නොවැම්බර් 05 වැනිදා ‘ක්ෂණික ප්රතිදේහජනක පරීක්ෂණ කට්ටල’ (රැපිඞ් ඇන්ටිජෙන් හෙවත් විනාඩි 10-30 අතර කෙටි කාලසීමාවක් ඇතුළත කොවිඞ්-19 පරීක්ෂණ කළ හැකි ක්රමවේදයකි. පරීක්ෂණ කට්ටල වර්ගය අනුව කාලසීමාව වෙනස් වෙයි.) ලක්ෂ දෙකක් රැගත් ශ්රී ලංකන් ගුවන් සමාගමේ ගුවන් යානයක් ශ්රී ලංකාවට ගොඩබැස්සේය. ඒ හොංකොංහි සියොල් සිට පැමිණි යානයකි. මෙම කට්ටල ලක්ෂ දෙක ගෙන්වා තිබුණේ ජෝර්ජ් ස්ටුවර්ට් සමාගමය. සටහන ලියන මොහොත වන විට ප්රතිදේහජනක ක්ෂණික පරීක්ෂණ වර්ග දෙකක් සඳහා ජාතික ඖෂධ නියාමන අධිකාරියේ ලියාපදිංචි කර ඇත. එලෙස ජෝර්ජ් ස්ටුවර්ට් සමාගමට ලියාපදිංචිය ලැබී ක්ෂණික ප්රතිදේහජනක පරීක්ෂණ කට්ටල ගෙන්වීම රටේ විශාල සාකච්ඡාවකට හේතු වී ඇත.
අවසරය ලැබී ඇති එක් වර්ගයක් ඇබට් ක්ෂණික ඩයග්නස්ටික්ස් නම් ආයතනයේ කට්ටලයය. දැනට ගෙන්වා ඇත්තේ එම කට්ටල වර්ගයයි. දෙවැන්න ස්ටෑන්ඩර්ඞ් ඩයග්නස්ටික්ස් ආයතනයේය. දෙකම මිලෙන් සමාන බව දැනට එම සමාගමේ නිවේදනවල සඳහන්ය.
ජෝර්ජ් ස්ටුවර්ට් සමාගම ඇබට් ඩයග්නස්ටික්ස් ආයතනයෙන් පරීක්ෂණ කට්ටල ලක්ෂ දෙකක් ගෙන්වා ඇත. ඉදිරියේදී තවත් ලක්ෂ අටක් ගෙන්වීමට බලාපොරොත්තු වන බව සඳහන්ය. ඒ අනුව ලක්ෂ දහයකි.
මේ අතර ලෝක සෞඛ්ය සංවිධානය ශ්රී ලංකාවට පරීක්ෂණ කට්ටල ලක්ෂයක් ආධාර ලෙස ලබාදී තිබෙන බවත් එම කට්ටලද ඇබට් ඩයග්නස්ටික්ස් ආයතනයේ කට්ටල බවත් වාර්තා වෙයි. නෙදර්ලන්තයෙන් ගෙන්වූ පරීක්ෂණ කට්ටල දෙකක්ද වරායේ ඇත. එහෙත්, ඒවා අයත් වන්නේ කුමන වෙළඳ නාමයටදැයි පැහැදිලි නැත. කෙසේ වෙතත් මේවා පාවිච්චි කරමින් සෞඛ්ය අමාත්යාංශයේ මැදිහත්වීමෙන් පරීක්ෂණ කිරීමට සැලසුම් කර ඇත. එමෙන්ම දැනටමත් පෞද්ගලික අංශයෙන් පරීක්ෂණ කට්ටල ලක්ෂයක් මිලදී ගැනීමට රජය ටෙන්ඩර් කැඳවා ඇත. ඉදිරියේදී තවත් ක්ෂණික ප්රතිදේහජනක පරීක්ෂණ කට්ටල මිලදී ගැනීමට සෞඛ්ය අමාත්යාංශය බලාපොරොත්තු වේ.
