පළාත් සභා මැතිවරණය පැරණි ක්‍රමයට පැවැත්විය යුතු බවට ආණ්ඩුවේ නායකයන් එකඟ වී ඇති බවත්, දෙසැම්බර් 14 වැනිදා කැබිනට් මණ්ඩලයට ඉදිරිපත් කරන ලද කැබිනට් පත්‍රිකාවේ තිබුණේ එම ක්‍රමයට මැතිවරණය පැවැත්වීමේ යෝජනාවක් බවත් වාර්තා වේ.
අමාත්‍ය ජනක බණ්ඩාර තෙන්නකෝන් එම කැබිනට් පත්‍රිකාව ඉදිරිපත් කළ අවස්ථාවේ පළාත් සභා මැතිවරණය මේ අවස්ථාවේ පැවැත්වීම නුසුදුසු බවට අදහස් ඉදිරිපත් වී ඇත. පළාත් සභා ක්‍රමයට විරුද්ධ මතයක් දරණ කිහිපදෙනෙකු එයට එරෙහිව අදහස් දක්වා ඇත. පසුව එම කැබිනට් පත්‍රිකාව පක්ෂ නායක රැස්වීමට ඉදිරිපත් කිරීමට එකඟ වී ඇත.
එම කැබිනට් පත්‍රිකාව ඉදිරියේදී නැවතත් කැබිනට් මණ්ඩලයට ඉදිරිපත් කොට සම්මත කරගැනීමට සැලසුම් කර ඇතැයි ආණ්ඩුවේ ආරංචිමාර්ග පැවසීය. එම ආරංචිමාර්ග වැඩිදුරටත් ප්‍රකාශ කළේ, ඉදිරිපත් කළ කැබිනට් පත්‍රිකාව 2018 ඔක්තෝබර් මාසයේදී නීතිවිරෝධී ආණ්ඩුවේ කැබිනට් මණ්ඩලයට ඉදිරිපත් කළ පත්‍රිකාවට බොහෝදුරට සමාන බවය.
පැරණි ක්‍රමයට පළාත් සභා මැතිවරණය පැවැත්වීමේ යෝජනාව සඳහා දිනේෂ් ගුණවර්ධන සහ විමල් වීරවංශ යන අමාත්‍යවරුන් කැමැත්තක් නොදක්වන බව අනිද්දා සමඟ අදහස් දැක් වූ කැබිනට් අමාත්‍යවරයෙකු පැවසීය.
සමානුපාතික පැරණි ක්‍රමයට පළාත් සභා මැතිවරණය පැවැත්වීම සඳහා පළාත් සභා ඡන්ද විමසීම් පනතට තාවකාලික සංශෝධනයක් පාර්ලිමේන්තුවට ඉදිරිපත් කර සම්මත කරගත යුතුය.
වසර දෙකක කාලයක් තිස්සේ පළාත් සභා මැතිවරණය ප්‍රමාද වී තිබෙන අතර, ඒ සඳහා හේතු වී ඇත්තේ කොට්ඨාශ හා සමානුපාතික ක්‍රමය යටතේ පළාත් සභා මැතිවරණය පැවැත්වීම සඳහා ඊට අදාල නීතිය වෙනස් කිරීමෙන් පසු ඒ අනුව සිදු කළ සීමා නිර්ණ වාර්තාව පාර්ලිමේන්තුව ප්‍රතික්ෂේප කිරීම හේතුවෙනි.■
JVP should state its stand on provincial council elections