සේනාධිපතිට ඕනෑ කෙනෙකුගෙන් ඕනෑ දෙයක් ඉල්ලිය හැකිය. කෘෂිකාර්මික වැඩක් නම් ඔහු ඉඩම් ඉල්ලිය යුතුව තිබුණේ කෘෂිකර්ම ඇමති මහින්දානන්ද අලුත්ගමගේගෙන්ය. මෙහිදී එය සිදුවී නැත. අගමැතිවරයාගෙන් එවැනි ඉල්ලීමක් කළත් එය විෂයභාර ඇමතිවරයාට යොමු කළ යුතුව තිබුණි. එයත් සිදුවී නැත.
නිශ්ශංක සේනාධිපතිට අයත් ඇවන් ගාඞ් ඇග්රෝ පෞද්ගලික සමාගමට බඩ ඉරිඟු වගා කිරීම සඳහා ඉඩම් අක්කර 5000ක් ලබාදීමට කෘෂිකර්ම අමාත්යාංශයේ ලේකම් විශ්රාමික මේජර් ජෙනරාල් සුමේධ පෙරේරා තීරණය කර ඇති බව මාධ්ය වාර්තා කර ඇත.
මත්ද්රව්යවලට ඇබ්බැහිවූවන් හා මත්ද්රව්යවලට ඇබ්බැහිවී සිරගතව සිටින්නන් යොදාගෙන කරන පුනරුත්ථාපන කටයුත්තක් සඳහා සඳහා මෙම ඉඩම් ඉල්ලා ඇති බවත් ඉල්ලන ලද මුළු ඉඩම් ප්රමාණය අක්කර 40000ක් බවත් අක්කර 5000ක ප්රමාණය ලබාදී ඇත්තේ නියමු ව්යාපෘතියක් වශයෙන් බවත් එම මාධ්ය වාර්තා සඳහන් කර ඇත.
මේ ආකාරයට පුනරුත්ථාපනය කරන සිරකරුවන්ගේ කුසලතා වර්ධනය වන බවත් හොඳ සමාජ දායකත්වයක් ඒ මඟින් කළ හැකි බවත් එම වාර්තාවල සඳහන්ය.
කෘෂිකර්ම අමාත්යාංශ ලේකම්වරයාට මේ ආකාරයට ඉඩම් ලබාදීමට හැකිද යන්න ප්රශ්නයකි. රජයේ ඉඩම් ප්රතිපත්තිය අනුව රජය සතු යම් ඉඩමක් කෘෂිකාර්මික හෝ වෙනත් කටයුත්තක් සඳහා බැහැර කළ හැක්කේ ඉඩම් කොමසාරිස් ජෙනරාල්වරයාට වන නිසාය. ඕනෑම අමාත්යාංශයක් හෝ රාජ්ය ආයතනයක් සතු ඉඩමක් රාජ්ය අංශයට හෝ පෞද්ගලික අංශයට බැහැර කරනවා නම් එය ඉඩම් කොමසාරිස් ජෙනරාල්වරයා හරහා සිදුවිය යුතුය. එම බලයම ඊට අමතරව ඇත්තේ මහවැලි අධිකාරිය සතුව පමණය. එම අධිකාරියටද ඔහුන් සතු ඉඩම් බැහැර කිරීමේ අයිතිය පවතී.
අනෙක් අතට කෘෂිකර්ම අමාත්යාංශය සතුව ඒ ආකාරයට ලබාදෙන්නට ඉඩම් නැත. කෘෂිකර්ම දෙපාර්තමේන්තුව සතුව ඇත්තේ එයට අයත් ගොවිපළවලට අදාළ ඉඩම්ය. රට පුරා ස්ථාන කිහිපයක ඇති එම ඉඩම් ද අක්කර දහස් ගණනකින් යුතු ඒවා නොවේ. ඒවා අක්කර සිය ගණනක ඉඩම්ය. ඒවාහි මුළු එකතුවත් අක්කර 5000ක් වන්නේ නැත.
තවත් මාධ්ය වාර්තාවල දැක්වෙන්නේ මෙම ව්යාපෘතිය සඳහා ඉඩම් ඉල්ලීම නිශ්ශංක සේනාධිපති අග්රාමාත්ය මහින්ද රාජපක්ෂගෙන් කර ඇති බවත් ඒ අනුව එම ඉල්ලීමට අග්රාමාත්යවරයා අනුමැතිය ලබාදීමෙන් පසු කෘෂිකර්ම අමාත්යාංශ ලේකම්වරයාට යොමුකර ඇති බවත්ය.
