■ ඉඳුවර බණ්ඩාර
දේශපාලක පළිගැනීම් ගැන සොයා බැලීමට ජනාධිපතිවරයා පත්කරන ලද කොමිසමට එරෙහිව නීතිඥවරුන් දස දෙනෙකු අල්ලස් හෝ දූෂණ චෝදනා විමර්ශන කොමිසමට පැමිණිල්ලක් ඉදිරිපත් කර ඇත. එම පැමිණිල්ලෙන් කියා ඇත්තේ කොමිසම ඒ සඳහා බලය පැවරූ ගැසට් පත්‍රයේ ඇති සීමාවෙන් ඔබ්බට ගොස් එම සීමාවට අයත් නැති පුද්ගලයන්ගේ පැමිණිලි බාරගෙන විමර්ශනය කිරීම තුළින් රජයේ මුදල් හා සම්පත් අවභාවිත කර ඇති බවයි. ඊට අදාල කොමිසම බාරගත් පැමිණිලි 22ක් ගැන එම පැමිණිල්ලේ දක්වා ඇත. ඒ නිසා අල්ලස් පනතේ දූෂණය නැමැති වරද සිදුකිරීම ගැන එම කොමිසමේ කොමසාරිස්වරුන්වූ විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න, විශ්‍රාමික අභියාචනාධිකරණ විනිසුරු දයා චන්ද්‍රසිරි ජයතිලක හා විශ්‍රාමික පොලිස්පති චන්ද්‍රා ප්‍රනාන්දුට එරෙහිව පරීක්ෂණයක් සිදුකර නීතිමය ක්‍රියාමාර්ග ගන්නා ලෙස ඉල්ලා ඇත. මෙම පැමිණිල්ල ඉදිරිපත් කර ඇත්තේ සේනක පෙරේරා, සයිනුල් ලුතුෆ, මංජු ශ්‍රී චන්ද්‍රසේන, අචලා සෙනෙවිරත්න, තම්බයියා ජෙයරත්නරාජා, හේමන්ත වික්‍රමසිංහ, නාමල් රාජපක්ෂ, උපාලි රත්නායක, අශෝක විජේවර්ධන හා චූලා අධිකාරි යන නීතිඥවරුය.■
