යහපාලන ආණ්ඩු සමයේදී සිදුවී ඇතැයි කියන දේශපාලන පළිගැනීම් පිළිබඳ සොයා බැලීම සඳහා පත්කර ඇති ජනාධිපති කොමිසම නොවැම්බර් 17 වැනිදා මරණ දඬුවම නියමවී ඇති දුමින්ද සිල්වා සම්බන්ධයෙන්වූ පැමිණිල්ලේ සාක්ෂි විමසා තිබේ.
එම සාක්ෂි විමසීම කර ඇත්තේ දුමින්ද සිල්වාගේ පියාවූ ප්රියලාල් සිල්වාගෙන් වන අතර දුමින්ද සිල්වාට මරණ දඬුවම ලබාදීම දේශපාලන පළිගැනීමක් බව එම පැමිණිල්ල මගින් කියා ඇත. මෙම පැමිණිල්ල දුමින්ද සිල්වාගේ පියා දිව්රුම් ප්රකාශයක් මගින් නොවැම්බර් 13 දින එම කොමිසමට ඉදිරිපත් කර ඇති බව අරුණ පුවත්පත ඒ සම්බන්ධයෙන් වාර්තාවක් ඉදිරිපත් කරමින් නොවැම්බර් 18 දින වාර්තා කර ඇත.
එම සාක්ෂි විමසීමේදී රන්ජන් රාමනායක මන්ත්රීවරයා හා එම නඩුව විභාග කළ පද්මිණි රණවක විනිසුරුවරියත් අතර සිදුවූ හඬ පටයක්ද වාදනය කර ඇත. සාක්ෂි විමසීමෙන් පසු එම පැමිණිල්ල සම්බන්ධයෙන් වගඋත්තරකරුවන් ලෙස රන්ජන් රාමනායක, පද්මිණි රණවක, සීඅයිඩීයේ හිටපු අධ්යක්ෂ ශානි අබේසේකර හා එහි පොලිස් පරීක්ෂක නිශාන්ත සිල්වා නම්කර තිබේ.
භාරත ලක්ෂ්මන් ප්රේමචන්ද්ර ඝාතනයට අදාළ දුමින්ද සිල්වා නඩුව වූ කලි ත්රිපුද්ගල විනිසුරු මහාධිකරණයක් බහුතර තීන්දුවෙන් මරණ දඬුවම ලබාදුන් එකකි. පංච පුද්ගල ශ්රේෂ්ඨාධිකරණ විනිසුරු මඬුල්ලක් එම තීන්දුව ස්ථීර කරන ලද එකකි.
නීති විරෝධි ගිනිඅවි යොදාගෙන පුද්ගල ඝාතන කිහිපයක්ම එම සිද්ධියේදී සිදුවී තිබුණත්, අනෙක් විනිසුරුවරුන්ගේ තීන්දුවට වඩා අප කතා කළ යුත්තේ මහාධිකරණ විනිසුරු මඬුල්ලේ ප්රධාන විනිසුරු ලෙස කටයුතු කළ ශිරාන් ගුණරත්නගේ තනි තීන්දුව ගැනය. එම කිසිදු චෝදනාවකට කිසිවකු වරදකරුවකු නොකරමින් එවැනි තීන්දුවක් එම සිද්ධිය සම්බන්ධයෙන් ලබාදෙන්නේ කෙසේද යන්න විමසිය යුතුය.
එම නඩුව පිළිබඳ කතා කරන්නට ගියහොත් එය දීර්ඝ ලියැවිල්ලක් වනු ඇත. මෙහිදී අපගේ අවධානය යොමු වන්නේ ජනාධිපති කොමිසම මෙම පැමිණිල්ල බාරගැනීම පිළිබඳවය. දුමින්ද සිල්වා යනු එම කොමිසමේ විෂය පථයට අයත් පැමිණිලි ඉදිරිපත් කළ හැකි පාර්ශ්වයක් නොවේ. මීට පෙර එම කොමිසම පැමිණිලි බාරගත් නිශ්ශංක සේනාධිපති, උදය ගම්මන්පිල ආදින්ගේ වැනි බාරගත නොහැකි පැමිණිලි ගණයටම මෙම පැමිණිල්ල අයත් වේ.