නිශ්ශංක සේනාධිපතිට ඕනෑ කෙනෙකුගෙන් ඕනෑ දෙයක් ඉල්ලිය හැකිය. කෘෂිකාර්මික වැඩක් නම් ඔහු ඉඩම් ඉල්ලිය යුතුව තිබුණේ කෘෂිකර්ම ඇමති මහින්දානන්ද අලුත්ගමගේගෙන්ය. මෙහිදී එය සිදුවී නැත. අගමැතිවරයාගෙන් එවැනි ඉල්ලීමක් කළත් එය විෂයභාර ඇමතිවරයාට යොමු කළ යුතුව තිබුණි. එයත් සිදුවී නැත. මෙවැනි විශාල ඉඩම් බැහැර කිරීමක් සිදුකරනවා නම් එය කැබිනට් මණ්ඩලයට යා යුතුව තිබුණි. මෙහිදී එයත් සිදුවී නැත.
ඊටත් අමතරව තවත් දෙයක් තිබේ. මේ ව්යාපෘතියේ ශ්රම දායකත්වයට යොදා ගන්නේ සිරකරුවන් නම් ඒ සඳහා වූ අනුමැතියද අධිකරණ අමාත්යාංශයෙන් ලබාගත යුතු වීමය. බන්ධනාගාරගතවූවන් පුනරුත්ථාපනය හෝ වෙනයම් නාමයකින් යම් කටයුත්තකට දායක කරගත්තද එය බන්ධනාගාරයේ අධීක්ෂණය යටතේ සිදුවිය යුතු අතර බන්ධනාගාර පාලනයෙන් බැහැර ස්ථානවලට පුනරුත්ථාපනය සඳහා රැඳවියන් යොමු කිරීමක් දැනට සිදුකරන්නේ නැත. දැනට වැලිකඩ, මහර, පල්ලේකැළේ හා පල්ලන්සේන යන බන්ධනාගාරවල රැඳවියන්ට වෘත්තීය පුහුණු කටයුතු ලබාදෙන අතර ඒ සඳහා බාහිර උපදේශකයන් හා පුහුණුකරුවෝ එම බන්ධනාගාරවලට පැමිණෙති. එසේ නොමැතිව රැඳවියන් බාහිර වෘත්තීය පුහුණු මධ්යස්ථානවලට යැවීමක් සිදුනොකරයි. එසේම බඩඉරිඟු වගා කිරීම සඳහා බන්ධනාගාර රැඳවියන් යොදා ගැනීම යනු ඔවුන්ට වෘත්තීය පුහුණුවක් ලබාදීමක්ද නොවේ.
බන්ධනාගාර රැඳවියන්ට වෘත්තීය පුහුණුව ලබාදීමේ ව්යාපෘතියකට අදාළ නිශ්ශංක සේනාධිපතිටම සම්බන්ධ මෑත අතීතයේ සිදුවීමක්ද ඇත. ඒ හිටපු අධිකරණ අමාත්ය නිමල් සිරිපාල ද සිල්වා සමඟ නිශ්ශංක සේනාධිපති අත්සන් කරන ලද එකඟතාවයි. පසුගිය පෙබරවාරි මාසයේදී අත්සන් කරන ලද එම එකඟතාවේදී කීවේ අවුරුදු 2ත් 5ත් අතර කෙටිකාලීන බන්ධනාගාරගතවූවන්ට වෘත්තීය පුහුණුවක් ලබාදීම සඳහා එම එකඟතාව ඇතිකරගන්නා බවයි. ඒ අනුව එම පුහුණුව ලබන බන්ධනාගාර රැඳවූවන්ට රජයේ වෘත්තීය පුහුණු නිපුණතා සහතිකයක් (එන්වීකියු මට්ටමේ) ලැබෙන අතර ඊට අමතරව එම පුහුණු කාලය තුළ ඔවුන්ට ආදායමක්ද ලැබෙන බව කියනු ලැබීය.
