■ පවිත්‍රා රූපසිංහ
කොවිඞ් ආසාදිතයින්ගේ පීසීආර් ප්‍රථිඵල නාම ලේඛනවල, බොහෝ අවස්ථාවලදී ‘රෝගියාගේ පදිංචිය’ සඳහන් නොවී ‘නම’ පමණක් සඳහන් වීම ඉතාමත් භයානක තත්ත්වයක් බව රජයේ වෛද්‍ය නිළධාරීන්ගේ සංගමයේ ලේකම් වෛද්‍ය හරිත අලුත්ගේ පැවසීය.
ඊට හේතුව සෞඛ්‍ය අමාත්‍යාංශය ආසාදිතයින්ගේ තොරතුරු ලබා ගැනීම සඳහා අවශ්‍ය දත්ත පත්‍රිකාවක් හෝ මේ දක්වා සකසා නැති වීම බව ඔහු තවදුරටත් පැවසීය.
සෞඛ්‍ය අමාත්‍යාංශයට රෝගීන් පරීක්ෂා කිරීමේදී තොරතුරු පත්‍රිකාවක් භාවිත කරන ලෙසත්, ප්‍රදේශයේ ග්‍රාම නිළධාරීවරයාගේ සේවය ඒ අවස්ථාවේ යොදා ගන්නා ලෙසත්, රජයේ වෛද්‍ය නිළධාරී සංගමය යෝජනා කර තිබුණද, එය සෞඛ්‍ය අමාත්‍යාංශය විසින් නියමාකාරව ක්‍රියාත්මක නොකරන බව වෛද්‍ය අලුත්ගේ අනිද්දා කළ විමසීමකට පිළිතුරු දෙමින් පැවසීය. මේ තත්ත්වය තුළ ඉදිරියේදී රෝගීන් නිවෙස් තුළම මියයාමට අවස්ථාව ඇති බවත්, රෝගය පැතිරීමේ වේගය වැඩි වන බවත් ඔහු අවධාරණය කළේය.■
