මත්ද්‍රව්‍ය මර්දනය සම්බන්ධයෙන් හිටපු ජනාධිපතිවරයා විශාල කීර්තියක් අත්කරගෙන සිටි බවත් පාස්කු ප්‍රහාරයෙන් පසු නැවත තරග කරන්න බැරි තත්වයකට පත්වී ඔහුට ගෙදර යෑමට සිදුවූ බවත්, ඔහු ඉවත් කර එම තනතුරට තව කෙනෙකු පත් කිරීමට වුවමනාව තිබ්බේ කාටද යන්න සොයා බැලිය යුතු බවත් රාජ්‍ය අමාත්‍ය දයාසිරි ජයසේකර පාස්කු ප්‍රහාරය සම්බන්ධයෙන් සොයාබලන කොමිසම හමුවේ ප්‍රකාශ කර ඇත.
මෙම පැහැදිලි කිරීම ඔහු කර ඇත්තේ ටාජ් සමුද්‍රා හෝටලයට ගිය මරාගෙන මැරෙන බෝම්බකරුවා එය පුපුරුවා නොගත්තේ එහි සිටි ප්‍රභූන් පිරිසක් නිසාද යන්න ගැන දයාසිරි ජයසේකර මහතා මීට පෙර කර තිබූ ප්‍රකාශයක් සම්බන්ධයෙන් කොමිසම ප්‍රශ්න කළ අවස්ථාවේදීය. ඔහු එහිදී කියා ඇත්තේ ටාජ් සමුද්‍රා හෝටලය විශේෂ හෝටලයක් බවත් එහි අයිතිය ඇත්තේ ඉන්දියානු ව්‍යාපාරිකයන්ට බවත්ය.
හිටි හැටියේ නාමල් කුමාර කෙනෙක් මතුවූ බවත්, හිටපු ජනාධිපතිවරයා සහ ජනාධිපතිවරණයට එයි කියා හිතූ අපේක්ෂකයා ඝාතනය කිරීමේ කුමන්ත්‍රණයක් ගැන ඔහු කියූ බවත්, එයින් රට තුළ අවිනිශ්චිත තත්වයක් මතුවූ බවත්, සෙවිය යුත්තේ ඒ ගැන බවත් ඔහු කියා ඇත.
රටේ බුද්ධි අංශ දන්නේ නැති පාස්කු ප්‍රහාරය ගැන විදේශ බුද්ධි අංශ දැනගෙන සිටි බවත්, ප්‍රහාරයේ දින වකවානු හා ප්‍රහාරය එල්ල කරන ස්ථාන පිළිබඳ ඔවුන් කීවේ කොහොමද යන්න ප්‍රශ්න කර ඇති ජයසේකර මහතා ප්‍රහාරය ගැන අපි දන්නේ ඉන්දියාවෙන් බවද කියා ඇත.
දයාසිරි ජයසේකර මහතා කියා ඇති එම කරුණු ඉතා වැදගත් බව බැලූබැල්මට පෙනේ. මන්ද පාස්කු ප්‍රහාර කොමිසම හෝ එම ප්‍රහාරය සම්බන්ධයෙන් පරීක්ෂණ පැවැත්වූ කණ්ඩායම් මෙම කරුණු ගැන මෙතෙක් අවධානය යොමුකර හෝ පරීක්ෂණ කර ඇති බවක් වාර්තා වන්නේ නැති නිසාය.
එමෙන්ම කටුවාපිටියේ මරාගෙන මැරෙන ප්‍රහාරකයා වූ හස්තුන්ගේ බිරිඳ පුලස්තිනී හෙවත් සාරා සයින්දමරුදු ප්‍රහාරක ස්ථානයේ සිට දිවි ගලවාගත්තේ කෙසේද යන්නත්, ඉන්පසු ඇයට සිදුවූයේ කුමක්ද යන්නත්, රෝ සංවිධානය ඇය ඉන්දියාවට ගෙනගොස් ඇති බවට වන කතාවත් පරීක්ෂණයට ලක්විය යුතුය.
එම කරුණු ගැන පරික්ෂණ කළහොත් එම ප්‍රහාරය පිටුපස සිටියේ කවුරුන්ද යන්න පිළිබඳ වඩා වැදගත් තොරතුරු සොයාගත හැකි අතර පාස්කු ප්‍රහාරය පසුපස සිටියේ කවුරුන්ද යන්න සොයන ලෙස දැඩි මතයක් පළකරන කාදිනල් හිමියන්ද මෙම කරුණු ගැන පරීක්ෂණ කරන ලෙස හා ඒවා අධිකරණයට වාර්තා කරන ලෙස ආණ්ඩුවට බලකළ යුතුය.■
