රටේ මහජනයාගේ ප්‍රශ්නවලට ආණ්ඩුව ගෙනෙන්නේ තාවකාලික සිල්ලර විසඳුම්ය. ඒ විසඳුම්වලින් ප්‍රශ්න විසඳෙන්නේ නැත. සිදු වන්නේ තාවකාලිකව ප්‍රශ්න යටගොස් නැවත උඩ ඒම පමණි.
■ ප්‍රියන්ජිත් ආලෝකබණ්ඩාර
ජාතික ප්‍රතිපත්තියක් හෝ විධිමත් ක්‍රමවේදයක් නොමැතිකමින් රටේ විවිධ ක්ෂේත්‍රයන් තුළ විටින් විට බරපතළ ගැටලු පැන නගින බව අපි දනිමු. ඒවාට දිගු කාලීන, නිශ්චිත, තිරසර විසඳුම් සොයනවා වෙනුවට අපේ රටේ ආණ්ඩු කරන්නේ ඒ වෙලාවට පැලැස්තර විසඳුමක් හඳුන්වා දීමය. ඒ පැලැස්තර විසඳුමට විශාල මාධ්‍ය ප්‍රචාරයක් ලබා දී ජනතාව රැවටීමය. මෑත කාලය වන විට ඒ පැලැස්තර ප්‍රවණතාව ඉහළ ගොස් තිබේ. මේ එවැනි උදාහරණ කිහිපයකි.
තදබදයට හමුදාව
කොළඹ නගරයේ මාර්ග තදබදය හා රිය අනතුරු අවම කිරීමට විසඳුමක් ලෙස හමුදා පොලිස් අංශ යෙදවීමට රජය කටයුතු කළේ 2020 පෙබරවාරි මාසයේදීය. ආණ්ඩුව පෙන්වූ විදියට තදබදයට වගකියන්න ඕනෑ ‘පොලීසියය’. ඊට වඩා සාර්ථක වැඩක් කළ හැකි බව මවා පාමින් හමුදා පොලිස් කණ්ඩායම් යෙදවීය.
මාර්ග අනතුරුවලින් දෛනිකව 8 දෙනෙකු මිය යන බව පවසමින් කාර්යබහුල වේලාවන් වන උදේ හයත් දහයත්, සවස තුනත් හතරත් අතර කාලය තුළ රථවාහන හැසිරවීම සඳහා හමුදා පොලීසිය යොදවා තිබිණි. යුද හමුදා පොලීසිය, නාවික හමුදා පොලීසිය හා ගුවන් හමුදා පොලීසිය මේ සඳහා යොදා ගත්තේය.
මේ පොලිස් අංශ සිවිල් ක්‍රියාකාරීත්වයන්ට ගැළපෙන්නේ නැත. අනෙක් පැත්තෙන් එය නීතියට ගැළපෙන්නේත් නැත. රථවාහන හැසිරවීම සඳහා හමුදා පොලීසිය යෙදවීමට හේතුව වශයෙන් පොලිස් මාධ්‍ය කොට්ඨාසයේ අධ්‍යක්ෂ ජාලිය සේනාරත්න මාධ්‍යට පවසා තිබුණේ රථවාහන පොලිස් නිලධාරීන් 600ක පමණ හිඟයක් පවතින බැවින් මෙවැනි තීරණයක් ගත් බවය. හමුදා පොලීසිය යෙදවීමෙන් යම් අත්දැකීමක් ගන්නට අදහස් කරන බවත් එහි යහපත් ප්‍රතිඵල තිබේ නම් මේ පිළිබඳව බලපාන නෛතික තත්වයන් වෙනස්කිරීමට කටයුතු කරන බවත් ඔහු කීය.
එහෙත් එලෙස මහපාරට යෙදූ හමුදා පොලිස් නිලධාරීන්ට අත්දැකීම් නැතිකම නිසා, දවසක් දෙකක් යද්දී මාර්ග තදබදය තවත් වැඩි විය. අන්තිමේ ඒ හමුදා නිලධාරීන් පැත්තකට වී පොඩි දරුවන් සේ බලා සිටින අතරතුර පොලිසියේ අත්දැකීම් සහිත නිලධාරීන්ම ඒ කටයුත්ත කරන බව පෙනුණි. කොවිඩ්-19 නිසා ඇඳිරි නීතිය තිබූ කාලය අවසන් වෙද්දී, තදබදයට හමුදාව යෙදවීමත් නතර විය.
වී මිල දී ගැනීමට හමුදාව
සහල් මිල ප්‍රශ්නය විසඳීමේ අරමුණින් වී අස්වනු මිලදී ගැනීමට යුද හමුදාව යොදවන්නටත් රජය කටයුතු කළේය. ඒ 2019-2020 මහ කන්නයේ වී අස්වනු මිලදී ගැනීම සඳහාය. විවිධ වංචාවන්ට ගොදුරු නොවී ගොවීන්ගේ අස්වැන්න මිලදී ගැනීම අරමුණු කරමින් මෙසේ වී මිලදී ගැනීමට යුද හමුදා සහාය ලබා ගන්නා ලෙස ජනාධිපතිවරයා බලධාරීන්ට නියෝග කර තිබිණි. යුද හමුදාපතිවරයා ඒ වෙනුවෙන් බි්‍රගේඩියර් අයි.පී. කදනආරච්චි පත් කළේය.
