දියවන්නාවේ මාළු අල්ලමින් සිටි බුත්ගමුව, ඇළ ඉවුර පාරේ රාජේන්ද්‍රන් රවීන්ද්‍රන්ගේ මරණය පිළිබඳව නොවැම්බර් 22 වනදා අනිද්දා පුවත්පතට අපි ලීවෙමු. මේ ඊට පෙර මිය ගිය දියවන්නාවේ මාළු අල්ලමින් සිටි ලෝරන්ස්ගේ කතාවය. මෙය ඔහුගේ හිතවතුන් හා අසල්වැසියන්ගේ අත්දැකීම් ඇසුරෙනි. ඔහු මිය ගියේ හරියටම රාජේන්ද්‍රන්ගේ මරණයට මාස 9 කට පෙරය. ලෝරන්ස්ද රාජෙන්ද්‍රන්ලාගේ අසල්වැසියෙකි.
■ ප්‍රියන්ජිත් ආලෝකබණ්ඩාර
වයස අවුරුදු 35 ක් වූ සෙල්වනායගම් ලෝරන්ස් දරුවන් දෙදෙනෙකුගේ පියෙකි. ලෝරන්ස්ලාගේ කුඩා නිවස පිහිටා තිබෙන්නේ බුත්ගමුව පාලම යටය. දියවනාව අසබඩය. ඔහු මාළු අල්ලන්නට යන්නේ රාජා සමගය. රාජාගේ කුඩා නිවෙස තිබෙන්නේ ඔයේ අනික් ඉවුරේය.
පෙබරවාරි 9 වන දා උදේ 10 ට පමණ ලෝරන්ස් හා රාජා ඔරුවේ නැගී බුත්ගමුව පාලම යටින් වෝටර්ස් එජ් හෝටලය පැත්තට ඔරුව පැද්දේ සුපුරුදු පරිදි මාළු අල්ලන්නටය. වෝටර්ස් එජ් හෝටලයේ ආරක්ෂක අංශයේ මහත්තුරුත්, ආරක්ෂක අංශවල මහත්තුරුත් ලෝරන්ස්ලාට කියා තිබෙන්නේ දියවන්නාවේ මාළු අල්ලනවා නම් රාත්‍රී 12න් පසු අල්ලා එළිය වැටෙන විට අවසන්කරන ලෙසය. ලෝරන්ස්ලා දියවන්නාවේ මාළු ඇල්ලුවේ වෝටර්ස් එජ් හෝටලය දියවන්නාව අසබඩට එන්නටත් කලියෙනි. රාත්‍රියේ දියවන්නාවේ මාළු බෑම අන්තරායකර නිසා ලෝරන්ස්ලා මාළු අල්ලන්නට රුචි වූයේ උදෑසනටය. ලෝරන්ස් හා රාජා ඔය මැද ඔරුව නවත්වා දැල එලන්නට පටන් ගත්තේය. අවුරුදු 52 ක් වන රත්නම් රාජගෝපාල් ඇන්ටනී නැත්නම් රාජා එදින මුහුණ දුන් සිද්ධිය විස්තර කළේ මෙසේය.
‘ඔතැන දැල් දාන්න එපා’ කියලා වෝටර්ස් එජ් එකේ සිකුරිටි කෙනෙක් අපට කිව්වා. අපි දැල අරගෙන තව මෙහාට ආවා. ඇවිත් ආයෙත් දැල දාලා පැන්නිලි දෙකයි පැන්නුවේ, ප්ලාස්ටික් කෑන්වලින් හදලා මෝටරයක් හයි කරපු බෝට්ටුවේ පොලිස්කාරයා තවත් කීප දෙනෙක් එක්ක අපේ ඔරුව පැත්තට ආවා. අපේ ඔරුවට කොක්කක් දාලා අපිව ඇඳලා ගත්තා. අපි දෙන්නා වතුරට පැන්නා. ‘සර් දැලයි ඔරුවයි මගේ’ කියලා වතුරේ ඉඳගෙන ලෝරන්ස් කිව්වා. ‘උඹේ දැලයි, ඔරුවයි ඕන නම් නැගපන්’ කියලා පොලිස්කාරයා කිව්වා. ලෝරන්ස් ආයෙත් ඔරුවට නැග්ගා. මම පීනාගෙන ගිහින් ඔයේ අනෙක් පැත්තට ගොඩවෙලා, කැලෙන් රිංගලා වත්ත පැත්තට ආවා. මම බය වුණා මාවත් පොලිසියෙන් අල්ල ගනීවි කියලා. හවස ලෝරස්ගේ ගෙදර අය ඇවිත් ‘ලෝරන්ස් කෝ?’ කියලා මගෙන් ඇහුවා. මම කිව්වා ‘පොලිසියෙන් ඇල්ලුවා පොලිසියේ ඇති’ කියලා. ඒ අය ගිහින් පොලිසියෙන් ඇහුවහම ‘එහෙම කාවත් අල්ලන් ආවේ නෑ’ කියලා පොලිසියෙන් කිව්වා.”
