- මෙම කන්ටේනර් විවෘත කිරීම පිළිබඳ මෙහෙයුම සමහර මාධ්ය වාර්තා කර ඇත්තේ එය රේගු අධ්යක්ෂ ජෙනරාල් විශ්රාමික මේජර් ජෙනරාල් විජිත රවිප්රියගේ උපදෙස් මත රේගු නිවාරණ අධ්යක්ෂවරයාගේ මෙහෙයවීමෙන් සිදුකළ බවටය. නමුත් ඇත්ත එය නොවේ.
රේගු අධ්යක්ෂ ජෙනරාල්වරයාගේ උපදෙස් මත සිදුකළ කන්ටේනර් විවෘත කිරීමකදී නීති විරෝධී වාහන අත්අඩංගුවට ගැනීමක් ගැන මාධ්ය වාර්තා කර ඇත. එහි ඇත්ත එයමද?
වාහන අමතර කොටස් කියා ආනයනය කරන ලද කන්ටේනර් හතරක තිබූ වාහන කිහිපයක් එම කන්ටේනර් විවෘත කිරීමේදී රේගු නිවාරණ අංශය සොයාගෙන තිබෙන බවට මාධය වාර්තා පලවී තිබේ. මෙම මාධ්ය වාර්තාවල ඇති විශේෂත්වය වන්නේ එම කන්ටේනර් ආනයනය කරන ලද සමාගමේ හෝ එහි හිමිකරුගේ නම සඳහන් නොකරන්නට වගබලා ගැනීමය. ඊට ස්ථීර හේතුව පැහැදිලි නැතත් අනුමාන කළ හැකි හේතුවක් තිබේ. ඒ මෙම හිමිකරු මේ ආකාරයට ආනයනය කරන ලියාපදිංචි නොකරන ලද වාහන මාධ්යවේදීන් හෝ ඒවාහි කර්තෘවරුන් භාවිතා කරන නිසා විය හැකිය. මන්ද මේ ආකාරයට හොරෙන් ගෙන්වා ලියාපදිංචි නොකරන ලද වාහන දේශපාලනඥයින් ඇතුළු විනිසුරුවන් දක්වා සමාජයේ ඉහළ පුද්ගලයින් භාවිතා කරමින් සිටීම ඊට හේතුවය.
ලියුම්කරුගේ දැනුමේ හැටියට මේ ආකාරයට හොර පාරෙන් ආනයනය කර එකලස් කරන ලදැයි කියා විකුණා ඇති, තවම ලියාපදිංචිය කර ගැනීමට නොහැකව ඇති වාහන සංඛ්යාව 100කට අධිකය. මීට පෙර විකුණු එවැනි වාහන වරින්වර ලියාපදිංචි කර ඇතත් එම ලියාපදිංචි කිරීම් සිදුවූයේ දේශපාලනඥයින් හා රජයේ ඉහළ නිළධාරින් එම ආනයනකරු සමඟ නීත්යානුකූල නොවන ආකාරයට අධිකරණයේ එකඟතාවලට ඒමේ ප්රතිඵලයක් වශයෙන්ය. එම එකඟතාවලට අධිකරණයද සමහර අවස්ථාවල අනුමැතිය දීම පුදුම සහගතය.
ඉහත සඳහන් සිද්ධියට සම්බන්ධ වාහන ආනයනකරු මිනුවන්ගොඩ වෙහිකල්ස් ලංකා සමාගමය. එහි හිමිකරු හර්ෂ ප්රභාත්ද සිල්වාය. අප පසුගිය පෙබරවාරි 07 දින ලියූ ‘බොරු අල්ලස බොරු කළ කනකසබේ නඩු තීන්දුව’ නම් ලිපියට අදාල අල්ලස් නඩුවේ රේගු නිවාරණ අංශයේ හිටපු අධ්යක්ෂ කනකසබේ රන්ජන්ට එරෙහිව අල්ලස් චෝදනාවක් නිර්මාණය කළ පුද්ගලයාය.(එම අල්ලස් චෝදනාවෙන් කනකසබේ රන්ජන්ව මහාධිකරණය නිදහස් කළේය)
වාහන එකලස් කිරීම සඳහා යැයි කියමින් භාවිතා කරන ලද වාහන කොටස් ආනයනය කිරීම නීති විරෝධි බවට හා ඒ ආකාරයෙන් වාහන එකලස් කිරීමට ඔහුට නීත්යානුකූල අවසරයක් නැති බවට අධිකරණය මීට පෙර තීරණය කර ඇත. එහෙත් ඒ ආකාරයේ ආනයනයන් නම් නැවතී නැත.