රට ගිලගෙන ඇති සහල් මාෆියාවෙන් රට ගලවා ගැනීම සඳහා ජනාධිපතිවරයා මේ තීරණය ගත් බව හමුදාපතිවරයා පැවසීය. රුපියල් මිලියන 163.4 කට, වී කිලෝ ග්‍රෑම් මිලියන 3.2 ක් මිලදී ගැනීමට යුද හමුදාව වී අලෙවි මණ්ඩලයට සහාය දක්වන බව එදා ආරක්ෂක අමාත්‍යාංශ සඳහන් කළේය.
‘මේ වන විට අපි වී මෙටි්‍රක් ටොන් 25000 ක් මිලට ගෙන ගබඩා කර තිබෙනවා. සුළු හා මධ්‍ය පරිමාණ මෝල් හිමියන් වී මෙටි්‍රක් ටොන් 25000 ක් මිලට ගෙන ගබඩා කර තිබෙනවා. මේවා සහල් කර ගත්තාම ඉදිරි මාස නමයේ රටේ සහල් අවශ්‍යතාව සම්පූර්ණ වෙනවා.’ බි්‍රගේඩියර් කඳනආරච්චි 2020 අප්‍රේල් 27 වන දා පුවත්පතකට පවසා තිබුණි.
හමුදාව ගත් වී කොහේ ගියාදැයි දන්නේ නැත. 2020 අගෝස්තු වන විට සහල් හිඟයක් රට තුළ ඇති වෙන්නට පටන් ගත්තේය. රටේ සහල් මිල ඉහළ ගියේය. අවුරුද්දක් ගත වී 2020-2021 මහ කන්නයේ අස්වනු නෙලන කාලය පැමිණ තිබේ. සහල් කිලෝව රුපියල් 110 ඉක්මවා ගොස් තිබේ. ආණ්ඩුව කියූ සහල් මාෆියාව එසේමය. මෙවර වී මිලදී ගැනීමට හමුදාව යොදවන බවක් පෙනෙන්නට නැත. ඒ ව්‍යාපෘතිය අවසන්ය.
රථවාහන මං තීරු නීතිය
කොළඹ නගරයේ රථවාහන තදබදය අවම කිරීම සඳහා රථවාහන මං තීරු නීතිය පළමුවෙන් හඳුන්වා දුන්නේ පෙරහුරුවක් වශයෙනි. 2020 සැප්තැම්බර් 14 වන සඳුදායින් ආරම්භ වූ සතිය පුරා පෙරහුරුව පැවති අතර 21 වන සඳුදා සිට එය නීතියක් ලෙස ක්‍රියාත්මක කරන බව පොලිස් මූලස්ථානය මාධ්‍ය හමුවක් පවත්වා නිවේදනය කළේය.
හඳුන්වා දුන් රථවාහන මං තීරු නීතියට අනුව පාරේ වම් පස මං තීරුවේ ලංගම හා පුද්ගලික මගී ප්‍රවාහන බස් රථ, ත්‍රී රෝද රථ හා ත්‍රී රෝද රථ ගමන් කළ යුතු විය. නීතියේ අවසන් ඉලක්කය මාර්ග තදබදය අවම කර අනවශ්‍ය ලෙස මහජනයා මහ මග රස්තියාදු නොකර කඩිනමින් සේවා ස්ථාන කරා ළඟා කරවීමත්, සේවා කාලය අවසන් වීමෙන් පසු ඔවුන් කඩිනමින් නිවෙස් වෙත ගෙන යාමත්ය. සිදු වූයේ කාර්, වෑන් හා ජීප් වැනි සුඛෝපභෝගී වාහනවලට නිදහසේ ගමන් කිරීම සඳහා මං තීරු දෙකක් ලැබීමත්, එක මං තීරුවක මගී ප්‍රවාහන බස් රථ, ත්‍රී රෝද රථ හා යතුරු පැදි සිර වී විශාල රථවාහන තදබදයක් නිර්මාණය වීමත්ය. බොහෝ අය එය පන්තිමය වශයෙන් මාර්ගය බෙදා දැක්වීමක් සේ අර්ථකථනය කර තිබිණි. තවත් අතකට මගී ප්‍රවාහන බස් රථවල පැමිණෙන බහුතර ජනයා අපහසුතාවට පත් කිරීමක් විය. අද වන විට මං තීරු නීතිය පිළිබඳ ආණ්ඩුවටත්, පොලීසියටත් වගේ වගක් නැත.
අධිකාරියේ පොල් වළලු තුන
ඉහළ යන පොල් මිල පාලනය සඳහා පාලන මිලක් පනවන්නැයි කෘෂිකර්ම අමාත්‍ය චමල් රාජපක්ෂ ප්‍රකාශ කර තිබිණේ 2020 මාර්තු මාසය අගදීය. වැවිලි කර්මාන්ත අමාත්‍යාංශය විසින් පොල් සඳහා පාලන මිලක් /14 පිටුවට