එතැන් සිට හැමෝම එක් වී ලෝරන්ස්ව සොයන්නට පටන් ගත්තේය. වත්තේ අනෙක් ඔරුවල නැගී ලෝරන්ස් අවසන්වරට දැල් එලමින් සිටි ස්ථානයට ගොස් බැලුවේය. වෝටර්ස් එජ් හෝටලයේ ආරක්ෂක නිලධාරීන්ගෙන් ලෝරන්ස් ගැන ඇසුවේය. ඔහු අත්අඩංගුවට ගත් පොලිස් නිලධාරියා ඇතුලු හැමෝම කීවේ ලෝරන්ස් හා රාජා ගඟෙන් එගොඩ වී යන්නට ගිය බවය. ඉන් පසු පොලිසියට බයේ කැලේ හැංගිලා ඉන්නවාදැයි ඔය ඉවුර දෙපස කැලේ පීරා බැලුවේය. හොඩුවාවක් හමු වූයේ නැත. ඇතැම්හු ලෝරන්ස්ට කරදරයක් කරන්නට ඇතැයි සිතා රාජා සැක කළේය. රාජාට තරවටු කළේය.
ලෝරන්ස්ගේ බිරිඳ වයස 31 ක් වන එස්. සුභාෂිනීය. ‘අපිට අවුරුදු 12 හා 4 ක පිරිමි ළමයි දෙන්නෙක් ඉන්නවා.’ ඇය කීවේ දරුවන් දෙදෙනා තුරුලු කරගනිමිනි.
“මම බොරැල්ලේ වැඩට ගිහින් හිටියේ. හවස 5.30 ට විතර ලෝරන්ස්ගේ අම්මා මට කෝල් එකක් දීලා කිව්වා ‘ලෝරන්ස්ව පොලිසියෙන් අලලලා’ කියලා. මම එන ගමන් රාජගිරියේ පොලිසියට ගිහිල්ලා බැලුවා. එයාගේ දැලයි ඔරුවයි පොලිසියේ තිබ්බා. ‘අපි බෝට්ටුවයි දැලයි ගෙනාව, ඒ දෙන්නා පැනලා ගියා’ කියලා පොලිසියෙන් මට කිව්වා. ඊට පස්සේ මමයි ලෝරන්ස්ගේ අම්මයි, රාජායි වෝටස් එජ් එක ළඟට ගිහින් හෙව්වා. වෝටර්ස් එජ් එක ළඟ හිටිය පොලිස්සියේ කෙනා බය වෙලා වගේ හිටියේ. ‘පොලිසියේ ගිහිල්ලා බලන්න. මෙහේ මොනවද හොයන්නේ’ කියලා අපට සැර කළා. ලෝරන්ස්ව හැම තැනම හොයලා නැති නිසා රෑ 10 ට විතර අපි ආයෙත් වැලිකඩ පොලිසියට ආවා. ‘ඔරුවයි දැලයි කාගෙද?’ කියලා පොලිසියෙන් ඇහුවා. ‘මගේ මහත්තයාගේ’ කියලා මම කිව්වා. ‘ඒ පැත්තට යන්ඩ තහනම්නේ මොකටද ගියේ නඩු දානවා’ කියලා පොලිසියේ කෙනා කිව්වා. ‘නඩු දැම්මට කමක් නෑ සර් මගේ මහත්තයාව දෙන්න’ කියලා මම කිව්වා. ඊට පස්සේ මගේ මහත්තයා නෑ කියලා මම පැමිණිල්ලක් දැම්මා. පහුවදා පාන්දර පොලිසියෙන් මෙහාට ආවා. මගෙන් ඇහුවා ‘මහත්තයා ගැන මොනවත් ආරංචියක් තියෙනවද?’ කියලා. මම නෑ කිව්වා. ‘එහෙනම් නෑදෑයෝ කවුරු හරි එන්න වෝටර්ස් එජ් එකේ සීසී ටීවී චෙක් කරන්න’ කියලා ඕ.අයි.සී. කිව්වා.”