මෙම ලිපියට නිමිත්ත වන SEAU 8660180 “MSKU 1506112″ PONU 7584540” HASU 4411270 කන්ටේනර් 04 රඳවා ගන්නේ 2019 වර්ෂයේ පෙබරවාරියේදීය. එම රඳවා ගැනීමට පෙර එම ආනයනකරුට අයත් කන්ටේනර් 08ක් 2013 දී රඳවා ගන්නා අතර ඉන් 05ක් පරික්ෂා කිරීමකින් තොරව තවමත් රේගු භාරයේ ඇත. එම අවස්ථාවේ රඳවාගත් කන්ටේනර්වලින් 03ක් පමණක් පරික්ෂා කිරීමේදී එවක සිටි රේගු අධ්යක්ෂ ජෙනරාල්වරයා එම පරීක්ෂණ නතර කරන ලෙස නියෝග කර ඇත. අදටත් එම පරික්ෂණ සිදුවී නැත.
මෙම කන්ටේනර් 04 රඳවා ගැනීමේ සිදුවීමට පෙර මෙම ආනයනකරු සම්බන්ධ ආසන්නතම සිදුවීම වශයෙන් වාර්තා වී තිබුනේ රේගුව හා පොලීසියේ වළාන දූෂණ මර්ධන ඒකකය 2017 දෙසැම්බර් 31 දින එම ආනයනකරුගේ වාහන අංගනය වටලා ලියාපදිංචි නොකරන ලද වාහන 54ක් අත්අඩංගුවට ගැනීමය. එම වාහනවලින් 26ක් පරීක්ෂණ සඳහා වැටලීම් කණ්ඩායම රේගු පරිශ්රයන් වෙත ගෙනැවිත් තිබූ අතර ඉතිරි වාහන 28 වෙහිකල්ස් ලංකා අංගනයේම සීල් තබා තිබේ. එහෙත් එම පරික්ෂණ අතර කරන ලද සොයා බැලීමේදී අනාවරණය වී තිබුනේ එම වාහනවලින් 18ක් සීල් කඩා අස්ථාන ගතකර ඇති බවය. මේ සම්බන්ධයෙන් මිනුවන්ගොඩ මහේස්ත්රාත් අධිකරණයට රේගුව හා පොලීසිය කරුණු වාර්තා කර තිබූ අතර මාස හයකට පසු ඒ සම්බන්ධයෙන් තීන්දුවක් ලබාදීමට මහේස්ත්රාත් අධිකරණය නීතිපතිවරයාට යොමුකර ඇතත් මෙතෙක් ඒ සම්බන්ධයෙන් කිසිඳු දැනුම්දීමක් ලැබී නැත. එම නඩුව ඇත්තේ බහා තබාය. ලියාපදිංචි නොකරන ලද එම වාහනවල වටිනාකම රුපියල් මිලියන 270ක් පමණ වේ යැයි කියනු ලැබේ.
මෙම කන්ටේනර් හතර පරික්ෂා කිරීම සඳහා රඳවා ගැනීමෙන් පසු එම පරික්ෂා කිරීම් අවස්ථාවලට සහභාගි වන ලෙස දිගින් දිගටම කරන ලද දැනුම් දීම් ආනයනකරු මඟහැර තිබුණී. මෙම කන්ටේනර් රඳවා ගෙන පරික්ෂා කිරීමට හේතුවී තිබුනේ ඒවා සම්බන්ධයෙන් රේගුවට ලබාදුන් ආනයන ලියවිලිවල වාහන අමතර කොටස් වශයෙන් සඳහන් වීමත්, නැව්භාර පත්රවල වාහන ඇති බවට සඳහන් වීමත් යන හේතුය. ඉන්පසු ආනයනකරුගේ ඉල්ලීම වී තිබුනේ එම කන්ටේනර් ඔහුගේ අංගනයට ගෙන ගොස් විවෘත කිරීමට ඉඩ දෙන ලෙසය. එම ඉල්ලීමම නීති විරෝධි එකකි. මන්ද පරීක්ෂණ සඳහා රඳවා ගත් කන්ටේනර් රේගු පරිශ්ර වලින් පිටත පරික්ෂාවට ලක් නොකිරීම ඊට හේතුවය.
