පුරාවිද්‍යා භූමි විනාශයි, ඉවත් කළ ගව මඩු යළිත් ඉදිකරලා යැයි සඳහන් කරමින් හිරු නාලිකාවේ විකාශය වූ පුවත්වල පසුපස කතාන්දරය කුමක්දැයි අපි සොයා බැලුවෙමු.
■ නිත්‍යා සෙව්වන්දි
හිරුනාලිකාව ‘පුරාවිද්‍යා භූමි විනාශයි. ඉවත් කළ ගවමඩු යළිත් ඉදි කරලා’ යනුවෙන් ප්‍රධාන ප්‍රවෘත්තියක් වාර්තා කළේය. එහි සඳහන් වුණේ ‘සිංහලේ අපි’ සංවිධානයෙන් හාමුදුරුවරු පිරිසක් ජල ගැලුම් නිම්න වනෝද්‍යානය ආශ්‍රිතව ඉඳි කර ඇති ගව මඩු අනවසර ඉදිකිරීමක්යැයි පවසමින් එම ගව මඩු කඩා දමන රූප රාමු කිහිපයකි.
අනතුරුව මෙම ගවමඩු පිළිබඳ හෙළිදරව් කිරීම සම්බන්ධයෙන් එම සංවිධානය හිරු නාලිකාවට ප්‍රශංසාවක් ද කළේය. ඉන් අනතුරුව ගව මඩු ඉවත් කිරීමේ ක්‍රියාවලියට විරෝධය දක්වමින් තඹාල සත්ව නිෂ්පාදන කිරි ගොවි සමිතිය උද්ඝෝෂණයක් ද සිදු කළේය. මෙම ගොවි සමිතිය විසින් පෙන්වා දෙන්නේ පරම්පරා තුනක සිට කිසිදු ගැටලුවකින් තොරව පවත්වාගෙන පැමිණි තඹාල සත්ව නිෂ්පාදන කිරි ගොවි සමිතියේ සාමාජිකයන් 28 දෙනෙකුගේ ගවයින් 1250ක් පමණ තබාගෙන සිටි ගව පට්ටි සියල්ල ඉවත්කර ඇත.
වනජීවී නිලධාරීන් හාමුදුරුවරුන් සමඟ මැදිහත් වී මෙම ගැටලුව ජාතිභේදයක් දක්වා හැරවීමට උත්සහ දරන බවයි. එහෙත් මෙම කිරි ගොවීන්ට මේ මොහොතේ අවශ්‍යව ඇත්තේ තම ගවයින් තබා ගැනීමට සුදුසු ස්ථානයක් ලබා ගැනීමටයි.
මේ පිළිබඳ කළ විමසීමක දී තඹාල කිරි ගොවියෙකු වන නයින මොහොමඞ් පවසා සිටියේ මෙසේය. ‘දැන් අවුරුදු 60ක් 70ක් විතර ඉඳලා ගව ගාලක් හදලා ඒකෙන් තමයි අපි ජීවත් වෙන්නේ. දැන් අවුරුද්දකට විතර කලින් බොදු බල සේනාවෙන් ගලගොඩ අත්තේ ඥානසාර හාමුදුරුවෝ ඇවිල්ලා පුරාවිද්‍යාවට අයිති ඉඩමක ගාල් හදලා තියෙනවා කියලා ගාල් ටික කැඩුවා.
ඊට පස්සේ අපි පොලිසීයෙ පැමිණිල්ලක් දාලා, ආණ්ඩුවටත් කියලා ආපහු ගව ගාල පවත්වාගෙන ගියා. දැන් ආපහු සිංහලේ අපි සංවිධානය කියාගෙන හාමුදුරුවෝයි මිනිස්සු කට්ටියකුයි ඇවිත් ගාල් හදපු තැන් කුඩු කරලා ඒවා ගිනි තියලා ගියා. අපි පොලීසියේ පැමිණිල්ලකුත් දැම්මා ආපහු. අපි ජීවත් වෙන්නේ මේකෙන්.
එළ හරක්, මී හරක් දෙවර්ගයම ඉන්නවා. දැන් අපිට මේ ගවයෝ ටික තියාගන්න තැනක් නෑ. කිරි ටික ගන්න විදිහක් නෑ. එක දවසට කිරි ලීටර් 700ක් විතර ගන්නවා. දැන් මේ මීහරක් පැටව් දාලා ඉන්නේ. උන්ගෙන් කිරි අපි ගන්න ඕනෑ. නැත්තම් ඒ කිරි ඔක්කොම පැටියා බිව්වට පස්සේ. පැටියා පණුවො ගහලා මැරෙනවා. ඒ නිසා අපි කිරි දොවන්න ඕනෑ. ඊට පස්සේ තමයි පැටියා ගානට බොන්නේ. ලංකාපුර මහලේකම් කාර්යාලයෙන් කිව්වා මේ ඉඩමට ගවයෝ දාන්න බෑ කියලා.
හරි කමක් නෑ. ඒක පුරාවිද්‍යා ඉඩමක් නම් කමක් නෑ. සංරක්ෂණය කරන්න අපිත් සහයෝගය දෙන්නම්. අපි ඉල්ලන්නේ දැන් එහෙනම් අපිට කුඹුරුවලට පහලින් කැළේට වෙන්න තියෙන කොටසක් හරි දෙන්න මේ ගවයෝ ටික දාන්න. දැන් අපිට කුඹුරුවලට දාන්නත් බෑ. ගව පට්ටි එකතු වෙලා ඉන්න කිරි ගොවීන්ගේ සංගමය එක්ක අපි නඩාලේ උද්ඝෝෂණයකුත් කරා. අපේ පැටව් ටික බේරගන්න. මේ අවුරුද්දේ නඩුවෙන් කුඹුරු ටික අපෙන් ගත්තා. සුද්දාගෙ කාලේ ඉඳන් හම්බවෙච්ච ඉඩම් මේවා. අපිට ඔප්පු තියෙනවා මේවාට. වනජීවී එකෙන් කියනවා අපිට මේවාට වන්දි ගෙව්වා කියලා.
බොරු කියන්නේ කිසිම වන්දියක් ලැබුණේ නෑ. අපි කාටද මේවා කියන්නේ කියලා තමයි තේරෙන්නේ නැත්තේ.’ යනුවෙනි.
ඔවුන් තමන් සතු ඔප්පු ආදිය පෙන්වීය.
සිය ආදායම් මාර්ගය කඩා අහුරවමින් ගෙන ඇති මේ තීන්දු තීරණ නිසා කිරි ගොවීහු විශාල අපහසුතාවකට මුහුණ දී සිටිති. ඔවුන්ට අවශ්‍යව ඇත්තේ ඉඩම් ලියවා ගැනීමට නොව සිය කර්මාන්තය සඳහා නිශ්චිත ස්ථානයකි. දේශීය කර්මාන්ත අගය කරන මෙවැනි අවදියක පටු දේශපාලන අරමුණු හා වාසි උදෙසා පමණක් ඇතැම් පාර්ශ්වයන් ජාතිවාදය අවුස්සමින් ක්‍රියාකරන බව පැහැදිලි වේ.■
