් නැති පානයක් යොදා ගන්නවා. ප්ලසීබෝ එක යනුවෙන් හඳුන්වන්නේ එය. ඒ කියන්නේ ශරීරයේ ප්‍රතිශක්තීකරණ පද්ධතියට කිසිදු හොඳ හෝ නරක බලපෑමක් සිදු නොවන පානයක්.
ඒ දෙකම එකම ආකාරයෙන් ලේබල් කරනවා. ඉන්පසු, විවිධ වයස් සීමා නියෝජනය වන පිරිසක් අතරින් එක් පිරිසකට පැණියත්, අනෙක් පිරිසට ප්ලසීබෝ එකත් දෙනවා.
මෙම පරීක්ෂණයේදී පිරිස කොටස් හතරකට කඩනවාලු. ඔවුන්ගේ සිරුරේ ප්‍රතිදේහ හෙවත් ඇන්ටිබොඩි නිපදවී තිබෙනවාද කියා මුලින් ඇන්ටිබොඩි පරීක්ෂණවලින් හඳුනාගන්නවාලු. (මෙය කොවිඩ් රෝගීන් හඳුනාගැනීමට කරන රැපිඩ් ඇන්ටිජෙන් පරීක්ෂාවට වෙනස්. රැපිඩ් ඇන්ටිජෙන් පරීක්ෂාවේදී හඳුනාගන්නේ ප්‍රතිදේහජනක නම් වෛරසයේ කොටස.)
සාමාන්‍යයෙන් කොවිඩ්-19 වෛරසයට එරෙහිව සටන් කොට ශරීරය ඇතුළේදී වෛරසය පරාද කරන්නේ ප්‍රතිදේහ. ඒ ප්‍රතිදේහ නිපදවන්නට දවස් කිහිපයක් ගත වෙනවා. බහුතර රෝගීන්ගේ සිරුරේ, යම් දින කිහිපයකට පසු ප්‍රතිදේහ නිපදවී වෛරසය පරාජය වෙනවා.
දින හතරකට පසු නියැදි පරීක්ෂා කරනවා. නියැදි පරීක්ෂකයන් සහ පෙර කී පානයන් ලේබල් කර රෝගීන්ට ලබාදුන් අයත් දෙපිරිසක්. ඒ කියන්නේ පරීක්ෂණ ක්‍රමවේදය අනුව පරීක්ෂකයන් දන්නේ නැහැ පැණිය දුන්නේ කාටද, අනෙක් පානය දුන්නේ කාටද කියා.
අවසානයේ පීසීආර් පරීක්ෂණ සිදු කොට ඒ ඒ රෝගීන්ගේ තත්වය වාර්තා කරනවා. පීසීආර් පරීක්ෂණ කරන්නේ දින හතරකට පසු. ඒ කාලසීමාව, පැණිය නැතත් ස්වභාවයෙන්ම ඇඟ ඇතුළේ ප්‍රතිදේහ නිපදවෙන්නටත් සෑහෙන කාලයක් බව සිහි තබාගන්න ඕනෑ. කෙසේ වෙතත් පරීක්ෂණ වාර්තාව ඇසුරෙන් අප සලකන්න ඕනෑ ප්ලසීබෝ එක ගත් අයත්, පැණිය ගත් අයත් අතර ප්‍රතිඵලවල පැහැදිලි වෙනසක් තියෙනවාද කියායි. ලංකාවේ තත්වය විශ්වාස නැති නිසා, ඔය කියන ඩබල්-බ්ලයින්ඩඩ් ක්‍රමයට අනුවම හරි හැටි පරීක්ෂණය සිදු වුණාද කියා සොයා බලන්නත් සිදු වේවි.