පොලිස් නිලධාරියෙකු මුල් වී අත්අඩංගුවට ගත් පුද්ගලයෙකුගේ ජීවිතය සම්බන්ධයෙන් සම්පූර්ණ වගකීම ඇත්තේ පොලිසියටය. අත්අඩංගුවට පත් පුද්ගලයා අතුරුදන් වූ පසු ඔහුට සිදු වූයේ කුමක්දැයි තමන් දන්නේ නැති බව කියන්නට පොලීසියට හැකියාවක් නැත. වෝටර්ස් එජ් හෝටලයේ ආරක්ෂක කැමරා පද්ධතිය පරීක්ෂා කිරීමට පොලිසිය සමග වොටර්ස් එජ් හොටලයට ගියේ රාජාත් ලෝරන්ස්ගේ මාමා කෙනෙකු වන සෙබස්කතියන් හා ඔහුගේ පුතාත්ය. අරක්ෂිත කැමරාවල සටහන්ව තිබූ දේ පිළිබඳව ලෝරන්ස්ගේ මාමා වන ඉලියනාදන් සෙබස්තියන් විස්තර කළේ මෙසේය.
“බෝට්ටුවේ නිල ඇඳුමින් සැරසුනු පොලිසියේ නිලධාරියා එක්ක හෝටලයේ සිකුරිටි එකේ කිහිප දෙකේ හිටියා. ඒ අය ලෝරන්ස්ව අත්අඩංගුවට ගන්නවා. ලෝරන්ස්ව ගොඩට අරන් ගිහින් වාඩි කරලා සෑහෙන වෙලාවක් තියාගෙන ඉන්නවා. එතන දහයකට වැඩිය සෙනග ඉන්නවා. පස්සේ තව ටිකක් පිට්ටනිය මැදට ලෝරන්ස්ව එක්කගෙන යනවා. එතන ඉන්න ඩ්‍රයිවර් කෙනෙකුට ලෝරන්ස්ව බාර දීලා බලාගන්න කියලා අනෙක් අය යනවා. ‘මුත්‍රා කරන්න යන්න ඕනෑ’ කියලා ලෝරන්ස් එතන හිටපු කෙනාගෙන් අහනවා. ඒත් එතන හිටිය කෙනා ‘බෑ’ කියනවා. ඩ්‍රයිවර් අහක බලපු වෙලාවක ලෝරන්ස් දියවන්නාවට බැහැලා පීනලා එහා පැත්තට යන්න යනවා. එහා ඉවුරට අඩි 10 ක් විතර තියෙද්දි ලෝරන්ස් දියේ ගිලෙනවා. ආයේ උඩ එනවා. තුන්වෙනිපාර යට ගිය ලෝරන්ස් ආයේ උඩ ආවේ නෑ. එතකොට වෙලාව උදේ 11.55 යි.
ලෝරන්ස් ගිලෙනවා ඒ අය බලාගෙන ඉන්නවා. ඒ අයට ඕනෑ නම් ලෝරන්ස් බේරා ගන්න තිබුණා. මොටර් බෝට්ටුවත් එතන තිබුණා. මළු අල්ලනවා කියලා බොට්ටුවෙන් ඇවිල්ලා අල්ලන්න පුළුවන් නම් මේ වෙලාවේ ලෝරන්ස් බේර ගන්න තිබුණා. අනික ඒ අය අත්අඩංගුවට ගත්ත කෙනානේ?”