ප්රතිපත්තිමය තීන්දුව
අපූරු කාරණයක් කිව යුතුය. කොවිඞ්-19 ලංකාවට පැමිණි මොහොතේ සිට අනිද්දා පුවත්පතත්, නොයෙකුත් සෞඛ්ය විශේෂඥයනුත් දිගින් දිගටම යෝජනා කළේ සමාජයේ පරීක්ෂණ කටයුතු සඳහා ප්රතිදේහ සහ ප්රතිදේහජනක පරීක්ෂණ සිදු කළ හැකි විවිධ ක්රමවලට අයත් කට්ටල ලංකාවට ගෙන්වන ලෙසය. අපට කළ හැකි පීසීආර් පරීක්ෂණ සංඛ්යාවේ සීමාවක් තිබෙන නිසා එම ක්රමවේද හඳුන්වාදෙන ලෙස අපි යෝජනා කළෙමු. ලෝකයේ වෙනත් රටවල ප්රතිදේහ පරීක්ෂණ, රසායනාගාර ප්රතිදේහජනක පරීක්ෂණ, ක්ෂණික ප්රතිදේහජනක පරීක්ෂණ, පොයින්ට් ඔෆ් කෙයාර් පීසීආර් ආදි බහුවිධ පරීක්ෂණ ක්රමවලට අනුමැතිය දී ඇති බව අපි දිගින් දිගටම පෙන්වාදුන්නෙමු.
එහෙත්, දිගින් දිගටම සෞඛ්ය අංශයේ බලධාරීන් කීවේ අනෙකුත් පරීක්ෂණ වර්ග විශ්වාස නැති නිසා පීසීආර් පරීක්ෂණ පමණක් සිදු කරන බවය. එය ප්රතිපත්තිමය තීන්දුවක් බවය. (දිනකට සිදුකළ පීසීආර් පරීක්ෂණ සංඛ්යාවත් ප්රමාණවත් නොවූ බව අමුතුවෙන් කිව යුතු නැත.)
මාස හතකට පසු ඒ නිලධාරීන්ගේ ප්රතිපත්තිමය තීන්දුව එක්වර වෙනස් වී ඇත. එහෙත්, තීන්දුව වෙනස් වීමෙන් පසුව වුණත්, බහුවිධ පරීක්ෂණ ක්රමවලට අවසර ලැබී නැත. ඒ වෙනුවට ක්ෂණික ප්රතිදේහජනක පරීක්ෂාවට පමණක් අවසර ලැබී ඇත. සටහන ලියන මොහොත වන විටත් ප්රතිදේහ පරීක්ෂණ නම් අනෙක් ක්රමවේදයටත්, රසායානාගාරවල සිදුකරන ප්රතිදේහජනක පරීක්ෂණවලටත් අවසර ලැබී නැත.
පීසීආර් විරෝධය
ඔක්තෝබර් 25 වැනි ඉරිදා දිනැති ඉරිදා අරුණ පුවත්පත වෙළඳපොළට නිකුත් වුණේ 25 වැනි සෙනසුරාදාය. ඒ අනුව පුවත්පතේ කටයුතු ඔක්තෝබර් 24 වැනි සිකුරාදා නිම කළ යුතුය. එම පුවත්පතේ ප්රධාන ප්රවෘත්තිය වුණේ ‘පෞද්ගලික සෞඛ්ය අංශයේ ජාවාරමක්’ යන්නය. ඒ සමගම තවත් පුවතක් පළ වී තිබුණි. ඒ ‘කොවිඞ්-19 පරීක්ෂණ විනාඩි 20න් කළ හැකි යන්ත්රයක් එයි’ යනුවෙනි.
