පුවත්පත් මණ්ඩල නීතිය සංශෝධනය කිරීම ගැනත්, මාධ්ය කටයුතුවලට හා භාෂණයට අදාළව දණ්ඩ නීති සංග්රහයට සංශෝධන ගෙන ඒම සඳහාත් ආණ්ඩුව ගෙන ඇති තීරණය සම්බන්ධයෙන් ජනමාධ්ය අමාත්ය කෙහෙලිය රඹුක්වැල්ල යළි අදහස් දක්වා ඇත.
ඒ කැබිනට් තීරණ දැනුම් දීමේ ප්රවෘත්ති සාකච්ඡාවේදී හා අමාත්යාංශ මාධ්ය ලේකම්වරු හමුවූ සාකච්ඡාවකදීය.
මාධ්යවේදීන්ගේ හා සමස්ත ජනතාවගේ අයිතිවාසිකම් සුරක්ෂිත වන ආකාරයට හැත්තෑව දශකයේ ගෙන ආ පුවත්පත් මණ්ඩල පනත යාවත්කාලීන විය යුතු බවද, එසේ නොවුණහොත් ලෝකයෙන් අප පසුපසට යනු ඇතැයිද එහිදී කියා ඇති ඇමතිවරයා එයට කවුරු හෝ විරුද්ධ වනවා නම් ඔහු පසුගාමී පුද්ගලයකු ලෙසද හඳුන්වා ඇත.
මෙය මාධ්ය මර්දනයට ගන්නා උත්සාහයක් නොවන බවද, එහෙත් පුරවැසියෙකුගේ අයිතිවාසිකම් කඩවන අවස්ථාවකදී ඒ සඳහා ක්රියාකරන්නට තමාට යාන්ත්රණයක් අවශ්ය බවද, කොතෙක් කීවත් ආචාර ධර්ම ගණන් ගන්නේ නැත්නම් එයට නීතිමය රාමුවක් අවශ්ය බවද ඔහු කියා ඇත.
ඇමතිවරයා කියා ඇති මේ කරුණු එකින් එක ගෙන බැලූ විට මේ ආකාරයට කිව හැකිය.
යාවත්කාලීන වීම යනු ලෝකයේ දියුණු ප්රජාතන්ත්රවාදයක් ඇති රටවල් මාධ්ය සම්බන්ධයෙන් කටයුතු කරන ආකාරය අනුගමනය කිරීම මිස රාජ්යය මඟින් මාධ්ය පාලනය කිරීම සඳහා නීතිරීති තවත් ශක්තිමත් කිරීම නොවේ. අහෝසි කළ යුතු යැයි දශක ගණනාවක් තිස්සේ ඉල්ලන පුවත්පත් මණ්ඩල නීතිය තවත් ශක්තිමත් කිරීම යනු කොහොමත් ලෝකයෙන් අප පසුපසට යෑමකි. පසුගාමී පුද්ගලයන් වන්නේ මාධ්ය සම්බන්ධ අලුත් දේවල් වැළඳ ගැනීමට අකමැති පිරිස මිස පැරණි දේවල් බදාගෙන සිටින පිරිස නොවේ.
පුරවැසියාගේ අයිතිවාසිකම් රකිනවාට අප අකමැති නැත. විවේචන තිබුණත් පුවත්පත් සඳහා හෝ නියාමන ක්රමවේදයක් සකසා තිබෙන්නේ ඒ නිසාය. සිදුවිය යුත්තේ එහි අඩුපාඩු ඇත්නම් නිවැරදි කිරීමය. එවැනි ක්රමවේදයකට විද්යුත් ක්ෂේත්රයටද ආරාධනා කිරීමය. මේ කටයුතු සඳහා ආණ්ඩුව පහසුකම් සපයන්නෙකුගේ භූමිකාව ඉටුකිරීමය. රට තුළ ස්ථාපිත සමහර වෘත්තීන් ක්රියාත්මක වන ආකාරයේ ආණ්ඩුවේ නීතිරීතිවලින් තොරව එම වෘත්තියටම ස්වයං නියාමනය කරගැනීමට අවශ්ය හා ඊට සියල්ලන් බැඳෙන ආකාරයේ නෛතික පසුබිමක් සකස් කිරීමය. ඇමතිවරයාගේ මුළු කතාව තුළ ඇත්තේ මාධ්යයට එරෙහි ආණ්ඩුවේ මර්දනයක් බව පැහැදිලිය. දණ්ඩ නීති සංග්රහයට සංශෝධන ගෙනෙන්නට අවශ්ය වන්නේ ඒ නිසාය. මේ අහෝසි කරන ලද සාපරාධී අපහාස නීතිය යළි වෙනත් ආකාරකට ගෙනඒමකි. සාපරාධි අපහාස නීතිය යටතේ පොලීසිය එදා නඩු පැවරුවේ ඇමතිවරයා කියන ආකාරයේ සාමාන්ය මිනිසුන් සම්බන්ධයෙන් නොවේ. දේශපාලනඥයන් වෙනුවෙනි.
පසුගිය දශක කිහිපය ගත්කළ වැඩියෙන්ම මිනිසුන්ට අපහාස කර ඇත්තේ රාජ්ය මාධ්ය විසින්ය. ඒ බලයේ සිටින ආණ්ඩුවේ වුවමනා අනුව එම මාධ්ය හැසිරවීම නිසාය. පුරවැසියන් ගැන ආණ්ඩුවේ ඇත්ත වුවමනාව පෙන්වීමට නම් මුලින් කළ යුත්තේ රාජ්ය මාධ්ය ආණ්ඩුවේ ජඩ මාධ්ය භාවිතාවෙන් මුදා හැරීමය. එය කරන්න සූදානම් දැයි ඇමතිවරයාගෙන් අසමු.■
පළමුව රාජ්ය මාධ්ය ආචාරධාර්මික කරමුද?
- Advertisement -
