දිවිනැගුම දෙපාර්තමේන්තුවේ මුදල් සාවද්‍ය පරිහරණය සම්බන්ධයෙන් චෝදනා එල්ලවී තිබූ හිටපු ආර්ථික සංවර්ධන අමාත්‍ය බැසිල් රාජපක්ෂ ඇතුලු විත්තිකරුවන් සිව්දෙනෙකු නිදොස්කොට නිදහස් කර තිබේ.
විත්තිකරුවන්ට එරෙහි චෝදනා සාධාරණ සැකයකින් ඔබ්බට ඔප්පු කිරීමට පැමිණිල්ල අසමත්වී ඇති බව පවසමින් කොළඹ වාණිජ මහාධිකරණ විනිසුරු ආර් ගුරුසිංහ නොවැම්බර් 30 වැනිදා එම නිදහස් කිරීම සිදු කර තිබුණි.
දිවි නැගුම දෙපාර්තමේන්තුවට අයත් රුපියල් මිලියන 2992කට අධික මුදලක් 2015 ජනාධිපතිවරණය සමයේ නිවාස ආධාර බෙදාදීම ඔවුන්ට විරුද්ධ චෝදනාව විය.
එම නඩුවේ සෙසු විත්තිකරුවන් වූයේ දිවි නැගුම දෙපාර්තමේන්තුවේ හිටපු අධ්‍යක්ෂ ජෙනරාල් කිත්සිරි රණවක, එම දෙපාර්තමේන්තුවේ හිටපු නියෝජ්‍ය අධ්‍යක්ෂ ජෙනරාල් බන්දුල තිලකසිරි හා ආර්ථික සංවර්ධන අමාත්‍යාංශයේ හිටපු ලේකම් වෛද්‍ය නිහාල් ජයතිලකය.
මෙම තීන්දුවට පෙර සතියේ 2015 ජනාධිපතිවරණ සමයටම අදාල සිදුවීමක් සම්බන්ධයෙන් තවත් තීන්දුවක් ප්‍රකාශයට පත්විය. ශ්‍රී ලංකා විදුලි සංදේශ කොමිෂන් සභාවේ හිටපු සභාපති ලලිත් වීරතුංග හා එහි අධ්‍යක්ෂ ජෙනරාල් අනූෂ පැල්පිට ඔවුන්ට නියමකර තිබූ සිරදඬුවමෙන් අභියාචනාධිකරණය නිදහස් කිරීමය.
ඔවුන්ට එරෙහි චෝදනාව වූයේ රුපියල් මිලියන 600ක මුදලක් 2015 ජනාධිපතිවරණ සමයේ සිල් රෙදි බෙදාදීම සඳහා සාවද්‍ය ලෙස පරිහරණය කිරීමය.
මේ ආකාරයට මෙම ආණ්ඩුවට සම්බන්ධයක් තිබූ විත්තිකරුවන් හා සැකකරුවන් චෝදනාවලින් නිදොස්කොට නිදහස්වීම, දඬුවමෙන් මුදා හැරීම, විදෙස් ගමන් තහනම් ඉවත්වීම ආදිය ඇත්ත වූවත් රසවත් ප්‍රබන්ධයක් මෙන් එකට ඇමිණී සිදුවේ.
අපරාධ චෝදනා සම්බන්ධයෙන් නීතිපතිවරයා නඩු පවරන්නේ ඒ පිළිබඳ ප්‍රමාණවත් සාක්ෂි ඇති නිසාය. නැත්නම් ලලිත් වීරතුංග හා අනූෂ පැල්පිට මහාධිකරණයේදී වරදකරුවන් වන්නේ නැත. බැසිල් රාජපක්ෂ ඇතුලු විත්තිකරුවන්ට එරෙහිව නඩු පවරන්නේ නැත. රජයේ සාක්ෂිකරුවන් සිය සාක්ෂි පසුව වෙනස් කිරීම මත නඩුවලින් පුද්ගලයන් නිදහස් විය හැක. එහෙත් ලලිත් වීරතුංග නඩුව හෝ බැසිල් රාජපක්ෂ නඩුව එවැනි අවස්ථා නොවේ. ඒ නිසා නීතිපතිවරයාට අවිශ්වාසයකින් තොරව එම නඩු යළි පැවරීම හෝ තීන්දු ඇපිල් කිරීම කළ හැකිය. මේ ආකාරයේ තවත් නඩුද තිබේ. එහෙත් නීතිපතිවරයා ඒ සම්බන්ධයෙන් කටයුතු කරන පාටක් පෙනෙන්නට නැත. ඔහුගේ මාධ්‍ය ප්‍රකාශිකාව ඒ සම්බන්ධයෙන් තවම මාධ්‍යයට කිසිවක් කියා නැත. ඒ වෙනුවට විවිධ සිදුවීම් සම්බන්ධයෙන් වාර්තා කැඳවීම, විමර්ශන සිදුකිරීමට උපදෙස් දීම වැනි දේවල් අපට අසන්නට ලැබේ. එම උපදෙස් ලබාදීම්වලදීත් තරාතිරම අනුව පොලීසිය නීතිපතිවරයාට වාර්තා ලබාදීම හා විමර්ශන කිරීම් සිදුකරන බව පෙනේ.
ඉහත සඳහන් කළ හා නොකළ තම නඩු වෙනුවෙන් සහ උපදෙස් ලබාදීම් හා වාර්තා කැඳවීම් සම්බන්ධයෙන් නීතිපතිවරයා තරාතිරම නොබලා පෙනී සිටිය යුතු වූවත් එසේ පෙනී සිටින බවක් පෙනෙන්නේ නැත.■