තවත් විශේෂ අතුරු ප්‍රශ්නයක් තිබෙනවා. මේ පැණිය නියමිත මාත්‍රා අනුව පානය කළාට පසුත් එක්තරා ප්‍රාදේශීය දේශපාලනඥයෙකුට කොවිඩ්-19 ආසාදනය වී තිබුණා. එලෙස පැණිය බිව් අයට කොවිඩ් වැළඳීමේ සිදුවීම් රැල්ලක් ඉන් පසු දුටුවා. සෞඛ්‍ය ඇමතිනියටත් කොවිඩ් වැළඳුණා.
සියයට සියයක් සාර්ථකයි. බිව්වොත් ජීවිතේට කොවිඩ්-19 හැදෙන්නේ නෑ. අත්දුටුවයි ප්‍රත්‍යක්ෂයි කියා ධම්මික වෙද/කපු මහතා මුලින් කීවා. ඒ දෙරණ ටීවී නාළිකාවේ චතුර අල්විස් මුව අයාගෙන බලා සිටියදී. දේශීය වෙදකම් භාර රාජ්‍ය ඇමති සිසිර ජයකොඩි අනුමත කරමින් ජයග්‍රාහී සිනහවකින් යුක්තව හිස වනද්දී. එහෙත්, පෙර කී සිදුවීම්වලින් පසු කීවේ සියයට සියයක සාර්ථකත්වයට ‘කොන්දේසි සහිතයි’ කියා.
ප්‍රචාරයක් ගියේ පැණිය පානය කිරීමෙන් පසු රැකිය යුතු පිළිවෙත් නිසි පරිදි රැකගත්තේ නැති නිසා ඒ අයට කොවිඩ්-19 ආසාදනය වූ බව. ඒ අනුව මේ සායනික පරීක්ෂාවට සහභාගී වූ අයත් දැන් පිළිවෙත් රකින්න ඕනෑද? නියමිත කොන්දේසි අනුව කටයුතු කරන්න ඕනෑද? සායනික පරීක්ෂණ පිළිබඳ වාර්තාවේ නම් ඒ බවක් සඳහන් නෑ.
මෙම පරීක්ෂණ ගැන විද්‍යාත්මක විමසීම් සඳහා අමතන ලෙස මහාචාර්ය සිසිර සිරිබද්දනගේ නම යොදා තිබෙනවා. රජරට විශ්වවිද්‍යාලයේ මහාචාර්යවරයෙකු වන සිසිර සිරිබද්දනගේ නම ජාතික ඖෂධ නියාමන අධිකාරියට නම් කරමින් මෑත කාලයේ රජරට විශ්වවිද්‍යාලයේ සේවය කර, දේශපාලනයට ආ මහාචාර්ය චන්න ජයසුමන ලිපියකුත් යැවු බවත් අතුරු කරුණක් ලෙස කියන්න ඕනෑ.
කොහොම නමුත්, මහාචාර්ය සිරිබද්දනගෙන් විද්‍යාත්මක පැහැදිලි කිරීමක් ඉල්ලුවත්, ඔහු මේ ගැන අපට අදහස් දැක්වුවේ නෑ. තමන් මෙයට වැඩි සම්බන්ධයක් නැති බවත්, ඒ ගැන දන්නේ ආචාර්ය සේනක පිලපිටිය බවත් ඔහු කීවා.
අප ආචාර්ය සේනක පිලපිටියගෙන් සායනික පරීක්ෂාව ගැන විමසූ කළ ඔහු කීවේ, මේ වන විටත් සායනික පරීක්ෂණයේ කටයුතු කෙරෙමින් පවතින බව. ආසාදිතයන් 70 දෙනෙකුට ලබා දී ඇති බවත් ඔහු කීවා. කෙසේ වෙතත් මේ වන විට තාක්ෂණික අදියරක පවතින බව ඔහු වැඩිදුරටත් කීවා.
ඒ අනුව පැණිය පානය කළ අයට කොවිඩ්-19 වැළඳීම වැනි බාධක මැද, කොවිඩ්-19 රෝගයට ඖෂධයක් ලෙස පැණිය නොනැවතී තවමත් ගමනේ යන බව කිව හැකියි.■