එයට පසු, ඔක්තෝබර් 26 වැනි සඳුදා ජාතික ඖෂධ නියාමන අධිකාරියෙන් ‘සියලු ලියාපදිංචි සමාගම් වෙත’ මැයෙන් නිවේදනයක් පළ කර තිබුණි. එම නිවේදනයෙන් දැනුම් දී තිබුණේ ක්ෂණික ප්රතිදේහජනක පරීක්ෂණ කට්ටල ගෙන්වීම සඳහා අවසර ලබාදෙමින් සමාගම් ලියාපදිංචි කිරීම වෙනුවෙන් අයදුම්පත් ඉදිරිපත් කරන ලෙසය.
වැඩිදුරටත් සොයා බලද්දී දැනගන්නට ලැබුණේ ඔක්තෝබර් 23 වැනිදා වන විටත්, ඒ කියන්නේ ඉහත දැන්වීම පළකරන්නට පෙරම, ජෝර්ජ් ස්ටුවර්ට් සමාගමට කට්ටල වර්ග දෙකක් ගෙන්වීමට ඖෂධ නියාමන අධිකාරියේ අවසරය ලැබී ඇති බවය. ඒ අනුව ඉරිදා අරුණ පුවත්පත පෞද්ගලික අංශයේ පීසීආර් ජාවාරමක් යැයි කියමින් පීසීආර් පරීක්ෂණ ගැන බිය වඩවන පුවත් පළ කර ඇත්තේ, අරුණ පුවත්පතේ හිමිකරුටම අයත් ජෝර්ජ් ස්ටුවර්ට් සමාගමට ක්ෂණික ප්රතිදේහජනක පරීක්ෂණ කට්ටල ගෙන්වීමට අවසර ලැබුණාට පසුවය.
ජාතික ඖෂධ නියාමන අධිකාරිය යම් ඖෂධයක් හෝ උපකරණයක් සඳහා ලියාපදිංචිය හදිසියේ ලබාදෙන්නේ නැත. ඒ සඳහා යම් කාලයක් ගත වෙයි. අදාළ ක්ෂේත්රයේ විශේෂඥයන්ගෙන් සමන්විත තාක්ෂණික කමිටුවලින් ඒ පිළිබඳ සලකා බලා, ලියාපදිංචිය ලබාදෙයි. බොහෝ විට ලංකාවේ ලියාපදිංචි නොකළ ඖෂධයක් හෝ උපකරණයක් හදිසියේ ගෙන්වීමට අවශ්ය වුණොත් කරන්නේ යම් තොගයක් ගෙන්වීම සඳහා විරෝධයක් නොමැති බවට ලිපියක් හෙවත් එන්ඕඑල් එකක් (නෝ ඔබ්ජෙක්ෂන් ලෙටර්) ලබාදීමකි. ලංකාවට වසරකට සැලකිය යුතු තරම් ඖෂධ ප්රමාණයක් ඒ තාවකාලික අවසරය මත ගෙන එනු ලබයි.
වැරදි ප්රතිඵල
සෞඛ්ය අමාත්යාංශයෙන් අපට වාර්තාවන ආකාරයට සහ ඔක්තෝබර් 10 වැනිදා මාධ්ය සාකච්ඡාවක් පවත්වමින් හිටපු සෞඛ්ය අමාත්ය රාජිත සේනාරත්න ප්රකාශ කළ ආකාරයට, ජාතික ඖෂධ නියාමන අධිකාරියේ ලියාපදිංචිය දීමට පෙර ක්ෂණික ප්රතිදේහජනක පරීක්ෂණවල කාර්යක්ෂමතාව හඳුනාගැනීම සඳහා කොවිඞ්-19 ඇතැයි තහවුරු වූ රෝගීන්ට පරීක්ෂණ සිදු කර තිබුණත්, ඉන් බොහොමයක් වැරදි ප්රතිඵල ලබා දී තිබුණි. කෙසේ වෙතත් කොවිඞ්-19 ඇතැයි තහවුරු නොවූ පුද්ගලයන්ගේ නියැදි ලබාගෙන, ඒ ආශ්රිතව පරීක්ෂණ කොට, ලෝක සෞඛ්ය සංවිධානයෙන් ලැබූ අනුමැතියත් පදනම් කරගනිමින් ඉහත කී ලියාපදිංචිය ලබා දී තිබුණි.
