ඇවන්ගාඞ් පාවෙන අවි ගබඩා ව්‍යාපෘතිය සම්බන්ධයෙන් කොළඹ ත්‍රිපුද්ගල මහාධිකරණය හමුවේ විභාග වන නඩුවක අධිචෝදනා ලබා සිටින විශ්‍රාමික මේජර් ජෙනරාල් පාලිත ප්‍රනාන්දු රාජ්‍ය අමාත්‍යාංශ ලේකම්වරයකු ලෙස ජනාධිපතිවරයා පත්කර තිබේ.
දෙසැම්බර් 11 දින සහිත අංක 2205/15 දරන රාජ්‍ය අමාත්‍යාංශ ලේකම්වරුන් පත්කිරීමේ අතිවිශේෂ ගැසට් පත්‍රය යටතේ ජනාධිපතිවරයා මෙම පත්කිරීම ප්‍රකාශ කර ඇති අතර එම පත්වීම නොවැම්බර් 25 දින සිට ක්‍රියාත්මක වන බව නිවේදනය කර ඇත. වනජීවි රැකවරණ, අලිවැට හා අගල් ඉදිකිරීම ඇතුළු ආරක්ෂිත වැඩපිළිවෙළ හා කැළෑ නැවත වගා කිරීමේ හා වන සම්පත් සංවර්ධන රාජ්‍ය අමාත්‍යාංශයේ ලේකම්වරයා ලෙස මේජර් ජෙනරාල් පාලිත ප්‍රනාන්දු පත්කර තිබේ.
ඇවන්ගාඞ් සමාගමට පාවෙන අවි ගබඩාවක් පවත්වාගෙන යෑමට අවසර ලබාදීම සඳහා රුපියල් මිලියන 35.5ක මුදලක් අල්ලස් වශයෙන් ලබා ගැනීම හා ලබාදීම යන චෝදනා පාලිත ප්‍රනාන්දු හා නිශ්ශංක සේනාධිපතිට එල්ලවී තිබේ.
මීට අදාල කොළඹ ත්‍රිපුද්ගල මහාධිකරණ නඩුව විභාගයට ගැනීම නැවැත්වීම සඳහා අභියාචනාධිකරණය පසුගිය ජුලි 31 වැනිදා තහනම් නියෝගයක් ලබාදුන්නේය.
පාලිත ප්‍රනාන්දු මහතා ජනාධිපති ගෝඨාභය රාජපක්ෂගේ හමුදා පුහුණු කාණ්ඩ සගයෙක් වන අතර මේ වනවිට ශ්‍රී ලංකා මලල ක්‍රීඩා සංගමයේ සභාපතිවරයාද වේ.■
