කෝවිඩ් 19 සඳහා වන ප්‍රතිශක්තිකරණ එන්නත සම්බන්ධයෙන් මේ වන විට වාර්තා වන කරුණුවලින් නැවතත් පැහැදිලි වන්නේ, අප ගිය සතියේත් අවධාරණය කළ පරිදි, ආණ්ඩුව එය කළමනාකරණය කරන දුර්වල ආකාරයයි.
ඇමතිවරුන්, පාර්ලිමේන්තු මන්ත්‍රීවරුන් හා පක්‍ෂ-විපක්‍ෂ දේශපාලකයන්, එන්නත පදනම් කරගෙන තමන්ගේ ජනතා හිතවාදිබව පිළිබඳ මිනුම් දඬු ප්‍රසිද්ධ කරන්නට උත්සාහ දරන අතර, ජනතාව ඒ ගැන දක්වන්නේ කෝපය මුසු විරෝධයකි.
කෝවිඩ් ප්‍රතිශක්තිකරණ එන්නත ලබා ගැනීමට රටේ සෑම පුරවැසියකුට ම අයිතියක් ඇත්තේ ය. ඒ නිසා, රටේ සාමාන්‍ය මිනිසුන් මෙන් ම, වරප්‍රසාදලාභීන් මෙන් ම දේශපාලකයන්ට ද කෝවිඩ් එන්නත ලබා ගැනීමට අයිතියක් තිබේ. උදාහරණයක් ලෙස, ඇමති, මන්ත්‍රී හෝ වෙනත් දේශපාලන නායකයකු වුවද, කෝවිඩ් වෛරසය ආසාදනය වීමෙන් ජීවිත අවදානමකට පත්විය හැකි ප්‍රමුඛතා ලැයිස්තුවේ සිටින්නකු නම්, (බොහෝ දේශපාලකයන් මෙන් ම රටේ සැලකිය යුතු ජනගහනයක් බෝ නොවන රෝගවලින් පෙළෙන බව යථාර්ථයකි.) ඔවුන්ට එන්නත ලබා ගැනීමට ඇති අයිතිය අනෙක් හැම කෙනෙකුට ම ඇති අයිතියට සමාන ය.
ප්‍රශ්නය වී ඇත්තේ, ආණ්ඩුව තවමත් පිටරටකින් හෝ ජාත්‍යන්තර සංවිධානයකින් පරිත්‍යාග ලෙස ලැබෙන කෝවිඩ් එන්නත් ගැන පමණක් බලාපොරොත්තුව තබා කටයුතු කිරීමයි. ඉන්දියාවෙන් ලැබුණු කොවිශීල්ඩ් එන්නත් මාත්‍රා ලක්‍ෂ පහ, ප්‍රමාණවත් වන්නේ පුද්ගලයන් 2,50,000කට පමණකි. එය එන්නත් කරන්නට පටන් ගත්තේ ද එවැනි සංඛ්‍යාවකට මාත්‍රා දෙක බැගින් ලබා දීමේ අදහසෙනි. එහෙත්, එහි දෙවැනි මාත්‍රාව, මාස තුනකට පසුව දිය හැකි යැ’යි නිෂ්පාදන සමාගමෙන් දැන ගන්නට ලැබීමත් සමග, එන්නත ‘මහජනතාවට ලබාදීමේ’ ව්‍යාපෘතියක් තමන්ගේ මහජන හිතවාදී ව්‍යාපෘතියක් හැටියට මහත් ප්‍රචාරයක් ඇතිව ආණ්ඩුව ක්‍රියාත්මක කළේ ය.
මහජනතාවට ලබා දෙන්නට පටන් ගත් වහා ම සිදුවූයේ ප්‍රමුඛතා ලැයිස්තු කඩාගෙන, වරප්‍රසාද හා බලය ඇත්තන්, පෝලිමෙන් පැන එන්නත ලබාගැනීමයි. ආණ්ඩුවේ ඇමති-මැතිවරුන් මෙන් ම විපක්‍ෂ දේශපාලකයෝ ද ඒ අතර වෙති. ඒ අතර සමහර දේශපාලකයෝ, ජනතාවට පළමුව අවස්ථාව දී තමන් පසුව එන්නත ලබාගන්නා බව කියමින් තමන්ගේ මහජන හිතවාදීබව පෙන්වන්නට උත්සාහ ගනිති.
එහෙත්, මේ සියලු ආකාරයේ දේශපාලකයන්ට, කෝවිඩ් එන්නත ලබා ගැනීමට අයිතියක් තිබෙන බව අප පිළිගත යුතු ය. ඒ නිසා පෝලිමෙන් පැන හෝ එම එන්නත ලබා ගැනීමට ඔවුන් දරන උත්සාහය අප පිළිගත යුත්තේ, ජීවිතාරක්‍ෂාව සඳහා ඇති කැමැත්තේ ප්‍රකාශනයක් හැටියට ය. වරද ඇත්තේ, එවැනි ම ජීවිතාරක්‍ෂාව සඳහා කැමැත්තක් ඇති අනෙක් පුරවැසියන්ට නැති අවස්ථාවක් ඔවුන්ට ලබා ගැනීම ය. ඒ, තමන්ගේ දේශපාලන හෝ වෙනත් බලතල පාවිච්චි කිරීමෙන් ඔවුන් ලබා ගත් අවස්ථාවක් බව පැහැදිලි ය.
ඒ නිසා, ආණ්ඩුව මහජනතාවට විවෘත කළ එන්නත අවසානයේ දී අන් හැම තැනක ම සිදුවනවාක් මෙන්, දේශපාලන හෝ වෙනත් වරප්‍රසාදලාභීන්ට පෝලිම පැන ලබා ගත හැකි දෙයක් බවට පත් වී තිබේ.
එයින් පැහැදිලි වන්නේ, ආණ්ඩුව එන්නත තමන්ගේ පාලනය යටතේ තබා ගැනීමට උත්සාහ කිරීමෙන්, අවුලක් සිදු වී තිබෙන බව ය.
කෝවිඩ් එන්නත රජය විසින් පමණක් මහජනතාවට ලබා දිය යුතු යැයි කියන ගිරා පෝතක වාමාංශිකයන්ට අරහං වුවත්, මේ අවස්ථාවේ උද්ගත වී තිබෙන්නේ කුමන ක්‍රමයකින් හෝ රටේ ජනතාවගෙන් අඩුගණනේ සියයට හැත්තෑ පහකට එන්නත ඉක්මනින් ලබා ගැනීමට අවස්ථාව සලසා දීමේ අවශ්‍යතාවකි. මේ ලියන මොහොත වන විට දිනකට මරණ 13ක් වාර්තා වන අසීරු තත්ත්වයකට ලංකාව පත්ව තිබේ.
ඒ නිසා, ගිය සතියේත් ලියූ පරිදි, පෞද්ගලික අංශයට ද එන්නත ආනයනය කිරීමේ අවස්ථාව නිසි නියාමනයක් යටතේ ලබා දීමෙන්, බලය ඇත්තන් පෝලිම් පැන එන්නත ලබාගැනීම් මෙන් ම, අනවශ්‍ය පිරිවැයක් දැරීම ද අඩු කර ගැනීමට ආණ්ඩුවට හැකි වන්නේ ය. ජීවිතය ගැන ආශාව හැමෝට ම එක සමාන ය. ■