මේ තත්වය පිළිබඳ ජාතික ඖෂධ නියාමන අධිකාරිය පැත්තෙන් එම අධිකාරියේ ඉහළම නිලධාරියෙක් අප වෙත කරුණු දැක්වීය. තමාගේ නම සඳහන් කරනවාට ඔහු අකමැති විය. ඔහු කී කතාව මෙසේය.
‘ක්ෂණික ප්රතිදේහජනක පරීක්ෂණ කට්ටල වර්ග දෙකක් සඳහා අපි ලියාපදිංචිය දුන්නා. මට ලියාපදිංචිය දුන් දිනය මතක නැහැ. එහෙත් පහුගිය සති තුනක් වගේ ඇතුළත. අපි ඉක්මනින් ලියාපදිංචි කළේ, එම කට්ටල වර්ග දෙක ලෝක සෞඛ්ය සංවිධානයේ නිර්දේශය සහිත නිසා. ලෝක සෞඛ්ය සංවිධානයේ ලැයිස්තුවක් තියෙනවා. ඒ ලැයිස්තුවේ තියෙන්නේ එම සංවිධානය ලෝකයේ ඕනෑම රටක පාවිච්චි කිරීම සඳහා අනුමැතිය දුන් ඖෂධ සහ උපකරණ වර්ග. ලෝක සෞඛ්ය සංවිධානයට අමතරව ලංකාවේ විශේෂඥ කමිටුවලිනුත් එයට අනුමැතිය ලැබුණා. ඒ වර්ග දෙකම ගෙන්වන්නේ ජෝර්ජ් ස්ටුවර්ට් සමාගම. අපි ජෝර්ජ් ස්ටුවර්ට්ලා නිසා විශේෂයෙන් දුන්නා නෙවෙයි. එයාලා අරගෙන ආ පරීක්ෂණ වර්ග දෙක යහපත් නිසායි අපි ලියාපදිංචිය දුන්නේ. තවත් සමාගම්වලට ඉදිරියේදී කොවිඞ්-19 පරීක්ෂණ ක්රමවේද සඳහා අවසර ලබාගැනීමේ හැකියාව තිබෙනවා.’
ටෙන්ඩර් එකක්
ඔක්තෝබර් මාසයේදී රාජ්ය ඖෂධ සංස්ථාව ඩීඑච්එස්/ආර්එල්/74ඩබ්ලිව්ඒසී/20 අංකය යටතේ ටෙන්ඩර් කැඳවීමක් කර තිබුණි. එය නොවැම්බර් 02 වැනිදා සවස 2.30ට පෙර ලංසු ඉදිරිපත් කළ යුතු ටෙන්ඩරයක් විය. ටෙන්ඩරයෙන් කැඳවා තිබුණේ ක්ෂණික ප්රතිදේහජනක පරීක්ෂණ කට්ටල සඳහා මිල ගණන්ය. පරීක්ෂණ ලක්ෂයක් සඳහා සාම්පල් අවශ්ය විය. ඒ ලක්ෂයම හදිසියේ ගැනීමට අවශ්ය බව ටෙන්ඩරයේ සඳහන්ය.
මෙම ටෙන්ඩරයේ සඳහන් වන්නේ ශ්රී ලංකාවට ගෙන්වන සෑම වෛද්ය උපකරණයක්ම ඖෂධ නියාමන අධිකාරියේ ලියාපදිංචි විය යුතු බවත්, විශේෂ අවස්ථාවකදී පමණක් ලියාපදිංචි නොවූ උපකරණ ගෙන්වන බවත්ය. සෑම ලංසුවක්ම සමඟ ඖෂධ නියාමන අධිකාරියේ ලියාපදිංචි සහතිකයේ පිටපතක් අමුණා එවිය යුතු බවත් එහි සඳහන්ය.
