පාස්කු ඉරිදා ත්‍රස්ත ප්‍රහාරයට වගකිවයුතු පුද්ගලයන්ට පියවර නොගෙන ශ්‍රීලනිප සභාපති, හිටපු ජනාධිපති මෛත්‍රීපාල සිරිසේනට චෝදනා කිරීම පිළිබඳ විරෝධය දක්වමින් ශ්‍රීලනිපය එම වාර්තාව ප්‍රතික්‍ෂෙප කර ඇත. ඒ පෙබරවාරි 25 වැනිදා පැවැති පක්ෂයේ විධායක සභා රැස්වීමේදීය.
ඉදිරියේදී එයට එරෙහිව සටන් කරන බව ඒ ගැන කළ විමසීමකදී අනිද්දා සමඟ අදහස් දැක්වූ ශ්‍රීලනිප ජ්‍යෙෂ්ඨ උප සභාපතිවරයෙක් පැවසීය. තම පක්ෂයේ සභාපතිවරයාට එරෙහිව කටයුතු කිරීමට සූදානම් වුවහොත් නිහඬව නොසිටින බවද ඔහු කිය.
පෙබරවාරි 24 වැනිදා පැවති ශ්‍රීලනිප මධ්‍යම කාරක සභා රැස්වීමේදීද ඒ පිළිබඳ සාකච්ඡා කළ බව ඔහු කීය. ඉදිරියේදී එම වාර්තාව පිළිබඳ විවාදයේදී ශ්‍රීලනිපය සංවිධානාත්මකව කරුණු දැක්වීමට බලාපොරොත්තු වන බවත් ඔහු ප්‍රකාශ කළේය.
ශ්‍රීලනිපය විමල් වීරවංශ ප්‍රමුඛ කණ්ඩායම සමඟ සාකච්ඡා කරන නමුත්, ඉදිරියේදී ආණ්ඩුව තුළ තනි කණ්ඩායමක් ලෙස කටයුතු කිරීමට බලාපොරොත්තුවෙන් සිටින බව ඔහු වැඩිදුරටත් කීය. ආණ්ඩුව තුළ සිටියත්, ස්වාධීන ප්‍රතිපත්ති මත ශ්‍රීලනිපය කටයුතු කිරීමට මධ්‍යම කාරක සභා රැස්වීමේදීද එකඟ වූ බව ඔහු සඳහන් කළේය.
පෙබරවාරි 25 වැනිදා හවස පවත්වන ශ්‍රීලනිප විධායක සභා රැස්වීමේදී පක්ෂයේ නිලධාරී මණ්ඩලය නැවත පත් කරගැනීමටද නියමිතව තිබුණි.■
පාස්කු වාර්තාවට ශ්‍රීලනිපය අවි ගනියි- ඉදිරියේදී ආණ්ඩුව තුළ තනි කණ්ඩායමක් ලෙස
- Advertisement -
