පාස්කු ඉරිදා මරාගෙන මැරෙන ප්‍රහාරය එල්ල කළ කණ්ඩායමේ නායකයා ලෙස හඳුනාගත් සහරාන් හසීම්ට ඉහළින් සිටින පුද්ගලයන් පිළිබඳව අනාවරණය කරගන්නා තෙක් රටේ ආරක්ෂාව පිළිබඳ සහතික කළ නොහැකි බව අපරාධ පරීක්ෂණ දෙපාර්තමේන්තුව බාර හිටපු ජ්‍යේෂ්ඨ නියෝජ්‍ය පොලිස්පති රවී සෙනෙවිරත්න ප්‍රකාශ කර ඇත.
ඔහු එම ප්‍රකාශය කර ඇත්තේ පාස්කු ඉරුදින ප්‍රහාරය සම්බන්ධයෙන් විමර්ශනය කරන ජනාධිපති කොමිසම හමුවේදීය.
සහරාන්ට ඉහළින් ඉන්නේ කවුරුන්ද යන්න පිළිබඳ යම් සැකයක් තිබුණාද යන්න කොමිසම විමසූ අවස්ථාවේදී ඒ ගැන තමන්ට අදහසක් තිබුණ බවත්, එය තහවුරු කර ගැනීමට බැරිවූ බවත් විශ්‍රාම යෑමට පෙර එය අවසන් කිරීමට බලාපොරොත්තු වූ බවත් රවී සෙනෙවිරත්න මහතා ප්‍රකාශ කර ඇත.
සාක්කි දුන් අවස්ථාවේදී රජයේ නීතිඥයා පුද්ගලයකුගේ නමක් සටහන් කළ කොළයක් සාක්කිකාර රවී සෙනෙවිරත්න මහතාට ඉදිරිපත් කළ බවත් සහරාන්ට ඉහළින් සිටින පුද්ගලයා එම පුද්ගලයා විය හැකි බවට සැකකළ බවට සෙනෙවිරත්න මහතා ප්‍රකාශ කළ බවත් ඒ සම්බන්ධයෙන් මාධ්‍ය වාර්තා කර ඇත. එසේම එම පුද්ගලයා සහරාන් සමඟ කටයුතු කර ඇති බවට තොරතුරු තිබූ බවද සෙනෙවිරත්න මහතා එහිදී ප්‍රකාශ කර ඇත. එසේම සහරාන්ගේ කණ්ඩායමේ සිටි සියලුම පුද්ගලයන් අත්අඩංගුවට ගෙන ඇති බවද ඔහු වැඩිදුරටත් කියා ඇත.
පාස්කු ඉරුදින ප්‍රහාර අසාර්ථක වන පුද්ගලයන් කැඳවාගෙන යෑමට පුද්ගලයකු යොදවා සිටි බවත් ඔහු අත්අඩංගුවට ගෙන තිබෙන බවත් කියමින් එම පුද්ගලයාගේ නම කොළයක සටහන් කර සෙනෙවිරත්න මහතා කොමිසමට ඉදිරිපත් කර ඇත. මාධ්‍ය ඉවත්කර එම පුද්ගලයා ගැන සාක්ෂි විමසීම ඉන්පසු සිදුකර ඇත.
එම විමර්ශකයන් සොයාගත් ඇත්ත ඉන් ඉදිරියට නොගොස් අද වැළලී යන තත්වයට පත්වී ඇති බවක් පෙනේ. නමුත් එම සාර්ථක නිලධාරීන් මේ වනවිට වත්මන් ආණ්ඩුව සීඅයිඩීයෙන් එළවා දමා තිබේ. එම විමර්ශන ප්‍රධානියා වූ ශානි අබේසේකර රිමාන්ඞ් භාරයට පත්කර පළිගනිමින් සිටී.
පාස්කු ඉරුදින ප්‍රහාරය සම්බන්ධයෙන් ඇත්ත හොයා ගැනීමේ සැබැ වුවමනාවක් තිබේ නම් මෙවැනි දේ සිදුවිය නොහැකිය. එම කොමිසම හමුවේදීම නැගෙනහිර පළාත බාරව කටයුතු කළ විශ්‍රාමික නියෝජ්‍ය පොලිස්පතිවරයකු වූ එඩිසන් ගුණතිලක කියා ඇත්තේ ජිහාඞ් මතධාරි මුස්ලිම් සංවිධාන 18කට ඔවුන් සතු අවිආයුධ බාරදෙන ලෙස 2009 වර්ෂයේදී දැනුම් දුන්නත් නැගෙනහිර පළාත් හිටපු ආණ්ඩුකාර එම්එල්ඒඑම් හිස්බුල්ලා ඔවුන්ගේ කණ්ඩායම සතු අවි බාර නොදුන් බවයි.
මෙම කරුණ අපට සිහි ගන්වන්නේ අයිඑස්අයිඑස් සංවිධානය සම්බන්ධයෙන් ඇමරිකාවට එල්ලවන චෝදනාවය. සිය වුවමනාව වෙනුවෙන් අයිඑස්අයිඑස් සංවිධානය බිහිකරන්නට සහාය දී තර්ජනයක් වූ විට එයට විරුද්ධවීම එයය. ඇමරිකාවට හුරුපුරුදු එම ක්‍රමවේදය ගැන අපට වඩා හොදින් දන්නේ ඇමරිකානුවන්ය.■