ඒ අනුව ක්ෂණික ප්රතිදේහජනක පරීක්ෂණ සඳහා දැනටමත් ඖෂධ නියාමන අධිකාරියේ ලියාපදිංචි කර ඇති එකම සමාගම වන ජෝර්ජ් ස්ටුවර්ට් සමාගමට මෙම ටෙන්ඩරය වාසිදායකය. ටෙන්ඩරයට සමාගම් 32ක් පමණ මිලගණන් ඉදිරිපත් කර තිබුණි. ඩොලර් 2.31ක සිට ඩොලර් 19.58 දක්වා මිලගණන් ඉදිරිපත් කර තිබුණි. ඇබට් සමාගමෙන් ගෙන්වන ජෝර්ජ් ස්ටුවර්ට් සමාගමේ කට්ටලයට ඉදිරිපත් කර තිබූ මිල ඩොලර් 6.19කි. රුපියල් 1146.22කි.
පුහුණුවක්
ඉහත කී ටෙන්ඩර් එක තවම ජෝර්ජ් ස්ටුවර්ට් සමාගමට හෝ වෙනත් සමාගමකට ලබාදී නැත. එහෙත්, ජෝර්ජ් ස්ටුවර්ට් සමාගම දැනටමත් සෞඛ්ය අමාත්යාංශයේදී ඇබට් සමාගමේ පරීක්ෂණ කට්ටලය පාවිච්චි කරන ආකාරය පිළිබඳ පුහුණුවක්ද පවත්වා හමාරය.
ඒ සමාගමේම නියෝජිතයන්ට අනුව මෙම කට්ටල ගෙන්වුවේ රජය වෙනුවෙන් නොවේ. පෞද්ගලික අංශයේ පාවිච්චිය වෙනුවෙනි. එහෙත්, නොවැම්බර් 05 වැනිදා සෞඛ්ය අමාත්යාංශයෙහි නිලධාරීන් වෙත ඇබට් ඩයග්නොසීස් ආයතනයේ වෛද්ය සහ විද්යා කටයුතු අධ්යක්ෂ වෛද්ය මෝහන් රිවාරුගේ දායකත්වයෙන් පුහුණුවක් පවත්වා තිබුණි. වෛද්ය මෝහන් වීඩියෝ තාක්ෂණයෙන් අදහස් දක්වා තිබුණු අතර සෞඛ්ය අමාත්යාංශයේ නියෝජ්ය අධ්යක්ෂ ජෙනරාල් (රසායනාගාර සේවා) සමන් රත්නායක ප්රමුඛ නිලධාරීහු පිරිසක් එම පුහුණුවට සහභාගි වී සිටියෝය.
මෙම පුහුණුව මෙහෙයවා තිබුණේ ජෝර්ජ් ස්ටුවර්ට් ආයතනයේ මැදිහත්වීමෙනි.
දැන් තත්වය
ශ්රී ලංකාවේ ක්ෂණික ප්රතිදේහජනක පරීක්ෂණ කිරීම ගැටලුවක් නැත. එහෙත්, ඒ වෙනත් පරීක්ෂණ ක්රමවේද අතරින් තවත් ක්රමවේදයක් ලෙසය. පීසීආර් පරීක්ෂණ නතර කොට, එයට විකල්පයක් ලෙස නොවේ.