එහෙත් වත්මන් ආණ්ඩුව බලයට පත්වීමෙන් පසු රේගුවේ ප්රධානියා වශයෙන් පත්කරන ලද විශ්රාමික මේජර් ජෙනරාල් විජිත රවිප්රිය ඒවා ආනයනකරුගේ අංගනයට රැගෙන යෑමට අවසර ලබාදෙන අතර එම නීති විරෝධි නියෝගය වළක්වා ගැනීමට හැකිවන්නේ පරික්ෂා කිරීම සඳහා එම කන්ටේනර් රඳවා ගන්නා සහකාර රේගු අධිකාරි ඩබ්ලිව්එම්ආර්පී විජේකෝන් ඊට විරුද්ධව අංක 260/2020 යටතේ ශ්රේෂ්ඨාධිකරණයේ මූලික අයිතිවාසිකම් පෙත්සමක් ගොනු කිරීම මඟින්ය. එම පෙත්සමෙන් පෙන්වාදී තිබුනේ මෙම කන්ටේනර් මුදා හැරීම මඟින් රුපියල් මිලියන ගණනාවක ආදායමක් රජයට අහිමි වන බවය. මුලින්ම එම පෙත්සම 2020 සැප්තැම්බර් 24 කැඳවා ඇති අතර නැවත 2021 ජනවාරි 20 දින කැඳවා ඇත. එම කැඳවුම් දිනවලදී පෙත්සම්කාර පාර්ශවය අධිකරණයට කරුණු ඉදිරිපත් කරමින් සඳහන් කර ඇත්තේ රඳවා ගත් මෙම කන්ටේනර් විවෘත කර ඒ තුළ ඇත්තේ කුමක්දැයි පරික්ෂා කර බැලිය යුතු බවත් එය ප්රමාද කරමින් පවතින බවත්ය.
නමුත් හාස්යයට කාරණය වන්නේ මෙම කන්ටේනර් විවෘත කිරීම පිළිබඳ මෙහෙයුම සමහර මාධ්ය වාර්තා කර ඇත්තේ එය රේගු අධ්යක්ෂ ජෙනරාල් විශ්රාමික මේජර් ජෙනරාල් විජිත රවිප්රියගේ උපදෙස් මත රේගු නිවාරණ අධ්යක්ෂවරයාගේ මෙහෙයවීමෙන් සිදුකළ බවටය. නමුත් ඇත්ත එය නොවේ.
මෙම මුලික අයිතිවාසිකම් පෙත්සම නැවත පෙබරවාරි 11 වැනිදා කැඳවීමට නියමිතව තිබුන අතර ඊට පෙර පෙරවාරි 09 වැනිදා රේගු අධ්යක්ෂ ජෙනරාල්වරයා මෙම කන්ටේනර් විවෘත කරන්නේ අධිකරණයෙන් බේරීම සඳහාය. එහෙත් තවමත් එම කන්ටේනර් තුළ ඇත්තේ හරියටම කුමක්දැයි පරික්ෂා කර බලා ඉන්වෙන්ටි්ර ගතකර නැත. මාධ්ය වාර්තා කර ඇත්තේ එම කන්ටේනර් විවෘත කළ විට බාහිරට පෙනෙන වාහන 09ක් ගැන තොරතුරු පමණය. එම වාහන 09 වටිනාකම රුපියල් මිලියන 200ක් පමණ වේයැයි කියනු ලැබේ. අඩි 40ක දිගකින් යුත් කන්ටේනර් තුළ පිටතට නොපෙනෙන වාහන මෙන්ම තවත් දේ ඇති බවට රේගු නිලධාරින් අනුමාන කරයි. එම අනුමාන තහවුරු කිරීම සඳහා රේගු අධ්යක්ෂ ජෙනරාල් වරයා එම කන්ටේනර් සම්පූර්ණයෙන් පරික්ෂා කරන්නේ කවදාදැයි අපි අවදියෙන් සිටිමු.■