එයත් අපි පසෙක තබමු. මෙම පැමිණිල්ල බාරගන්නේ නොවැම්බර් 13 වැනිදා, සිකුරාදාය. 15වැනිදා හෙවත් ඉරිදා, දුමින්ද සිල්වාගේ පියා කැඳවා කොමිසමේ පොලිස් ඒකකය ප්රකාශය සටහන් කරගනියි. 17 වැනිදා, අඟහරුවාදා, ඔහු කොමිසම හමුවේ සාක්ෂිද දෙයි. කෙතරම් ඉක්මනින් රාජපක්ෂ ලංකාවේ යුක්තිය ඉටුවෙනවාද?
දැන් අපි මෙම කොමිසමේ කාල වකවානුවලට යමු. මෙම කොමිසම ජනාධිපතිවරයා පත්කරන්නේ 2020 ජනවාරි 09 වැනිදා සිට මාස හයක කාලයක් සඳහාය. එම මාස හයක කාලය අවසන් වන ජුලි 09 දින එහි වාර්තාව බාර දීමට නිමිතව තිබුණි. එතැන් සිට තවත් මාස 4ක කාලයකට එම කොමිසමේ කාලය දික් කරනු ලැබීය. ඒ නොවැම්බර් 09 වැනිදා දක්වාය. එතැන් සිට නොගැළපෙන තවත් දින 16කට කාලය දික්කරනු ලැබුයේ නොවැම්බර් 25 දින දක්වාය.
දුමින්ද සිල්වා සම්බන්ධයෙන් පැමිණිල්ල එන්නේ එම අවසන් කාලය දික්කිරීමත් සමඟ නොවැම්බර් 13 වැනිදාය. වැඬේ පැහැදිලිය. දුමින්දගේ පැමිණිල්ල වෙනුවෙන්ම කාලය දික්කර ඇත. සාමන්යයෙන් කොමිසමක කාලය දික් කරන්නේ ඊට ලැබී ඇති පැමිණිලි විභාග කර අවසන් කිරීම සඳහාත්, අවසන් වාර්තාව සකස් කිරීම සඳහාත්ය. මේ කාලය දික් කිරීම පැමිණිල්ලක් බාර ගැනීම සඳහාය. එසේ නොකර ඉන්නේ කොහොමද?
දුමින්ද සිල්වා යනු ජනාධිපතිවරයා ආරක්ෂක අමාත්යාංශයේ ලේකම්වරයා ලෙස කටයුතු කරන කාලයේ ඔහු සමඟ ළඟින් කටයුතු කළ අධීක්ෂණ මන්ත්රීවරයාය. දුමින්ද සිල්වාගේ ප්රසිද්ධ දේශපාලන රැස්වීම්වල වේදිකාවට ගොඩවූ අමාත්යාංශ ලේකම්වරයාය. භාරත ලක්ෂ්මන් සිද්ධියේදී වෙඩි වැදුණැයි කියන දුමින්ද සිල්වා බැලීමට ජයවර්ධනපුර රෝහලට ගිය ආණ්ඩුවේ පළමුවැන්නාය.
මේ පෙළගැසෙන්නේ එකිනෙක සිදුවීම්ය. දුමින්ද සිල්වාට ජනාධිපති සමාව දෙන ලෙස දැනටමත් මන්ත්රීවරුන් පිරිසක් ඉල්ලා ඇත. ඒ ගැන පාර්ලිමේන්තුවේද ඉල්ලීම් කරනු ලැබේ. ජනාධිපති කොමිසමට කළ පැමිණිල්ලද පෙරහැර එන බව කියන කසකාරයකුය.■