දැනට සිදු වූ සියල්ල සිදුවුණේ ක්ෂණික ප්රතිදේහජනක පරීක්ෂාවක් තරම් අධිවේගයකිනි. ක්ෂණිකව ආණ්ඩුව ප්රතිදේහජනක පරීක්ෂණවලට අනුමැතිය දීමට ප්රතිපත්තිමය තීන්දුවක් ගැනීම, ඒ විගසම ඖෂධ අධිකාරියෙන් වෙළඳනාම දෙකක් ලියාපදිංචි කිරීම, ලියාපදිංචිය ලැබී සති දෙකක් ඇතුළත කට්ටල ගෙන්වීම, ඒ සමගම ඖෂධ සංස්ථාවෙන් ටෙන්ඩර් කැඳවීම සිදු විය. සෞඛ්ය අමාත්යාංශයේ ඒ වේගයට සමපාත වෙන්නට හැකිව තිබුණේ ජනාධිපතිවරයාගේ මිතුරෙකු වන දිලිත් ජයවීරගේ ජෝර්ජ් ස්ටුවර්ට් සමාගමට පමණි. අප පෙර කී ඔක්තෝබර් 26 වැනිදා අනෙකුත් සමාගම්වලට ලියාපදිංචි වෙන්නැයි ඖෂධ අධිකාරිය නිවේදනය පළ කොට දින හතක් ඇතුළත ඖෂධ සංස්ථාවේ ටෙන්ඩරයේ කාලයත් අවසන් විය. ගැටලුව ඇත්තේ එතැනය.
ඉහත සඳහන් මිලට මෙම කට්ටල වෙළඳපොළට සහ සෞඛ්ය අමාත්යාංශයට අලෙවි කළායැයි සිතමු. එසේ වුවහොත් ලංකාවට ගෙන ඒමට බලාපොරොත්තු වන කට්ටල අලෙවි කිරීමෙන් ලැබෙන මුදල රුපියල් 1,146,220,000 ක් බව ගණනය කොට අනුමාන කළ හැකිය. එනම් කෝටි 114කි. මෙය දැවැන්ත ව්යාපාරයක් බව වටහාගැනීමට ඒ ගණනය කිරීමෙන් හැකියාව ලැබේ.
දැනට සෞඛ්ය අමාත්යාංශය ලෝක සෞඛ්ය සංවිධානයෙන් හා නෙදර්ලන්තයෙන් ලැබුණු කට්ටල ද, මිලදී ගැනීමට බලාපොරොත්තුවෙන කට්ටලද පාවිච්චි කරමින් ක්ෂණික ප්රතිදේහජනක පරීක්ෂණ කිරීමට සැලසුම් කර ඇත. ඒ තොග ඉවර වෙද්දී, ටෙන්ඩර් කැඳවා තවත් තොග මිලදී ගනු ඇත. එහිදී ජෝර්ජ් ස්ටුවර්ට් සමාගමට විශේෂ වාසියක් හිමිවේද යන්න බලා සිටිය යුතුය.■
ඉක්මන් තීන්දුව ඇඟලුම් කර්මාන්තය නිසා
නියෝජ්ය අධ්යක්ෂ ජෙනරාල්
(රසායනාගාර සේවා) වෛද්ය
සමන් රත්නායක
ජෝජ් ස්ටුවර්ට් සමාගම ක්ෂණික ප්රතිදේහජනක පරීක්ෂණ කට්ටල ගෙන්වා තිබෙන්නේ සෞඛ්ය අමාත්යාංශයටද?
ලෝක සෞඛ්ය සංවිධානය මගින් ක්ෂණික පරීක්ෂණ කට්ටල ලක්ෂයක් මේ වෙනකොට සෞඛ්ය අමාත්යාංශයට පිරිනමලා තියෙනවා. පෞද්ගලික අංශයෙන් ගෙන්වා තිබෙන්නේ රාජ්ය ඖෂධ නියාමන අධිකාරියේ ලියාපදිංචි වූ සමාගමක්. ඒක අපට අදාළ නැහැ. ලියාපදිංචිය ලැබුණාම පෞද්ගලික සමාගමට ගේන්න පුළුවන්.
ලෝක සෞඛ්ය සංවිධානය දුන්නේත්, ඇබට් කියන සමාගමේ කට්ටලම නේද?