සෙබස්තියන් පවසන ආකාරයට ආරක්ෂිත කැමරා පද්ධතියේ දුටු දර්ශන අනුව ලෝරන්ස් වතුරට බැස එගොඩට පීනා යන්නට සැරසෙන විට වෝටස් එජ් හෝටලයේ ආරක්ෂකයින් ‘පැන්නා පැන්නා’ කියමින් ඔය ඉවුරට දිව ගොස් තිබේ. ගැටළුව ඇත්තේ එතැනය. තමන් අත්අඩංගුවට ගත් පුද්ගලයා දියේ ගිලෙන්නට ඉඩ හැර ඔහුට නිසි දඬවම ලැබුණා කියා හෝටලයේ ආරක්ෂකයින් සතුටු වූයේද? ලෝරන්ස් දියේ ගිලුණු බව පොලීසියට දැනුම් දේනනට ඔවුන් කටයුතු නොකළේද? නැත්නම් මේ සිද්ධියට සම්බන්ද පොලිස් නිලධාරියා කිසිවක් නොදුටු සේ සිටින්නට ඔවුන්ට උපදෙස් දුන්නේද කියා අප දන්නේ නැත. සමහර විට කිඹුලන් සිටින දියවන්නාවේ ගිලුණු ලෝරන්ස්ගේ සිරුර යළි ගොඩ නොඑනු ඇතැයි ඔවුන් සිතුවා ද විය හැකිය. කෙසේ හෝ ලෝරන්ස්ගේ අම්මා හා ඥාතීන් පැමිණ ලෝරන්ස් ගැන විමසද්දී වෝටර්ස් එජ් හෝටලයේ අදාල පුදගලයින් රැක්කේ ගොළුවතමය. පනස් දෙහැවිරිදි ඉලියනාදන් පාතිමා ජානිගේ අම්මාය.
“අපි පොලිසියේ ඉඳන් හෝටලේට ආවා. හෝටලේ එතන හිටිය අයගෙන් ඇහුවා ‘මගේ පුතා කෝ’ කියලා. එතකොටත් ඒ අය කීවේ ‘ඒ දෙන්නා පැනලා ගියා’ කියලා. ඒත් අපි කිව්වා ‘පැනලා ගියානම් ගෙදර එන්න එපැයි’ කියලා. අපි ආයෙත් පොලිසියේ බලලා ආයෙත් හෝටලේට ආවා. එයා ගිලුනා කියලා හොඳට දැනගෙනත් ඒ අය කීවේ නෑ. අපි පාන්දර තුන වෙනකන් හෙව්වා. ලෝරන්ස්ව අල්ලන් ඉන්නවා දැකපු එක්කෙනෙක් කිව්වා එතන හිටි කෙනෙක් ලෝරන්ස්ගේ ඔළුවට ගහනවා දැක්කා කියලා. පාන්දර මම සාත්තරයක් බලන්ඩත් ගියා. උදේ කැමරා බලලා මිනිය ගෙඩ ගත්තා.”
ලෝරන්ස්ගේ මරණය සම්බන්ද නඩුව කැඳවා තිබුණේ මාර්තු 15 වන දාය. ඒ අලුත්කඬේ උසාවියේදීය. ලෝරන්ස්ගේ බිරිඳ මහේෂිකාත්, රාජාත්, ලෝරන්ස්ගේ මාමා සෙබස්තියනුත් අලුත් කඬේ උසාවියේ පෙනී සිටියේය. රාජාගෙන් සාක්ෂි විමසුවේය. වෝටර්ස් එජ් හෝටලයේ කිසිවෙක් නඩුවට පැමිණ සිටියේ නැත. ඊ ළඟ නඩු වාරයේදී වෝටස් එජ් හෝටලයේ අදාල පුද්ගලයින් හා ආරක්ෂිත කැමරා පද්ධතියේ දර්ශන ඉදිරිපත් කරන්නැයි අධිකරණය දන්වා තිබේ. කොවිඞ් 19 තත්වය නිසා ඒ කටයුතු ප්‍රමාද වී තිබෙන බව ලෝරන්ස්ගේ බිරිඳ මහේෂිකා පවසයි.
දශක ගණනක් තිස්සේ දියවන්නාවෙන් මාළුවෙක් අල්ලාගෙන විකුණා තම අඹු දරුවන් පොෂණය කරමින් සිටින මේ කුඩා මිනිසුන් බලා සිටියදීම දියවන්නාවේ එක් එක් කොටස් බලවතුන් අයිති කර ගත්තේය. කඩදාසිවල අත්සන් තබා ලබා ගන්නා ඒ අයිතිය ගැන මේ කුඩා මිනිසුන්ට වැටහීමක් ඇත්තේ නැත. තමන්ගේ ප්‍රජාවේ එකා දෙන්නා අදිසි බලවේග බිලි ගන්නා බව පමණය. තම කුඩා පැල්පත් අභිබවා අහස සිඹින සුපිරි මහල් නිවාස ඉදි වෙද්දී, හෝටල් ඉදි වෙද්දී තමන්ගේ ජීවිත දියවන්නාවේම ගිලී නිසල වී යමින් තිබෙන බව පමණය.■