එහි පළමු අදියර යටතේ බන්ධනාගාරගතවූවන් 5000ක් පුහුණු කරන බවත් ඔවුන්ට ඉංග්රීසි, අරාබි, ජර්මන් හා ප්රංශ භාෂා උගන්වන බවත් මෙම පුහුණුවට අවශ්ය ගුරුවරුන් හා පුහුණුකරුවන් ඇවන් ගාඞ් සමාගම සපයන බවත් එහිදී සඳහන් විය. ඊට අමතරව මේ පුහුණුවන්නන් වෙනුවෙන් ආහාර සපයන බවත් ඔවුන් පුහුණුවන ස්ථානවල වැසිකිළි හා නාන ස්ථාන 200ත් 300ත් අතර ප්රමාණයක් ගොඩනංවන බවත් මේ ව්යාපෘතිය වෙනුවෙන් ඇවන් ගාඞ් සමාගමට රුපියල් බිලියනයක මුදලක් (රුපියල් කෝටි 100ක් ) වැයවන බවත් ඒ සම්බන්ධයෙන් පළවූ මාධ්ය වාර්තාවල එකල සඳහන් විය. සිරකරුවන් ගැන මෙතරම් සානුකම්පිත ව්යාපාරිකයෙකු ඊට පෙර අප අසා තිබුණේ නැත.
පෙබරවාරි 06 වැනිදා සිදුවු මෙම එකඟතා ගිවිසුම සඳහා අමාත්ය නිමල් සිරිපාල ද සිල්වා, අධිකරණ අමාත්යාංශයේ එවක ලේකම්වරයා, එවක බන්ධනාගාර කොමසාරිස් ජෙනරාල්වරයා ඇතුළු පිරිසක් නිශ්ශංක සේනාධිපති සමඟ එක්වූහ.
පෙබරවාරි සිට මේ දක්වා මාස නවයක කාලයක් ගතවීත් ඊට සිදුවී ඇත්තේ කුමක්දැයි දන්නේ නැත. වර්තමානයේ බඩඉරිඟු වගාවක් ලෙස කරළියට පැමිණ ඇත්තේ එම එකඟතාවට මුවාවූ සැබෑ ව්යාපෘතිය විය හැකිය. සිරකරුවන් ගැන සානුකම්පිත ව්යාපාරිකයෙකුගේ ඇත්ත ඒ අනුව ඉදිරියේදී දැකගත හැකිවනු ඇත.
නිශ්ශංක සේනාධිපති යනු ජනාධිපති ගෝඨාභය රාජපක්ෂගේ ගජ මිතුරෙකි යන්න රටම දන්නා සත්යයකි. ජනාධිපතිවරයකුට එරෙහිව අපරාධ නඩු පවත්වාගෙන යා නොහැකිය යන ප්රතිපාදනය යටතේ ධුරයට පත්වීමෙන් පසු ඇවන් ගාඞ් පාවෙන අවි ගබඩා නඩුවෙන් ගෝඨාභය රාජපක්ෂගේ නම ඉවත් කළද ඔහු නිශ්ශංක සේනාධිපති සමඟ එකම නඩුවක විත්තිකාරකම් දැරුවෙකු බව අහෝසි කළ නොහැකිය. කෘෂිකර්ම අමාත්යාංශයේ ලේකම් ධුරයට පත්කර ඇති විශ්රාමික මේජර් ජෙනරාල් සුමේධ පෙරේරාද ජනාධිපතිවරයාගේ සමීපතමයෙකි. අමාත්යාංශ ලේකම් කිරීමට පෙර ජනාධිපතිවරයා පත්කරන ලද කාර්ය සාධක බලකා රැසක සාමාජිකයෙකු වූයේද සුමේධ පෙරේරාය.
ඒ නිසා බඩඉරිඟු වගා කිරීමේ මෙම ව්යාපෘතිය සඳහා ඉඩම් ලබාදීම, ඉඩම් පිළිබඳ නීතිරීති කෙසේ වෙතත් බාධාවකින් තොරව රාජපක්ෂවරුන්ට කළ හැකි බව අපගේ විශ්වාසයය. මන්ද රටේ ඉඩම් සින්නක්කරව විදේශිකයන්ට ලබාදිය නොහැකි බවට වූ නීතිය නොතකා ෂැංග්රිලා හෝටලය සඳහා වූ ඉඩම චීන සමාගමට සින්නක්කරව ලබාදිය හැකිවූ රාජපක්ෂලාට නිශ්ශංක සේනාධිපතිගේ ඉල්ලීම ඉටුකිරීම සුළු දෙයක් වන නිසාය.■