එහෙම වෙන්න ඕනෑ. අපි මේ වෙනකොට ගෙන්වූ කට්ටල අතරින් සාම්පල විද්යාගාර හතරකට යවලා තියෙනවා. එයින් බලාපොරොත්තු වෙන්නේ ගෙන්වා ඇති වර්ගවල නිරවද්යතාව යළි තහවුරු කිරීමක්. නොවැම්බර් 10 හවස එහි ප්රතිඵල ලැබීමට නියමිතව තිබුණා. ඒ ප්රතිඵල අනුව අපි ලංකාවේම ප්රතිදේහජනක පරීක්ෂණ පාවිච්චි කිරීම පිළිබඳ මාර්ගෝපදේශ සකසනවා. ඒ අනුව අපේ රෝහල්වල පරීක්ෂණ කරනවා. ඊට අමතරව පෞද්ගලික රෝහල්වලටත් අවස්ථාව ලබාදෙනවා. රජයේ වෛද්ය සේවය හරහා සාමාන්ය සමාජයේ යම් ප්රමාණයක් කරන්න බලාපොරොත්තු වෙනවා. ඒක කරන්නේ සෞඛ්ය වෛද්ය නිලධාරීවරුන් හෙවත් එම්ඕඑච්ලා හරහා. ඔවුන්ට අපි පුහුණුවකුත් දෙනවා. කොහොමත් අපට හැමදාම ලෝක සෞඛ්ය සංවිධානයෙන් කට්ටල ලැබෙන්නේ නැහැනේ. ඒවා අවසන් වුණාම අපට පෞද්ගලික අංශයෙන් කට්ටල මිලදී ගන්නට සිද්ධවෙනවා.
දැනටමත් රාජ්ය ඖෂධ නීතිගත සංස්ථාව ටෙන්ඩර් කැඳවලා නේද?
ඔව්, ඒ ලක්ෂයක් කැඳවලා තියෙන්නේ අපට දැනට තිබෙන අවශ්යතාව අනුව. ඉදිරියේදී අවශ්යතාව අනුව අපි ටෙන්ඩර් කැඳවාවි.
ප්රතිදේහ පරීක්ෂණ කිරීමට අවසර ලබාදීම සඳහා සෞඛ්ය අමාත්යාංශය ප්රතිපත්තිමය තීන්දුවක් ගත්තේ නැත්තේ ඇයි?
දැනටමත් අපි ප්රතිදේහ පරීක්ෂණ සඳහාත් අවසර ලබාදීමට මාර්ගෝපදේශ හදලා ඉවරයි. ඒත්, ඒක ඉදිරි සතිවලදී සිදුවේවි. එකපාර ඔක්කෝටම අවසර නොදුන්නේ හේතුවක් ඇතිව. එහෙම හැම ක්රමයටම අවසර තිබුණොත් පෞද්ගලික රෝහල්වලින් හැම පරීක්ෂණයක්ම කරලා, බිලට ඒවා එකතු කරන්න ඉඩ තියෙනවා. මේවා ව්යාපාර අවස්ථා බවට පත්වෙන්න ඉඩ තියෙනවා. ඒකයි.
ප්රතිදේහජනක පරීක්ෂණ සඳහා ප්රතිපත්තිමය තීන්දුවක් ගැනීම හදිසියේ සිදු වූ එකක්ද?
අපට බලපෑමක් තිබුණා තමයි. ඒත් ඒකට හේතුව ඒ වෙද්දී ඇඟලුම් කර්මාන්තයට වසංගතය පැතිරීම. ලක්ෂ අටක් වන ඇඟලුම් කර්මාන්තයේ සේවක සේවිකාවන් පරීක්ෂණවලට ලක් කළ යුතු වුණා. හැමෝටම පීසීආර් කරන්න වියදම වැඩයි. ඒ නිසායි අපි ඉක්මනින් තීන්දුව ගත්තේ.■
