වරාය පර්යන්තය ඉන්දියාවට කැබිනට් අනුමැතිය ලැබෙයි – ජපානය නොඑන බව මහින්ද කියලා

කොළඹ වරායේ නැගෙනහිර පර්යන්තයේ මෙහෙයුම් කටයුතු ඉන්දීය සහ ජපාන ආයෝජන ඇතුළත් සමාගමක් මගින් සිදුකිරීම සඳහා අවශ්‍ය කටයුතු සිදුකිරීමට නොවැම්බර් 9 වැනිදා පැවති කැබිනට් මණ්ඩල රැස්විමේදී අනුමැතිය හිමිවි ඇත.
ඒ සඳහා වූ කැබිනට් මණ්ඩල පත්‍රිකාව වරාය හා නාවික විෂයභාර අමාත්‍ය රෝහිත අබේගුණවර්ධන ඔක්තෝබර් 22 දින සහිතව එම්පීඑස්/2020/01/20 අංකය යටතේ ඉදිරිපත් කර ඇත. එම කැබිනට් පත්‍රිකාව ඉදිරිපත් කළ අවස්ථාවේ අග්‍රාමාත්‍ය මහින්ද රාජපක්ෂ ප්‍රකාශ කර ඇත්තේ ජපානයේ ආයෝජකයන් මෙම සමාගමේ ආයෝජනය කරනු ඇතැයි බලාපොරොත්තුවක් නොමැති බවත්, ඉන්දීය සමාගම්වලට සීයට 49ක අයිතිය ලබාදීමට සිදුවනු ඇති බවත්ය.
කැබිනට් පත්‍රිකාවට අනුව වරාය නැගෙනහාර පර්යන්තයේ මෙහෙයුම් සිදුකිරීම සඳහා සමාගමක් පිහිටුවීමට නිමිත අතර ශ්‍රී ලංකා වරාය අධිකාරියට සීයට 51ක කොටස් අයිතිය සහ ඉතිරි සීයට 49ක කොටස් අයිතිය ඉන්දීය සහ ජපාන ආයෝජන සමාගම්වලට හිමිවන ආකාරයට එම සමාගම පිහිටුවීමට නියමිතය. ඉන්දීය සමාගමක් වන ‘අදානි පෝට්ස් ඇන්ඞ් ලොජිස්ටික්ස් ගෲප් සමාගම’ නැගෙනහිර පර්යන්තය වෙනුවෙන් පිහිටුවන සමාගමේ ආයෝජනය කිරීමට නියමිතය.
එම සමාගම පිහිටුවීමට අදාල ගිවිසුම පිළිබඳ සාකච්ඡා කිරීමට කැබිනට් මණ්ඩල සාකච්ඡා කමිටුවක් පත්කිරීමටත්, එම කමිටුවේ සහයෝගය සඳහා කමිටුවත් පත් කිරීමට භාණ්ඩාගාර ලේකම්වරයාට අවසර ලබාදීමටත්, නව ආයෝජන සමාගම නැගෙනහිර පර්යන්තයේ නව දොඹකර ස්ථාපනය කරන තෙක් දැනට එම පර්යන්තයේ තිබෙන දොඹකර පාවිච්චි කිරීමට අවසර ලබාදීමටත් කැබිනට් මණ්ඩල සංදේශයෙන් අවසර ඉල්ලා තිබේ. නැගෙනහිර පර්යන්තයේ මෙහෙයුම් සිදුකිරීමේ සමාගම් ව්‍යාපෘතිය පිළිබඳ සාකච්ඡා කරන කැබිනට් මණ්ඩල කමිටුවේ සාමාජිකයන් වන්නේ වරාය හා නාවික අමාත්‍යාංශයේ ලේකම් ඩී.සී. ජයලාල්, මාර්ග සංවර්ධන අමාත්‍යාංශයේ ලේකම් ඩබ්ලිව්.ආර්. ප්‍රේමසිරි, බලශක්ති අමාත්‍යාංශයේ ලේකම් පී.කේ. මායාදුන්නේ, කම්කරු අමාත්‍යාංශයේ ලේකම් යූ.කේ. මාපා පතිරණ, භාණ්ඩාගාරයේ නියෝජ්‍ය ලේකම් ප්‍රියන්ත රත්නායක සහ ශ්‍රී ලංකා වරාය අධිකාරියේ සභාපති ජෙනරාල් දයා රත්නායකය.
කොළඔ වරායේ නැගෙනහිර පර්යන්තය ඉන්දියා ඇතුලු විදේශ හවුලකට ලබාදීම සම්බන්ධයෙන් සමිති 23කින් සමන්විත සිය වෘත්තීය සමිති පෙරමුණ දැඩි විරෝධය දක්වන බවත් ඊට එරෙහිව අරගල කිරීමට සූදානම් බවත් වරාය ස්වාධීන සේවක සංගමයේ ලාල් බංගමුව පවසයි.
අගමැතිවරයාත් විෂයභාර ඇමතිවරයාත් නැගෙනහිර පර්යන්තය නොවිකුණන බවට දුන් පොරොන්දු බොරු වන බවත් එමෙන්ම ජනාධිපතිවරයාගේ ප්‍රතිපත්ති ප්‍රකාශයේ ඇති රටේ සම්පත් නොවිකුණන බවට වූ පොරොන්දුව බොරු වන බවත් එම පොරොන්දුවට ඡන්දය දුන් හැටනව ලක්ෂයක ජනතාව අතර වරාය සේවකයන්ද සිටින බවත් බංගමුව මහතා පවසයි.■